Ibigala neg surgusmala

BE DAGGE wegi ibmar gunaidi. Edén neg yeerdaglegedgi, Adán, Eva bogwa onolenanai. ¿Be wisi ibigala?

Ar ibmar isgana imasmalad. Ar, aaga Jehová neg yeerdaglegedgi onossunna. ¿Be wisi Adán, Eva bogwa ibu ibmar isgana imasmala?

Babdummad ibmar mer imaggoye sogsadi imasmala. Babdummad wemarga sogsana sabbimar neg yeerdaglegedgi gwismaladi, e sanmar nabir gunmaloye. Auggine, sabbi wargwena gwisbali, adi wemarga sogsa mer we sabbi san dina gunmaloye; gudsamalale, bemar burgwemaloye. Wedina Babdummad gadina. Ar ibmar dule baid gadile ei suedi nuedsulid, ¿nabirsursi? Degidde ¿neg igi gussunna?

Ibagwengi Eva neg yeerdaglegedgi walagwen gudiid gine, nagbe ega sunmasa. ¡Nue be iddogena! Nagbe, Eva gala sogsa we sabbi e san be gunye, Babdummad wemarga sogsadi mer aa sabbi e san bemar gunmaloye. Ar Jehová nagbemar imasgua sunmaggega imassulinad. Degisoggua, dule baid yamo nagbe osunmasad. ¿We dule doagi?

Adán suli. Nabbaneg imagged iduale Jehová dulemar imasa; we dule wargwena gudiinar gebed. Wemar ángelmala, geb aggudaglemala. We ángel na dummarba imasa. Binsaali, ee, Babdummad yobi negseedga guedgi. Geb dulemar eba ibsaed abeali, bur Jehová bali ibsamaladba. We dule nagbe sunmaggega imasa.

We ángel nabir Eva yardagnonigusa. Ega sogsagua be we sabbi san gudsale Babdummad yobi guoye, Eva ese binsaed galesa. Aa gala gudsa, geb Adán anba gudsamoga. Adán, Eva bogwa Babdummad iddossurmala, ar aaga e neggi onolesmala, neg yeerdaglegedgi.

Auggine, ibagwengi Babdummad imagbaloe Nabbaneg yeerdagle guedi, Edén neg yeerdaglegedyob. Sorba anmar daggoe igi be nabir neg yeerdagle imaggedgi arbasmogale. Emisgindi anmar daggoena Adán Eva bogwa igi gusmala.