José e iamarse isdardaglesa

¡BE DAGGE, we massi nue buggibbinsae dagleged, igi gudodibe na wissulid! We massigwa, Joséd. Agga na e iamala, we dulemar Egiptose nadabmalad sega manigi ugnanaid. Aa neggweburgi José emar maiga imaglegoed. ¿Ibigala e iamar, babbi mesamalad, we ibmar isgana imagnanai? Ar José gine nobmaladbali.

We masmala e bab, Jacob, nabbira José binar daena. Agala, ega mor suid yeerdagleged imasa. E iamar anbe merguedi dagsamargua Jacob nabbira José binale, egi nobguarmala geb isdar José daggarmala. Auggine, ibmar baid ulale anba isdar José dagsamarbali.

José, irbo gabdasa. We irbo gabdasadgi, dagsad e iamala e asabbinni dullu gwisgunonidamala. E iamala bur bule isdar José dagsamala, José e gabdasad emarga sogsagu.

Ibagwengi, José iamala e babga sibadmar edarbedimala, geb Jacob, Joséga sogde, be dagnaoye be iamar bule nueganbii gudimardibeye. E iamala daggarmargua José daniggi, abar soggarmala: ‘¡Anmar oburgwe!’ Auggine, bur e ia saglaginedi, Rubénye nugad, adi soge: ‘¡Mer we ibmar imagmala!’. Degsoggu, bur José egwadsamala dia dinna siid yaba. Geb sigwismarsunna, igar amigega igi José imagmalodibeye.

Degiidgi, Ismael dorgana danimala. Judá, e gwenadganga soge: ‘Ismael dorganse anmar manigi ugdo’. Geb deyob imasmala. ¡Mani sibu 20, José ugsamarsunna! ¡Wedi gwen ibmar nued gussuli!

¿Igi e babga emisgi sogmalosunna? Cabra oburgwismala, geb José e mor yeerdaglegedi we abegi dudidudi imasmala. Geb we mola e babse sesmala, degine, sogdabmala: ‘Anmar we amisad. Be daggena, bule José mor surdibe’.

Jacob daggargua, inso aadi, Jacob ogormaggali: ‘Ibmar dula sabburbalid ani José oburgwisar gebed’. José e iamala abemala weyobi e bab binsaedi. Jacob nue wileiddoged. Beedse, banebane bodi guali. Auggine, José burgwissuli. Anmar daggoena igi gude José, neggweburse owarmasgua.