Faraón irbo gabdasad

BIRGABO gude José anba esgaryagi mellesii. Faraónga nog dagged Joségi bar binsassuli. Degiidgi ibagwengi muddiggidba Faraón irbo negburgan dagsa, geb wisgubi guali wemar ibu obare. Be daggena, Faraón gabmaid. Oibosgu, Faraón e nerganse godsa, geb e gabdasadi wemarga sogsa. Auggine, wargwensaar ega sogsa suli ibu negburgan obare.

Emisgi Faraónga nog dagged geb José ebinsaarsunna. Geb Faraónga soge: ‘An esgaryagi mellesigu, dule wargwen aagi mellesimogana, adina nabir soge gabdagged ibu obare’. Degsoggu, Faraón yog José onogale.

Faraón e gabdasadi José gala soggali: ‘War gugle vacamar an dagsa, warburwisuli geb nued daglemala. Degine, war gugle vacamar an dagsabali, adi garagara daglemala, geb garbi daglemala. Geb garagara daglemaladi, wardummagan gudsa.

‘An baid gabdasad gindi, an dagsa ibmar orosgi dagleged, aa sargwengi gugle e durbagan yeerdagleged geb bad nue gores sanmagnanai. Degiidgi, baid sargwengi e durbagan gugle an dagsabali adi dinnadinnagwad, garagaragwad. Geb dinnadinna daglemaladi, nued daglemalad dode’.

José, Faraónga soge: ‘We sogbo be gabdasadi nabo emala. Vacamar gugle wardummagan be dagsadi geb ibmar orosgiid gugle san nue nigga be dagsadi birga guglegid obare, degine, moli bebe niggad ome gugle be dagsadi garagaragwa, geb ibmar orosgiid gugle be dagsadi e san dinnadinnagwa, baid birga guglegid obarbalid. Birga gugle Egipto neggweburgi yeer ibmar sanmaggoe. Degiidgi, birga gugle nagunonibaloe mas adi nue bar sanmaggosuli’.

Degsoggu, José, Faraónga soge: ‘Be amigoe dule wargwen yeer ibmar wisid, geb be onugsaoe birga gugle yeer mas sanmaggoedgi mas onmaggega. Wegiile dulemar uggudba burgosuli birga gugle isgana naguoedgi, ar aagi mas nue nigguosulid’.

Faraón dagsa we binsaed nuedi. Geb José onugsalesa mas onmaggega geb sabogega. Faraón yarbali Egiptogi, José bur dule nugniggadga gunoniggi.

Birga baabag gudgua, geb birga gwengus uggud negdagnaidgi, José daggali massergan daniggi. ¿Be wisi doamala? ¡José iamar 10 mergumaladi! Jacob, wemar baba, wemar barmisa Egipto neggweburse, ar webali Canaán neggweburgi emarga mas galaggudedba. José, e iamala mag yog daggale, auggine, emardi José aggudagmala. ¿Be wisi ibigala? Ar José bad seredgusad geb mor aggardagle yobalid.

José ebinsae massigwaun gabdasgua e iamar e asabin dullu gwisgunonimarye. Be we absosad, ¿be ebinsae? Degsoggu, José magdagge Babdummad sogedba Egiptose noniggi, degine, ibmar nued ulale. ¿Ibu José imas be binsae? Anmar daggoena.