Bonigan 10 mergu

WE GINE sobarnanaid be dagge. Wemargi oyolenanai Jehová, Egipto neggweburgi bonigan onisadi. Gebbedgi be dagge Aarón, Nilo diwar bibyonai suwargi. Geb diwar maidi abega binyisa, degine, uamar we diwargi niggadi bela burgwismala, geb diwar sunnasur yabban gussunna.

Sorbali, Jehová imasa Nilo diwargi noomala agnied. Madu yoed yaba ber oidsomade, madu sobed bormo yagi ber oidsomade, cama yagine oidsomade, bia addagde sogele ber oidsomade. Noomala burgwismargua, Egipto dorgan dunnudunnu urbismala, geb neggwebur sunnasur yabban gussunna.

Aa sorbali, Aarón suwar nabbagi bibyosa geb nabba buru gwi burwigwadga binyisa; we gwimala nunmaggerba dule gunne. We boni sogbaagi gusa.

Bamalad bonigan gindi unnila Egipto dorganbi wilesmala, Israel dulemardi aggar gussuli. Sogbaggegi guggur dummagan agnisa, geb bela Egipto dorgan negyaba guggurmala ubosa. Sogaddar gindi ibmar durganga boni agnismoga. Buggidar vacamala burgwisa geb ovejamar, degine, cabramar Egipto dorgan ibe burgwisa.

Sorbali Moisés, Aarónbo sobur nibali mismala, geb dulemar, degine, ibmar durgan ugga yaayaa guarmala. We boni sognergwagi gusa.

We sorbali Moisés argan niba oyosa, geb Jehová aggwanyob dii gwamaggar owisa, marbali mesa. Weyob bibbisaar dii Egiptogi widisulina.

Sogbaabag gindi, adi sese dummagan agnisbalid. We iduale geb sorbali deyob mergu sese agnidi suli. Bela ibmar digar naid dii gwamaggaled abin burgwissulidi, sesemala ber gudsamala.

Sogbaggebag gindi, negsidsid nagusa. Iba baagwa neggweburgi negsidsid dummad nagusa, auggine Israel dulemar e gudidiid gindi, negsidsid nagussuli.

Nabbi berguedgi, Babdummad e neggweburga sogsa cabra mimmi e abe, cordero e abedibe wagag e bubagi magmaloye. Degiidgi Babdummad ángel Egipto birgi nasa. We ángel daggalile abe magale aa negyagine dule oburgwidsurdae. Auggine abe magar suli daggalirdi, dule massi saglagined oburgwisdae geb ibmar durgan mimmi saglagined oburgwis dabali. We boni soganbegi gusa.

We boni nasad sorbali, Faraón, Israel dulemar barmissunna, ar wemardi bad guaggwa bugmalanad, geb aa muddig yog noarmalad Egiptogi.