Becerroyob or sobaled

¡AGGA be dagge! ¿Ibu emisgi dulemar imagnanai? ¡Becerro e babdummadga na imagnanai! ¿Ibigala we ibmar imagnanai?

Moisés yar birgi undar yoggusgua, neggwebur soggali: ‘Anmar wissulid igi Moisés gusdibe. Ibmar baid anmar sobsunna anmar babdummadga guega geb weg buggwadgi anmar onogega’.

‘Degir nabirdo’, Aarón soge, Moisés e ia. ‘Bela olua yoyoid ungemalo, geb anga sedamalo’. Neggwebur deyob imasgua, Aarón oluamar odalusa geb becerro yobi dagle sobsa. Geb neggwebur soge: ‘¡We anmar Babdummadi, Egiptog anmar onosadi!’ Geb iba dummad onosmala, degine becerro yobi or sobaled na e babdummadga imaggarmala.

Jehová we ibmar daggargua, nue isdar iddoali. Geb Moisésga soge: ‘Gwae agdege. Neggwebur ibmar isgana imagnai. An igar iesmala, degine, becerro yobi or sobaled asabinni sindigar signanai’.

Degsoggu Moisés gwae agdearsunna. Geb iddagga gusgua, weyob ibmar gunai dagnoniggi. ¡Dulemar onamagdemala geb dodonanabali becerroyob or sobaled ebirisa! Moisés nue saeiddoge, degsoggu aggwa maddargwagwad gwabogwad egi babigar narmaggar naidi biggin meddesunna, geb ber goagwar gusa. Degiidgi becerro sobaled gadebin imasa geb bela odalusa. Sorbali ubiubi imasa bur gala imaggedse.

Neggwebur ibmar isgana imasa. Aaulale Moisés abar dulemarga soge espadamar onomarye. Moisés soge: ‘Becerro na e babdummadga imasmaladi oburgwelemaloe’. ¡Degisoggu 3.000 mergu dulemar oburgwilesmala! ¿We oyosur be binsae unnila anmar Jehovásebii goloye, geb ibmar baigan babdummadga anmar imaggedsurye?