Jordán diwar obagmamai

¡BE DAGGE! ¡Israel dulemar Jordán diwar obagmamai! Degidde ¿ibig dii daglesursunna? Ar aa ibagan gindi dii yaisur wida soggua, wemar obagged iduale diwar enamaggar mainad. ¡Ar emidi, ber negdinna! ¡Geb Israel dulemar negdinnagwadgi obagmamai, igi dermar Ginnidgi obagsamala, aa yobi! ¿Bia ber dii nadsunna? Anmar daggoena.

Israel dulemar Jordán diwar obagged ibagan mosgua, Jehová, Josuéga sogsa we ibmar neggweburga be sogoye: ‘Sacerdotemar, Bab igar mesisad ulu naggwa sedmaloe, geb wemar, anmar idumaloe. Wemar Jordán diwargi nag ododmalale, dii galedoe’.

Degsoggu sacerdotemar Bab igar mesisad ulu naggwa sesmala, geb emar idudmala. Jordán diwar owarmasmargua, diwar binnabinna iirmagmasuli geb wila sagla mabali. Sacerdotemar diwarse agdedgua, geb e naga diigi warmagdegu, yog dii galegale. ¡Weyob ibmar gudi sulinad! Jehová diwar naggwale, dii bargasa. ¡Diwar dingussunna!

Sacerdotemar, Bab igar mesisad ulu naggwa semamaidi, diwar dingusad abarse gwisgudabmala. ¿Be dagsa bia wemala sobarnaidgi gwismala? ¡Wegi emar buggwadgi, bela bamalad Israel dulemar dina Jordán diwar obagdemarsunna, negdinnagwadgi!

Belagwable obagsamargua, Jehová, Josué gala soge, massergan 12 mergu yeer gangued nigmaladga be sogye: ‘Diwarse namala bia sacerdotemar Bab igar mesisad ulu ganiggi gwismaladse. Agine aggwa 12 mergu sumalo geb urbemalo bela anmar gaboedgi. Degiile, bemar mimmigan yoogidse egidsarmarsundibe, ibigala we aggwamar we gine bugye, bemar mimmigan gala sogmalo, Babdummad igar mesisad ulu Jordán obagdegua, dii bar iirmagmai gussuli. ¡Emar aggwamar daggarmalale ebinsadamaloe igi diwar dingusa, weyob gudisulinye!’. Josué anba aggwamar 12 mergu birginbirgin urbisbali, sacerdotemar diwar abargi gwissi gusmaladgi.

Josué nabbis sogde, sacerdotemar Bab igar mesisad ulu semamaid, Jordán diwar yagi gwismaladga: ‘Nagmala’. Naggwismargua, gannar dii iirmade.