Dad galesa

JOSÚE be dagge. Soggwissi: ‘¡Dada, mer agbano!’. Geb Dad galesa. Ibagwen dummad nibneggi gales nagusa. ¡Jehová weyob ibmar imasa! Ar anmar daggoena, ibigala Josué abesuli Dad ginnedi.

Eaddar mergu rey Canaán neggwebur ginmaladi Gabaón neggwebur bogwa uluarmargua, Gabaón dorgan dule wargwen barmisa Josuése bendagged egisega. Weyob sogsa: ‘¡Gwae be anmarse dage, anmar bendaggega! Bela reymar yarmarbalid beg arbamalad oiddonanai’.

Josué geb e soldadomar yognaarmala. Muddiggidba iirmadmala geb nadabbi oibosmala. Gabaón owarmasmargua, rey eaddar mergumalad sordagana dobguarmala gebwaggiddemala. Degidgi Jehová imasa nibneggi aggwanyob dii gwamaggaled baddedi, geb Josué soldadomar oburgwisadba bur buggidara burgwismala aggwanyob dii gwamaggaled wisadgi.

Ar Josué dagge bad Dad argwaned owarmasa. Negsibbusur naoe, geb buggidar soldadomar rey eaddar mergumalad gadi waggiddemaloe. Agala Josué, Jehováse godsasunna geb weyob sogsa: ‘¡Dada, mer agbano!’. Geb Dad ganai gusadba Israel dulemar nabir urwed obelosmala, geb naggwismala.

Anba buggidar rey isganagan Canaán neggweburgi mamabali Babdummad neggwebur isdar dagmalad. Josué birga nergwa saar galesa 31 mergu reymar we neggwebur ginmalad ogalagguega. We ibmar imasad sorbali, Josué neggweburmar anba nabba saddemaladga Canaán neggwebur susadi mamarisa.

Birgamar buggib nanasa, degiidgi Josué burgwenonisunna 110 años niggadgi. Josué geb e aimarmar dula gudimargu bela dulemar Jehová sogedba ibsadi gusmala. Geb wemar burgwisgua, dulemar ibmar isgana imaggarmala geb agala negbeedse emarga guali. Emisgindi nue Babdummad e bendagged abemarsunna.