David neg yeer gagalesa

JERUSALÉNGI David negdagmai gualidgi, Jehová, David soldadomar bendagmai guali, bamalad neggweburgi obinmai gumalaga. Jehová iduale sogsa Canaán yar, Israel dorganga e dega uggoye. Emisgindi, Jehová wemar bendasa, bela yar emarga urmaglesad, emargadga guega.

David nued negidumai. Jehová sabe. Aaulale, Jerusalén neggwebur susmargua ibmar soggwen imasa, Bab igar mesisad ulugwa, Jerusalénse sesa. Babdummad sega goled neg sobedgi binsae, we ulugwa aa neg yaba siega.

Undaradgi, dummad David yolenoniggi. David wisi emar ib ibmar suedi nuedsuli. Auggine, ibagwengi e neg niba gudiidgi, urbali addaggargua ome yeerdagleged dagsad. We ome nuga Bat-seba, geb e suidi David soldado, Uríasye nuga.

David belabela Bat-seba binale iddoali, degsoggu imasa e gala e negse we ome sedamalaga. We ome suidi, diggasuli urwenai. David we ome egadga imasa, geb sorba wisgunoniggi ome bonigwar gusa. David nue buggib binsae geb e soldadomar dummad, Joabye nugadga soge, Urías barmide, asabin urwelenaid abargi, Urías burgwega. Geb Urías burgwisgua, David Bat-seba niggusa.

Jehová nue sae David abin iddosa. Geb Jehová barmisa dule wargwen ega arbaedi Natán nugad, Davidga ibmar isgana imasadgi sunmaggega. Be daggena Natán, Davidga sunmaggwissid. David nue buggib binsae ibmar imasadba, degsoggu Jehová, David oburgwissuli. Auggi ega soge: ‘Ar be we ibmar isganamar imas soggua, be neg yagi yeer neggagalenoniggoed’. ¡Inso David yeer nunmagged dummad niggunoniggi!

Gebbegwa, Bat-seba e mimmi burgwenoniggi. Sorba, David massi sagla gined Amnón nugadi, agga na e bun Tamargi agbidsa. Degiidgi, we ibmar wisguargu, David massi Absalón nugad, saeiddoali geb Amnón oburgwisa. Aa sorba, Absalón ibmar imasadba dulemar buggib eba aggasmala geb reyga e imagmaladga imasa. David soldadomar Absalóngi geb Absalón soldadomargi obissamarsunna, geb agine Absalón burgwisa. Inniggigwadgi, David nue gwage nunmagdii gusa.

Bela we ibmar gunagua, Bat-seba goe massi wargwen bagnonibali, onuggusa Salomón. David nue sered gusadgi, geb bonigan egi yolealidgi, e massi Adonías reyga mege soggali. Geb David imassunna, sacerdote Sadoc nugadi, aceite yeer yabbanned Salomón e nonog eyogedi, oyogega Salomón reyga megoedye. We sorbali nabbi isse David gudigusa, geb burgwenoniggi 70 años niggadgi. Reyga negdagmai gusa 40 años. Emisgindi Salomón reyga megnonisunna..