Galu gine ibmar narmaglesad

¿IGI weg emisgi neggunabali? We dulemar iba dummad onobuggwa. Babilonia e rey, miliba mergu dulemar nugnigmaladse godsa, ese dagmalaga. Jerusaléngi, Jehovás goled neg siidgi, noggobemar olobimalad onolesmaladi, geb noggobemar manisibu sobarmaladi, bormomar gobed simaladi, ebunanai. Geb uggiagwale, dule argan noali, geb neggalug e goo ibmar narmaggali. Bela gwaggismala.

Belsasar, Nabucodonosor e wagwa, emisgi reyg mai. Geb binnasur emarse godde, e dulemar ibmar wismaladi ega sedamaloye. Geb rey sogdesunna: ‘Dule nabir we narmaggarnaid absosale, geb anga sogsundibe ibu we obarnai, ibmar buggidar an ega uggoe, bamalad bali bur nugdummad nigguoe negdagmai guega, an yarbali’. Auggi, wargwensaale e ibmar wismaladye sogmaladi, ega gwen absossurmala ibmar galug narmaggar naid, geb ega gwen sogsasurmar bali ibu obarnai.

Rey e nana, ibmar binnasur gole iddoargua, mas gunned negyab dognoniggi. ‘Mer be doggus dobedar iddoge’, reyg soge. ‘Be reinog dule wargwen gudii, aa dule babdummad gwage swilidigmalad wisi. Be dad Nabucodonosor reyg magua, we dule onugsasa, dulemar ibmar wismalad e dummadga. Danielye nuga. We dule be sedager gebe, geb Daniel beg sogoedi ibu we ibmar obare’.

Degsoggu gwae Daniel senonimala. Auggi Daniel soge, ibmar eg uglegoedi abin suosurye. Geb sorba Daniel sogdesunna ibig Jehová, Belsasar e dada reyg negdagmagua ibagwengi obadsa gusa. Daniel soge: ‘Dogdar na dummarba imasad bali, geb Jehová agala odurdassunna’.

‘Ar be wisina igi bela ibmar gusa’, Daniel Belsasarga soge, ‘deginigwale anba Nabucodonosor yobi be na dummarba samogad. Jehovás goled neg yagi noggobemar onolesmalad geb bormomar gobed simalad be sealid; we nogmar be ebusad. Suwar sobarmalad geb aggwa sobarmalad na babdummadga be imasad, geb Babdummad anmar Obinyisad nug gwen be odummossulid. Agala Babdummad we argan barmialid ibmar narmaggega.

Geb Daniel sogdebali: ‘Narmaggar naidi, wegi narmaggale: MENE, MENE, TEKEL, degine, PARSIN’.

‘MENE soglege Babdummad be reino dagmaid ibagana ebidsaye geb ega bergued iba nasisye. TEKEL soglege, nibirgi be wilubdaglesye, geb be daglesye be nuedsuli. PARSIN soglege be reino, medomarga geb persamarga uglegoye’.

Geb anba Daniel sunmaggwissi medomala geb persamala Babiloniag ubononimala. Bela neggwebur susmala geb Belsasar oburgwismala. ¡Degsoggu, neggalug igi ibmar narmaggar nai gusa, agga aa muddiggi deyob ibmar gusa! Auggi Israel dorgandi, ¿igi emisgi gudmosunnoe? Sorba anmar daggoe, auggi anmar bin daggoloe, igi Danieldi gudmoga.