Jesús Getsemanígi

CUARTOYAB buggwa nosmalad sorbali, Jesús e apóstolmar bogwa Getsemaníye neg nugadse nadmala. Iduale balibali we negse nonidamala. Jesús emisgi emarga soge mer gabmaloye, degine, gaddig Babse gormaloye, geb wis bibbi emargi bangusgua, sindigar dullu sigwis Babse godde.

Beedsegi, Jesús gannar e apóstolmarse nonibali. ¿Ibu imagbuggwa dagnoni be binsae? ¡Agga gabbugmalad! Ilabaagwa Jesús emarga sogsad mer gabmaloye, auggi gannar emarse agbirnoniggile, gabmamai dagnonidaed. Nabbi noniggidgi, Jesús emarga soged: ‘¿Bemar gabbugde wegi neggusoggalidgi? An isdarmaladse an uglegoed wadsi owarmasad’.

Degiidgi, dule buggib oimagdaniggi iddollege. ¡Be dagge! ¡Dulemar danimala espada annigga geb suwarmar annigga! Baggagwallu sedanimala negmee imaggega. Iddagga gusmargua, dule buggidarad inbagi dule wargwen noali geb Jesús sega nade. Degiidgi, Jesús wagar usa igi sobarnaidgi be dagge. ¡We dule, Judas Iscariote! ¿Ibigala Jesús ib wagar usa?

Jesús, Judasga soge: ‘Judas, ¿wegi wagar uedgi be an ugnade?’. Nabiri, wagar uedgi ibmar soggwen oyolenai. Dulemar Judasba danimalad emisgi wismala wee Jesús gue, degine, wemardi ar Jesús amidanimalad. Degsoggu, e isdarmaladi Jesús siggi nadmala gamalaga. Auggi Pedro dina, ulussuli Jesús sedmalaga imaggosulid. Espada sedaniggid onosad geb dule e waligsaar gwissid sigded. E uadug nued siggid ei sigsad. Auggi Jesús dina dule uadug ebusad geb gannar ega nudasad.

Jesús emisgi Pedrog soge: ‘Espada be saboge. ¿Ar an Babse geg egis be an ebinsasi, milibali ángelmar barmidaye an bendagmalaga?’. ¡Eye, ar nabir egissaled! Auggine Jesús egissasulid Babdummad sega ángelmar barmidaye, ar wisid wadsi owarmasa e isdarmalad e sedmalaga. Degsoggu, deyob imagmaladga imasad. Emisgi anmar daggoena igi Jesús gudbali..