Damascos nadabgu

¿BE WISI we dule nabbagi maidi, doawa? Saulo. Esteban sarsosmaladga, mor edarbe gwissi gusadi. ¡Emisgi, negmee ganoniggidi be dagge! ¿Igi we neg gudbali?

Esteban burgwisad sorba, Saulo Jesúsba nanamalad nagbi saega aminade. Wemar neg yaba dogsadae, geb wemar onosdae, degine, esgaryag wemar meddedae. Buggidar Jesús sabbingan neggwebur bamaladsig waggidsamala geb agine “ibmar nuegangi” sunmagdii gusmala. Auggine, Saulodi neggwebur bamaladsig nade gusa, Jesúsba nanamalad amigega. Emisgindi Damascose nadabbi. Auggine, igarba ibmar soggwen gunoniggi:

Uggiagwale, nibneggi negmee Saulo ebiris ganoniggi. Geb Saulo nabbagi aglasa, igi wegi anmar dagge. Degiidgi, dule wargwen gole iddolleali: ‘¡Saulo, Saulo! ¿Ibigala be ibgwensur an imagnai?’. Dulemar Saulo bali gudimalad negmee gusad dagsamarmoga geb dule sunmagge iddosmarbali, auggine agguiddomala igi soge.

Geb Saulo egissali: ‘Dummad, ¿be doa sunna?’.

Geb abin gollali: ‘Ani an Jesús, be ibgwensur an imagnaid’. Jesús deyob soge, ibigala ar Saulo, Jesúsba nanamalad ibgwensur imaggalile, Jesús ibgwensur e imagnai yobi iddodae.

Emisgi Saulo egissarsunna: ‘Dummad, ¿ibu an saer gebe?’.

‘Be gwisgue geb Damascose be nao’, ega Jesús soge. ‘Agine bega soglegoed, ibu be imaggoe’. Degiidgi, Saulo gwisgusgua, geb ibya egadgu, bibbisaale ibmar gwen dagsuli. ¡Aggu addagge gusa! Degsoggu, dulemar eba gudimalad yamo argangi sesmarsunna Damascose.

Jesús emisgi, e sabbin wargwenga sunmasa Damascogi, geb ega soge: ‘Gwisgue Ananías. Igar Inniggigwad nugadse be nao. Judas neggi be egisdabbo dule Saulo nugadsig. We dule an susa bamaladbo aggarsagla arbadii guega’.

Ananías, sogedba imasa. Ananías, Saulo daggargua, egi argan mesisa geb sogde: ‘Dummad an barmiali, be gannar nabir addaggega, degine, Bab burba nued be nigguega’. Emisgine yog Saulo ibyagi ibmar ua ugga yobi dagle babaddiali, geb gannar nabir addade.

Saulo dulemar buggidar bamalad neggwebur ginmaladga sunmaggega nued gunoniggi. Apóstol Pabloye bilenoniggi, geb sorba anmar ibmar buggidar we dulesig durdaggoe. Auggine, bina anmar daggoloe Babdummad ibu Pedro imaggega imasa.