Dule dobsur daedi

DULEMAR Nabbaneg gine mergudmargua, bur melu Caín yobi ibmar isgana imasmala. Auggine, dule wargwen dina bamaladbo aggar gusa. We dule nuga, Enoc. Enoc emar ­dobsurdae. Ar dulemar e neg nagaba mamainaddina ber isganabimalana, deginigwale, Enoc dina anba Babdummad gala arbadii gusa.

¿Be wisi ibigala we dulemar ibmar isgana imagdii gusmala? Ebinsao: Adán, Eva bogwa Babdummad soged bali igar imassurmala, geb sabbi san mer gunnoye Babdummad sogsadi gudsamala. ¿Doa imasa weyob damalaga? Ángel isgana. Biblia gine we ángel bilege Nia. Wedina alamagnai bela anmar dulemar isganaga guega.

Ibagwen gine Babdummad Jehová imasa, Enoc, dulemar gala sogedi, ibmar emar iddobisulidi. Emarga wegi sogsa: ‘Ibagwen gine Babdummad bela dule isganamar oberguoe’. Sun saeiddosar iddosmala. Ar sun Enoc oburgwebi gusmalar gusmalana. Aagala, Enoc, emar dobgued abelessuli, we dulemarga Babdummad ibmar imaggoed sogega.

Babdummadi imassuli Enoc undar gudiguedi dulemar isganamar abargine. Unnila 365 años gudigusa. ¿Ibigala anmar soge “unnilagwa 365 años” gudigusye? Ar aa ibagan gine dulemar bur duddusulinad anmar ibagan ginedbali, geb bur undar gudigudamarbalinad. ¡Nabiri; Matusalén, Enoc massi 969 años gudigusa!

Degiidgi, Enoc burgwisad sorbali dulemar agga bur bule isgude. Biblia soge, ‘we dulemar unnila ibmar isgana imaggedginbii binsadimalana’, geb ‘Nabneggi dulemar na sabsur imagdii gusmala’.

¿Be wisi ibigala aa ibagangi doggus negun­darguar gusa? Ar Nia igar baid amisadbali, dulemar ibmar isgana imaggedse imaggega. Anmar daggoena ibu ibmala.