Jacob Haránse nade

¿BE WISI doamarbo Jacob sunmaggwissi? Ibamar nadabbi gusadgi, Jacob wemar abingunoniggi dia nagaba. Na ovejamar edarbedimalad. Jacob wemarse egissa: ‘¿Bemar bialidi?’.

‘Anmar Harán ginmaladi’, abinsogmala.

Jacob egisdebali: ‘¿Mag bemar Labán dagmala?’.

‘Eye’, abinsogmala. ‘Be daggena, e sisgwa Raquel, e bab ovejamar sedaniggid’. ¿Be, Raquel daniggidi dagmoga?

Jacob e gilordi nuga Labán, geb Jacob, Raquel daggargua, Labán ovejamar idudii, nade geb aggwa dia birgi siid onirisa ovejamar nabir dii gobmalaga. Degiidgi, Jacob, Raquel wagar usa geb ega sogsa edi doagi. Raquel yeeriddosa geb e negse nade, degine, e bab Labánga bela ibmar gusad sogsa.

Labán yeeriddosmoga Jacob e negse obunnononigua. Geb Labán yeeriddosbali, Jacob ega sogsagua Raquel niggubiye. Auggine, Jacobga soge, Raquel nigguega birga gugle e nagnugi arbagweler gebye. Ar belabelad Raquel abe soggua, Jacob deyobi imasad. Auggine, na niggumalad iba owarmasgua, ¿be wisi igi ibmar gusa?

Labán, Raquel anar e sisgwa bur dummad, Lea nugadi, Jacobga ugsa. Jacob, Labánbo gannar igar mesisbali baid birga gugle arbabaliga, geb Labán ega Raquel yog uggarbarsunna nigguega. Aa ibagangi Babdummadi basur dagsa massergan buggidar omegan nigguedi. Auggine, emisgindi, Biblia anmar odurdagge unnila ome wargwen niggulegoye.