Job inniggigwad Babdummadba nai

WE DULE ugga biin siidi, ¿be wiledagsuli? We dule nuga Job, geb ome ega sunmaggwissidi, e ome. ¿Be wisi igi Jobga soggwissi? ‘Babgi issaggwa sunmagge geb burgwe’. Anmar daggoena ibig we ome deyob soge, geb ibigala Job weyob wilesii.

Job dule inniggi daedina geb bela Jehová bali ibmar ­sabalina. Neggwebur Uz ­nugad ginedina, we neggwebur dogdar Canaán neggweburgi banbasuli. Jehová nabbiragwad Job sabena, auggine dule wargwen, Job isdar dagged gudibalina. ¿Be wisi doa Job e isdaradina?

Niana. Ebinsao, Nia, ángel isgana, isdar Jehová daggedi. Nia Adán, Eva bogwa, mer Jehovába ibsamalaga imasa, geb binsasbalina bela dulemar Jehovág obanoye, mer eba ibsamalaga. Auggine ¿nabir un deyob imasa? Suli. Be binsaena anmar durdasadgi massergan geb omegan buggidar inniggi Babdummadba nanasmaladsig. ¿Warbigwa mergu be nabir e nugmar sogsale?

Jacob, José bogwa Egiptogi burgwismalad sorbali, Job bur inniggi Jehová bali nai gudigusa bela we Nabbaneggi. Jehová, Nia sega oyoge soggali geg bela dulemar oissoye, geb Jehová ega sogsa: ‘Job be daggena. Inniggigwadba anba naid’.

Nia sogdemogad: ‘We dule inniggigwadba be bali naid, ar be ega ibmar nuegan imagmaid, geb buggidar ibmar nuegan nigbalid. Auggine ei be osulosardi, adi beg issaggwa sunmadeled’.

Degsoggu Jehová ega sogded: ‘Be dagnaena. Ei be ibmar obelonado. Bela be ibmar isgana Jobgi imagbiedi, imagdo. Anmar daggo bule angi issaggwa sunmaggodibe. Auggine mer oburgweddi oburgo’.

Gebbedgi, Nia dulemar Job ibmar durgan addursaeg imasa geb e camellomar, degine e ovejamar bela ei oburgwilesbalid. Geb e mimmigan 10 mergued ei oburgwisbali diburwa dummadgi. Geb sorba Jobgi boni isgana yononibali. Job dummad wilesa. Aaga e ome ega sogsad: ‘Babgi issaggwa sunmagge geb burgwe’. Auggine Job deyob ibmar imassuli. Anba warbaa yamo e aiye sogmalad nonimarmogana, geb ega sogsamala ar be dule isgana gudigusaddeye. Auggi, Job anba inniggigwadba Babba nagusa.

We ibmarba Jehová yeeriddosa, geb sorba Jehová, Jobga ibmar nuegan ugsa, igi weg sobarnai be dagge. Boni ega osulosa. Geb Job mimmigan 10 mergu niggusbalid yeerdaglemalad, geb ibdulamar, ovejamar geb camellomar idualedba ilabogwa wilub mergu niggusbalid.

¿Be Job yobi Jehovába inniggigwadba nanadii gumogoe? Be deyob damogale, Bab ibmar nuegan beg imagmogoe. Be sadegu nabir gudisaoe bela Nabbaneg yeerdagle gunoniggir, Edényob.