Jefté ibmar imaggoye sogsad

¿IBAGWEN gine be sogsa ibmar soggwen imaggoye geb sorba beedse beg gusa imaggega? We dule sobarnaidgi gwissi be daggedi deyob gusad, agala wileiddo dagleged. We dule Jefté, Israelgi juezga maid, geb dule dobed saddedid.

Jefté gudigusa Israel dulemar Jehová bar e Babdummadga sabugsurmalad ibagi. Gannar ibmar isgana sabugmaladgi. Degsoggu Jehová, Amón dorgan wemar oaggaloged bargassuli. Degiidgi Israel dulemar Jehováse goddemala: ‘Anmar beg yolesa. ¡Be anmar bendagge!’.

Dulemar nue wileiddomala ibmar isgana imasmaladba. Gannar Jehová e Babdummadga imasmalad bali, na oyomala nue wileiddomarye. Ar aaga gannar Jehová wemar bendaggarsunna.

Neggwebur Jefté susa Amón dorgan dule isganamaladbo urwenaedga. Jefté belabela abege Jehová e bendagged we urwedgi. Aagala, we ibmar Jehová gala imaggoye soge: ‘Be Amón dorgangi naggwedga an imaggele, an naggwis daniggile, gebe dule an neg yaba nodagoedi an abin daggega, an beg uggoe’.

Jehová iddosa Jefté ega ibmar sogsadi, geb naggwega imasa. Jefté agbirnonigua, ¿be wisi doa dule inso noali Jefté abindaggega? E sisgwa wargwennagwadi. ‘¡Sisgwaye!’, Jefté bodsunna. ‘¡Nunmagged dummad be anga ugnai! Ar an Jehová gala ibmar soggwen imaggoye sogsa, emisgindi an Jehová gala ibmar imaggoye sogsad geg bar imagsuli gue’.

Jefté sisgwa e bab ibmar saoye sogsad wisgunonigua, gebe wileiddosmoga, e babgi banguoedbali geb e aimargi. Auggi, Silógi Jehová tabernáculo siidgi, Jehovága arbadii sered gussunnoe. Degsoggu, e babga soge: ‘Be Jehovága sogsa soggua we ibmar imaggoye, be sogsadba be imagger gebe’.

Degsoggu, Jefté sisgwa Silóse nadsunna, degi Jehová gala arbadii gussunna tabernáculogi. Omegan Israel ginmalad birga irba ibbagge ese addaggabdamala geb degi na buraggwa nuediddobuggwa gusdamala. Dulemar, Jefté sisgwa nue sabmala ar we yaagwade nued, na e Babdummad Jehová gala arbaed.