Dule bur yeer ganguedi

¿BE WISI igi nuga dule bur yeer gangued nigga gudigusadi? Nuga Sansón, we dule juezga megisa. Jehová, Sansónga gangued ugmai gusa. Ar anba Sansón gwaluleged iduale, Jehová, Sansón e nanga weyobi sogsa: ‘Be goe massigwa nigguoe. We, Israel dulemar bendaggoedi Filistea dulemargi naggwega’.

Filistea dulemar Canaángi bugmala, isganamala. Buggidar urwemalad nigmala, degsoggu sabsur Israel dulemar sadamala. Ibagwengi Sansón, Filistea dorgan mamaidsig nadabgua, león dummad egi uurmagdani daggali. Auggi Sansón ibmar baid ebussuli, unnila argan ginbi león oburgwisa. Geb anba Filistea dulemar isgana buggidar oburgwisbali.

Sorba Sansón ome abeali, Dalila nugad. Filistea neggweburgi dummaganga gudidimaladi Dalilaga soggarmala, warwargwengi ega ugmaloye mani sibu 1.100 emarga sogsundibe ibigala Sansón yeer gangue. Daliladi bela we mani abege. Auggine, wedi Sansón aya sunsoged suli geb anba Babdummad e neggwebur aya sunsoged surbali. Degsoggu Dalila egisnai guali Sansónse, ibu ulale yeer gangued nigye.

Degi nabbis, Dalila imasa Sansón eg sogedi e gangued siggi. Sansón soge: ‘Bibbisaar anga sagla sigdisurmala. An gwalulesad aggale Babdummad an susa nazareoga guega, we arbaed bamaladbo aggala. Anga sagla sigsamarsundibe, an gangued niggad surgusale’.

Emisgi Dalila we ibmar iddosgua, imassunna Sansón e nuggugi gabedga. Degiidgi imasa, massered wargwen dogega geb ei sagla siggega. Sansón addaggargua, bad gangued sadde. Degiidgi Filistea dorgan dogsamala, geb Sansón gasmala. Ei ibya gwabobela onosmala, geb e maiga imasmala.

Ibagwengi Filistea dorgan e babdummad Dagónse goleg iba dummad onobugmala, geb Sansón esgaryagi galesiid onosmala egi dodomalaga. We iba gued iduale Sansón sagla gannar sugusbali. Sansón, massi bibbi argangi e semaidga soge: ‘Buwarmargi be an oaggae’. Degiidgi Sansón, Jehováse godsasunnad ega gangued uggega, geb buwarmargi aggassunnad. Geb degi binnasur godded: ‘An Filistea dorganbo burgoe’. We iba gunaidgi, 3.000 mergu Filistea dorgan bugmala, geb Sansón buwarmar barmeddegua, neg ayarissunnad, geb bela dulemar isganamar burgwismalad.