Israel dorgan Babiloniag nodmala

BIRGABO gussaale Babilonia, medomarse geb persamarse sulesad aggale. ¡Emisgi be dagbalina igi neggunabali! Israel dorgan Babiloniag nomamai. ¿Igi nabir onolesmala? ¿Doa emar onosadi?

Ciro emar onosadi, Persia e rey. Diggasur gusa, Ciro gwaluleged iduar, Jehová e gaya berbeged Isaíasga sogsa, weyobi garda narmaggoye we dulesig: ‘Igi be ibmar imagged an abege, aa bali be ibmar imaggo. Wagag beg argaar sigoe, neggweburgi be nabir ubomalaga’. Degine gaggansuli, Ciro Babilonia suedgi emar idusadi. Medomar geb persamar muddiggidba neggweburgi ubosmala, wagag argaar sigwisadba.

Auggine Isaías, Jehová gaya berbegedi, anba sogsabali Ciro igar uggoedye, Jerusalén neggwebur geb Jehovás goled neg sii gusadi, gannar sobmalaga. Degidde, ¿Ciro we igar ugsa? Eye. Israel dorganga weyob sogsa: ‘Jerusalénse namalo, geb agine bemar Babdummad Jehová sega goled neg sobmalo’. Emisgi Israel dorgan we ibmar imaggeg nadabmala.

Auggine, Israel dorgan Babiloniag gudimaladi bergwable geg namala, ar we nanalegoedi yeer sugu nanamaloenad, 800 kilómetros saar. Ar buggidar Israel dorgan bad nue sered gusmalad, nue boni nigmarbalid, namalaga. Degine, ibmar soggwen ulale abar geg namarbali. Auggi, Israel dorgan naosurmaladga, Ciro sogsa: ‘Mani be ugmalo geb olo, degine, ibmar bamalad, Jerusalén sobnamaloedga geb Jehovás goled neg sobnamaloedga’.

Degsoggu, Israel dorgan Jerusalénse namaloedi, ibmar buggidar niggusmala. Degine, anba Ciro ega ugsa gusbali noggobemala geb bormo gobed simaladi, Jehovás goled neg siid yaba onolesmaladi, rey Nabucodonosor Jerusalén obelosgua. Degsoggu, neggwebur ibmar buggidar sesmala.

Nii warbagge gussaled sorba, Israel dorgan Jerusalénse owarmagdabmala, ibamar soglesad balillagwa. Nue inniggigwadgi, 70 años gusa, Jerusalén neggwebur obelolesad aggale, geb neggwebur ollo nagusad aggale. Auggi, Israel dorgan na neggweburse nonimar inigwale, iba bulegan emargi daniggoe. Anmar daggoena igi gudmala.