Jesús reyyob daniggi

DULE wilegan ibya surmalad warbo nudasad sorbali, Jesús neggwebur bibbigwadse nade, Jerusalén waliggagwa. E sabbingan warbogwadga soge: ‘Neggweburse namalo geb asno mimmi addinnai bemar dagdabboed. Esigmalo geb anga sedamalo’.

Ega asno senonimargua, Jesús aa birgi sigisad. Geb aa birgi sii Jerusalénse nade, wedi iddaggasaale nai. Neggwebur owarmagdabgua, dule buggidar abin dagmalad agniali. Buggidar we dulemar na mor unnusmala geb igargi ogidsamala. Bamaladi ogob gagangiid e gagan ogiddemalad, geb binnasur goddemala: ‘¡Rey Jehová nuggi daniggidi, biddiggi Babdummad nued be dagsan gadina!’.

Ebbenne, Israelgi rey binigan nugsalesale, asno mimmi birgi sii dognonidamala Jerusalénse, neggweburse oyolegega. We ibmar Jesús imagnai. Geb we dulemardi na oyonanai, abemarye Jesús e reyg guedi. Auggine Jesús, Babse goled negse nadgu ibmar gusadi, anmarse oyoge belagwable dulemar abesurmala Jesús reyg guedi. Anmar daggoena.

Babse goled neggi Jesús emar nudaggali, dulemar ibya surmaladi geb dulemar abgan burgwarmaladi. Burwigan we ibmar daggarmargu, binnasur oimaggarmalad Jesús nug odummoarmalad. Auggi sacerdotemar isdariddoarmalad, geb Jesúsga sogdemala: ‘¿Ar be iddoge burwigan ibmar sogbugmalad?’.

Jesús abinsogde: ‘Eye. ¿Ar be absodisurmarsi Bibliag soglenaid: “Burwigan gayagi Babdummad na e nug odummogoed?”’. Degsoggu burwigan bogigussulid, Babdummad nuggi rey daniggid e nug odummobuggwa gudmala.

Anmar we burwigan yobi gubimogad, ¿insoa? Abar dulemar sun abemalale anmar Babdummad reinog mer bar sunmaggedi. Auggine anmardi anba sunmagdii gumaloe, Jesús ibmar nuegan emarga imaggoedgi.

Jesús Nabbaneggi gudigusgua, anba yoo aunni owarmagge reyg negdagmai gued iba. ¿San we iba owarmaggoe? E sabbingan wisgubi guarmala. Anmar we igarsig emisgi durdaggoe.