Lección 2
¿Doagi Bab Dummad?
¿Doa Bab Dummad napiragwadi, geb igi nuga? (1, 2)
¿San igiidi nika? (3)
¿Bitimar bur e daed biriginmaladsunna? (4)
¿Babse gole gala akwa sobaled anmar ebugoe geb ibmar sobarmaladi? (5)
¿Ibu ibmar sogbogwad gine anmar nabir durdaksale Bab Dummad siki? (6)
1. Dulemar ibmar bukidara na e bab dummad gala imakmala. Biblia dina anmar gala soge Bab Dummad NAPIRAGWAD, unnila wargwennaye. Belagwable ibmar obinnisa nibneg gine geb Napaneg gine, geb ar nabir dula gudii anmar imaksabar soggua, unnila wesebii anmar goled abelege. (1 Corintios 8:5, 6; Revelación [Apocalipsis] 4:11, Bab Dummad Jesucristoba Igar Mesisad Garda.)
2. Bab Dummad akar akar nugsalege inigwale, nug sunsogedi soggwenna nika: JEHOVÁ. Bibliamar bukidar gine Bab Dummad nuga elilesa, geb aa muchup unnila narmaksadamala, Dummad o Bab Dummad. Degi inigwale, Biblia gebe narmaklesgu dina, Jehová nuga egi narmakar naina mili gugle wilup (7,000). (Éxodo 3:15; Salmo 83:18; Lucas 1:16, Bab Dummad Jesucristoba Igar Mesisad Garda.)
3. Jehová san nikmoga, aukine anmar sangiid suli. Biblia soge: “Bab Dummad, burbaled”. (Juan 4:24, Bab Dummad Jesucristoba Igar Mesisad Garda.) Dule burbaledi anmar gine ise obinale. Dule wargwensaale Bab Dummad dakdisuli. Jehová nibneg gine mai inigwale belagwable ibmar dakmai. (Salmo 11:4, 5; Juan 1:18.) ¿Geb Bab burba swilidikid dina, ibusunna? Adina, dule suli, Bab Dummadgiid suli. Bab Dummad gangued e ibmar abeged imaked gine ebulegedi obare. (Salmo 104:30.)
4. Biblia anmar sega oyoge Jehová dule igi daedi. Soge, e daed bur biriginmaladi guye sabgued, ibmar innikigwad saed, binsaed ibedi geb gangued nikadi. (Deuteronomio 32:4; Job 12:13; Isaías 40:26; 1 Juan 4:8.) Amba sogbali dule wile emar dakedi, nued daedi, dule isgusale nabir ega eliedi, wissur nalleguedi geb gwae gwae ibmar abegedsurbali. Anmar e mimmigan eba ibsamalad soggua, anmar aa yobi damogar gebed. (Efesios 5:1, 2.)
5. ¿Akwa sobaled asabinni, o suar sobarmalad dibe, Cristo wagarwilup dibe, María wagarwilup dibe o dule bamalad wagarwilup asabinni, anmar sindigar sigoe geb ese goloe? Suli. (Éxodo 20:4, 5.) Jehová soge unnila anmar esebii goloye. E nug odummolegedi obanosuli dule baid gala o ibmar baidgar dibe. Degine, ibmar sobarmalad dina gangued sate anmar bendakega. (Salmo 115:4-8; Isaías 42:8.)
6. ¿Igi anmar, Bab Dummad bur nue mag dake gusale? E ibmar obinnisad daked gine, geb nue itoakwa binsaed gine we ibmarmala ibu anmar gala Bab Dummad siki sognai. Ibmar obinnisad gine anmar sega oyolege, yeer gangued nika geb yeer binsaed nika. Bela ibmar imaksad gine anmar sega na oyoge sabed nika. (Salmo 19:1-6; Romanos 1:20, Bab Dummad Jesucristoba Igar Mesisad Garda.) Anmar Biblia durdaked gine nabir Bab Dummad siki ibmar wisgubali. Biblia gine bur nue anmar gala soglenai Bab Dummad dule igi daedi. Amba anmar gala soglenabali, ibu ibmar imaked gine binsamai geb ibu imaked anmar abege. (Amós 3:7; 2 Timoteo 3:16, 17.)
[Picture on page 5]
Ibmar obinnilegaled gine geb Biblia gine anmar nabir durdake Bab Dummad siki