Lección 3

¿Doagi Jesucristo?

¿Ibigala Jesús onugsalege Bab Dummad Machi “gebesailagined”? (1)

¿Ibigala onugsalege “Gaya Burba”? (1)

¿Ibigala Jesús Napaneg sega noniki dule Napaneg gined yobi? (2-4)

¿Ibigala ibmar nuegan dule bamalad geg imakedi imaksa? (5)

¿Ibu Jesús imakoe yoogi neg itaka gudanikid gine? (6)

1. Napanegse daged iduale, Jesús nibneg gine gudiina, dule burbaledina. Bab Dummad we insogi imaksa; aa gala Jesús onugsalege Bab Dummad Machi “gebesailagined”. (Colosenses 1:​15; Revelación 3:14.) Bab Dummadi unnila Jesúsbi obinnisgusa e wargwen gine, dule baid ebo arbassuli. Jehová, Jesús ebusbali nibneg gine gudigua e “bendaked” gala, belagwable ibmar bamalad obinyenagua nibneg gine geb Napaneg gine. (Proverbios 8:​22-31; Colosenses 1:​16, 17, Bab Dummad Jesucristoba Igar Mesisad Garda.) Bab Dummad amba ebusbali e argar dummad gala arbaega. We ulale Jesús onugsalege “Gaya Burba”. (⁠Juan 1:​1-3; Revelación 19:13.)

2. Bab Dummadi, na e Machi barmiali Napaneg sega, geb María e nan gala gunoniki. Degisoggua Jesús bab sanaledi nikussuli; aa gala isguedi ese gwagsa suli. Bab Dummadi, Jesús barmiali Napaneg sega, igar sogbaagwad ulale: 1) anmar odurdake gala ibmar napiragwad gine Bab Dummad siki (Juan 18:37), 2) Bab igar bali bela belad nai na oyoge gala, geb anmar deyob imakmogaga (1 Pedro 2:​21, Bab Dummad Jesucristoba Igar Mesisad Garda) geb 3) na e san uke gala, isgued gine geb burgwed gine nabir anmar onolegega. ¿Ibigala Jesús na e san uked abelesa? (⁠Mateo 20:⁠28.)

3. Adán dule gebe obinnilesadi, Bab Dummad bali ibsassurgua imaknoni gusa, Biblia onugsaedi “isgued”. Degisoggua Bab Dummad we dule urmaksasunna, burgwedga. (Génesis 3:​17-19.) Gege Bab Dummad igar bali nanagussoggua, dule isgued gala gussuna. Binna binna seredgumai gude, geb napis degi burgwenonisunna. Adán, bela e mimmigan sega isgued ogwasa. Aa gala anmar seredgumoga, uelemoga geb burgwemoga. ¿Igi nabir bela dulemar bendaklesale? (⁠Romanos 3:23; 5:⁠12, Bab Dummad Jesucristoba Igar Mesisad Garda.)

4. Jesús, isgued sate Napaneg gine gudigusa, Adán igi isgued sate gudigusmoga. Aukine Jesús dina Adán yobi gussuli; e dina belagwable Bab Dummad soged bali ibmar imaksa, amba dummad wilupdaklesa inigwale. Degisoggua na e san isgued sated we Napaneg gine nika gusadi, nabir uke gusa Adán isgusad bennukega. Biblia we ibmar imaklesadi onugsae “abonoleged”. Weyobi Adán mimmigana burgwed gine nabir onolege guoe. Belagwable dulemar Jesús gine bensulid nikmaladi, isgunonisundibe, nabir ega ielegoe geb sadegu gudigued nabir nikubaloe. (⁠1 Timoteo 2:​5, 6; Juan 3:⁠16; Romanos 5:​18, 19.)

5. Jesús Napaneg gine gudigusgua, uelemalad nudaksa, ukurba itomalad oimmeres bali geb burwa dummagana bogi imaksa bali. Burgwarmaladse bakale odulosa. ¿Ibigala ibmar nuegan dule bamalad geg imakedi imaksa? 1) Dulemar wiledimalad wile daked bali geb bendakbied bali. 2) Ibmar nuegan dule bamalad geg imakedi imaksad gine oyolesa Bab Dummad Machi gue. 3) Amba oyolesbali Napaneg Rei gala arbade sogele, ibu ibmarmala imakoe dulemar eba ibsamaladga. (⁠Mateo 14:14; Marcos 2:​10-​12; Juan 5:​28, 29.)

6. Jesús burgwisgua, Bab Dummadi gannar odulosa geb dule burbaled gala imaksa; degi nibneg sega gannar nade. (1 Pedro 3:18.) Sorbali Bab Dummadi, Rei gala imaksa. Iche napi, Jesús, bela ibmar isgana obelogoe geb wile itogedi osulobaloe we Napaneggi.​(⁠Salmo 37:​9-11; Proverbios 2:​21, 22.)

[Pictures on page 7]

Babga arbadii gusgua, Jesús emar odurdaksa, ibmar nuegan dule bamalad geg imakedi imaksa geb anmar ulale na e san uksa bali