Lección 5
¿Igi Napaneg imaked gine Bab Dummad binsae?
¿Ibigala Jehová Napaneg obinnisa? (1, 2)
¿Ibigala emisgwa gine Napaneg neg yeer dakleged suli? (3)
¿Igi imaklemaloe dule isganamar? (4)
¿Ibu Jesús yoogid sega imakoe dulemar bonigan nikmalad gala? ¿seredgusmalad gala?, ¿burgwismalad gala? (5, 6)
¿Ibu be saer gebe ibmar nuegan danikoed be nikumoga gala? (7)
1. Jehová we Napaneg obinnisa dulemar na sadegu egi yeer itodii gumalaga. Abesana dule nuegana geb gwage weligwar itomaladi egi bukwagu guedi, na sadegu. (Salmo 115:16; Isaías 45:18.) Napaneg obelolego suli; na sadegu nai guoe. (Salmo 104:5; Eclesiastés 1:4.)
2. Dule obinyed iduale, Bab Dummadi nagnu soggwen bipisaar Napaneg gine nasisa, geb neg yeer dakleged gala imaksa. Geb onugsasa “Edén”. Aa gine ogwisgunoniki machered geb ome gebe obinnilesmalad: Adán, degine, Eva. Bab Dummad abesa we dulemala mimmigan nikuedi geb bela Napaneg gine dule ambakuedi. Binna binna Napaneg belagwable neg yeer dakleged gala imakmaloena. (Génesis 1:28; 2:8, 15.)
3. Adán, Eva bogwa Bab igar gine yolesmala, ar nue Bab igar wismala inigwale eba ibsassurmala. Aa ulale, Jehová we dulemala Edén gine onosa, geb neg yeer dakleged yokunoniki. (Génesis 3:1-6, 23.) Aukine Jehová amba ebinsae, ibiga Napaneg imaksa gusa. Soge gakansurye, neg yeer dakleged gala obinyoye, geb na sadegu egi dulemar ambakued imakoye. ¿Igi nabir we imakoe? (Salmo 37:29.)
4. We Napaneg neg yeer dakleged gala gued iduale, dulemar ibmar isgana imakmaladi osulolegweloe. (Salmo 37:38.) We ibmar gunonikoe Armagedón gine, Bab Dummad urwed dummad onogoed iba gine, neg isgusnaid obeloega. Sorbali, Nia gugmakar galesii guoe birga miligwena, dule isganamala wargwensaale bar gudiguosuli neg oichogega. Unnilagwa Bab Dummad e neggweburbii sabgulegoe. (Revelación 16:14, 16; 20:1-3.)
5. Geb degiid gine Jesucristo Napaneg e rei gala gunonikoe birga miligwenadba. (Revelación 20:6.) Geb anmar binsaed gine geb anmar san gine ibmar isgana binargued naidi, binna binna obelomai guoe. Anmar gunonikoe dulemar isgued satedga, igi Adán Eva bogwa isgued sate gusmarmoga isgued iduale. Geb degiid gine bar bonigana nikuosuli, seredgued geb burgwed amba deyobba. Bonigwarmaladi nugumaloe geb sergan dina gannar nuchukwa gumaloe. (Job 33:25; Isaías 33:24; Revelación [Apocalipsis] 21:3, 4, Bab Dummad Jesucristoba Igar Mesisad Garda.)
6. Jesús Birga Miligwena Rei Gala Megoed gine, dulemar nue innikigwadba Bab bali nanaidi, arbamaloe bela Napaneg neg yeer dakleged gala imakedgi. (Lucas 23:43.) Degine, miyon bali burgwarmalad gannar durgumaloe geb gannar gudigumaloe Napaneggi. (Hechos 24:15, Bab Dummad Jesucristoba Igar Mesisad Garda.) We dulemala Bab Dummad ibmar abeged bali damalale, na sadegu gudigumaloe Napaneggi. Sulir dina, na sadegu obelolemaloe. (Juan 5:28, 29; Revelación 20:11-15.)
7. Wegii nabir Napaneg gunonikoe Bab Dummad gebeunni igi gued abesana. ¿Be dakbimoga we ibmar nuegan danikoedi? Degiir dina, be durdaknai saer gebe Jehová siki, geb e igarmar mamaid bali be gudigubalir gebe. Be neggwebur gine Jehová gine sunmakmalad Igar Itoged Neg siid sega be nanaele, wee be bendakoe be nabir we ibmar nuegan danikoedi be dakmogaga. (Isaías 11:9; Hebreos 10:24, 25, Bab Dummad Jesucristoba Igar Mesisad Garda.)
[Picture on page 10]
Neg yeer dakleged yokusad
[Pictures on page 11]
Armagedón sorbali, Napaneg neg yeer dakleged gala gunonikoe