Lección 6

¿Ibua Bab Dummad e Reino?

¿Bia Bab Dummad e Reino sii? (1) ¿Doa degite Reisunna? (2)

¿Dule bamalad Rei bogwa neg iduged gine arbamaloe? Degisundibe, ¿dule warbigwa? (3)

¿Ibu anmarse oyoge neg dukumosad gine anmar gudimarye? (4)

Yoogid sega, Bab Dummad e Reino ¿ibu dulemar gala imakoe? (5-7)

1. Jesús Napaneg gine gudigusgua, na e sapingan odurdaksa Bab Dummad sega gollalile egismaloye Bab Dummad e Reino dagedi. Reinoye soglege, neggwebur soggwen gine dummad rei gala neg dakmaile. Bab Dummad e Reino dina baigan gobiernomar bogwa akala geb bur nuedi. Nibneg gine sii geb Napaneg idugoe. Bab Dummad nug swilidiki obariledii imakoe. Igi nibneg gine Bab Dummad sogedba ibmar imaklemai, deyob we Napaneggi ibmar imakmogoe. (⁠Mateo 6:​9, 10.)

2. Bab Dummad sogsa, E Reino gine Jesús Rei gala sigoedye. (Lucas 1:​30-33.) Jesús Napaneg gine gudigusgua, na oyosa Neg Iduged nued guoye, ibmar innikigwad saoye geb dule isgued sated guoye. Nibneg sega gannar nadgua, abga Bab Dummad Reino gine Rei gala sigissuli. (Hebreos 10:​12, 13.) 1914 gine Jehová, Jesúsga gangued uksa, ar igi iduale ega sogsa. Aa dakale, nibneg gine Jesús neg idumai, ar Jehová na Rei gala onugsassoggua. (⁠Daniel 7:​13, 14.)

3. Jehová amba egwasbali Napaneg gine abar machergana geb omegana e bali innikigwad bali nai gudimaladi nibneg sega namala gala. We dulemala, bela dulemar gudigumaloed iduged gala gumarmogoe, Jesús yalabali sigmarmogoe reimarga, dulemarga igar nabogedga, degine, Bab igar gine emar idumaladga. (Lucas 22:​28-30; Revelación 5:​9, 10.) We dulemala ebo neg iduged gine e Reino gine arbamaloedi, Jesús onugsasa “sibad ichegwad”. Mergumala 144.000 (mili dulataled ilagwen gakadulabo gakabake). (⁠Lucas 12:32; Revelación 14:​1-3.)

4. Jesús Rei gala sigisgua, abgayala nibneg gine Nia onosbinne imaksa e angermar isganamar burakwagwa, geb Napaneg sega wemar barmetelesmala. Aulale 1914 dakale Napaneg gine neg bur bule isgumagusa. (Revelación 12:​9, 12.) Neggweburmar nabo abin abin urwemaladi, ukumesedi, bonigan dule bukib ibloedi, ibmar isgana mergumaidi . . . , belagwable we ibmala “oyoged” gala gue, Jesús neg idumagusye geb neg isgunaid e ibagana berguedmosye. (Mateo 24:​3, 7, 8, 12; Lucas 21:10, 11; 2 Timoteo 3:​1-5.)

5. Iche napi Jesús dulemar gala igar nabogoe, geb bachik bachik urboe igi sibad akwed bachik bachik urbe sibad wawaad geb sibad absar sulid gine. “Sibad-wawaad” yobi dakoe, dulemar eba nue nai na oyosmaladi, geb na sadegu Napaneg gine gudigumalad gala imakoe. Dulemar Bab Dummad e Reino abin obachamalad dina “sibad-absar-sulid” yobi gumaloe. (Mateo 25:​31-34, 46, Bab Dummad Jesucristoba Igar Mesisad Garda.) Iche napi, yoogid sega, Jesús belagwable obelogoe dulemar sibad absar sulid yobi gumaladi. (2 Tesalonicenses 1:​6-9.) Be Jesús “sibad-wawaad” soggwen gala gubiele, Bab Dummad e Reino igar maidi be itoger gebe geb ibmar durdakmaid bali be dabalir gebe. (⁠Mateo 24:14.)

6. Napaneg mamaris nai neggwebur baid baid gine geb na warwargwen e neg iduged nikmarbali. Neggweburmar nabo urwedbi dakdidii. Aukine Bab Dummad e Reino bela dulemar gobiernomar anale signonikoe. Geb webi unnila wargwenna bela Napaneg iduged gala guoe. (Daniel 2:44.) Geb bar nikuosuli neggweburmar nabo abin abin urwemaladi, igar mamaid bali dasurmaladi, geb sabsur emar imakedi. Belagwable dulemar burakwa gudiguoe neg boogwad gine na wargwenna yobi. (⁠Miqueas 4:​3, 4.)

7. Jesús Miligwen Neg Dakmai Guoed gine, dulemar nue innikigwad bali Bab bali gudigusmaladi, isgued sated gala gumaloe. Geb belagwable Napaneg gunonikoe neg yeer daklegedga. Birga miligwenad bergued mosale, Jesús bela imaksabinnoe Bab Dummad ibu ibmar imaked abesana. Geb degine e Bab gala Reino na ukoe. (1 Corintios 15:​24.) ¿Ibigala geg be sogmosunna be aimar gala geb be gwenadgan gala, Bab Dummad e Reino ibmar imaknonikoedi?

[Picture on page 13]

Jesús neg idugoed gine, bar nikuosuli na istar dakmaladi geb na edulesulid bali istar dakmaladi