Noar Babigar Odurdagmaladba Mer Anmar Nague

Satanás geb e ángel isganamala abesurmala anmar Babdummad gala arbaedi. Wemar alamagnanai Babdummad gine bur melu dulemar obaned gine. ¿Ibu ebumarsunna we ibmar imaggegala? Ibmar soggwen we ibmar imaggegala ebumaladi, adi noar babigar odurdagmaladi (2 Corintios 11:13-15). Babigargi emar odurdagmalad Biblia gine ibmar naid odurdagsulile, we sogledo noar babigar odurdagmarye. Noar babigar odurdagmaladi mani isgana yobi gue: sun mani nued yobi daglegele, auggine mani gala gusulile. Ugginbali, negbeedsegid anmar gala ugbaloe.

Noar babigar odurdagmalad Jehová dina geg nued dagge, ar e dina Babdummad ibmar nabbiragwad imaggedid. Jesús Nabbaneggi gudigusgua, babigar gine emar idudii gusmaladi Jesús oburgwebi gusmala. We dulemar dina binsamalana Bab sega inniggigwad bali gordimarye. Geb sogdamala: “Anmar Bab wargwenna nigga, Babdummadi”. Auggine ¿igi Jesús dina sogsa, nabirye sogsa? Suli. Jesús emar abin weyob sogsa: “Ar bemar bab gine bemar dina daniggid, ar Nia bemar babad” (Juan 8:41, 44, NM). Buggidar dulemar emi iba gine binsamala Babdummad gala arbamarye, deginigwale Satanás gala bur arbananaile geb e ángel isganamaladgala (1 Corintios 10:20).

Igi sabbi isgana durba nued sanmagsuli, aa yobi noar babigar odurdagmaladi dulemar ibmar isgana samaladi onisii. Dulemar ibmar isgana imagged ulale yeer negisgusnai. Galagwensur daedi yaisurgusa, nabo urwemalad yaisurgusa, addursaed yaisurgusbali, emar oburgwemalad yaisurgusa geb emar abgangi dodomaladi yaisurgusbali. Buggidar dulemar we ibmar imagmaladi babigarba naye sogmarmogana, deginigwale we dulemarga soglesuli ibmar nuegan imagmarye. Ar we dulemala ibmar isgana imagged indagsurmalale geg Babdummad e ai gala gumala (Mateo 7:17, 18).

Noar babigar odurdagmalad emar odurdagge ibmar sobarmalad bogwa nabir sunmagleye. Babdummad anmar gala soge mer ibmar sobarmalad bogwa sunmagmaloye. Ar nabir soge iddollege. ¿Anmar igi iddogersunna dule wargwen anmar bogwa sunmagsulile, auggine anmar wagar wilubbodina sunmaggele? ¿Nabir we dule anmar ai gala gusale? Suli, geg gue. Jehová abege dulemala e bogwa sunmagmaladi, ibmar sobarmalad o wagar wilub burgwar naidbo suli (Éxodo 20:4, 5).

Noar babigar odurdagmalad emar odurdagge neggweburmar nabo abinabin urwenasundibe, aa gindina nabir dule bamalad oburgweleye. Jesús sogsa Babdummad aimala na mudsubmudsub sabgumaloye. Anmar dule wargwen sabele anmar oburgosulid ¿insoa? (Juan 13:35.) Dule isganamar oburgwedi anba nued gusurbali. E isdarmalad Jesús ganadmargua, Jesús imagsa suli e sabbingana urwemaladi, e bendagmalagala (Mateo 26:51, 52).

Noar babigar odurdagmalad emar odurdagge dule isganagan soo gwabunyegwissid gine odurdaglemaloye. Deginigwale, Biblia dina odurdagge isguedi burgwed sega anmar semaye (Romanos 6:23). Babdummad Jehová sabed niggadi. Babdummad nue sabed nigsundibe, ¿na sadegu emar soo gine odurdagsar be binsae? Suli, geg deyob imagge. Neg Yeerdagle guoedgindina unnilagwa babigar soggwen niggulegoe, biddi e igar sunsogedye Jehová soge aa bii (Apocalipsis 15:4). Bela noar babigar odurdagmalad Nia gaggan saed bali emar odurdagmaladdina, bergumaloe.