Josías, aimar nuegan niggusad

¿Beedsedibe Jehová sogedba ibmar imaggega?... Dulemardi binsadaed beedseye Jehovába ibmar imaggega. Bibliagindi soglenaid, beedsesurye. Bibliagi soglenaid, massigwa Josías alamasye Jehová sogedba ibmar imaggega. Aimar nuegan amisadbali Josías nabir Jehová sogedba ibmar imasad. Anmar durdaggoena, Josías ibu ibmar imasa, geb doamar e aimarga gusbali.

Josías, Amón massinad. Amón, Judági reyga mai gusad. Amón, dule isgananad, nussumar na e babdummadyob imagdii gusad. Josías, e bab burgwisgu Judági reyga megisad. Aa unni birga baabag nigganad. ¿Josías e babyob, dule isgana gusmodibe?... Suli, dule isgana gussulid.

Bad bibbigwa unni Jehová sogedba igar imagbi gualid. Aaga Jehová sordagan e aimarga imasad. E aimala, Josías bendasmalad ibmar nuegan imaggega. ¿Doamar Josías aimalansunna?

Sofonías, Josías ai nuedinad. Sofonías, Judá neggweburgi dulemarga sogdii gusad, bemar nussumar babdummadyob imagged indagsurmalale, bemar oiddollemaloye. Josíasdi Sofoníasba igar imasad, nussumar na e babdummadyob imassulid, bur Jehová na e Babdummadga imasad.

Jeremías, Josías aiga gusmogad, geb na unnisaar dungumarbalinad; dunguarmargua na gi iddagga mamainad. Jeremías, Josíasbo na mudsub mudsub bendagdidii gusmalad Jehová sogedba igar imagdiidi gumalaga. Na ayamar nueganansoggua, Josías burgwisgua Jeremías wile iddogedbali Josíasga namagged soggwen narmasad.

¿Ibu ibmargi Josías, be odurdasa?... Anba massi bibbigwa unni bad Jehová sogedba ibmar imaggedgi binsaalid. Nue wisinad Jehová sordagan e aimarga imagged abelege. Be Jehovága arbabimosoggua, nue abelemogad be Jehovága arbamalad be aimarga imagmogad.