Jesús, e serganba igar imagdii gusad

¿Ibigwensur bega gusdae, be, be serganba igar imaggega?... Inbaggwa beedse guardaed. ¿Be wisina Jesúsdi Jehovába ibmar imagdii gusad, geb e serganba ibmar imagdii gusbalid?... Anmar durdaggoena, igi Jesús nabir e serganba ibmar imagdii gusa.

Nabbanegse daged iduale, Jesús, e Bab Jehová waliggi nibneggi gudiinad. Jesús nabbaneggi gudigusgua babgan nigga gudigusbalid. E bab nuganad, José; e nandina, María. Be wisgubie, ¿igi wemar Jesús e serganga gunonimala?...

Jesús nibneggi Jehová walig gudiinad. Nabir Jesús nabbaneggi gwalulega Jehová imasad, María bonigwar guega. ¡Weyob ibmar gudisulinsoggua, geger iddolleged! Igi goegan niwarbaggebaggi gwalulege, deyobi Jesús niwarbaggebaggi gwalulesmogad. Weyobi María, Josébo, Jesús serganga gunonimalad.

Jesús birga anbe gagga bo nigga unni ibmar soggwen imasadbali mag daglesad gadi na e Bab Jehová binale. Aa unni Jesús e serganmala Jerusalénse Pascua iba onodidiinad. Gannar negse armarbargua, e sergan igarba Jesús amiarmalad, Jesús sadde daggarmalad. ¿Ibu José, Maríabo imasmardibe?...

Gwae gwae María, Josébo gannar Jerusalénse abarmagnonimalad, Jesús bin miamagdidii guarmalad. Jesús amisur guarmargua buggib binsaarmalad. Ibabbagine geb amidabmalad, templogi sii daggarmalad. Be wisi ¿ibiga Jesús templogi siina?... Ar aagi e Bab Jehová igar durdaglegenad. Gadi Jehová igar binalensoggua, durdagbi gualid, igi nabir Jehovába igar imasale. Anba inbaggwa ega beedse gusdamo inigwale Jesúsdi, Jehová sogedba igar imagdii gusad. ¿Jesús, Joséba, geb Maríaba igar imagdii gusbardibe?... Eye. Bibliagi deyob soglenaid.

¿Ibu ibmargi Jesús, be odurdasa?... Anba bega beedse gudamogo inigwale, be, be serganba igar imagged abelemogad. ¿Be, be serganba igar imagmogoe?...