Bab Reino bela nabbaneg idusii guoed

Reino soggwen bela nabbaneg idumai gusoggalid. ¿Be wisgubie, doa reino bela nabbaneg idugoedi?... Eye, Bab Reino. We Reino bela nabbaneg yeer dagle imaggoed. ¿Be nabbi we Reino igar durdagbimoga?...

¿Be wisi, ibu reymar imagdamala? Reymala, Reinogi dummadga neg dagmamadaed. Bab Reino na rey nigmogad, ¿Be wisi doawa?... Jesucristo. Jesucristo, Bab neggi maid, undar nabsulid bela nabbaneg idumai guega. Jesús nabbaneg idudele, ¿bela anmar yeer iddodii gudodibe?...

¡Bela anmar yeer iddodii gudoed! Nabbaneg yeer dagle gusale, bar dulemar urwedii guosurmalad, guerramar bar noosurbalid. Bar dulemar uwelegosurmalad, bar burgosurmarbalid. Ibya surmalad, nugumaloed; uaya saddemalad, nugumarmogoed; geg nanamalad, nabir abarmagge gumaloed. Dule wargwensaar mas sadde gudiguosulid. Ibmar durgan na aggar imaggosurmarmogad, anmar nabir ibmar durganbo dodoge gubaloed. Dulemar burgwismalad gannar durgudamarmogoed. Degsoggu, Rebeca, Rahab, David, Elías, wemala gannar durgudamarmogoed. ¿Be we dulemar dagbimoga?...

Jehová wile be dagged, abeged be yeer iddodii gued. Degsoggu, Jehová igar durdaggo, geb eba igar imagbalo, degiile be yoogidse nabbaneg yeer daglegedgi sadegu gudiguoed. ¿Be nabbaneg yeer daglegedgi gudigubimoga?...