¿Be, Jehovági sunmagmalad dagdimoga? Sun abar be neggweburgi gudidimalad, bebo arbadibe, bebo escuelagi nadibe. Sun bad Biblia igargi bega sunmagdidimalad. ¿Nue ibugine arbamarsunna? ¿Ibiga dulemarga Bab igargi sunmagdamala?

Anmar, dulemar bamaladbo aggarsulid. Anmar abargi massergan gudidiid, omegan gudidimarmogad; abar mani nigmalad, abar dogdar mani nigsurmarbalid. Jehovági sunmaggedga gued iduale anmar abar iglesia soggwenba namoganad; abar anmar binsadabalinad Babdummad masurye. Jehovági sunmaggedga gued iduale anmar bin durdasgweled, igi Bibliagi nue ibmar soglenanai (Gusmalad 17:11). Anmar dagsagu Biblia sogedba anmar odurdaglenai, anmar, Jehovága sogsamogad, an bega arbamogoye.

Biblia durdagged anmar bendagged. Dulemar bamaladyob inbaggwa anmar noar ibmar imaddamarmogad, inbaggwa anmarga neg beedse guardabalid. Auggi Biblia sogedba anmardi igar imagdisoggua, nabir anmar bur nued gudisunnad (Salmo 128:1, 2). Aaga anmar emarga sogdaed Biblia sogedba igar imaggedi, bur igar nuedye.

Babdummad sogedba anmar igar imagged. Bab sogedba igar imagdiidbali anmar nued gudiid. Anmar ibgwensur dulemar imagsulid, anmar emar yardaggedgi arbadisulid, geb anmar emar sabsur imagdisurbalid. Neggweburmargi anmar nued gudibalid, anmar wie wie arbasurbalid, anmar neguyagi urwed amidisurbalid, geb anmar galagwensur gudisurbalid. Anmar nue wisid “Babdummad bela dulemar nue emarbi dagge”, aagala anmar bela neg dirbimaggar buraggwa arbabugmalad, ar bela anmargardi dulemar emarbiid, geb política igarba anmardi aggasurmarbalid. Anmar emarbo aggarsur inigwale, auggi anmarbii unnila weyob ibmar imagbuggwad (Gusmalad 4:13; 10:34, 35).

• ¿Ibigala Jehovági sunmagmalad dulemar bamaladbo aggarsuli?

• ¿Ibu igar nuegan anmar Bibliagi durdasa?

Buggidar dulemar binsadamalad Jehovági sunmagmalad emisgwa noarmarye. Auggi bad 2.700 años gusad Bibliagi Babdummadga arbamalad bilenaid, Jehovági “sunmagmalad” (Isaías 43:10-12, NM). Ebbenne 1931 iduale anmar nuganad, Biblia Durdagmalad. Degidde ¿ibigala anmar nuggunoniggi Jehovági sunmagmalad?

Dulemar wisguega doa anmar Babdummadi. Bibliagi miliba mergu Babdummad nug narmaggar naid, Jehová. Ebbenne gardamar narmaglesadgi degi narmaggar nanaid. Auggi baid gayaba Biblia ogwadmalale bar Jehová nug nasissurdamalad, aa anale nasisdamalad, Dummad, Babdummad. Auggi ebbenne Babdummad, Moisésga sogsad, ani an Jehováye, “we deyob an nuga guad” (Éxodo 3:15). Weyob sogsad wisgumalaga nue doa bur Babdummad sunsogedi. Degsoggu anmar yeer iddoged Babdummad nug sediidba.

Dulemar wisguega ibugi anmar arbae. Bibliagi soglenaid, “buggidar” dulemar, Jehovági sunmagdi gusmarye. Soglenaid gudigusye: Abel, Noé, Sara, Moisés geb David (Hebreos 11:4–12:1). Igi dule wargwen dule baid bendaggega juez asabin ibmar soge dagleardae, aayobi anmar, Bab nuggi dulemarga sunmagdimogad, dulemar wisguega Babdummad nue dule igi daedi.

Jesús yobi ibmar imagdii guega. Bibliagi soglenaid, Jesús, Jehovági ‘sunmagdii gusye’ (Apocalipsis 3:14). Jesús sunnad sogsad e dega e Bab nuggi sunmagdii gusye, geb Bab “igar nabbiragwadgi sunmaggega” e dega noniye (Juan 17:26; 18:37). Degsoggu dule sogele an Jesús sorda sunsogedye, Jehová nuggi sunmagdiir gebed, Jehová nug sedibalir gebed. Aaga Jehovági sunmagmalad Jehová nuggi sunmaggega alamagdidiid.

• Ebbenne anmar nuganad Biblia Durdagmaladye, degidde ¿ibiga anmar nuggunoniggi Jehovági sunmagmaladye?

• ¿Ingua Jehovági sunmagmalad buggude?

• ¿Doa Jehová nuggi sunmaggega barmileargusa?

Bibliagi soglesad Cristo burgwisad sorba dulemar Bab igar oisgudmaloye, emar yardadmaloye (Gusmalad 20:29, 30). Dulemar, Jesús igar odurdagye sogdigusmaladi agga ibmar isganabo we igar oburusmalad. Yamo Cristo sordagan sunsogmaladiyobi ibmar imaggarmalad (2 Timoteo 4:3, 4). Ebbenne weyob neg gussoggua, ¿igi anmar wissunna anmardina nue Biblia sogedba emar odurdagdidii?

Jehová sogedba gannar e igar sunsoged wisgulealid. Babdummad sogsad neg duggumosale dulemar e “igar sunsogedi [...] wisgu[maloye]” (Daniel 12:4, NM). 1870 gine dulemar, Bab igar sunsoged wisgubi gudigusmaladi daggarmalad iglesiamargi Biblia sogedba ibmar odurdaglenasuli. Aagala emar sunnad wisgubi guarmalad, igi nue Bab Gardagi ibmar soglenanai. Degsoggu Jehová wemar bendasad nabir e igar sunsoged balamimalaga.

Dulemar inniggigwad Bab igar wisgubi gusmaladi nueggwa Biblia durdasmalad. Igi emi anmar Biblia igar durdagge, igar niggagwa, ebbenne dulemar Biblia durdasmaladi deyob durdasmarmogad, wemala anmar idusmaladid. Biblia durdagbuggwa ibmar soggwen Bibliagi aggu iddononimardibe Bibliagi baidsig amisdamarbalid mag iddogega nue ibu obarnai, dagnonimalale bela nabirbi sognai, narmasdamalad. Degsoggu na emar binsaedba ibmar sogsasurmalad, degi nabir balaminonimalad igi Babdummad nuga, ibua Bab Reino, yoogidse Bab ibu dulemarga imaggoe geb igi nabbaneg imagbaloe, dule burgwisar igi gusdae, geb burgwismaladi yoogidse gannar durgudamarbaloe. Weyob ibmar durdasmaladbali iglesiamargi nodmalad, ar dagnonimalad noar emar odurdagdidii, geb ibmar nuegan imagdidisurmarbali (Juan 8:31, 32).

1879 gine mag iddononimalad bela neg dirbimaggar Bab igargi sunmagged abelege. Aa birgagi La Atalaya. Anunciando el Reino de Jehová onodmalad, aadaggale we garda anba mimilenaid. Emi iba 239 mergu neggweburmar nanaidgi, geb 700 mergu gayamar aggar aggar anmar Bab igargi sunmagdidiid. Weyob Bab igargi sunmagledisulinad.

• Cristo burgwisad sorba ¿igi dulemar Bab igar imadmala?

• ¿Igi Jehovági sunmagmalad Bab igar sunsoged balaminonimala?

Diggasurgus Jehovági sunmagmalad arbabugmalad Biblia onigedgi, Biblia mimigedgi, geb Bibliagi emar odurdaggedgi; auggi bibliamar anmargadsur nanaenad. Anmar wisid Jehová abege dulemar e “igar nabbiragwad wisgumala[di]”, degsoggu anmar daggalid dulemar nueggwa Bab igar durdagmalaga, Biblia bur ibigwensur mag iddolleged abelege (1 Timoteo 2:3, 4). Aaga anmar 1950 gine Traducción del Nuevo Mundo, mergi gaggaba onoded, we Biblia ibigwensur mag iddolle imaglesad, geb nueggwa imaggarbalid. Emi ibagi 120 gwena mergu gaya aggar aggar sunmaglegedba onilemaid.

Biblia ibigwensur mag iddolleged abelealid. Bibliamar sergan sunmaggedba narmaglessoggua aagala abar aggu iddolle nanadaed, ar dulemar sunmagged binna binna gwagmaid. Manuscritomar ebbennemalad geb emissaar amiles nanabarsoggua, emissar geb mag nueggwa iddollealid hebreoba, arameoba, geb griegoba ibu ibmar nue obarnanaina.

Igi Biblia na gebbeun narmaglesa aayobid abelealid. Dule, baid gaggaba Biblia ogwadele, geg yogasaar e binsaedba imagged, igi na gebbeun narmaglesa aayobi ogwaed abeleged. Deginigwale dulemardi baid gaggaba Biblia ogwadele, agga Babdummad nug, Jehová, elisdamalad.

Biblia, e ibed nug odummoged abelealid (2 Samuel 23:2). Traducción del Nuevo Mundo gine 7.000 mergusaar Babdummad nug, Jehová, gannar nasiglesad, ar ebbenne na gusgu nanainad. Urba naid be daggena, manuscritogi Bab nug narmaggarnaid (Salmo 83:18). We Biblia ibigwensur absoleged, degsoggu ibigwensur Bab igar wisguleged; geb undar gagalesbalid nabir nueggwa imaglegega. We Biblia anba dule gayaba sadded, auggine be nabir waggayaba absoged, degsoggu nuediled be bane bane Jehová Gaya Burba absoger (Josué 1:8; Salmo 1:2, 3).

• ¿Ibigala anmar Biblia onoge soggarmoga?

• Dule wisgubiele ibu imaggedgi Jehová binsamai, ¿ibu bane bane imagdiir gebe?