Idudimalad Babga arbadiidba bennuglesurmalad. Ebbenne Cristo sordagan buggusayobi emi ibagi anmar abargi abar gwenagan anmar dagdidimarmogad, ar ‘dulemar daggega nug imaglesmalad’ (Gusmalad 20:28). Anmar idudimaladi nue Bab igarba gudidiid, ‘nue yeer iddogedgi Babdummad sogedba gwenadgan aggwedidiid, dule ega ise sogaledginsur, geb dulemargi mani gaegarsurba, weligwar iddogedgi gwenadgan aggwedimalad’ (1 Pedro 5:1-3). ¿Ibu anmarga imagdidii?

Anmar aggwedidiid. Idudimaladi gwenaganga binsaed daggega gudidiid, geb mer gwenagan Bab igargi bangumarbaliga. Nue wismalad Babdummad emarga we arbaed ugsa, degsoggu na binsaedba anmarga ibmar sogsurmalad, bur abemalad anmar nued gudigued (2 Corintios 1:24). Igi pastor na ovejamar aggwedae, aayobi idudimalad wisi gudidimarmogad igi gwenagan gudidimarmoga (Proverbios 27:23).

Babga arbaega anmar odurdagdimalad. Iddoged irba idudimalad anmar ogannogega Igar Iddoged Neggi anmar odurdagmalad (Gusmalad 15:32). Bab igargi sunmaglenadele anmar idudamarbalid, anmarbo Bab igargi emarga sunmagnaddamarbalid, geb anmar odurdagdimarbalid igi emarga Bab igargi sunmaglegoe.

Anmar ogannogega anmarbo sunmagmalad. Mer anmar Babgi banguegala anmar negse anmarbo sunmagnaddamarbalid, geb Igar Iddoged Neggi anmarbo sunmagmarbalid. Biblia sogedba anmarga binsaed dagmalad (Santiago 5:14, 15).

Gwenagan abargi emar idudimar inigwale, na nabir neguya sedii guega na egad egad arbaed nigmalad. Weyob anmar ular alamagdidisoggua nuedsulid anmar ibigwensur idudimalad imagger (1 Tesalonicenses 5:12, 13).

• ¿Idudimalad igi gwenagan bendagdidii?

• ¿Igi anmar wisi idudimaladi nued anmargi binsadidii?

Bibliagi dulemar sogbogi sunmaglenaid, gwenagan dagdimaladgi, geb gwenagan ‘bendagdimaladgi’; wemala gwenaganga arbadimaladid (Filipenses 1:1). Gwenagan buggwad irbali weyob abar gwenagan arbadidiid. Gwenagan bendagmalad ¿ibu imaggedgi arbamala?

Idudimalad bendagdidiid. Gwenagan bendaggedgi arbamaladi nue Babba nanamarmogad, wemarga arbaed soggwen uglesale nueggwa ibmar imagdamalad. Abar nusgana nanaed, abar bad seredgus gudidimalad; abar, Igar Iddoged Neg aggwedgi arbamalad; abar, gardamar seedgi. Wemarga arbaed dogdar gwagsur inigwale, arbaed nued imagdidimogad. Weyob idudimalad bendagdimaladbali, idudimalad nabir gwenagan odurdaggedgi, geb gwenagan aggwedgi bur bule arbadidimarsunnad.

Ibmar nuegan imaggedgi arbadidiid. Abar, dulemar Igar Iddoged Negse danimalad abin daggega, geb dulemarga gan amigedgi arbamalad. Abar arbamalad: sonido daggedgi, gardamar mimigedgi, mani igarga gardamar seedgi, gwenaganga sogega bia bia Bab igargi sunmaglegoe. Igar Iddoged Neg mer sunnasur daglesii guega, abar aa neg nudaggedgi arbamalad. Gwenagan seredgusmalad bendaggedgi abar arbamarbalid. Arbaebier arbadamarsoggua gwenagan nued wemar dagdamalad (1 Timoteo 3:13).

Mag dagleged nue Babga arbabimala. Inniggigwad Bab sogedba igar imagdimaladba gwenagan bendaggega onugsalesmalad. Anmar abargi anmarga sunmaggarmarmogale, nue anmar ogannomarmogad; yeer Bab igargi sunmagged binarmarbarsoggua, Bab igargi sunmaggebier anmar imagmarmogad; geb idudimaladba igar samarbarsoggua, anmar bendagmalad nabir anmar yeer iddogedgi buraggwa Babga arbadii guega (Efesios 4:16). Sorba wemar nabir idugedga gumarmogad.

• ¿Gwenagan bendaggedgi arbamalad bule Bab igar binarmala?

• Anmar nueggwa Babga arbadii guega ¿gwenagan bendagmalad ibugi anmarga arbadidii?

Bibliagi bali balisaar sunmaglenaid, Bernabégi, geb apóstol Pablogi; wemala nued gwenagangi binsaedba ebbenne gwenagan neggweburmar irba bugmaladse addagdidi gusmalad. Pablo sogsad gannar an gwenagan dagnabibarye; diggasur nanaed bai iddossulid, bur gwenagan ogannogedgi binsasad (Gusmalad 15:36). Emi ibagi circuitogi, geb distritogi arbamalad anba deyob gwenagan binarmarmogad.

Anmar ogannogega nonidamalad. Gwenagan circuitog arbamaladi congregaciónmar gwadurgwen mergusaar nanagwigwissid; congregación irba, iddoged irgwen megwisdaed. Birgagi irbo congregaciónmarse nanaed. Anmar aamarbo sunmaggele, e omeganbodibe anmar ogannomarmogoed. Nonimalale nusganaganbo, geb serganbo sunmagdamalad. Anmar walig gudiile anmarbo Bab igargi dulemarse sunmagnaddamarmogad, geb dulemar Bab igar durdagnanaidse anmar bardaggabdamarbalid. Idudimaladbo gwenagan negse gwenagan ogannogega naddamarbalid; Igar Iddoged Neggi Bab igargi anmarga sunmagmarbalid geb igar iddoged bulaledgi anmar ogannogega anmarga binsaed nuegan dagmarbalid (Gusmalad 15:35).

Bela gwenagan binarmalad. Gwenagan circuitogi arbamalad abemalad bela anmar nue Bab igarba gudigumalad. Idudimaladbo, geb gwenagan bendagmaladbo igar iddosdamalad, wemar nabir nueggwa ibmar imagdii gumalaga, wemarga binsaed dagsadamalad. Igar mayemalad bendagmarbalid nueggwa Bab igargi dulemar odurdagdii gumalaga. Dulemar binigan igar iddogedse nonimalale wemarbo sunmasdamarbalid, yeer iddodamarbalid daggarmalar dulemar Bab igar durdaggega alamagnanai. Wemar ‘anmar ular alamagdidiid’ (2 Corintios 8:23). Degsoggu, aamaryob anmar Babga arbadi gubimogad (Hebreos 13:7).

• ¿Ibigala circuitogi arbamalad gwenaganse addagmala?

• ¿Ibu be imagmogar gebe circuitogi arbamalad nabir be bendagmarmogaga?

Dii burwa dummad nosale, negabandur nasardibe anmar yog igar amigardaed, gwenagan bendaggega; weyob ibmar imaglegedba mag dagleged anmar na nue gwenagan sabe (Juan 13:34, 35; 1 Juan 3:17, 18). ¿Ibu ibmar anmar gwenaganga imagdasunna?

Gwenaganga mani barmilesdaed. Ebbenne gwenagan Antioquía ginmaladi, Judeagi bugmaladga mani barmismalad Judea yargi uggud dummad nagunonigu (Gusmalad 11:27-30). Emi ibagi anmar deyob imagmogad, anmar iddoarsundibe anmar gwenagan baid yarsig waladagbuggwa, anmar Igar Iddoged Neggi mani ugsadamogad, gwenaganga nabir ibmar barmiledega (2 Corintios 8:13-15).

Gwenaganga ibmar barmilesdaed. Neg dargwen gusar idudimalad alamasdamalad wisguega, bela gwenagan nueganbimardibe. Sun sordagan bengdagmaladi gwenaganga mas mimigoed, diidibe, mordibe, inamardibe, neg amimarbalodibe. Abar gwenagan baid neggweburginmalad nonidamalad, neg dargwen gusar gwenagan bendaggega; gwenaganga neg nudaggega, Igar Iddoged Negmar nudaggegardibe. Anmar na gusgu wissoggua igi buraggwa arbalege, neggwebur soggwengi neg aggargusar aagala anmar nabir ibigwensur gwenagan bendagdaed. Anmar bur na “gwenadgan Babba nanaimalad” bendagmar inigwale, anmar sordasurmalad anba bendaglesdamarmogad (Gálatas 6:10).

Mer dogdar buggib binsamalaga gwenaganga Bab igargi sunmaglesdaed. Neg dargwen gusar dulemar buggib binsadamarsoggua, wis aamarga ibmar nuegangi sunmagged abeledaed. “Babdummad bela dulemar gwage armag[soggua]”, wemar ogannosdaed (2 Corintios 1:3, 4). Aaga degi neg gusale anmar gwenaganga Bibliagi ibmar soglenaid ebinsadadamarbalid, mer iemalaga Bab Reino nabbaneg idudele, dulemar bar wiledii guosurmala (Apocalipsis 21:4).

• ¿Ibigala anmar nabir neg dargwen gusar gwae gwae gwenaganga ibmar imasdae?

• ¿Ibu igargi anmar gwenaganga sunmasdabali mer doggus buggib binsamalaga?

Pedro, Santiago, Juan geb Andrés, Jesússe nonimalad, Jesús wemarbo sunmagsii gusad e burgwed idu. Sogsagua, neg duggumosar ee reyga nibneggi sigwisar igi neg gudagoe, ibmar soggwen e sordaganse egidsad: “¿Ar doa degidde mai nued, nue binsaed niggaa, geg galagguedga guosunna? Mai deyobidi, na e dummad na e neg daggega nug saodo, adi wadsi seggalaa [ginnelle] mai baiganga mas daggegar” (Mateo 24:3, 45; Marcos 13:3, 4). Jesús ee “dummad[soggua]”, sogsad eedi, dulemar onugsaoye Bab igargi neg duggumosar e sordagan odurdagbuggwa guega. ¿Doamala sulesmarsunna?

Jesúsba nanaid, issemalad, Babdummad na wemar susad. “Mai nued[ye]” soglegedi mergi neggi Gwenagan Anmar Idubugmalad obared. Wemala Bab igargi na e sordagan odurdagsii guoed. Anmar nabir ‘wadsi ginnelle mas gunbuggwa guega’ mai nued Bab igargi anmar odurdagsiid (Lucas 12:42).

Babga neg aggwesiid (1 Timoteo 3:15). Jesús mai nuedga sogsad, bee be nabbaneggi Jehová neggwebur aggwesii guoye. Degsoggu mai nued ibmar aggoedid, Bab igargi sunmaggega igar amisii guoedid, geb Bab igargi anmar odurdagsii gubaloedid. Aagala “mai nued, nue binsaed niggaa [daed] ”, anmarga gardamar onogega arbasiid, we gardamar dulemarga mimilegega. Anmarga sogsibalid ibu ibmar Igar Iddoged Neggi durdaglegoe, geb ibu ibmar igar iddoged bulaled gualir durdaglebaloe.

Sogleged “mai” nuedye, ar Bibliagi ibmar soglenaidba dulemar odurdagged, geb igar nuegangi dulemarga sunmagbalid; soglebalid nue binsaed niggaa daye, ar Cristoga nabbaneggi nueggwa ibmar aggwesiid (Gusmalad 10:42). Jehová mai nued arbasiid bendagmaid, aagala Jehovági sunmagmalad mergumaiguad, geb gardamar buggidar agnimabalid (Isaías 60:22; 65:13).

• ¿Jesús doa onugsasa Bab igargi e sordagan odurdagsii guega?

• ¿Ibiga soglege we “mai”, nuedye geb binsaed niggaa ibmar imagbarye?

Siglo primerogi apóstolmar, geb gwenagan “idudimaladi” Jerusaléngi gwenagan idugedgi arbabuggwa gusmalad, wemala gwenaganga igar amibuggwa gusmalad igi ibmar imaglegoe (Gusmalad 15:2). Igar soggwennabarbi ibmar imaglemai guega, Bab Gardagi balamisdamalad igi ibmar imaglegoe, geb Bab ganguedba igar imasdamarbalid (Gusmalad 15:25). Emi ibagi mergi neggi Gwenagan Anmar Idubuggwadi ebbenne ibmar imagbuggwa gusmaladyob ibmar imagbugmarmogad.

Babdummad wemar urbisad e igargi sunmagmalaga. Gwenagan Anmar Idubuggwad, Bab Garda maidba igar imagmalad, geb nue wismarbalid igi gwebur aggwelege, geb igi Bab igarmar mamabali, Jehová na wemar susad ibagwengi ese namalaga. Iddoged irba igar iddodamalad daggega ibu ibmar bela neg dirbimaggar gwenagan abebuggwa. Siglo primerogi ibmar imaglegenayobi anmarga igar ugbugmarmogad, aaga anmarga gardamar barmiardamalad, gwenagan circuitogi arbamaladga, gwenagan bamaladgardibe soglesdabalid ibu igargi gwenagan odurdaglegoe. Aaga anmar unnila igar soggwenna durdagbuggwad (Gusmalad 16:4, 5). Gardamar Biblia igargi sunmagged onibugmarbalid, igar amibugmarbalid nabir Bab igargi sunmaglegega, geb dagbugmarbalid doamar gwenagan idugedga arbamaloe.

Bab ganguedga igar imagbuggwad. Gwenagan Anmar Idubuggwad, Jehová sogedba anmar idubuggwad, geb Jesús sogedba igar imagbugmarbalid (1 Corintios 11:3; Efesios 5:23). Binsabugsulid, emala, Babga arbamalad e dummaganye. Emardi, igi Bab negse namaloed “Sibad Wawaad Mimmi [Jesús]” ba gudidimala, aamaryobi Jesúsba gudidimarmogad (Apocalipsis 14:4). Gwenagan Anmar Idubugmalad abemalad anmar emar anar Jehováse goled.

• Siglo primerogi ¿doamar gwenagan idubuggwa gusmala?

• ¿Igi emi ibagi Gwenagan Anmar Idubuggwad, Bab sogedba igar imagbugmala?

Betel soglegedi hebreo gayaba “Babdummad neg” obared (Génesis 28:17, 19). Aaga Jehovági sunmagmalad arbabugmalad negmala Betelye bileged. Betelgi igar amilesiid Bab igargi sunmaglegega. Gwenagan Anmar Idubuggwadi, Nueva York (Estados Unidos) gine bugmalad, aagi buggwa bela neg dirbimaggar sucursalmar buggwad dagbugmalad. Sucursalmargi arbamaladi, bilemalad, gwenagan Betelgi arbamaladye, degsoggu na gwenaganyobi buraggwa arbabugmalad. Buraggwa mas gunmalad, buraggwa arbamalad, buraggwa mamabalid, geb buraggwa Biblia durdagmarbalid (Salmo 133:1).

Bela belad Babga arbabuggwad. Betelgi arbabuggwad, massergana, omegana, wemala bela belad Bab igar binarmalad; degsoggu unnila Babga arbaedgarbi bugmalad, geb nabir Bab Reino igargi sunmaglegega ibmar imagbuggwad (Mateo 6:33). Wemar Betelgi gabmalad, aagi mas gunmarbalid, wis wemarga mani bibbi uglebalid nabir na ibmar bagmarmogaga, deginigwale arbanaidba bennuglesurmalad, ar mani nigguega arbananasulid. Abar oficinamargi arbamalad, abar mas duedgine, mas mimigedgine, libromar imaggedgine, geb libromar uggamar nasiggedgi. Abar neg durwigedgi arbamarbalid, mor enuggedgindibe, edificiomar aggwedgindibe, geb ibmar bamalad imagmarbalid.

Betelgi arbaed yaisulid nabir Bab Reino igargi sunmaglegega. Nabir dulemar Bab igar durdaggega Betelgi gwenagan arbabuggwad. Igi anmar wisi Bab igargi dulemar odurdaggega arbabugmala. We ibmar wisguega anmar sogoena igi we folleto imaglesa. Gwenagan Anmar Idubuggwadi igar amismalad nabir we folleto narmaglegega, narmaglesgua Internetba barmilesad baid gaggaba ogwamalad bugmarmogadse; sorba máquinamar dummagan buggwadgi onilesad, geb aasorba 110.000 gwena mergu congregaciónmar neg dirbimaggar buggwadse barmilesad. Bela nabir gwae neg dirbimaggar Bab igargi sunmaglegega, gwenagan Betelgi arbabugmalad weyob ibmar imagbugmalad (Marcos 13:10).

• ¿Doamar Betelgi arbamala, manigi arbabugmardibe?

• ¿Ibu igargi gwae sunmaglegega Betelgi arbalenai?

Bab igargi nabir sunmaglenai guega Betelgi unnila ibmar soggwenna imaglesulid. Abar baid gaggaba gardamar ogwaedgi arbabugmalad, abar libromar onigedgine, libromar ugga nasiggedgine, libromar nueggwa urbedgine, ibmar grabar samaladgine, video imaggedgine, geb buggidar ibmar bamalad imaglebalid.

Sucursalgi Gwenaganga Igar Amibuggwad, sucursalgi arbalesiid dagbugmalad. Mergi neggi Gwenagan Anmar Idubuggwad gwenagan bamalad onugsasmarmogad, e baadibe, e baggedibe, sucursalgi gwenagan idubuggwa gumalaga, wemala nue odurdaggar bugmalad. Sucursalgi Gwenaganga Igar Amibuggwadi, mergi neggi Gwenagan Anmar Idubuggwad owisobuggwad igi ibmar imaglenai, geb igi gwenagan gudidimarbali; aaga mergi neggi Gwenagan Anmar Idubuggwad wisdamalad ibu igargi gardamar sunmagged onilegoe, igar iddogedgi ibu ibmar durdaglegoe, geb igar iddoged bulaled gualir ibu igargi sunmaglebaloe. Gwenagan Anmar Idubuggwad sucursal daggega bamalad barmisimogad. Wemar Sucursalgi Gwenaganga Igar Amibuggwadga igar ugnonidamarmogad nabir nueggwa ibmar imagbuggwa gumalaga (Proverbios 11:14). Gwenad sucursal dagged sucursal gwagwense gudiile, aa neggweburgi gwenagan bugmaladga Bab igargi sunmasdaed.

Congregaciónmar bendaggega arbabuggwad. Sucursalgi sogleged ibu neggweburgi congregación sigoe; aagi, igar mayemaladga, misioneromarga, geb circuitogi arbamaladga igar uglesibalid; aagi, igar amilesibalid bia igar iddoged bulaled gunanaoe, bia Igar Iddoged Negmar soblegoe geb aagine gwenaganga libromar barmilesibalid. Bela sucursalgi ibmar imaglegedba nabir igar nigga Bab igargi sunmaglenaid (1 Corintios 14:33, 40).

• Sucursalgi Gwenadganga Igar Amibuggwad, ¿igi mergi neggi Gwenagan Anmar Idubuggwad bendagbuggwa?

• ¿Sucursalgi ibu ibmar imaglege?

Nabir “Bab gaya burba nued [...] dulemar bela yar baid baidgi bugmaladga, dulemar abe aggar aggarmaladga, dulemar gaya aggar aggar sunmagmaladga, degine, dulemar baid baid [...] bugmaladga, [...] sunmag[legega]”, anmar 700 mergusaar gayamarba gardamar onibuggwad (Apocalipsis 14:6). Bela dulemarga Bab igargi sunmaglegega, neg dirbimaggar gardamar narmaggedgi arbamalad bugmalad, geb 3.300 mergusaar baid gayaba ogwamalad bugmarbalid, bela wemar Jehovági sunmagmaladbiid.

Inglésbar inso narmaglesdaed. Mergi neggi Gwenagan Anmar Idubuggwad, Garda Narmagmalad Dagsimalad idusiid. Garda Narmagmalad Dagsimaladi, narmagbugmalad idusiid, abar mergi neggi buggwad, abar bamalad sucursalmargi bugmalad. Narmagmalad bela neg dirbimaggarsaar bugsoggua, aaga nabir anmar gardamar igar soggwennaginbi sunmagsurnanaed.

Garda narmaglesale barmilesdaed bamalad gayaba ogwalegega. Garda maddagwen narmaglesale, geb soglesale we garda nooedye baid gayaba ogwamalad buggwadse bela neg dirbimaggar barmilesdaed, Internetba barmileged. Wemar na e gayaba ogwasdamalad, sorba dagsadamarbalid bule nabir imaglesa, geb sorba nabbi wis onuguega dagsadamarbalid. Baid gayaba ogwaedgi arbamaladi dagbuggwad igi nabir “inniggigwadba narmag[legoe]”, aaga nueggwa dagbuggwad igi gebbe narmaglesa, aayob e gayaba sogmarmogaga (Eclesiastés 12:10).

Computadoramar niggadba nabir gwae gwae arbaleged. Computadoramargi diccionariomar, libromar nabir nagued, degsoggu gardamar narmagbugmalad, geb baid gayaba ogwabugmaladi nabir we ibmar ebubugmalad nabir gwae gwae gardamar imaggega. Jehovági sunmagmalad onosmalad Sistema Electrónico de Edición Plurilingüe (mergisig, MEPS). Programa MEPS gine ibmar narmaglemaid nabir ouboleged, nabir sorba libroyob dagle imaglegega; ibu gayabardibe adi aggarsulid, programa MEPS bergwable onudagsiid libro sunnad onogega.

¿Ibiga anmar gardamar imaggedgi alamagnanai, ar inbaggwa abar e dulemarde isse mergudaed? Ar Jehová abemaid ‘bela dulemar bendaglemalad, geb igar nabbiragwad wisgumarbalid’ (1 Timoteo 2:3, 4).

• ¿Igi gardamar narmaglesii?

• ¿Ibiga gardamar onilemaid gayamar baid baidba ogwalesdae?

Birga irba anmar millónba, bibliamar, geb libromar onobuggwad, dulemarga maniginsuli mimigega. Birga irba anmar, Igar Iddoged Negmar, sucursalmar sobbugbalid, geb mer aggar guega aggwelebugbalid. Miliba Betelgi arbabugmalad bendaggega, geb misioneromar bendaggega, mani oballemabalid. Neg dargwen gusar anmar gwenaganga ibmar barmisdabalid, bela we ibmar imaglegega ¿bia mani dagleardae?

Anmar diezmo gasulid, anmar mani egissulid, geb anmar mani wesurbalid. Bab igargi sunmaggega mani bibbisur owelege inigwale anmar dulemarse mani egisdisulid. Ebbenne revista La Atalaya gine soglesad Jehová anmar bendagmaye. Geb aagi soglesbalid: “[Anmar] bibbisaar dulemarse manibin wilegosulid, geb anmar dulemarga sogosurbalid anmar bendagmarye”. Ar inniggigwa anmar manibin dulemargi wiledisulid (Mateo 10:8).

Na ugbiedba dulemar mani ugmalad. Buggidar dulemar nued dagdamalad Biblia igargi anmar dulemar odurdagdiidba, aaga inbaggwa dulemar yamo ese egisledsuli anmarga mani uggardamalad. Dulemarga Bab igargi sunmagnaega, anmar na anmar ibmar ebuged, anmar na wadsi amibalid (1 Crónicas 29:9). Igar Iddoged Neggi, geb igar iddoged bulaled imaglegedgi ulugwamar burwi burwi buggwadgi dule mani egwanbier nabir egwaned. Ebbenne Jesús dagsad muuggwa wilesaggwa gudiid templogi mani gwabo egwannai, emi ibagi anmar sordagan anba dogdar mani saddemarmo inigwale, we muuggwayobi mani ugdidimarmogad (Lucas 21:1-4). Degsoggu dule wargwen ‘e gwagegi naidba’ mani ugbiele nabir mani ugmogad (1 Corintios 16:2; 2 Corintios 9:7).

Anmar bensulid Jehová imagmaid dulemar e neggweburga mani uggega, nabir e Reinogi sunmaglenai guega (Proverbios 3:9).

• ¿Ibiga anmar bamalad iglesiamarbo aggala?

• ¿Igi anmar mani uglemaid ebusii?

Anmar, Babse goled nega Igar Iddoged Negye bileged. Igar Iddoged Neggi Bab Reino igargi sunmagleged, ar aa igargi ebbenne Jesús sunmagdii gusmogad (Lucas 8:1).

Igar Iddoged Negmargi Bab igar sunsoged durdaglesiid. Aa neggi igar amilesiid bia Bab Reinogi sunmaglegoe (Mateo 24:14). Igar Iddoged Negmar emarbi dungusurnanaed, geb emarbi imaggarsurnanabalid, auggi yaba doggus ibmar nigsur nanaed; inbaggwa igar Iddoged Neggi congregación gwagwenna ubosurdamalad. Anmar sordaganmar mergumagusoggu, aaga birgamar nasadgi miliba mergu Igar Iddoged Negmar soblesnanaed (ibagwengi gwaaddarsaar soblesnanaed). ¿Igi nabir anmar deyob imasdae? (Mateo 19:26.)

Igar amilesad, abar mani uglemaidi nabir Igar Iddoged Neg sobega ebulegega. Aa manimar sucursal siidse barmilesdaed, geb sucursal, congregaciónmarga mani ugsadaed nabir Igar Iddoged Neg gwabbid sobmarmogaga, geb onuguegardibe. Igar Iddoged Neg sobega congregaciónmar mani gasmaladi, gannar sucursalse mani barmisdamalad.

Gwenagan Igar Iddoged Neg sobedgi arbamaladi bennuglesurmalad. Abar neggweburmargi gwenagan amilesad, Igar Iddoged Neg sobmaladga gumalaga. Aagi arbamaladi na arbabiedba arbadidiid, bia Igar Iddoged Neg sobleged abeledagoe, aase barmilesdamalad; inbaggwa sabbur yabaloed. Neg soblealile wemar sordagan bendasdamalad na igar iddoged neg sobmalaga. Abar neggweburmargine gwenagan neg sobed wismaladi sulesdamalad igar iddoged neg sobmalaga, onudagmalagardibe. Amba anmar sordagan neg sobed wismalad bamalad neggwebursigmalad buggidar nonidamar inigwale, auggi nagi ubomaloedi bur Igar Iddoged Neg sobsadamalad. Jehová e ganguedba anmar bendagmasoggua, geb ega arbamaladi arbabierba arbadamarmosoggua, aaga nabir weyob negmar soblemamaid (Salmo 127:1; Colosenses 3:23).

• ¿Igar Iddoged Neggi ibu igargi sunmaglege?

• ¿Ibiga nabir anmar bela neg dirbimaggar Igar Iddoged Negmar sobsadamala?

Igar Iddoged Neggi Jehová nug narmaggar nadasoggu, anmar we neg sunnasur daglesii imagbisulid. We neg siid Jehová gadsoggua, aaga anmar nueggwa we neg aggwebied.

Igar Iddoged bergusar neg durwiged abeleged. Igar iddolleged irba gwenagan neg durwisdamalad. Iddoged irba bur nueggwa nudagledabalid. Neg nudaggega, idudimaladi, gwenagan bendagdimaladdibe igar nigga ibmar imagmalad, neg durwilesdaed, piso enuglesdaed, ganmar nueggwa nudaglesdaed geb nueggwa gannar urbilebaloed. Bañomar nueggwa enuglesdabalid, ventanamar, isbemar niggale nueggwa nudaglesdabalid, sorba neg durgan milesdaed. Negmagaba nueggwa neg durwilesdabalid, neg yeer daglesii guega. Birgagi ibagwen igar amilesdabalid isedar onudaggar imaglegega. Burwiganga arbaed uglemogale, burwigan durdagmogoed Babse goled neg nueggwa aggwed abelege (Eclesiastés 5:1).

Anmar nabir nudaggedgi arbamogad. Birga irba nueggwa dagledaed, yabali, negmagabardibe abaggar ibmar isgumaile, onuguega mer sorba bur mani bibbisur owelegega (2 Crónicas 24:13; 34:10). Igar Iddoged Neg nueggwa aggwelesiile, Babdummad nug odummolegoed. Igar Iddoged Neg aggwedgi anmar arbadamodibe, mag daglegoed anmar we neg ibgwensur imagbisuli, geb anmar nue Jehová sabbali (Salmo 122:1). Dulemar dagdamogoed anmar nued we neg aggwesii (2 Corintios 6:3).

• ¿Ibiga anmar Babse goled neg sunnasursii imagbisuli?

• ¿Ibu ibmar imaglege nabir Igar Iddoged Neg yeer daglesii guega?

¿Be nabbi Bab igar durdagbie? ¿Be nabbi versículo soggwen nueggwa durdagbie, Bibliagi dule wargwen nug bilenaiddibe, neggwebur soggwen bilenaiddibe, Bibliagi ibmar soggwen gusad soglenaiddibe? Bega wis neg undar gunaile nabir Biblia be bendagbalid. Be nabbi ibmar wisgubiele Igar Iddoged Neggi biblioteca siidse be nabir aminaed.

Bibliotecagi libromar buggwad, anmar nueggwa ibmar durdaggega. Sun bergwable Jehovági sunmagmalad libromar onosad, be gaggaba be nigsulid. Auggi Igar Iddoged Neggi biblioteca siidgi nabir libromar amileged, libromar soggwenna masurdaed, diccionario mai, Bibliamar bugbalid. Igar Iddolleged iduardibe, sorbardibe, nabir be we gardamar ibmar durdaggega ebuged. Computadora sibalile programa Watchtower Library niggar gebed, aa programagi buggidar libromar nanaid, geb aagi ibgwensur ibmar durdaglebalid.

Babga Arbaed Igar Durdagnanaidga, nued gusaled nabbi ibmar durdagmalaga. Be aa escuelagi naile, nabir be aase naed ibmar durdaggega. Babga Arbaed Igar Durdaglesiid dagsiidi, nueggwa Biblioteca aggoedid, aadi daggoedid libromar nabbi nosmalad nigdibe, geb libromar nueggwa buggubalid. Aadibe, Bibliagi be odurdagnaiddibe, bega sogoed igi libromargi ibmar amilege. Mer iego aa libromar Igar Iddoged Neggi geg onoleged, nueggwa libromar aggwed abeleged, iir iir imagged abelesulid.

Bibliagi soglenaid be, ‘Babdummad igar wisgubiele’ “maniyob be [...] bina” miamagdiir gebye (Proverbios 2:1-5). Igar Iddoged Neggi biblioteca siidi nuedid, be nabbi ibmar durdaggega.

• Igar Iddoged Neggi Biblioteca siidgi nabir anmar ibmar durdaggega ¿ibu ibmarmar buggwa?

• ¿Doa be bendaggoe nabir be bibliotecagi libromar buggwad ebuged durdaggega?

Jesús e sordaganga sogsad: “Gwallu gaeyobi, bemar dulemar asabin damarmo, adi dule baigan be dagmalagar, bemar ibmar nuegan imagdiid, degine, adi be Babdummad nibneggi maid e nug ogannomalagar” (Mateo 5:16). Aaga anmar emi ibagi Internetba dulemar odurdagbalid. Anmar sitioweb jw.org gine soglenaid, Jehovági sunmagmalad ibu ibmargi dulemar odurdagge, geb igi arbabugmarbali. ¿Ibu ibmar sitiowebgi nanai?

Dulemar ibmar wisgubimalad soglenanaid. Aagi be dagdagoed dulemar ibmar wisgubi gudidiid, narmaggar nai. Sognergwa mergu garda, ¿Igar nabbiragwad be wisgubie? gine naid; we garda 400 gwena mergu gayamarba imaggaled. Biblia, Traducción del Nuevo Mundo 100 gwena mergu gaya aggar aggar nabalid. Libro ¿Biblia gine nue igi soglenai? nabalid, geb La Atalaya geb ¡Despertad! nanamogad. We gardamar nabir be Internetba absoged, nabir iddollebalid, nabir iddogega odelebalid, anba nabir PDF gine, geb EPUB gine odelebalid. Dule baid Bab Reino igar wisgubimogale, we gardamar nabir be ega imprimir samogad. Sordomar gayaba buggidar videomar nanabalid, Biblia dramatizar garmalad, drama Biblia igargi sunmagmalad, geb músicamala be na neggi iddogega nabir be na odebalid.

Jehovági sunmagmalad ibmar imagbuggwadgi sunmaglenaid. Anmar sitiowebgi sunmagnaid igi Jehovági sunmagmaladga neg gunai; videomar oyoleardabalid. Aamargi soglenaid Jehovági sunmagmalad igi na gwenagan bendagbuggwa. Soglenabalid sanawa anmar igar iddoged bulaled guoe, geb igi anmar oficinamarse nabir gorlesale.

We ibmarba nabir bela Bab igargi dulemarga sunmaglenaid, Antártidase baggale dulemarga Bab igargi sunmaglenaid. Aaga anmar, Jehovága soged ‘bela be gaya burba gwae gwae nasgumai gusan gadinye’, bela dulemar Jehová nug odummomalaga (2 Tesalonicenses 3:1).

• ¿Igi sitioweb jw.org dulemar bendagge nabir Bab igar sunsoged durdagmarmogaga?

• ¿Ibu igar be anmar sitiowebgi durdagbimoga?