Bab igar iddoged negmargi bar ibmar nuegangi sunmaglesursoggua, dulemar bar Bab igar iddoged negmarse nanabisurdamalad. Degi neg gunasoggua, ¿ibigala Jehovági sunmagmalad igar iddogedse naed abelesunna? Jehovági sunmagmalad igar iddogedgi ¿ibu nued be durdaggoe?

Be, dulemar nuegan geb ayamar nuegan abingudagoed. Ebbenne siglo primero gine gwenagan anbaggusdamalad Babse golega, Bab igar durdaggega, geb na mudsub mudsub ogannomarbaliga (Hebreos 10:24, 25). Degsoggu gwenagan abargi buggwale, na ayamar nuegan abargi buggwa iddodamalad (2 Tesalonicenses 1:3; 3 Juan 14). Emi ibagi anmar deyob anbaggumarmogad, aaga anmar yeer iddodamarmogad Igar Iddoged Negse nader.

Anmar durdagbuggwad ibiga nuedi Biblia sogedba igar imagged. Igi ebbenne gwenagan igar iddogega anbaggusdamala, emi ibagi Jehovági sunmagmalad Bab igar iddogega deyob ubomarmogad, omegana, massergana, geb mimmigana. Gwenagan anmarga binsaed dagdamalad, anmar nabir Biblia sogedba gudiguega (Deuteronomio 31:12; Nehemías 8:8). Dule, Igar Iddoged Neggi siile, namaglealir, nabir namagmogad; ibmar egislealile, nabir wis abin sogbalid. Dule weyob ibmar imagsiile mag daglegoed nue Bab igar bensuli (Hebreos 10:23).

Mer Bab bengudii nanaega. Apóstol Pablo ebbenne gwenaganga weyob narmasad: “An bemar dagnabied, [anmar] na mudsub mudsub ogannomalaga” (Romanos 1:11, 12). Degsoggu igar iddogedgi anmar gwenagan abingualile anmar na mudsub mudsub ogannomalad, Cristo sogedba gudiguega.

Be sunnad be dagnamogale, anmar Igar Iddoged Neggi igi ibmar imaglege. Anmar yeer iddogeled be anmarse namogar. Begi mani galegosulid, geb mani welegosurbalid.

• Anmar Igar Iddoged Neggi ¿igi ibmar imaglege?

• ¿Ibiga nuedi Igar Iddoged Negse nanaed?

Anmar sabbur yabba madibe, dii dummad winadibe, anba anmar Igar Iddoged Negse nanaed iggudisulid. Anba anmarga inbaggwa neg ibgwensur gusur dae inigwale, inbaggwa anmar arbaedgi geggus nonidabar inigwale, ¿ibiga anmar iggubisurdae?

Nued gudiguega. Apóstol Pablo sogsagua, ibiga igar iddogedse nanaed nue abelege, gwenaganga sogsad, ‘nagi binsamaloye’ (Hebreos 10:24). Nagi binsamaloye soglenaidi, “nueggwa ibmar dagged” obarnaid. Degsoggu sogle iddolleged naba mudsub mudsub buggib binsadii gumaloye, nabo sunmagdii gumaloye. Anmar nabo sunmagdii gudmalale, anmar wisgudoed abar anmaryob alamagdidii gusmarmoga Babga arbaega, degsoggu nabir anmar bendagmarmogad mer anmar galaggumarmogaga.

Anmar nabir ayamar nuegan amibalid. Igar Iddoged Neggi unnila anmar binsa dulemar abargi gudisurdaed, ayamar nuegan abargi anmar gudidaed. Inbaggwa anmar gwenagan neggi anbaggusdabalid wis iba onogega. ¿Ibiga nuedi anmar deyob gwenagan buraggwa anbaggued? Degi anmar anbaggudaele anmar na ibgwensur imagdii guosurmalad, geb anmar na bur bule sabgudmarbaloed. Degsoggu anmar iddoarsundibe anmar gwenaganga wis neg gagaleali anmar binsa wegi iddogosulid anmar yog ese naaloed bendaggega, ar anmar aimar nueganad (Proverbios 17:17). Anmar gwenagan yaurgi unnila dule soggwennabi binarsulile, mag daglegoed anmar “na bela bendaggedbimala” (1 Corintios 12:25, 26).

Nuediled dule Jehovága arbadiid be aiga be imagged. Degsoggu Jehovági sunmagmalad abargi be nabir aimar nuegan amiged. Aagala mer igar iddogedse nanaed igguo.

• ¿Ibiga anmar, gwenagan abargi sii gued abelemoga?

• ¿Sanawa be anmar Igar Iddoged Negse nadmogale?

Siglo primerogi gwenagan Igar Iddoged Neggi buggusmalale ¿ibu imasdamala? Namasdamalad, Babse godsadamarbalid, Bab garda absosdamarbalid geb nueggwa durdasdamarbalid, oimagbuggussurdamalad (1 Corintios 14:26). Be anmar igar iddogedse noniggile, be dagdagoed anba anmar deyob ibmar imagmoga.

Biblia igargi dulemar odurdagleged. Sábadogi, domingo gindibe bela neg dirbimaggar anmar sordagan ubobuggwad Biblia igargi sunmagleged iddogega, we 30 minutos gued; aagine sogleardaed igi anmar daed abelege, geb igi emi ibagi neg gudagoye Bibliagi soglenai. Sunmaggwissid soggalile Bibliagi amimaloye, nuediled iddobugmalad eba Bibliagi absobuggwa gumogad. Sorba La Atalaya durdagleged, wedi wadsi irgwen gued. Aagi gwenagangse ibmar egisleardaed, nabir abin sogmarmogaga; La Atalaya gine durdagleged igi anmar Biblia sogedba igar imagdii gusale. Negdirbimaggar 110.000 congregacionmar buggwadgine, anmar emarbi ibmar durdagbuggwad.

Anmar odurdaglesiid nueggwa dulemar odurdaggega. Iddogedgi muddig irgwen anmar ubobalid, aagi anmar ibmar sogbaa durdagsiid. Gebbe noder Biblia Igar Durdagleged, 30 minutos; aagi anmar durdagbuggwad Bibliagi igi igarmar mamai, geb igi neg gudagoye Bibliagi soglenabali; durdaglenaile ibmar egisleardaed, iddobugmalad abin sogmarmogaga. Sorba 30 minutos Babga Arbaed Igar Durdagleged, bad iduaggwa Biblia absolesdaedgi sunmaglesdaed. Sorbali durdagnanaid burwi burwi sunmasdamalad, geb e odurdaggwissidi binsaed daggoed, anmar odurdaggega igi nueggwa garda absolege, geb igi nueggwa dulemarga sunmaglebali (1 Timoteo 4:13). We sorba nabbi 30 minutos Babga Arbaed Igar Iddolleged. Anmar odurdaggega gwenagan sunmasdaed, oyoleardabalid igi Bibliagi emar odurdaglege, geb gwenaganse egisledabalid igi Bibliagi emar odurdagdidimoga.

Be anmar igar iddogedse nadmogale be dagdagoed, nueggwa Bibliagi dulemar odurdaglebuggwa (Isaías 54:13).

• Jehovági sunmagmalad igar iddogedgi ¿ibu ibmar imaglege?

• ¿Biddi igar iddoged inso be anmarba iddonabimoga?

Wegi fotomar nanaidgi be daggena, Jehovági sunmagmalad nue nudaggaggwa igar iddogedse nanamalad. ¿Ibiga anmar nue nudaggaggwa nabidae?

Mer Babgi dodolegega. Anmar wisid Babdummad anmar daglegedgi addagmasulid (1 Samuel 16:7). Auggi anmar igar iddogedse nadabbile Babgi dodogega anmar nadabsurdaed, geb gwenagan ibgwensur imaggega anmar nadabsurdabalid. Binsaena, be juezse nadele geg be sunnasur mor yoi naed; aayobmogad, Jehová “igar naboged e dummadsoggu”, anmar nueggwa mor yoi nadele mag daglegoed anmar ibgwensur Jehová imagsuli (Génesis 18:25).

Anmar mor yoedba mag daglegoed ibmar nuegan anmar durdagnai. Bibliagi soglenaid “wilubbali mor yoma[loye]”, geb mer “dogdar wilub obidsasur [yogsaardibe]” mor yomaloye (1 Timoteo 2:9, 10). Soglenaidi “wilubbali mor yoma[loye]”, mor garged yoedgi sunmagnasulid dulemar anmar daggega; geb anmar mor meddee, geb daddara yoi gudiguosurbalid. Soglesbarsoggua mer “dogdar wilub obidsasur [yogsaardibe]” mor yomaloye, degsoggu anmar mor sunnasur dagle yoosurbalid. Bibliagi weyob igar masoggua soglesurbalid bela emarbi anmar mor yooye. Anmar nudaggaggwa gudidaele dulemar dagdagoed ‘Babdummad igar, igar nuedi’, anmar mor yoedba Babgi nued sunmagmalaga (Tito 2:10; 1 Pedro 2:12). Dulemar daggarmalar anmar nue nudaggaggwa igar iddogedse nanae, wisgumaloed Jehovági sunmagmalad dulemar igi damaladi.

Mor nued yoegala soglesulid anmar mor garged baggoye. Degsoggu mer binsao an Igar Iddoged Negse naega mor nued saddeye.

• ¿Ibiga igar iddogedse yogasaar mor yoi naed abelesuli?

• ¿Igi anmar mor yoed abeleye Bibliagi soglenai?

Be, Jehovági sunmaggedbo Biblia durdagnaile, bes daged idu be iduaggwa garda durdasdagweler gebed. Igar iddogedse naed iduar neggi garda iduaggwa durdaglemogad. Deyob be imaggele nabir be nueggwa ibmar durdagmogoed.

Nue daggo sanawa geb biagi be garda durdaggoe. ¿Sanawa bur be nueggwa garda durdagsii gusar be iddosunna? Sun be nabir garda durdagged bolegwadibe, wagdardibe, muddig burwigan gabisad sorbardibe. Soglesulid ibmar saed yaisulile geg garda durdagleye, bee be sogoedid sanawa be garda durdaggoe, mer ibmar baid imagged ular garda durdagsuli guo. Mer ibmar baidgi binsasii guega garda durdagsoggalile oginno: radio, televisión, geb teléfono. Garda durdagged idu Babse goled abeleged, mer ibmar baidba buggib binsasii guega, unnila Bab Gardaginbi binsasii guega (Filipenses 4:6, 7).

Garda iir iir sao, igar iddogedgi wis ibmar sogmogaga. Garda durdagged idu nueggwa daggo ibu igargi sunmaglesoggali. Título daggo, dagbalo ibiga subtítulomar nanai; sobar nanaid dagbalo, geb recuadrogi ibmar egislenanaid dagbalo, aagi soglenaid ibu igargi sunmaglenai. Degi imasale sorba párrafomar absogo, geb párrafomar absolenadabbidbali urba egislenadabbid dagbalo, geb dagbalo igi párrafogi abin imaglenanai. Abar Bibliagad copiar garnanasulid, copiar garsurmaladi Bibliagi amigo, daggega ibiga narmaglesnanabali (Gusmalad 17:11). Be, párrafogi abin sognaid amisale unnila aaginbi iir imaggo, mer ibmar durdagsiid iegega. Weyob be imaggele, igar iddogedse nader nabir be ibmar durdasadba sogmogoed.

Iddoged irba be weyob garda durdaggele, bur bule be Babdummad “ibmar nue[gan]” durdagmai gudoed (Mateo 13:51, 52).

• ¿Igi be nabir igar amismogale igar iddogedse naed idu garda durdaggega?

• Igar iddogedgi wis be ibmar sogmogaga ¿be ibu imagger gebe?

Diggasurgus Jehová abemaguad dulemar neguyagi na buraggwa gudigumalad geb mer e gine bangumarbalid (Deuteronomio 6:6, 7). Aagala anmar iddoged irba neguyagi irgwen gwenagan buraggwa Bab igar durdagmarmogad, Biblia durdaglealir urwebuggwa gued abelesulid. Ibu ibmar durdagleged abelege, aa ibmar durdagmaloed. Anba dule walagwen gudiile nabir Biblia durdagmogad, e ibmar durdagbiedba.

Babdummad ai nuedga guega. “Mer Babdummadgi banguo, Bab be gine banguosurmogad.” (Santiago 4:8, NM.) Anmar Bibliagi durdadele Jehová igi dulemar aggwemai, geb ibu ibmar imagmabali, anmar wisguoed Jehová dule igi daedi. Neguyagi gwenagan Biblia durdaggega, sun Babga Arbaed Igar Durdaglegedgi Biblia absolemaidba absomarmogad. Sun burwi burwi absolenadabgued, sorba sogmalaga ibu ibmar durdaglesa.

Neguyagi nued gudigumalaga. Neguyagi dulemar buraggwa Biblia durdagmalale nued gudigumaloed. Gwenagan Biblia durdaggalir urwebuggwa guosurmalad, yeer iddobuggwa gued abeleged. Sun ibmar durdaglegoed La Atalaya gine sulegoed, ¡Despertad! ginodibe, sulirdi, anmar sitioweb jw.org gi; daglebaloed burwigan bule dungu nanae, aabarbaloed. Burwiganga escuelagi ibmar undar gunadibe, sun aa igargi nabir sunmagleged, burwigan bendaggega. Sun igar iddogedgi namaglegoed durdagmarbalid, sorba sun wis nabir ibmar goblebalid.

Anmar weyob iddoged irba gwenagan buraggwa Biblia durdaggele, anmar gadi Bab Garda binar gudoed, geb Babdummad ibmar nuegan buggib anmarga dagdamogoed (Salmo 1:1-3).

• ¿Ibiga anmar neguyagi gwenagan buraggwa Bab igar durdagged abelege?

• ¿Ibu babgan imagged abelege nabir neguyagi yeer iddogedgi Bab igar durdagbuggwa gumalaga?

¿Bule wegine dulemar yeer iddobuggwa be dagsunna? Igar iddoged bulaledgi buggwadba yeer iddobuggwad. Ebbenne Jehová e neggweburga sogsad birga irba ilabaa ubomaloye, aayobi anmar emi ibagi bular bular ubomarmogad (Deuteronomio 16:16). Birgagi anmar ilabaa igar iddoged bulaled imagmogad, iba gwenad sogbo nigga, geb iba baagwad nigbalid. ¿Ibigala anmar we igar iddollemaladse iggubisurmoga?

Anmar na gwenaddigwar gudiguega. Israel dorgan, “dulemar onmagmalad abargi” Jehová nug odummobuggwar yeer iddosdamalad; anmar anba yeer iddodamogad gwenagan abargi bugguder (Salmo 26:12; 111:1). Anmar danar dummad ubodele gwenagan baid neggwebursigmalad abingudagoed. Yooruggudba anmar buraggwa mas gudsadaed, degsoggu anmar na aigwar iddobugdaed (Gusmalad 2:42). Degi igar iddollealile mag dagledaed anmar na bela belad “gwenadgan” sabgubuggwa (1 Pedro 2:17).

Bur bule anmar Jehová ai nuedga gudbaloed. Israel dorgan “Babdummad Garda [...] nue mag iddosdamala[le]” nue Babba nagusdamalad (Nehemías 8:8, 12). Anmar aagala yeer iddadamogad igar iddoged dummagangi anmarga Bab igargi sunmaglealir. Igar iddoged bulaledgi Biblia igarginbi sunmagleged; anmar Jehovága arbadii guega anmarga gwenagan binsaed nuegan daggwissi gusdamalad, geb ibmar oyoleardabalid anmar odurdaggega. Abar gwenagan anmarga sunmagdabaloed, Jehovága arbadiidba ibiga galaggudisurmala, anba emarga ibmar ibgwensur gusur inigwale. Igar iddoged bulaled iba baagwad gualile dramamar guardabalid, ebbenne ibmar gusmalad Bibliagi nanaid oyoleardaed anmar egi binsaed nuegan amigega. Igar iddoged bulaled gued irbali dulemar bautizar imaglebalid, dulemar daggega Jehovága sogsa, an begarbi arbadii guoye.

• ¿Ibigala igar iddoged bulaledse nanaed yeer iddolle dule imagge?

• Be, anmar igar iddoged bulaledse namogale ¿ibiga bega nued gusmogale?

Jesús sogsa naded: “We Bab Dummad neg dagmaid gaya burba nued bela we nabneg naidgi sunmaglegweler gebed, adi bela dulemar yar baid baidgi bugmalad Bab Dummad neg dagmaid gaya burba nued wisguegar, geb agi we nabneg bergunonisunnoed” (Mateo 24:14). ¿Igi nabir bela neg dirbimaggar dulemarga Bab igargi sunmaglegoena? Igi Jesús emarga Bab igargi sunmagdii gusa, aayobi imaglemogoed (Lucas 8:1).

Emar negse anmar naddaed Bab igargi sunmaggega. Jesús, e sordagan odurdasad negse negse Bab igargi dulemarga sunmagmalaga (Mateo 10:11-13; Gusmalad 5:42; 20:20). Jesús sordagan yogsaar Bab igargi sunmagdii gussurmalad, neggwebur soggwen soggwen wemarga uglesad Bab igargi sunmagnamalaga (Mateo 10:5, 6; 2 Corintios 10:13). Emi ibagi aayobi anmar igar niggaa Bab igargi sunmagdimogad, degsoggu gwenagan na egad egad nigmarmogad bia Bab igargi sunmagmarmogoe. Weyob nabir anmar nuegwa Bab igargi ‘sunmagdidiid’ (Gusmalad 10:42).

Dulemar buggwadse anmar owarmasdaed. Jesús unnila emar negginbi dulemarga Bab igargi sunmassulid, dii gagga nagaba dulemar abingualir sunmasdabalid, neggwebur dia siidgi dulemarga sunmasbalid (Marcos 4:1; Juan 4:5-15). Aaga anmar dulemarga Bab igargi sunmagmogad: igarbali, tiendamargine, parquemargine, teléfonobardibe. Anmar maidgi anmar emarga Bab igargi sunmagbalid, arbaedgindibe, escuelagindibe, anmar gwenadgan gardibe anmar sunmagbalid. Aaga millónba mergu nabir dulemar ‘Bab gaya burba iddodidiid’, nabir bendaglemalaga (Salmo 96:2).

Binsaena, doaga be Bab Reino ibmar nuegan imaggoedgi sunmasmogar be iddoge. Mer unnila bebii be yoogidse ibmar guoed wisi gudiguo. Dule wargwen abingualir yog ega Bab igargi sunmaggar imagmogo.

• ¿Ibu “gaya nuegan[gi]” sunmagged abelege?

• ¿Igi Jehovági sunmagmalad, Jesús yobi, Bab igargi sunmagdidimarmoga?

Igar mayed soglegedi, dulemar idu sabburba igar egaed obared. Jesús inso we nabbanegse dulemarga igar mayenoniggid, dulemarga bendagleged igar eganoniggid (Mateo 20:28). Emi ibagi anmar Jesús yobi emarga Bab igargi sunmagdimogad, dulemar Jesús sordaganga gumarmogaga (Mateo 28:19, 20). Abar gwenagan igar mayedgi arbadidimarmogad.

Bab igargi sunmaggedginbi arbamalad. Bela Jehovági sunmagmalad Bab ibmar nuegan imaggoedgi dulemarga sunmaggedbimalad. Deginigwale abar gwenagan na igar amismalad nabir igar mayed abarginedga gumalaga, 70 horas nii irba imagmalad Bab igargi sunmaggedgi. Aagala abar iddogedgi irgwen, irbodibe arbamalad, wis mani amigega. Abar igar mayedginbi arbadidii guega sulesdamalad, geb bia bur nue Bab igargi sunmagleged abele daglege, aa neggweburse barmilesdamalad; wemardi 130 horas, aaba bur meludibe nii irba imagmalad Bab igargi sunmaggedgi. Dogdar ibmar issesur nigsurmalad ar wismalad Jehová emar bendagmai guoe (Mateo 6:31-33; 1 Timoteo 6:6-8). Dule wargwen igar mayed abarginedga geg guele, geg igar mayedginbi arbadii gubardibe nabir igar mayed bendaggedgi arbaed, wemardi 30, 50 horas dibe niigi imagmalad.

Babdummad sabedba, geb dulemar sabedba igar mayedgi arbamalad. Jesús yobi anmar dulemar wile dagmogad Bab igar wissur bugmaladba (Marcos 6:34). Anmardi nue Bab igar wissoggua nabir anmar dulemar bendagged, yoogidse nued gudigumarmogaga. Gwenagan igar mayedgi arbamalad dulemar sabedba Bab igargi dulemar odurdaggega alamagdidiid (Mateo 22:39; 1 Tesalonicenses 2:8). Weyob emarga Bab igargi sunmagdiidbali bur bule Jehová bensur guddamalad, bur Jehová ai nuedga guddamarbalid, aaga yeer iddodididamalad (Gusmalad 20:35).

• ¿Igar mayedgi arbaed ibu imagge?

• ¿Ibigala abar gwenagan Bab igargi sunmaggedginbi arbaardamala?

Jehovági sunmagmaladi gusgu Biblia igargi emar odurdaggedgi bur arbadamalad. Aagala bur bule Bab igargi sunmagdimaladga escuelamar niggad. Aa escuelamargine odurdaglebugmalad bur nued Bab igargi emar odurdagmalaga (2 Timoteo 4:5).

Escuela igar mayemaladgad. We escuela ibnergwa imagleged, igar mayemalad abarginmaladga, we escuela Jehovági sunmagmalad Igar Iddoged Neggi imagleged. Dule aa escuelase naegala birgagwengus igar mayedga gusa gudiir gebed. Ibiga imaglege, Jehová ai nuedga gumalaga, nueggwa Bab igargi emar odurdagdii gumalaga, geb mer Bab igargi arbaed igar indagmarbaliga.

Escuela Bab Reino Igargi Sunmagmaladgad. We escuela nii warbo imagleged, aasega nabir namalad gwenagan abirgin saddemalad, gwenagan abirgin nigmaladdibe. 23, 65 años nigmaladsega nabir we escuelase namalad, geb bad undargus igar mayedgi arbadimarbalir gebed, guagwa gudimarbalir gebed baid neggweburse barmiledega. Jesucristo bur bule Bab igargi sunmagdii gussoggua, aayob daega weyob sogmalad: “Ani be an barmide, ani an naoe” (Isaías 6:8; Juan 7:29). Baid neggweburse nadmalale, sun durdagge dagledamaloed ibmar isse niggued, aa neggweburginmaladyob daed, dad biin gudigued, diiba waladagdi gued, geb mas gwabbid gunned durdaggodibe. Sun baid gaya sunmagged durdagge dagledamarbaloed. We escuelagine odurdaglemaloed nueggwa Bab igarba damalaga, barmilesmalale nabir nueggwa arbadi gumalaga. Odurdaglemarbalid nueggwa Jehovága, geb Jehová neggweburga ibmar imagdi gumalaga.

Escuela Bíblica de Galaad de la Watchtower. Hebreo gayaba Galaad soglegedi, “aggwamar mullu urbed” obared, oyogega wegi ibmar soggwen gusye. We escuela 1943 gi sigwisad. Aad aggale 8.000 mergu we escuelagi ibmar durdasmaladi misioneroga arbasmalad, aaga nabir bela neg dirbimaggar Bab igargi sunmagleged nasgusad (Gusmalad 1:8). Be daggena, misioneromar Perúse nonimargua congregaciónmar anba saddenad, emidi 1.000 mergu gwena congregaciónmar buggwad. Misioneromar Japónse nonimargua, Jehovági sunmagmalad e anbe owarmagsurmalanad, emidi 200.000 gwena mergumalad. Nii waladdargi nueggwa Bab Gardagi odurdaglesdamalad, odurdaglesdamarbalid nueggwa neggwebur soggwengi Bab igargi sunmaglenai guega geb nabir Bab igar nasgumai guega. We escuelase nabir namalad, igar mayedginbi arbadidimalad, misioneromar bur Bab igargi sunmaggedginbi arbadimalad, gwenagan circuitogi arbadidimalad, sucursalgi arbadimaladdibe.

• ¿Ibiga igar mayemalad Escuelase barmilesdamala?

• ¿Escuela Bab Reino Igargi Sunmagmaladgadse doamar nabir namala?