¿Ibiga be Biblia durdagnai gued abelege?

1. ¿Ibiga nuedi be Biblia durdagnai gued?

We gardagi be Bab igar durdasadba, be bur bule Jehová binar gudmogar gebed. Bur bule Jehová sabgudii guegala we igar indagged abelesulid (1 Pedro 2:2). Be nabir yoogidse sadegu gudiguegala, be, Jehová aiga guer gebed, aagala mer Biblia durdagged indaggo. Juan 17:3 geb Judas 21 absogo.

Bur bule be Jehová igar durdadele bar be Bab benguosulid, be eba igar imagbi gudabaloed (Hebreos 11:1, 6). Be, Bab bensulile bar be ibmar isgana imagbiosulid, be daed be na ogwadsunoed. Gusmalad 3:19 absogo.

2. Be, Bab igar durdagmaidba ¿igi be nabir emar bendasmogale?

Sun be Bibliagi ibmar durdasad emarga sogbigudamogoed, ar bela anmar ibmar nuegan sogbiguardaed. Be, Biblia durdagmaidba be durdadbaloed, igi be nabir Jehovági sunmagnader Bibliagi dulemar odurdasmogale. Romanos 10:13-15 absogo.

Buggidar dulemar e gwenadgangar inso babigargi sunmaddamalad, e aimargardibe. Mer emarga sogo, bemar noar gordidiye; bur be, Jehová ibmar nuegan imaggoedgi emarga sunmaggoed. Ebinsabalo, sun dulemar be ibmar sogeddi iddogosurmalad, auggi bur be daedgi addagmaloed. 2 Timoteo 2:24, 25 absogo.

3. Be, Biblia durdagnaidba ¿doa aigala guoe?

Be, Biblia durdagnaile bur bule be, Bab igar durdadoed, geb be, e aiga gudbaloed. Be, Babdummad neggwebur sordaga gumogoed. 2 Corintios 6:18 absogo.

4. Be nabbi nueggwa Bab igar durdaggega, ¿be ibu imaggoe?

Mer Biblia durdagged indaggo (Hebreos 5:13, 14). Jehovági sunmagmaladga be nabir soged, an durdagbiye libro nugad: ¿Biblia gine nue igi soglenai? Bur bule be Biblia durdadele, bur be yeer iddodii gudbaloed. Salmo 1:1-3 geb 73:27, 28 absogo.

Ebinsao, Jehová yeer iddomailed be e gaya burba durdagged indagsulir; degsoggu be nanamogale bia Jehovági sunmagmalad ubomala, nabir bur bule be Jehová aiga gudoed (Hebreos 10:24, 25). Be, Jehová sogedba ibmar imaggega alamagnamogale, be nabir yoogidse sadegu gudiguoed. Degsoggu Bab igar durdaggedi bur igar nuedid. 1 Timoteo 1:11 geb 6:19 absogo.