LECCION 36
Mer emar yardaggo, mer gaggansadabalo
Dulemar, dule gadi emar yardagged e aiga imagbisurdaed, Jehova abesurmogad e aimar emar yardagdi gumalad. Emi ibagine, dulemar na gadi yardag gusmaladba na ega gaggansad damarsunnad. ¿Ibigala emar yardagged, igar nuedsuli?
1. ¿Ibigala anmar emar yardagged abelesuli?
Anmar wissur emar yardagdaele, anmar emarga gaggansasurdabalile, Jehova sogedba anmar igar imagnaoed. Mer iego, Jehova dagmadaed anmar ibu ibmargi binsadii, igi anmar ibmar imagdibali (Hebreos 4:13). Degsoggu, anmar emar yardaggedgi binsasurdaele, anmar wissur gaggansabalile, Jehova yeer anmar dagmaoed. Ar Bibliagi soglenaid: ‘Jehova, dule isganamar nue isdar dagdaed. Dule nueganbodi waliggagwad’ (Proverbios 3:32).
2. ¿Doamarga anmar gaggansaed abelesurbali?
Jehova abeged anmar na ega ‘nabbiragwadgi ibmar sogmalad’ (Zacarías 8:16, 17). Degsoggu, neg yaggi anmar gwenaganga anmar gaggansaed abelesulid, arbaedgi anmar sordaganga anmar gaggansaed abelesurbalid, congregacion yaggi anmar sordaganga anmar gaggansaed abelesurbalid. Dummagan neg dagmamaidga anmar gaggansaosurbalid. Dulemar wissur gaggansamalad, wissur addursamarbalid, wissur emar yardagmarbalid (Proverbios 24:28 geb Efesios 4:28 absogo). Aa dulemar bela impuestomar bennugmarbalid (Romanos 13:5-7). Anmar “bela nueganbi” ibmar imagdi gubiele weyob anmar ibmar imagger gebed (Hebreos 13:18).
3. ¿Ibigala anmar emarga gaggansaed abelesuli?
Anmar wissur gaggansadaele dulemar anmargi binsaosulid, we an yardaggoye. Congregacion yaggi gwenagan anmar dobgudi guosurmogad, ar wismaloed anmar e yardaggosuli. Anmar binsadi guosurmogad, abbaggar an emar yardasye wisgulealirye. Anmar wissur gaggansaele, geb anmar wissur emar yardagbalile, dulemar dagdamarmogoed, ‘Bab Dummad igar, igar nuedi’, aabali sun dulemar Jehova igar durdagbi gudamarmogad (Tito 2:10).
NUEGGWA WE IBMAR DURDAGMARGOLO
Wegine be durdaggoed, anmar wissur emar yardaggele, geb anmar wissur gaggansabalile, Jehova igi anmar dagmaoe, geb doamarga anmar gaggansaed abelesurbali.
4. Jehova, dulemar wissur gaggansamalad yeer dagdaed
Salmo 44:21 geb Malaquías 3:16 absomalo, we ibmargi sunmagmarbalo:
¿Nabir anmar Jehovagi ibmar oduggusardibe? ¿Ibigala deyob be soge?
Anmar wissur gaggansadaele, ¿igi Jehova anmarba iddomaoe?
Mimmigan e serganga wissur gaggansaele, e sergan yeer iddodamalad. Anmar wissur gaggansamogale, Jehova anmarba yeer iddomamogoed.
5. Mer emarga gaggansadao
Abar dulemar binsadaed, wis bibbi an gaggansasale, aggarsurye; auggi wegine anmar durdaggoed, ibigala anmar emarga gaggansaed abelesuli. VIDEO dagmalo.
Hebreos 13:18 absomalo, we ibmargi sunmagmarbalo, ¿ibigala anmar gaggansaed abelesuli...
... anmar neguyaginmaladga?
... arbaedgi, escuelagindibe?
... ibmar imagnader?
6. ¿Wissur gaggansamalad igi iddodididamala?
Dule wissur gaggansaedba sun ega wis ibmar undar gudabaloed, auggi degi daed bur nuedid. Salmo 34:12, 16 se absomalo, we ibmargi sunmagmarbalo:
Be wissur gaggansaele, ¿igi be iddodi guoe?
Abirgin nigmalad na egi wissur ibmar oduggumalale, bur bule na binargudmaloed.
Dule, arbaedgi wissur gaggansaele, e dummad sun ega nabir arbaed baid ugbalid.
Dule wissur gaggansaele, dummagan egi issaggwa binsaosulid.
ABAR SOGDAMALAD: “Yamo beg an yardaggo”.
¿Jehova nued dagdibe emargi dodogega dule yamo gaggansasdaer? ¿Ibigala deyob be soge?
WE IGARGI SUNMAGLESAD
Jehova abesulid, e aimar emar yardagged, emarga gaggansaed abesurbalid.
Ibu be durdasa
¿Doamarga anmar gaggansaed abelesuli?
¿Ibigala geg anmar bibbisaar Jehovagine ibmar oduggue?
¿Ibigala be emarga gaggansabisurmoga?
NABIR BE WE IBMAR DURDASBALILED
Ibu babgan imagged abelemala e mimmigan mer gaggansaed durdagmalaga.
Wegine soglenaid, dule ibmar sogsar imaggedse daele, igi Jehova we dule bendaggoe.
Be ibmar sogsar imaggedse sadao, Jehova nued be dagmai guega (9:09)
Wegine soglenaid, impuesto bennugleged mani ibmar isgana imaggega ebulegele, anba anmar impuesto bennuggodibe.
“¿Bule nue impuestomar bennugleged abelege?” (La Atalaya, septiembre 1, 2011 gad)
Wegine soglenaid, dule emar yardaggedgi arbaenadi, igi nabir na e daed ogwasa.
“An durdasad Jehova dule nued daye” (La Atalaya, mayo 1, 2015 gad)