LECCION 43
¿Cristo sordagan nabir ibmar sisagimalad gobmarmodibe?
Bela dulemar emarbi ibmar sisagimalad gobed dagsurmalad. Abar e aimarbo gusirbii unnila gobmalad. Abar ibmar wegimalad wissur ebumalad. Abar gobdele munguedse damalad. Bibliagindi igi soglenamosunna, ¿issaggwadibe sisa gobed, cerveza gobeddibe?
1. ¿Issaggwadibe ibmar sisagimalad gobed?
Bibliag soglenasulid issaggwaye ibmar wegimalad gobed. Soglenaid, Jehova, anmarga buggidar ibmar nuegan ugsaye, “vino weligwar emar saed” anmarga ugsabarye (Salmo 104:14, 15). Bibliag soglenabalid, ebbenne dulemar nueggwa Jehovaga arbadi gusmalad ibmar wegimalad gobsamarmoye (1 Timoteo 5:23).
2. ¿Igi iddo guedse gobed nuedsurye Bibliagi soglenai?
Jehova unnila munguedbi issaggwa dagsulid, doggus wilub obidsa gobed issaggwa dagbalid (Gálatas 5:21). Bibliag anmarga soglenaid: “Dule gadi mungumaladba mer aggamalo” (Proverbios 23:20). Degsoggu, walagwengi ibmar wegimalad gobedgi be binsaardibe, dule bamaladbodibe, suu guedse gobed nuedsulid, yogsaar godsa godsa gusi guedse gobed nuedsurbalid. Doggus gobed nuedsulid, ar sun anmarga boniga gubalid. Ibmar wegimalad gobder geg bar be indagdaerdina, bur mer gwagwensaar gober nuediled.
3. Anmar ibigwensur emar imagbisulile, ¿ibu anmar imaggosuli?
Anmar na wala walagwengi sogoedid, anmar ibmar cervezagimalad gobodibe, gobosurdibe. Degsoggu, dule wis bibbi ibmar wegimalad gobbiele anmar egi issaggwa sunmaggosulid, auggi, dule ibmar wegimalad gobbisurbalile, anmar egi nai guosurbalid (Romanos 14:10). Auggi, anmar dagsundibe ibmar wegimalad gobedba sun dulemar anmargi issaggwa binsadage, degiirdi bur anmar we ibmar ebugosulid (Romanos 14:21 absogo). Ar Bibliag soglenaid: ‘Mer beginbi na binsamaloye, aimar baigangi binsamarmogoye’ (1 Corintios 10:23, 24 absogo).
NUEGGWA WE IBMAR DURDAGMARGOLO
Weg ibmar soglenaid be bendaggoed, be na walagwengi sogega, be ibmar cervezagimalad gobodibe, gobosurdibe, gobye sogele, gwabigwadse be nabir gobsabalile. Weg be durdagbaloed, be ibmar wegimalad indagbiele, ibu be imagger gebe.
4. Bee na sogoedid, be wis bibbi gobodibe, bur be gobosurdibe
¿Jesus bule nued dagsamoga ibmar sisagimalad gobed? We ibmar wisgueg dagmaloena, ebbenne Jesus ibu ibmar imasa. Juan 2:1, 11 se absomalo, we ibmargi sunmagmarbalo:
Bibliag igi soglenai, ¿Jesus igi vino gobed dagsa? ¿Igi dulemar ibmar wegimalad gobmalad dagsabali?
Jesus ibmar wegimalad gobed issaggwa dagsasursoggua, dule wis bibbi ibmar wegimalad gobbiele, ¿Cristo sordagan igi we duleg binsaedsurmoga?
Anmar nabir wis bibbi ibmar wegimalad gobe inigwale, auggi, inbaggwa wis bibbi gobedbela nuedsurbaloed. Proverbios 22:3 absomalo, we ibmargi sunmagmarbalo:
Be, carro onanaoer, motor onanaoerdibe, nuedirdibe be sisa gober, cervezadibe.
Nuedirdibe, be bonigwar gudii sisa gober, cervezadibe.
Doctor bega sogsar mer ibmar sisagimalad ebugoye, nuedirdibe be ibmar aagimalad gobdaer.
Wis gobder geg bar be indagdaele, nuedirdibe be ibmar aagimalad gobedgi binsaer.
Dummagan igar mesisar aa ibagi ibmar sisagimalad goblegosurye, nuedirdibe be aa ibagine ibmar wegimalad gober.
Dule bebo gusiid ebbenne gadi gobedba bar ibmar aagimalad ebubisulile, nuedirdibe be aa dulebo gusii ibmar wegimalad gober.
¿Nuedirdibe dule ome niggunaidgi, iba nonaidgindibe, sisa mimileger, cervezadibe, vinodibe? We ibmar wisguegala, VIDEO dagmalo.
Romanos 13:13 geb 1 Corintios 10:31, 32 absomalo. Bibliagi ibmar absomaidba we ibmargi sunmagmalo:
¿Bibliagi ibmar absolesad igi nabir be bendasale, be ibmar imadele nabir be Jehova sogedba ibmar imagdaega?
Anmar na sogoedid, anmar ibmar sisagimalad wis bibbi gobodibe, surdibe. Sun inbaggwa anmar sogbalid, emidi an gobosurye.
5. Bee na be sogoed, gwabigwa be goboe
Be sogsundibe andi an ibmar cervezagimalad gober aggar iddosurye, auggi mer iebalo, Jehova sogmarsur inigwale, sisagimalad gobed issaggwaye, auggi doggus gobeddi nued dagsurbalid. ¿Ibigala nued dagsuli? Oseas 4:11, 18 absomalo, we ibmargi sunmagmarbalo:
¿Dule doggus gobdele sun ibu ibmar imaggedse owarmaggoe?
¿Ibu anmar bendaggoe mer anmar doggus wilub obidsa gobdaega? Anmar na nue wisir gebed gwabigwa gobsadgi anmar suu iddoddae. Proverbios 11:2 absomalo, we ibmargi sunmagmarbalo:
¿Ibigala be na igar mesed abelege, gwabigwa be gobdaoe?
6. ¿Ibu be nabir imasale sisa gobed indaggega?
Wegine soglenaid, ibu dule wargwen imasa nabir sisa gobed indaggega. VIDEO dagmalo, we ibmargi sunmagmarbalo:
¿Doggus gobedba Dimitri dule igiidga gusa?
¿Abgayala Dimitri sisa gobed indas imasa?
¿Dimitri igi nabir sisa gobed indasa?
1 Corintios 6:10, 11 absomalo, we ibmargi sunmagmarbalo:
¿Ibigala mungued boni bibbisuli?
¿Igi anmar wisi, dule gadi mungued, nabir sisa gobed indagge?
Mateo 5:30 absomalo, we ibmargi sunmagmarbalo:
Jesus, argan siggedgi sunmasad, anmar mag iddogega, Bab Dummad sogedba anmar ibmar imagbiele, inbaggwa anmar ibmar gadi binaled indagged abelegoe. Be sisa gobed indagbiele, ¿ibu be imagger gebe?a
1 Corintios 15:33 absomalo, we ibmargi sunmagmarbalo:
Dulemar gadi gobmaladba be aggadele, ¿igi be gudmogoe?
ABAR SOGDAMALAD: “Ar inna gobeddi Babgadid”.
¿Igi bedi sogmoga?
WE IGARGI SUNMAGLESAD
Jehova anmarga ibmar sisagimalad imasad, nabir anmar egi yeer iddodi guega. Auggi mungueddina, geb wilub obbidsa gobeddina, Jehova nued dagsulid.
Ibu be durdasa
¿Bibliag soglenadibe, sisa gobed issaggwaye, cerveza gobeddibe?
¿Dule doggus sisa gobdele, cervezadibe, sun igi gudoe?
Anmar ibigwensur emar imagbisulile, ¿ibu anmar imaggosuli?
NABIR BE WE IBMAR DURDASBALILED
¿Ibu ibmargi nusganagan binsaed abelegoe, ibmar cervezagimalad goboye soger?
Wegine be durdaggoed, ibu be imagger gebe ibmar sisagimalad gobed indaggega.
“Ibu be imaggoe sisa gobed indaggega” (La Atalaya, enero 1, 2010 gad)
¿Nuedirdibe Cristo sordagan brindis imagmogar?
“Abar wisgubi guardamalad” (La Atalaya, febrero 15, 2007 gad)
Wegine soglenaid, dule gadi mungued igi sisa gobed indasa. Weyob soglenaidgi be amigoed, “An gobdele geg bar an indagdaenad”.
“Biblia dulemar daed ogwamaid” (La Atalaya, mayo 1, 2012 gad)
a Dule gadi munguele, bendagged amiger gebed. Doctormar sogmarmogad, dule sisa gobed indagbiele, mer bar bibbisaar ibmar wegimalad ebuger gebye.