Hogi Ein Sgiliau yn y Weinidogaeth—Dechrau Sgwrs er Mwyn Tystiolaethu’n Anffurfiol

Pam Mae’n Bwysig: Wrth inni fynd o ddrws i ddrws yn y weinidogaeth, mae llawer o bobl oddi gartref. Ond efallai byddwn ni’n cael cyfle i siarad â phobl ar y bws neu’r trên, yn y feddygfa, wrth gael egwyl yn yr ysgol neu yn y gwaith ac yn y blaen. Mae Jehofa yn dymuno i bawb gael y cyfle i glywed am y Deyrnas. (1 Tim. 2:3, 4) Ond yn aml, cyn inni fedru tystiolaethu, bydd rhaid inni gymryd y cam cyntaf a dechrau sgwrs.

Sut i Fynd Ati:

Dewiswch rywun sy’n edrych yn gyfeillgar ac yn hapus i siarad. Ydy’r sefyllfa yn addas ar gyfer sgwrs? Mae rhai cyhoeddwyr yn dechrau trwy ddal llygad rhywun a gwenu. Os yw’r person yn gwenu yn ôl, maen nhw’n ceisio dechrau sgwrs.
Os ydych chi’n teimlo’n swil, gweddïwch yn dawel am hyder.—Neh. 2:4; Act. 4:29.
Dechreuwch gyda chyfarchiad syml. Ni wnaeth Iesu ddechrau ei sgwrs gyda’r wraig o Samaria drwy sôn am y Deyrnas. (Ioan 4:7) Weithiau mae modd dechrau sgwrs drwy ganmol, gan ddweud rhywbeth fel: “Mae eich plant chi yn foneddigaidd iawn!” Ffordd arall o gychwyn sgwrs yw drwy ofyn cwestiwn: “A welsoch chi’r newyddion neithiwr?”
Unwaith bod y sgwrs wedi dechrau, edrychwch am gyfle i gyflwyno’r newyddion da, ond peidiwch da chi â brysio. Gadewch i’r sgwrs lifo’n naturiol. Efallai gallwch ddweud rhywbeth sy’n ennyn diddordeb y person ac yn gwneud iddo ofyn cwestiwn i chi. Er enghraifft, os ydych chi’n trafod y teulu, gallwch ddweud: “Gwelais i ryw gyngor da ar sut i fagu plant.” Os ydych chi’n trafod rhywbeth yn y newyddion, gallwch ddweud: “Darllenais i dipyn o newyddion da yn ddiweddar sy’n beth prin iawn y dyddiau hyn.” Peidiwch â digalonni os yw’r sgwrs yn dod i ben cyn i chi gael cyfle i dystiolaethu.
Cadwch draethodynnau neu gyhoeddiadau eraill arnoch i’w rhoi i bobl sydd â diddordeb.

Rhowch Gynnig ar Hyn yn Ystod y Mis:

Ceisiwch ddechrau o leiaf un sgwrs bob wythnos gyda’r nod o dystiolaethu’n anffurfiol.