“Mae Gair Duw . . . yn Cyflawni Beth Mae’n ei Ddweud”

1. Pam rwyt ti’n credu’n gryf fod Gair Duw yn rymus? (Gweler y llun agoriadol.)

MAE pobl Jehofa yn credu’n gryf fod ei air, ei neges i fodau dynol, “yn fyw ac yn cyflawni beth mae’n ei ddweud.” (Hebreaid 4:12) Rydyn ni wedi gweld grym y Beibl ar waith yn ein bywydau ac ym mywydau pobl eraill. Cyn dod yn Dystion, roedd rhai pobl yn lladron, yn gaeth i gyffuriau, ac yn anfoesol yn rhywiol. Roedd gan eraill enwogrwydd ac arian ond eto roedden nhw’n teimlo bod rhywbeth ar goll yn eu bywydau. (Pregethwr 2:3-11) Da o beth fod llawer a oedd ar un adeg heb obaith ac ar goll wedi cael gobaith ac ystyr i’w bywydau bellach. Yn y Tŵr Gwylio, rydyn ni wedi darllen hanesion rhai o’r fath yn y gyfres o erthyglau “Mae’r Beibl yn Newid Bywydau.” A hyd yn oed ar ôl dod yn Gristnogion, mae’n rhaid i bobl barhau i atgyfnerthu eu perthynas â Jehofa gyda chymorth y Beibl.

2. Sut gwnaeth grym Gair Duw effeithio ar bobl yn y ganrif gyntaf?

² Nid yw’n syndod fod llawer o bobl yn gwneud newidiadau mawr ar ôl dysgu’r gwirionedd. Roedd ein brodyr a’n chwiorydd eneiniog yn y ganrif gyntaf wedi gwneud newidiadau o’r fath. (Darllen 1 Corinthiaid 6:9-11.) Pan siaradodd Paul am y rhai na fyddai’n etifeddu Teyrnas Dduw, dywedodd: “A dyna sut bobl oedd rhai ohonoch chi ar un adeg.” Gair Duw a’i ysbryd glân a helpodd y bobl hynny i newid. Ond hyd yn oed ar ôl dod yn Gristnogion, gwnaeth rhai ohonyn nhw gamgymeriadau difrifol a effeithiodd ar eu perthynas â Jehofa. Er enghraifft, mae’r Beibl yn sôn am un brawd eneiniog a oedd yn gorfod cael ei ddiarddel. Yn ddiweddarach, newidiodd gymaint fel y gallai fod yn rhan o’r gynulleidfa Gristnogol unwaith eto. (1 Corinthiaid 5:1-5; 2 Corinthiaid 2:5-8) Calonogol iawn yw gweld bod ein brodyr a’n chwiorydd wedi gwneud cymaint o newidiadau o ganlyniad i rym Gair Duw.

3. Beth byddwn ni’n ei drafod yn yr erthygl hon?

³ Mae Gair Duw yn rymus iawn. Gan mai Jehofa sydd wedi ei roi inni, dylen ni sicrhau ein bod ni’n ei ddefnyddio’n effeithiol. (2 Timotheus 2:15) Bydd yr erthygl hon yn trafod yr hyn y gallwn ni ei wneud i ddefnyddio grym y Beibl (1) yn ein bywydau ein hunain, (2) yn ein gweinidogaeth, a (3) wrth inni ddysgu o’r llwyfan. Bydd dysgu am y pethau hyn yn ein helpu ni i ddangos ein cariad a’n diolchgarwch tuag at ein Tad nefol, yr un sy’n ein dysgu ni er ein lles.—Eseia 48:17.

YN EIN BYWYDAU EIN HUNAIN

4. (a) Er mwyn i Air Duw effeithio arnon ni, beth gallwn ni ei wneud? (b) Sut rwyt ti’n trefnu dy amser i ddarllen y Beibl?

⁴ Er mwyn i Air Duw effeithio arnon ni, mae’n rhaid inni ei ddarllen yn rheolaidd. Dylen ni geisio ei ddarllen bob dydd. (Josua 1:8) Mae’r rhan fwyaf ohonon ni’n byw bywydau prysur iawn ond ni ddylen ni adael i unrhyw beth, gan gynnwys ein cyfrifoldebau, ein stopio ni rhag darllen y Beibl. (Darllen Effesiaid 5:15, 16.) Gallwn ni neilltuo amser yn gynnar yn y bore, rywdro yn ystod y dydd, neu’n hwyrach ymlaen gyda’r nos. Rydyn ni’n cytuno â’r salmydd pan ddywedodd: “O, dw i wrth fy modd hefo dy ddysgeidiaeth di! Dw i’n myfyrio ynddi drwy’r dydd.”—Salm 119:97.

5, 6. (a) Pam dylen ni fyfyrio? (b) Sut gall ein myfyrio fod yn effeithiol? (c) Sut mae darllen y Beibl a myfyrio arno wedi dy helpu di?

⁵ Fodd bynnag, dydy darllen y Beibl ddim yn ddigon. Mae’n rhaid myfyrio, neu feddwl yn ddwys, ar ei gynnwys. (Salm 1:1-3) Dim ond wedyn y byddwn ni’n gallu rhoi doethineb y Beibl ar waith yn ein bywydau. Felly, pan fyddwn ni’n darllen y Beibl ar ffurf brintiedig neu ar ddyfais electronig, dylen ni adael i Air Duw ein mowldio a’n hysgogi ni.

⁶ Sut gallwn ni fyfyrio mewn ffordd effeithiol? Pan fyddwn ni’n darllen y Beibl, dylen ni oedi a gofyn i ni’n hunain: ‘Beth mae hyn yn ei ddweud wrthyf am Jehofa? Ym mha ffordd rydw i eisoes yn rhoi ar waith yn fy mywyd yr hyn rydw i’n ei ddarllen? Pa newidiadau sydd rhaid imi eu gwneud o hyd?’ Pan fyddwn ni’n myfyrio ar Air Duw ac yn gweddïo ynglŷn â’r hyn rydyn ni’n ei ddarllen, byddwn ni eisiau rhoi ei gyngor ar waith. Yna gallwn ni brofi grym y Beibl yn ein bywydau.—2 Corinthiaid 10:4, 5.

YN Y WEINIDOGAETH

7. Sut gallwn ni ddefnyddio Gair Duw yn fwy effeithiol yn y weinidogaeth?

⁷ Pwysig iawn yw defnyddio Gair Duw yn gyson wrth bregethu a dysgu. Dywedodd un brawd: “Petaset ti’n pregethu o dŷ i dŷ gyda Jehofa ei hun, fyddet ti’n gwneud y siarad i gyd, neu a fyddet ti’n gadael iddo Ef siarad hefyd?” Pan fyddwn ni’n darllen o’r Beibl i rywun, rydyn ni’n gadael i Jehofa siarad â’r unigolyn. Gall adnod sydd wedi ei dewis yn ofalus fod yn fwy grymus nag unrhyw beth y gallen ni ei ddweud. (1 Thesaloniaid 2:13) Pan fyddi di yn y weinidogaeth, a wyt ti’n ceisio darllen o’r Beibl gymaint ag y gelli di?

8. Pam mae’n rhaid inni wneud mwy na dim ond darllen adnodau yn y gwaith pregethu?

⁸ Fodd bynnag, dydy darllen adnod o’r Beibl i rywun yn y gwaith pregethu ddim yn ddigon. Dydy’r rhan fwyaf o bobl ddim yn deall y Beibl. Roedd hyn yn wir yn y ganrif gyntaf, ac mae’r un mor wir heddiw. (Rhufeiniaid 10:2) Ni ddylen ni gymryd yn ganiataol fod y deiliad yn deall yr adnod rydyn ni newydd ei darllen. Gallwn ni ei helpu drwy ailadrodd y prif eiriau neu syniadau sy’n dod o’r adnod ac yna esbonio’r hyn maen nhw’n ei olygu. Dyma sut mae Gair Duw yn cyffwrdd â chalon a meddwl pobl.—Darllen Luc 24:32.

9. Sut gallwn ni helpu pobl i barchu’r Beibl drwy’r hyn rydyn ni’n ei ddweud cyn inni ddarllen adnod? Rho esiampl.

⁹ Mae’r hyn rydyn ni’n ei ddweud cyn inni ddarllen adnod hefyd yn gallu helpu’r deiliad i barchu’r Beibl. Er enghraifft, gallwn ddweud: “Gadewch inni weld beth mae ein Creawdwr yn ei ddweud am y pwnc.” Neu os ydyn ni’n siarad â rhywun sydd ddim yn Gristion, gallen ni ddweud: “Gadewch inni weld beth mae’r Ysgrythurau Sanctaidd yn ei ddweud wrthyn ni.” Os ydyn ni’n cwrdd ag unigolyn heb unrhyw ddiddordeb mewn crefydd, gallen ni ofyn: “Ydych chi erioed wedi clywed am yr hen ddywediad yma?” Os ydyn ni’n cofio bod gan bob person ei gefndir a’i ddaliadau, byddwn ni’n gwneud popeth a allwn ni i gyflwyno’r gwirionedd mewn ffordd apelgar.—1 Corinthiaid 9:22, 23.

10. (a) Beth ddigwyddodd i un brawd? (b) Ym mha ffordd rwyt ti wedi gweld grym Gair Duw ar waith yn dy weinidogaeth?

¹⁰ Mae llawer wedi gweld bod defnyddio Gair Duw yn gallu cael effaith bwerus iawn ar y bobl maen nhw’n pregethu iddyn nhw. Er enghraifft, aeth un brawd i weld hen ddyn a oedd wedi bod yn darllen ein cylchgronau am flynyddoedd. Un diwrnod, yn hytrach na rhoi’r Tŵr Gwylio diweddaraf iddo, penderfynodd y brawd ddarllen adnod. Darllenodd 2 Corinthiaid 1:3, 4, sy’n dweud: “Fe ydy’r Tad sy’n tosturio a’r Duw sy’n cysuro. Mae’n ein cysuro ni yng nghanol ein holl drafferthion.” Gwnaeth y geiriau hyn argraff fawr ar yr hen ddyn a dyma’n gofyn i’r brawd ddarllen yr adnodau eto. Yna, dywedodd y dyn fod angen dybryd am gysur arno ef a’i wraig. Oherwydd yr adnod hon, roedd eisiau gwybod mwy am y Beibl. Mae defnyddio Gair Duw yn y weinidogaeth yn hynod o rymus!—Actau 19:20.

WRTH DDYSGU O’R LLWYFAN

11. Pa gyfrifoldeb sydd gan y brodyr sy’n dysgu o’r llwyfan?

¹¹ Rydyn ni wrth ein boddau yn mynd i’n cyfarfodydd, i’n cynulliadau, ac i’n cynadleddau. Y rheswm pennaf dros wneud hyn yw addoli Jehofa. Rydyn ni’n elwa hefyd ar yr hyn rydyn ni’n ei ddysgu. Am y rheswm hwn, mae gan y brodyr sy’n dysgu o’r llwyfan fraint fawr a chyfrifoldeb pwysig. (Iago 3:1) Dylen nhw sicrhau bod eu dysgu yn seiliedig ar Air Duw. Os wyt ti wedi derbyn y fraint hon, sut gelli di ddefnyddio grym y Beibl i annog y rhai sy’n gwrando arnat ti?

12. Sut gall siaradwr sicrhau bod ei anerchiad yn seiliedig ar yr Ysgrythurau?

¹² Yr Ysgrythurau yw’r rhan bwysicaf o unrhyw anerchiad. (Ioan 7:16) Felly, bydda’n hynod o ofalus nad ydy’r ffordd rwyt ti’n traddodi dy anerchiad ynghyd â’r profiadau a’r eglurebau rwyt ti’n eu defnyddio yn denu mwy o sylw na’r Beibl. Hefyd, cofia nad ydy darllen o’r Beibl yr un fath â dysgu o’r Beibl. Yn wir, os wyt ti’n darllen gormod o adnodau, ni fydd y rhan fwyaf o bobl yn gallu eu cofio. Felly, dewisa’r adnodau rwyt ti am eu defnyddio yn ofalus. Wedyn, cymera dy amser i ddarllen ac esbonio’r adnodau. Hefyd defnyddia eglureb, a helpa’r gynulleidfa mewn ffordd effeithiol i wybod sut i roi’r adnodau ar waith. (Nehemeia 8:8) Pan fydd anerchiad wedi ei seilio ar amlinelliad, gwna’n siŵr dy fod ti’n astudio’r amlinelliad ynghyd a’r adnodau mae’n eu defnyddio. Mae’n bwysig iti geisio deall y cysylltiad rhwng yr amlinelliad a’r adnodau. Yna, defnyddia rai o’r adnodau hyn i bwysleisio’r pwyntiau a wneir yn yr amlinelliad. (Ceir awgrymiadau da ym mhenodau 21-23 y llyfr Benefit From Theocratic Ministry School Education.) Ac yn bwysicach na dim, gofynna i Jehofa am iddo dy helpu di i rannu ei feddyliau gwerthfawr o’r Beibl.— Darllen Esra 7:10; Diarhebion 3:13, 14.

13. (a) Sut cafodd un chwaer ei heffeithio pan glywodd hi adnod yn cael ei darllen mewn cyfarfod? (b) Sut mae’r ffordd y mae’r Beibl yn cael ei ddefnyddio yn y cyfarfodydd wedi effeithio arnat ti?

¹³ Pan oedd chwaer o Awstralia yn blentyn, digwyddodd llawer o bethau erchyll iddi ac er iddi ddod mewn amser i adnabod Jehofa, doedd hi ddim yn gallu credu’n llawn fod Jehofa yn ei charu hi. Mewn un cyfarfod, clywodd y chwaer adnod yn cael ei darllen a wnaeth argraff ddofn arni. Myfyriodd ar yr adnod a gwneud ychwaneg o ymchwil, a gwnaeth hyn ei hannog hi i ddarllen mwy o adnodau o’r Beibl. Daeth i gredu heb unrhyw amheuaeth o gwbl fod Jehofa yn ei charu hi.a (Gweler y troednodyn.) Wyt ti wedi clywed adnod yn cael ei darllen mewn cyfarfod, cynulliad, neu gynhadledd a effeithiodd arnat tithau yn yr un ffordd?—Nehemeia 8:12.

14. Sut gallwn ni ddangos ein bod ni’n trysori Gair Duw?

¹⁴ Onid ydyn ni’n hynod o ddiolchgar i Jehofa am ei Air ysgrifenedig y Beibl? Fe wnaeth Jehofa addo y byddai ei Air yn goroesi, ac mae Duw, heb unrhyw amheuaeth o gwbl, wedi cadw at yr addewid hwnnw. (1 Pedr 1:24, 25) Felly, dylai pob un ohonon ni wneud yn siŵr ein bod ni’n darllen y Beibl yn rheolaidd, yn ei roi ar waith yn ein bywydau personol, ac yn ei ddefnyddio i helpu pobl eraill. Pan fyddwn ni’n gwneud hyn, byddwn ni’n dangos cymaint rydyn i’n trysori’r Beibl ac, yn fwy na dim, yn caru ei Awdur, Jehofa Dduw.