Yesu ˗bha bɔmɛn ˗nu këwɔn ˗nu

7 ˈYö ˈˈsaabhomɛn ˈkpii˗ ˗ya pö ˗a ˗dhɛ: «˗Yö ˗kë ˈˈdhʋ̈ ꞊dedewo ˗ee?» 2 ˈYö Etiɛnö ˗ya ˗yɔ bɔ ˈö˗ pö: «N ꞊dhegblü ˗nu, n dë ˗nu, ˗ka ka ˈˈtʋ ˈto. ˈDhɛ ˈö kwa ˈˈbhɛman Ablaamö kun Mezopotami ˗sɛ ˈgü, kö yö ˈti ˈdho ꞊köŋ kö ˗yö ˗ya Aranö, ˗Zlan ˈö ˈtɔ bhɔ ˗Zlan ˈka bhë ˗yö ö ˗de ˗zɔn ˗a ˗dhɛ, 3 ˈö˗ pö ˗a ˗dhɛ: ‹˗Bhö ü ˗bha ˈˈsɛ waa ü ˗bha ˈkɔdhigümɛn ˗nu ˈto kö ˈü ˈdho* ˈü ˗ya ˈˈsɛ ˈa ˗dho ˗a ˗zɔn ü ˗dhɛ bhë ˗a ˈgü.› 4 ˈDhɛ ˈö ˗kë ˈˈdhʋ̈, ˈyö Ablaamö ˗yö go Kalide ˗sɛ ˈgü ˈö dho ˈö ˗ya Aranö. ˗Dhɛ ˈö bhë ˈyö˗ dë ˗yö ga ˗a ˗bha. ˈDhɛ ˈö ö bo ˗kë ˈˈdhʋ̈ ˗sü ˈka, ˈyö ˗Zlan ˗yö ˈˈdhiʋ̈sü ˗a ˈka ˈö nu ˈö ˗ya ˗dhɛ ˈö ˈka˗ ˗bha ꞊dɛɛ yö ˗a ˈgü. 5 ˈKö ˗kë ˈˈdhʋ̈, ˗Zlan yö ˈti pë ˈˈwɛɛ ˈbhaa nu ˗a ˗dhɛ ˈkɛnŋpë ˈka ˗dhɛ ˈö bhë ˗a ˈgü. ˗Dhɛ pë ˈˈtɩtɩ ˗de ˈö ˗dho kë ꞊dhɛ ˗a ˗gɛn yö ˗dhɛ ˈdhö, yö ˈti˗ nu ˗a ˗dhɛ. Pë ˈö˗ ˗kë ꞊ʒiaan ˈyö ˗tɔ ö ˗wo ˗bhö ˗a ˗dhɛ ˗sü ˈö˗ pö ˈˈsɛ ˈö bhë ö ˗dho ˗a nu waa ö ꞊suugünën ˗nu ˗an ˗dhɛ, ˈˈkɛɛ kö ˈˈtʋ̈ŋ ˈö bhë ˗a ˈka ˈnën ˈyaa˗ ˗gɔ ꞊köŋ. 6 ˗Ya ˈgo mü ˈzü, ˗Zlan ˗ya ˗pö ˗a ˗dhɛ ꞊dhɛ ˗a ꞊suugünën ˗nu ˗dho kë ˗dhɛŋ ˈka mɛn ˗nu ˗bha ˈˈsɛ ˈgü, ˈö ˈˈsɛ ˈö ˈˈdhʋ̈ ˗a ˈgümɛn ˗nu ˗wo ˗an ˗kë wo ˗bha ꞊dhuëŋ ˗nu ˈka, ˈö ˈwo ˗an ˈˈklʋʋbhɔ ˗kwɛ këŋ ˗yiishiö (400) ˈˈpiʋ̈. 7 ˈYö ˗Zlan ˗ya pö ˈzü: ‹ˈˈSɛ ˈö˗ ˈgümɛn ˗nu ˗wo ˗an ˗kë ꞊dhuëŋ ˈka bhë a ˗dho za dɔ ˗a ˗bha. ˗Ya bo kë ˗sü ˈka ˈˈdhʋ̈, ˗wo ˗dho ˈgo ˈˈsɛ ˈö bhë ˗a ˈgü ˈö ˈwo nu ˈwo n ˗dhɔkë ˗dhɛ ˈö yö ˗a ˗bha.›

8 «˗Ya ˈgo mü ˈzü, ˗mlɛɛn ˈö˗ ˗dɔ ˗a ˗bha ˗pë ˗yö ˗kë ˗dho ˈˈbɔnŋ* ˗sü ˈka bhë, ˗Zlan ˗ya ˗da waa Ablaamö wo ꞊zinŋgü. ˈYö ˈdhɛ Ablaamö ˗yö Izaakö kpɔ ˈö˗ ˗kë ˈˈbɔn ˈka ˗a ˗dhɛkpaɔyi ˈˈsaaga ˗naan ˈka. ˈYö Izaakö ˗yö Zakɔbö kpɔ, ˈyö Zakɔbö ˗de ˈpö ˈö ˈnën ˗kɔŋ do ö ga ꞊plɛ (12) ˈwo ˗kë kwa ˈˈbhɛman* ˗nu ˈka bhë ˗an kpɔ. 9 ˈYö kwa ˈˈbhɛman ˗nu ˗wo ꞊druɛɛ˗ ˗kë wo ꞊dhegblü Zozɛfö ˗bha ˈö ˈwo˗ ˈˈdhoodɔ, ˈyö mɛn ˗nu ˗wo dho ˗a ˈka Ezitö. ˈˈKɛɛ ˗Zlan ˗yö ˗kun ˗a ˈˈpiʋ̈, 10 ˈö˗ dha ˈˈklʋʋbhɔdhe ˈˈpɛpɛ ˈwo nu ˗a ˗ta bhë ˗an ˗gɔ, ˈö ꞊kpɔɔdhɛ nu ˗a ˗dhɛ Fadhaɔn ˈö ˗kë Ezitö ˗gblüdë ˈka bhë ˗a ˗kuu ˈˈdhiʋ̈, ˈö˗ ˗kë ˈö˗ ˈˈdhiaa ˗yö mën ˗a ˈgü. ˈYö Fadhaɔn ˗ya ˗ya Ezitö ˗sɛ waa ö ˗bha ˈkɔ ˗todhʋ̈sü ˗an ˗gɔ ˈˈdhiʋ̈. 11 ˈDhɛ ˈö ˗kë ˈˈdhʋ̈, din˗ ˈkpii˗ ˗yö ˗da Ezitö ˗sɛ waa Kanaan ˗sɛ ˗todhʋ̈sü ˗an ˈgü. ˗Yö ˗kun saanˈˈ ˈkpii˗ do ˈbhaa ˈka, ˈö kwa ˈˈbhɛman ˗nu ˈwaa kun pë ˈˈwɛɛ ˈbhaa ꞊slɔɔ ˗ni ˈgü kö ˗wa ˗bhö. 12 ˈDhɛ ˈö Zakɔbö ˗ya man ꞊dhɛ ˗bhöpë ˗yö Ezitö ˗sɛ ˈgü, ˈyö kwa ˈˈbhɛman ˗nu bɔ mü ˗blɛɛsü wo. 13 ˈDho ꞊plɛ ˗naan ˈwo˗ wo, ˈyö ˗an ꞊dhegblü Zozɛfö ˗ya ˗zɔn ˗an ˗dhɛ ꞊dhɛ yö Zozɛfö ˗mɛn yö ˗mü. ˈYö Fadhaɔn ˗yö ˈwɔn ˈö ˗gban Zozɛfö ˗bha ˈkɔdhigümɛn ˗nu ˗bha ˗a man. 14 ˈDhɛ ˈö ˗kë ˈˈdhʋ̈, ˈyö Zozɛfö ˗yö nɔɔn˗ bɔ kö ö dë Zakɔbö waa ö ˗bha ˈkɔdhigümɛn ˈˈpɛpɛ ˗wo nu. ˗An ꞊gban ˈˈpɛpɛ ˗wo ˗kun mɛn ˗kɔŋ ˈˈsɔɔplɛ ö ga ˈˈsoodhu (75). 15 ˈYö Zakɔbö ˗yö dho Ezitö ˗sɛ ˈgü. ˗Dhɛ ˈö bhë ˈyö ga ˗a ˗bha, ˈyö kwa ˈˈbhɛman ˗nu ˗wo ga mü ˈpö. 16 ˗Wo ˗an ga ˗nu ˗sü ˈö ˈwo dho ˗an ˈka Sishɛmö, ˈö ˈwo ˗an ˗wɔ blɔɔndhɛ ˈö Ablaamö ˗ya dhɔ Amɔɔ ˗bha ˈnën ˗nu ˗gɔ Sishɛmö bhë ˗a ˈgü.

17 «ˈWɔn ˈö ˗Zlan ˗ya ˈˈplünŋ bho Ablaamö ˗dhɛ bhë, ˈdhɛ ˈö˗ ˗yökodhiʋ̈ ˈˈtʋ̈ŋ ˈdhö ˗wo ˗ni ˈgü, kö Izraɛdhö ˈnën ˗nu ˗wa ˗da ˈˈdhiʋ̈ ꞊dedewo ˗wa kë ꞊va Ezitö. 18 ˈYö ˗gblüdë ˈˈwɛɛ ˈbhaa ˈö yö ˈti Zozɛfö dɔ ˗yö ˗ya Ezitö ˗sɛ ˗gɔ ˈˈdhiʋ̈. 19 ˗A ˗gblüdë ˈö bhë, ˗yö ˈˈslö yaa ˗kë kwa ˈˈbhɛman ˗nu ˈka, ˈö ˈˈgbɩɩdhɛ ˗wɔ kwa dë ˗nu ˗ta kö ˗wo wo ˗kɔ bho wo ˗bha nëënˈˈ ˈˈpuu ˗nu ˈgü kö ˗wo ga. 20 ˗A ˈˈtʋ̈ŋ ꞊dede ˈö bhë ˗a ˈgü ˈyö Moizö ˗yö bhɔ. ˗Yö ˗kun ˗së ꞊dedewo, ˈö ˗Zlan ꞊dede ˗ya yö mɛn ˗së ˈka. ˗A ˗mɛn ˗nu ˗wa ˈˈdhi ˗gba ˈˈsu ˗yaaga ˈˈpiʋ̈ wo ˗gɔ ˈkɔɔ. 21 ˈˈKɛɛ ˈdhɛ ˈö˗ ˈkun ˗dhɛ ˈyaa kun ˗a ˗mɛn ˗nu ˗gɔ ˈzü, ˈö ˈwo wo ˗kɔ bho ˗a ˈgü, Fadhaɔn ˈdhu ˗ya ˗sü ˈö˗ ˗to ꞊dhɛ ö ˗de gbö ˈdhö. 22 ˈDhɛ ˈö ˗kë ˈˈdhʋ̈, ˈyö ˈwo Moizö ꞊klaŋ ˗kë, ˈö ˈwo Ezitö ˗mɛn ˗nu ˗bha ˈwɔndɔdhe ˈˈpɛpɛ ˗zɔn ˗a ˗dhɛ. ˈYö ˗kë ˈˈgbɩɩ˗ ö ˈˈdhiwo waa ö këwɔn ˗nu ˈgü.

23 «ˈDhɛ ˈö Moizö ˗kwɛ ˗yö ˗kë ˗kɔŋ ˗yiishiö (40), ˈyö ꞊luu kö ˈö ˈdho ˗wo ö ꞊dhegblü ˗nu ˈwo ˗kë Izraɛdhö ˈnën ˗nu ˈka bhë ˗an ˗dhɛ. 24 ˈDhɛ ˈö ˗kpan Ezitö mi do ˗bha kö ˗yö Izraɛdhö ˈnën do ˗wëëdhɛ bho ˗ni ˈgü, ˈyö dho ö ꞊dhegblü Izraɛdhö ˈnën ˈö bhë ˗a ˗dhɛ ˈö˗ ˗ta ˗ko zë, ˈö Ezitö mi zë. 25 ˗A ˗bha ˈgü ˗be ö ꞊dhegblü ˗nu ˗dho ˗a ˈgüman ꞊dhɛ yö ˈnën ˈö ˗Zlan dho bɔ ö ˗ta kö ˗yö ˗an dha, ˈˈkɛɛ wo ˈti˗ ˈgüman ˈˈdhʋ̈. 26 ˈDhɛ ˈö˗ ˗ta ˗dhɛ ˗yö ꞊kpɔɔ ˈö nu ˗an ˈˈpiʋ̈, ˗yö ˗kpan ˗a mɛn ꞊plɛ ˗bha kö ˗wo ˈkozë ˗ni ˈgü, ˈyö˗ ˈˈslö ꞊mɛɛn kö ˈwɔn ˈö ˗an ꞊zinŋgü ˈö˗ ˈˈɲan bhɔ kö ˗wo dhi wo ˈko ˗dhɛ. ˈYö˗ pö ˗an ˗dhɛ: ‹꞊Dhegblüzë ˗nu ˗mü ka ˈka. ˈMën ˗kë ˈö ˈka pë ˈˈdhiʋ̈˗ ˗kë ka ˈko ˗nu ˈka?› 27 ˈˈKɛɛ ˈyö mɛn ˈö kun pë ˈˈdhiʋ̈˗ kë ˗ni ˈgü ö ˈˈtɛɛdo ˈka bhë, ˗yö Moizö ˗blü ˈö˗ pö ˗a ˗dhɛ: ‹ˈDe ˈö ü ˗ya yi ˗gɔ ˈˈdhiʋ̈ ɛɛnˈˈ yi ˗bha zakanmɛn ˈka? 28 Ɛɛnˈˈ ü˗ ˈˈpiʋ̈ ˈpö ˈü n zë ꞊dhɛ ˗kɔ ˈü Ezitö mi zë ˗a ˈka ɲaandhiʋ̈ bhë ˗a ˈdhö ˗ee?› 29 ˈDhɛ ˈö Moizö ˗ya man ˈˈdhʋ̈, ˈyö ꞊duëë ˈö dho Madian ˗sɛ ˈgü. ˗Yö ˗to ˗dhɛŋ ˈka ˈˈsɛ ˈö bhë ˗a ˈgü ˈö ˈnëngɔɔn˗ ꞊plɛ kpɔ mü.

30 «ˈDhɛ ˈö ˗kwɛ ˗kɔŋ ˗yiishiö (40) ˗yö ˗ʒiö, ˈyö ˗Zlan ˗bha ˈˈkiö do ˗yö ö ˗de ˗zɔn ˗a ˗dhɛ ˈˈshiʋ̈ gɔn ˈö kun ˈˈglɛɛn ˗kpɔɔ ˈgü ˗a ˈgü ˈˈyɛtadhɛ ˈö Sinai ˗tɔn ˈdhö˗ ˗bha bhë ˗a ˈgü. 31 ˈDhɛ ˈö Moizö ˗yö ˈwɔn ˈö bhë ˗a yö, ˗a ˈwɔn ˗ya ˗kun ꞊dedewo. ˈDhɛ ˈö kun ꞊ɲɔɔn ˗ni ˈgü ˗a ˗bha kö ˈö˗ ˗ga ˗së ˈka, ˈyö Zoova ˗yö ˗we ˈö˗ pö ˗a ˗dhɛ: 32 ‹Man ˈnën ˈa ˗tɔ ü ˈˈbhɛman ˗nu ˗bha ˗Zlan, Ablaamö ˗bha ˗Zlan, Izaakö ˗bha ˗Zlan waa Zakɔbö ˗bha ˗Zlan.› ˈDhɛ ˈö ˗kë ˈˈdhʋ̈, ˈyö Moizö ˗yö ˗ya ꞊zii ˗sü ˗bha, ˈö ˗dhɛ ˗ga mü ˗sü ˗yö ˗kë ˗a ˗dhɛ ˗ziisü. 33 ˈYö Zoova ˗ya pö ˗a ˗dhɛ: ‹˗Sabha ˗nu bho ü ˗gɛn ˗bha, ˈyö sü ꞊dhɛ ˗dhɛ ˈü dɔ ˗a ˗bha bhë ˗dhɛ ˈˈslʋ̈ʋ̈slʋ̈ ˗mü. 34 ˈˈKlʋʋbhɔdhe ˈö n ˗man ˈˈsɛgümɛn ˗nu ˈdhö˗ ˈgü Ezitö bhë ˈman˗ yö, ˈman ˗an ˈˈgbʋ* ˗wo man. Yö ˈnën ˈö˗ ˗wɔn ˈgü ˈa ꞊yɔɔ kö ˈa ˗an bho ˈˈgan ˈgü. ˈDhɛ ˈö ˈˈdhʋ̈, ˗bhö nu kö ˈa ü bɔ Ezitö ˈˈsɛ ˈgü.› 35 Moizö ˈö ˈwo ˗kɔ ˗a ˈka ˈkpa, ˈö ˈwo˗ pö ˗a ˗dhɛ: ‹ˈDe ˈö ü ˗ya yi ˗gɔ ˈˈdhiʋ̈ ɛɛnˈˈ yi ˗bha zakanmɛn ˈka?› bhë, yö ˈnën ˈö ˗Zlan ˗yö bɔ ö ˗bha ˈˈkiö ˈö ˗wo ˈˈglɛɛn ˗kpɔɔ ˈgü bhë ˗a ˗ta ˈö˗ bɔ kö ˗yö kë ˗an ˗gɔmɛn waa ˗an ˗bho ˈˈgan ˈgü ˗mɛn ˈka. 36 ˗A Moizö bhë, yö ˈnën ˈö ˗an bho Ezitö ˗dhidha ˗nu waa ˈwɔn ˈˈmlünmlünsü ˗nu ˈö ˗an ˗kë Ezitö ˗sɛ ˈgü, ˈö ˗an ˗kë ꞊Weeyi ˗zɔɔndhö ꞊bhaa, ˈö ˗an ˗kë ˈpö ˗kwɛ ˗kɔŋ ˗yiishiö (40) ˈˈpiʋ̈ ˈˈyɛta bhë ˗an ˈka.

37 «˗A Moizö do bhë ˈzü, yö ˈnën ˈö˗ pö Izraɛdhö ˗mɛn ˗nu ˗dhɛ: ‹˗Zlan ˗dho ö ˗wodhiʋ̈lomɛn do ˈö ˗kë ꞊dhɛ n ˈdhö ˗a ˗ya ka ˗bha ˈˈsɛgümɛn ˗nu ꞊zinŋgü.› 38 Moizö bhë, yö ˈnën waa Izraɛdhö ˗mɛn ˗nu ˈwo kun ˈˈyɛta. ˗Yö ˗kë mü ˗Zlan ˗bha ˈˈkiö ˈö ˈwɔn ꞊blɛɛ ˗a ˗dhɛ Sinai ˗tɔn ˗ta bhë waa kwa ˈˈbhɛman ˗nu ˗an ˈˈpiʋ̈, ˈyö ˗Zlan ˗yö ö ˗wo ˈö ˈˈbhɩɩ˗ bhë ˗a dɔ ˗a ˗gɔ kö ˗ya pö kwa ˗dhɛ. 39 Kwa ˈˈbhɛman ˗nu wo ˈti ˈˈwɩ ˗a ˗bha kö ˈwo ˈwɔn man ˗a ˗ta. ˗Wo ˗kɔ ˗a ˗wɔn ˈka, ˈö ˈwo wo ꞊yɛɛ ˗kë ˈwo dho Ezitö wo zuʋ̈ˈˈ ˈgü, 40 ˈyö sü ꞊dhɛ ˗wa ˗pö Aadhɔn ˗dhɛ: ‹˗Bhö kwa ˗bha ˗zlan ˗nu ˗yö kë kö ˗wo ˈˈdhiʋ̈sü kwa ˈka. ˗A ˗gɛn ˗mü ꞊dhɛ, Moizö ˈö yö kwa ˗dhɛ ˈˈdhiʋ̈ ˈö go kwa ˈka Ezitö bhë, pë ˈö ꞊yaa˗ ˈˈdhiʋ̈ ꞊slɔɔ ˈkwaa˗ dɔ.› 41 ˈYö ˈwo ˗dunën ˈˈbin do ˗yö ˗kë ˈˈtʋ̈ŋ ˈö bhë ˗a ˈgü, ˈyö ˈwo nu ˈˈsaapë ˗nu ˈka ˗a ˈˈdhiʋ̈ ˈö ˈwo ˗ya ˈwlaan˗ kë ˗sü ˗bha pë ˈwo˗ ˗yö ˗kë wo ˗kɔ ˈˈdhiʋ̈ bhë ˗a ˗bha ˈka. 42 ˈDhɛ ˈö ˗kë ˈˈdhʋ̈, ˈyö ˗Zlan ˗yö ö ˗ta yö ˗an ˗bha, ˈö ö ꞊kwaa ˗an ˗zü ˈö ˈwo ˗ya dhaŋgüpë* ˗nu ˗dhɔkë ˗sü ˗bha, ꞊dhɛ ˗kɔ ˈö ˗bɛnzë ˗sü ˈka ˗a ˈka ˗Zlan ˗wodhiʋ̈lomɛn ˗nu ˗bha ˈsëëdhɛ ˈgü bhë ˗a ˈdhö. ˗Yö pö ˗sü ˈka mü ꞊dhɛ: ‹Izraɛdhö ˗mɛn ˗nu, gbɔɔdhe ˗nu ˈö ˈka ˗an ˗kë waa ˈˈsaa˗ ˗nu ˈö ˈka ˗an bho kwɛ ˗kɔŋ ˗yiishiö (40) ˈö ˈka˗ ˗kë ˈˈyɛta ˗a ˈˈpiʋ̈ bhë, ka ˈti ˗an bho n ˗dhɛ. 43 ˈˈKɛɛ Molɔkö ˗bha sɔ ˈkɔ waa ˗zlan Lefanö ˈˈbin ˈö ˗kë ˈˈsusënŋga ˈka ˈö ka ꞊dede ˈka ˗an sü, pë ˈˈbin ˗nu ˈö ˈka ˗an ˗yö ˗kë bhë, ˈyö ˈka ˗an ˗dhɔkë. ˗A ˗wɔn ˈgü, a ˗dho ˈdho ka ˈka Babidhɔnö ˗dhɛ ꞊zlöö.›

44 «Sɔ ˈkɔ ˈö˗ ˗zɔn ꞊dhɛ ˗Zlan ˗yö ˗an ˈˈpiʋ̈ ˗yö ˗kun kwa ˈˈbhɛman ˗nu ˗gɔ ˈˈyɛta. ˗A sɔ ˈkɔ ˈö bhë Moizö ˗yö ˗to ˗a dɔ ˗kɔ ˈˈbin ˈö˗ yö ˗a ˈˈpiʋ̈, ˈö˗ ˗yö ˗kë ꞊dhɛ ˗kɔ ˈö mɛn ˈö ˈwɔn ꞊blɛɛ ˗a ˗dhɛ ˈö˗ pö ˗ya ˗yö kë ˗a ˈka ˗a ˈdhö. 45 ˈDhɛ ˈö kwa ˈˈbhɛman ˗nu ˗wa ꞊slɔɔ, waa Ʒozue ˗nu ˗wo ˗dho ˗a ˈka ˈˈsɛ ˈö ˗Zlan ˗ya ˈgümɛn ˗nu ˗kë kwa ˈˈbhɛman ˗nu ˈˈdhiʋ̈ bhë ˗a ˈgü. ˗Yö ˗to ˗dhɛ ˈö bhë ˗a ˈgü ˈö dho ˈö yö ˗a ˈka Davi ˗bha ˈˈtʋ̈ŋ ˗bha. 46 Davi ˈˈdhiaa ˗yö ˗mën ˗Zlan ˈgü, ˈö˗ pö ö˗ ˈˈpiʋ̈ ˈö ˈkɔ do dɔ Zakɔbö ˗bha ˗Zlan ˗dhɛ. 47 ˈˈKɛɛ Sadhomɔn ˈnën ˈö ˈkɔ ˈö bhë ˗a dɔ ꞊taabha. 48 ˈKö ˗kë ˈˈdhʋ̈, ˗Zlan ˈö pë ꞊gban ˈˈpɛpɛ ˗gɔ ˗ta bhë ˈyaa ˗ya ˈkɔ ˈö mɛnbhɩɩdhe ˗nu ˗wa dɔ ˗a ˈgü, ꞊dhɛ ˗kɔ ꞊dede ˈö ˗Zlan ˗wodhiʋ̈lomɛn ˗ya pö ˗a ˈka ˗a ˈdhö. ˗Ya ˗pö: 49 ‹Dhaŋgüdhɛ ˈnën ˈö ˗tɔ n ˗man ˗gblüdëdhɛ ˗gbloo, ˈyö ˈˈsɛtadhɛ ˗yö ˗kë n ˗gɛn ˗dɔ ˗a ˗ta ˗pë ˈka. ˈKɔ ꞊suu ˗mɛɛn ˈö ˈka ˗dho ˗a dɔ n ˗dhɛ? ˗Dhɛ ˗mɛɛn ˈö n ˈˈtɛɛpadhɛ ˈka? Pë ˈö Zoova ˗ya pö ˈyö bhë. 50 Pë ˈˈpɛpɛ ˈwo bhë n ˗kɔ kë ˗pë ˗nu ˗mü, ˈyaa ˈˈdhʋ̈ ˗ee?›

51 «Gɔɔgbɩɩmɛn ˗nu ˈö ka zuʋ̈ˈˈ waa ka ˈˈtʋ ˗nu ˈdhö ta ˗sü ˈka* bhë, ka ˗gban ˗kplawo ˗Zlan ˗bha ˗zuu ˈˈslʋ̈ʋ̈slʋ̈ ˗gɔ. Pë do ˈö ka ˈˈbhɛman ˗nu ˗wa ˗kë bhë ˈyö ˈka˗ kë ˗ni ˈgü bhë. 52 ˗Zlan ˗wodhiʋ̈lomɛn ˗mɛɛn ˈö ka ˈˈbhɛman ˗nu wo ˈti˗ ˈˈklʋʋ bhɔ? ˗A mɛn ˗nu ˈö ˈwo mɛn ˈö kpɛnŋdhö ˗a ˗bha nu ˗sü to ˈˈdhiʋ̈ ˈö ˈwo˗ ꞊blɛɛ bhë ˗wo ˗an ˗zë, ˈyö ka ˗zë ˈka kë mɛn ˈö ˈˈdhʋ̈ ˗a ˈˈdhoodɔmɛn ˗nu waa˗ zëmɛn ˗nu ˈka. 53 Ka ˈö ˗Zlan ˗bha ˈˈkiö ˗nu ˗wo ˗a ˗bha ˈTɔŋ˗ nu ka ˗dhɛ bhë, ka ˈti˗ ˗ya ꞊bhlëë ˈgü.»

54 ˈDhɛ ˈö zakanmɛn ˗nu ˗wo Etiɛnö ˗wo ˈö bhë ˗a man, ˗yö ˗mën ˗an zuʋ̈ˈˈ ˈka ꞊dedewo ˈö ˈwo ˗ya wo ˈˈsɔn ˗bhö ˗sü ˗bha. 55 ˈˈKɛɛ Etiɛnö ˗zë, ˗zuu ˈˈslʋ̈ʋ̈slʋ̈ ˗yö ˗kun ˗a pa ˗sü ˈka, ˈö ˗dhɛ ˗ga dhaŋ˗ ˈgü ˗pinŋdhö ˈö ˗kpan ˗Zlan ˗bha ˈtɔbhɔdhe ˗bha, ˈö ˗kpan ˈpö Yesu ˗bha kö ˗yö dɔ ˗sü ˈka ˗Zlan ˗kɔ ˗së ˈgü. 56 ˈYö˗ pö: «˗Ka ˗dhɛ ˗ga, dhaŋ˗ ˈˈdhi ˗ya ˈˈpʋ, n ˈˈɲan ˗yö mɛn Gbö ˗bha, ˗yö dɔ ˗sü ˈka ˗Zlan ˗kɔ ˗së ˈgü.» 57 ˈDhɛ ˈö˗ pö ˈˈdhʋ̈, ˈyö ˗an ꞊gban ˈˈpɛpɛ ˗wo ˗gbla wo ꞊faan ˈka ˈö ˈwo wo ˗kɔ ˗nu yö wo ˈˈtʋ ˗bha ˈö ˈwo ˗lo ˗a ˗ta. 58 ˈDhɛ ˈwo˗ ˗gan ˈö ˈwo go ˗a ˈka ˈplöö, ˈyö ˈwo ˗ya ˗a ˗zuö ˗gwö ˈka ˗sü ˗bha. Mɛn ˗nu ˈö ˈwo ꞊suawɔn ˗ya ˗a ˗bha bhë, ˗wo wo ˗bha sɔ ˗nu ˗ya wlüünën do ˈbhaa ˈö ˗kë mü ˈö ˈwo˗ ˗dhɛ Sɔdhö ˗a ˈˈpiʋ̈. 59 ˈDhɛ ˈwo kun Etiɛnö ˗zuö ˗ni ˈgü ˗gwö ˈka, ˈyö ˗ya bhɛɛˈˈ ˗sü ˗bha ˈö˗ pö: «Dëmɛn Yesu, ˈman n ˗man ˗këdhösü ˗lo ü ꞊kwɛɛ˗.» 60 ˈDhɛ ˈö˗ pö ˈˈdhʋ̈, ˈyö yö ö kpɔn ˈgü ˈö ˗gbla ˈˈgbɩɩ˗ ˈö˗ pö: «Zoova, ˈbha ˗dho ꞊sɔŋ yaa ˈwo˗ ˗kë bhë ˗a za ˗lo ˗an ꞊troo.» ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈyö ga.*