ˈSëëdhɛ ˈö Pɔdhö ˗ya bɔ Wlɔmö ˗mɛn ˗nu ˗dhɛ

9 Klito ˗bha gwëëˈˈ ˗mü n ˈka, ˈö ˗zuu ˈˈslʋ̈ʋ̈slʋ̈ ˈdhö ˈˈdhiʋ̈sü ˗ni ˈgü n zuʋ̈ga ˈka. ˗A ˗wɔn ˈgü ˈwɔn ˈa ˗dho ˗a blɛɛˈˈ ka ˗dhɛ yö ˈyaa ꞊sua ˈka, gagade ˗mü. 2 ˗Wëë ꞊dede ˗yö ˈkpɔ ˗sü ˈka n zuʋ̈ˈˈ ˗ta, ˈö n zuʋ̈ˈˈ ˈdhö n kë ˗ni ˈgü ˗kplawo. 3 ˗A ˈˈse ˗yö ˗kë n ˗dhɛ ˗be, a ˗dho ˗a ˈˈslö mɛɛnˈˈ ˈa ˗kë mɛn ˈö ˗kan Klito ˗bha ˗a ˈka, kö ˗a ˈˈdhaŋga ˗yö man ˗zë n ˈkun n ꞊dhegblü ˗nu ˈö ˈwo ˗kë n ˗de ˗bha mɛn ˗nu ˈka bhë ˗an ˗duɛɛ ˈgü, kö ˈwɔn ˗së ˗yö kë wo ˗zë ˗an ˗dhɛ. 4 ˗A ˈmɛn ˈwo ˈˈdhʋ̈ ˈyö ˈwo ˗tɔ Izraɛdhö ˈnën ˗nu. Wo ˈnën ˈö ˗Zlan ˗yö ˗an ˗kë ö ˗bha ˈnën ˗nu ˈka, ˈö ö ˗bha ˈtɔbhɔdhe ˗zɔn ˗an ˗dhɛ, ˈö ˗mlɛɛn ˗da waa˗ ˗nu wo ꞊zinŋgü, ˈö ö ˗bha ˈTɔŋ˗ nu ˗an ˗dhɛ, ˈö ꞊bhlëë ˗ya ˗an ˗bha kö ˗wo ö ˗dhɔkë, ˈö ˈwɔn ˗nu ˈˈplünŋ bho ˗an ˗dhɛ. 5 Wo ˈnën ˈwo ˗tɔ kwa ˈˈbhɛman ˗nu ˗bha ˈnën ˗nu. Wo do ˈwo bhë ˈzü, wo ˈnën ˈö Klito ˗yö ˗kë mɛnbhɩɩdhe ˈka ˈö go ˗an ꞊suu ˈgü. Kö ˗Zlan ˈö pë ꞊gban ˈˈpɛpɛ ˗gɔ ˗ta bhë ˗a ˈtɔ ˗yö bhɔ ˗toëpö ˈka bhë, ˈaa ˗yö kë!

6 ˈˈKɛɛ kë ˈö˗ wo ˈˈdhʋ̈ bhë, yö ˈti kë ꞊dhɛ ˈwɔn ˈö ˗Zlan ˗ya ˈˈplünŋ bho bhë yö ˈti yö ˈko ˈˈdhiʋ̈. ˈPë ˗kë ˈa˗ pö ˈˈdhʋ̈ ˈyö ˗tɔ, mɛn ˈˈpɛpɛ ˈö ˈwo go Izraɛdhö ꞊suu ˈgü ˗an ꞊gban ˈwaa «Izraɛdhö ˗mɛn ꞊dede ˈka.» 7 Yö ˈti kë ˈpö ꞊dhɛ ˈdhɛ ˗wa ˈgo Ablaamö ꞊suu ˈgü bhë kö ˗an ꞊gban ˗wo ˗a ˗bha ˈnën ˗nu ˈka. Pë ˈö ˗bɛnzë ˗sü ˈka ꞊ʒiaan ˈyö ˗tɔ: «Ü ꞊suugünën* ˗dho ˈgo Izaakö ˈgü.» 8 ˗Ya ˗zɔn ꞊dhɛ ˈnën ˗nu ˈö ˈwo go Ablaamö ꞊ɲɔɔn ˈgü ˈwaa ˗Zlan ˗bha ˈnën ꞊dede ˗nu ˈka. ˈNën ˗nu ˈwo bhɔ ˈˈplünŋ ˈö ˗Zlan ˗ya bho bhë ˗a ˈgü, wo ˈnën ˈö ˗an sü ꞊dhɛ ˗a ꞊suugünën ꞊dede ˗nu ˈdhö. 9 ˗A ˗gɛn ˗mü ꞊dhɛ ˈˈplünŋ ˈö˗ bho ˈˈdhʋ̈ bhë ˗ya ˗pö: «ˈˈTʋ̈ŋ do ˈö yö ˗a ˈka a ˗dho nu ˈzü. N nu ˗sü ˈka kö Saadha ˗ya ˈnën gɔɔn˗ do ˈkpɔ.» 10 ˗Wo ˈö bhë ˗yö ˗yökodhiʋ̈ ˈˈtʋ̈ŋ ˈö bhë ˗a ˈgü. ˈˈKɛɛ ˗yö ˗yökodhiʋ̈ ˈpö ˈˈtʋ̈ŋ ˈö Dhebeka ˗yö ˗flɛɛn kpɔ ˗a ˈka mɛn dosɛnŋ ˈö ˗kë kwa ˈˈbhɛman Izaakö ˈka ˗a ˗gɔ bhë ˗a ˈka. 11 Kö ˈnën ˗nu ˈwo bhë ˈwii bhɔ ꞊köŋ, kö wo ˈti ˈwɔn ˗së ɛɛnˈˈ ˈwɔn yaa ˈˈwɛɛ ˈbhaa kë ꞊köŋ ˗ʒiaanwo, ˗Zlan ˗ya ˗zɔn ꞊dhɛ ö ˗bha ˗kɔ ˗yɛ mɛn ˗bha ˗sü ˈyaa ˈsü mɛn këwɔn ˗nu ˗bha, ö ˗de dhɔɔbhaawɔn ˈnën ˈö ˗gban ˗a ˗ta ˈö ö ˗kɔ ˗yɛ mɛn ˗bha, ˈö˗ ˗dhɛ. 12 Yö ˈnën ˈö˗ ˗wɔn ˈgü ˈö ˗Zlan ˗ya pö ˗a ˗dhɛ: «˗A mɛn ˈkpiisü ˗dho kë ˗a mɛn ˈˈtɩɩsü ˗bha ꞊dhuëŋ ˈka.» 13 ˗Yö ˗bɛnzë ˗sü ˈka ˗Zlan ˗Wo ˈsëëdhɛ ˈgü ꞊dhɛ: «Zakɔbö ˗dhɔ ˗yö n ˗kë, ˈˈkɛɛ Ezau ˗zë ˗a ˗san ˗yö n ˗kë.»

14 ˗Ya kë ˈˈdhʋ̈ ˈsa kö ˈkwa˗ pö ꞊dhɛ? Kö ˗Zlan ˈyaa kpɛnŋdhö ˈnën ˈö bhë ˗ee? ˗Abin toŋtoŋdhö! 15 ˗A ˗gɛn ˗mü ꞊dhɛ ˗ya ˗pö Moizö ˗dhɛ: «Mɛn ˈö ˗dhi n ˗dhɛ ˈyö ˈa˗ ˗bhawɔn to. Mɛn ˈö ˗dhi n ˗dhɛ ˈpö, ˈyö ˈa˗ ˗wëë zë.» 16 ˈDhɛ ˈö ˈˈdhʋ̈, ˈyaa ˈsü mɛn ˗de dhɔɔbhaawɔn ɛɛnˈˈ mɛn ˗bha ö ˈgü ˗dɔ ˈˈgbɩɩ˗ ˗sü ˗bha,* ˗yö ˗sü ˗Zlan ˈö mɛn ˗wëë ˗ya ˗kë bhë ˗a ˗bha. 17 ˗A ˗gɛn ˗mü ꞊dhɛ ˗Zlan ˗Wo ˈsëëdhɛ ˈgü, ˗yö ˗bɛnzë ˗sü ˈka mü ꞊dhɛ ˗Zlan ˗ya ˗pö Fadhaɔn ˗dhɛ:* «Pë ꞊dede ˈö˗ ˗wɔn ˈgü ˈa n ꞊kwaa ü ˗zü ˈö ˈü ꞊kun ˈˈbhɩɩ˗ ˈyö ꞊nɛn: A˗ ˗kë ˈˈdhʋ̈ kö ˈa bɔ ü ˗ta ˈa n ˗man ˈˈpiigbɩɩdhɛ ˗zɔn kö n ˈtɔ ˗yö ˗pɛn ˈˈsɛ ˗ta ˗dhɛ ꞊gban ˈgü.» 18 ˈDhɛ ˈö ˈˈdhʋ̈, mɛn ˈö ˗Zlan ˈdhö˗ ˈˈpiʋ̈ ˈö˗ ˗wëë zë, ˈyö˗ ˗wëë zë. Mɛn ˈö˗ ˈˈpiʋ̈ ˈö ö ꞊kwaa˗ ˗zü ˈpö ˗a ˗bha gɔɔgbɩɩdhɛ ˈgü, ˗yö ö ˗kwaa ˗a ˗zü.

19 Mɛn ˈbhaa ˗nu ꞊mɔɔn˗ ˗bha ˈwo n dhɛɛˈˈ kpɔ ˈwo˗ pö: «ˈMën ˈö ˗kë ˈsa ˈö ˗Zlan ˗yö za ˗ya yi ˗bha? De ˈö ꞊mɔɔn˗ ˗bha ˈö ˗gban ˗a dhɔɔbhaawɔn ˗gɔ?» 20 ˈˈKɛɛ bhi ˈü ˗kë mɛnbhɩɩdhe ˈka bhë, ˗mën ˗mü ü ˈka kö ˈü dhɛɛˈˈ ꞊suu ˈö bhë ˗a ˈkpɔ ˗Zlan ˗gɔ? Pë ˈwo˗ ˗yö ˗kë ˗yö ꞊mɔɔn˗ ˗bha ˈö˗ pö ö ˗yökëmɛn ˗dhɛ: «ˈMën ˗kë ˈü n ˗yö ˗kë ꞊dhɛ ˗kɔ ˈö yö ˗a ˈdhö ˗ee?» 21 Ɛɛnˈˈ ꞊dhɛ? Gbɔdɔmɛn dua ˈyaa ˗mü kö ˗yö pë ˈö ˗dhi ˗a ˗dhɛ ˗a ˗yö kë böö˗ ˗kɔn ˈka ˗ee? ˈYaa ꞊mɔɔn˗ ˗bha kö ˗yö böö˗ ˗kɔn ˈsü kö ˗yö pëfüöö ˈö ꞊bhlëësü ˗a ˗yö kë ˗a ˈka, kö ˗ya ˈˈpian do ˈsü ˗yö pëfüöö ˈö˗ ꞊bhlëë ˈyaa ˈdhö ˗a ˗yö kë ˗a ˈka ˗ee? 22 ˈDhɛ ˈö ˈˈdhʋ̈, ˗Zlan ꞊yaa˗ pö ˈö ö ˗bha ˗naanzuëëdhe ˗zɔn kö mɛn ˗nu ˗wo ö ˗bha ˈˈpiigbɩɩdhɛ dɔ, ˗ya ˈgo mü ˈzü pëfüöö ˗nu ˈö˗ ˗bha ˗naanzuëëdhe ˈdhö ˗an ˗bha, ˈö˗ ˗dhɛ ˈdhö˗ ˗bha kö ˗an ˈgü ˗yö shiʋ̈ˈˈ bhë ˗ya ö zuʋ̈ˈˈ kë ˗saa ꞊dedewo ˗an ˈˈpiʋ̈, kö ˗a ꞊duaa ˈyaa ˗mü ˗ee? 23 ˗Zlan ꞊yaa˗ kë ˈˈdhʋ̈ kö ˈö ö ˗bha ˈtɔbhɔdhe ˗ziisü bhë ˗a ˗zɔn pëfüöö ˗nu ˈö ˗an ˗wëë ˗ya ˗kë, ˈö ˗an to ˈˈdhiʋ̈ ˈö ˗an ꞊baa kö ˈö ˈtɔbhɔdhe ˗nu ˗an ˗dhɛ, 24 ˈö ˈwo ˗kë kwa ˈö kwa sü Zuifö ˗nu waa ˈˈsɛ ˈˈwɛɛ ˈgümɛn ˗nu kpö ˈgü kwa ˈka bhë, ˗mën ˈö kwa ˗gɔ ˈzü kö ˈkwa˗ pö? 25 Pë ꞊dede ˈö˗ to ˈˈdhiʋ̈ ˈö˗ pö Oze ˗bha ˈsëëdhɛ ˈgü ˈyö˗ kë ˗ni ˈgü bhë. ˗Ya ˗pö: «Mɛn ˗nu ˈö ˈwaa n ˗man ˈˈsɛgümɛn ˗nu ˈka, a ˗dho ˗an ˗dhɛ ‹n ˗man ˈˈsɛgümɛn ˗nu,› ˈö dhebɔ ˈö˗ ˗dhɔ ˈyaa kun mɛn ˗nu kë ˗ni ˈgü bhë, ˈa˗ ˗dhɛ ‹n ˗man ꞊dhɔɔdhe.› 26 ˗Dhɛ ˈa˗ pö ˗an ˗dhɛ ˗a ˗bha ‹ˈkaa n ˗man ˈˈsɛgümɛn ˗nu ˈka› bhë, ˗dhɛ ˈö bhë a ˗dho ˗an ˗dhɛ ˗a ˗bha ‹˗Zlan ˈö ˈˈbhɩɩ˗ ˗a gbö ˗nu.›»

27 Izai ˗de ˈpö ˗yö ˈwɔn ˈö ˗gban Izraɛdhö ˗bha ˗a ˗blɛɛ ˈö˗ pö: «ˈKö ˗kë ꞊dhɛ Izraɛdhö ˈnën ˗nu ˗wo ˗kë ꞊va ꞊dhɛ ˈˈɲɛɛn ˈö ꞊weeyi ˈˈkpɔnŋ ˈˈdhiʋ̈ ˗a ˈdhö, ˗a mɛn kpönën ˈö to, wo dosɛnŋ ˈnën ˈwo ˗dho dha. 28 ˗A ˗gɛn ˗mü ꞊dhɛ Zoova ˗dho za dɔ ˈˈsɛtadhɛ ˗bha. ˗Yö ˗dho ˈwɔn ˈö ˗gban ˗a ˗bha ˗a ˈˈɲan bhɔ ˈpapadhö, ˈˈvaandhö.» 29 Izai ˗ya ˗to ˈˈdhiʋ̈ ˈzü ˈö˗ pö: «˗Ya kë ꞊dhɛ ˗Zlan ˗Gblüdë Zoova yö ˈti kwa ꞊suugünën ˗nu bhë ˗a mɛn ˈbhaa ˈto ˗be, kwa ˗dho kë ꞊dhɛ Sodɔmö ˗dhɛ ˈdhö, ˈö ˈkwa bhɔ Gomɔɔ ˗dhɛ ˗bha.»

30 ˗Ya kë ˈˈdhʋ̈ ˈsa kö ˈmën ˈkwa ꞊mɔɔn˗ ˗bha ˈkwa˗ pö? Kwa ꞊mɔɔn˗ ˗bha ˈkwa˗ pö ꞊dhɛ ˈˈsɛ ˈˈwɛɛ ˈgümɛn ˗nu ˈö ˈwaa kun kpɛnŋdhödhɛ mɛɛnˈˈ ˗ni ˈgü bhë ˗wa kë kpɛnŋdhö ˗Zlan ˈˈɲan ˈˈdhiʋ̈ ˗an ˗bha ˗zoyödhe ˈsaa˗ ˈgü. 31 ˈˈKɛɛ Izraɛdhö ˗mɛn ˗nu ˈwo kun ˗a ˈˈslö mɛɛnˈˈ ˗ni ˈgü kö ˈwo ˈto ˗kë kpɛnŋdhö ˗sü ˈtɔŋ˗ ˈˈpiʋ̈ bhë, ˗an ˗kɔ ˈti ˗mɔn ˈtɔŋ˗ ˈö bhë ˗a ˈgüwɔn kë ˗sü ˗bha. 32 ˈMën ˗kë? ˈYö sü ꞊dhɛ wo ˈti˗ ˈˈslö mɛɛnˈˈ kö ˈwo ˈto ˗a ˈˈpiʋ̈ ˗zoyödhe ˈka. ˗Wa ˗kë ꞊ʒiaan ꞊dhɛ pë ˈö ˗an këwɔn ˗nu ˈnën ˗dho ˗a kë kö ˗wo ˗mɔn ˗to ˗a ˈˈpiʋ̈ ˗sü ˗bha ˗a ˈdhö. ˗An ˗gɛn ˗yö ˗zuö «˗gwö ˈö mɛn ˗gɛn ˈˈdhiʋ̈ ˗zuö ˗a ˗bha ˗pë ˈka» bhë ˗a ˗bha, 33 ꞊dhɛ ˗kɔ ꞊dede ˈö ˗Zlan ˗Wo ˗ya pö ˗a ˈka ˗a ˈdhö. ˗Ya ˗pö: «˗Ka ˗dhɛ ˗ga! A ˗gwö ˈö mɛn ˗gɛn ˈˈdhiʋ̈ ˗zuö ˗a ˗bha ˗pë ˈka, ˗gwö gbɔŋ˗ ˈö mɛn ˗puö bhë ˗a ˗gban ˗ni ˈgü Siɔn. ˈˈKɛɛ mɛn ˈö ö ˗zo yö ˗a ˗dhɛ, yö ˈti ˗dho ˈgo ˗a ˈgü ö ˗kɔ ˈˈfuöö ˈka.»