Yesu ˗bha bɔmɛn ˗nu këwɔn ˗nu

9 ˈˈKɛɛ Sɔdhö ˗yö ˗kun pë ˈˈdhiʋ̈˗ kë ˗ni ˈgü Dëmɛn ˗bha gwëëˈˈ ˗nu ˈka ˗kplawo, ˈö kun ˗a ˈˈpiʋ̈ ꞊dedewo kö ˈö ˗an zë. ˗A ˗wɔn ˈgü ˗yö ˗dho ˈˈsaabhomɛn ˈkpii˗ ˈˈpiʋ̈ 2 ˈö˗ pö ˗a ˗dhɛ ˗yö ˈsëëdhɛ ˗nu nu ö ˗dhɛ kö ˈö ˗an ˗zɔn ˗yakwëë ˗kë ˗a ˈgü ˗kɔ ˗nu ˈwo Damasö ˗an ˈgü, ˗yö kë ˈˈdhʋ̈ kö mɛn ˈˈoo ˗mɛn ˈö Ʒiaan ˈö bhë ˗a ˗ta ˗mɛn ˈka, ˗yö ˗kë gɔɔn˗ ɛɛnˈˈ dhebɔ ˈka, ˈö˗ ˈkun ˈö˗ ˗lö ˈö nu ˗a ˈka Zedhizadhɛmö.

3 ˈDhɛ ˈö kun ˈdho ˗ni ˈgü, ˈö ꞊ɲɔɔn ˗ni ˈgü Damasö ˗dhɛ ˗bha, ˈö ˗dho ˈˈkan ö ˗ta kö ˈˈshiʋ̈ ˈbhü ˈö go dhaŋ˗ ˈgü ˗ya ꞊klënŋ ˗a ˗zü. 4 ˈDhɛ ˈö ˗kë ˈˈdhʋ̈, ˈyö ˗puö ˈˈshia˗. ˈYö ˗wo do ˈbhaa man kö ˗ya pö ˗ni ˈgü ˗a ˗dhɛ: «Sɔdhö, Sɔdhö, ˈmën ˗kë ˈü n ˈˈklʋʋ bhɔ?» 5 ˈYö Sɔdhö ˗ya dhɛɛˈˈ kpɔ ˈö˗ pö: «N Dëmɛn, de ˗mü ü ˈka?» ˈYö˗ pö ˗a ˗dhɛ: «Maan Yesu ˗mɛn ˈü n ˈˈklʋʋ bhɔ ˗ni ˈgü bhë man ˗mü. 6 ˗Bhö luuˈˈ kö ˈü ˗da ˈplöö. ˈBha ˗lo mü, ˈpë ü dua ˈdhö ˗mü kö ˈü˗ kë, ˗wo ˗dho ˗a pö ü ˗dhɛ.» 7 ˈÖ ˗kë ˈˈdhʋ̈ kö mɛn ˗nu ˈö waa˗ ˗nu ˈwo kun ˈˈta ˈsü ˗ni ˈgü bhë, ˗wo ˈduaannu ˗sü ˈka mü, kö ˗an ˈˈwɩ ˗dhɛ ˈyaa ˈdhö. ˗Wo ˗kun ˗wo ˈbhaa man ˗ni ˈgü, ˈˈkɛɛ ˈwaa kun ˗kpan ˗ni ˈgü mɛn ˈbhaa ˗bha. 8 ˈYö Sɔdhö ˗yö ꞊luu ˈˈshia˗. ˈKö ˗kë ꞊dhɛ ˗a ˈˈɲan ˗yö ˗kë ˈˈpʋ ˗sü ˈka, ˈyaa kun ˗dhɛ yö ˗ni ˈgü. ˈDhɛ ˈö ˗kë ˈˈdhʋ̈, ˈyö ˈwo ˗ya ˗a ˗kɔ ˗bha ˈö ˈwo ʒiaan bho ˗a ˈka ˈwo dho ˗a ˈka Damasö. 9 ˗Dhɛkpaɔyi ˗yaaga ˈˈpiʋ̈ yö ˈti ˗kpan pë ˈˈwɛɛ ˈbhaa ˗bha, yö ˈti pë ˗bhö ɛɛnˈˈ yö ˈti pë ˈˈwɛɛ ˈbhaa mü.

10 Yesu ˗bha gwëëˈˈ do ˈbhaa ˗yö ˗kë Damasö ˈö ˈwo˗ ˗dhɛ Ananiasö. ˗A ˈˈɲan ˈgü ˗yö ˗da ˈö Dëmɛn ˗ya pö ˗a ˗dhɛ: «Ananiasö!» ˈYö ˗we ˗a ˗gɔ ˈö˗ pö: «꞊Oo, n Dëmɛn.» 11 ˈYö Dëmɛn ˗ya pö ˗a ˗dhɛ: «˗Bhö luuˈˈ ˈü ˈdho ˗kpinŋga ˈwo˗ ˗dhɛ Ʒiaan ˈö dɔ vɛɛdhö bhë ˗a ˗ta, kö gɔndënën ˈwo˗ ˗dhɛ Sɔdhö ˈö go Taasö ˈö Zuda ˗gɔ ˈkɔɔ bhë, ˈü˗ mɛɛnˈˈ. ˗A ˗gɛn ˗mü ꞊dhɛ ˗yö bhɛɛˈˈ ˗ni ˈgü. 12 ˗A ˈˈɲan ˈgü ˗yö ˗da ˈpö ˈö ˗kpan gɔndënën do ˈwo˗ ˗dhɛ Ananiasö ˗a ˗bha kö ˗yö ˗da ˗ni ˈgü ˈkɔɔ, kö ˗yö ö ˗kɔ ˗ya ˗ni ˈgü ˗a ˗ta kö ˗a ˈˈɲan ˗yö ˗dhɛ yö ˈzü.» 13 ˈˈKɛɛ ˈyö Ananiasö ˗ya pö: «N Dëmɛn, gɔndënën ˈö bhë mɛn ꞊vadhɛ ˗wa ˗wɔn ˗blɛɛ, ˈö pë yaa ˈˈpɛpɛ ˈö˗ ˗kë ü ˗bha mɛn ˈˈslʋ̈ʋ̈slʋ̈ ˗nu ˈka Zedhizadhɛmö bhë ˈa˗ man. 14 Nu ˈö˗ wo yö bhë, ˈˈsaabhomɛn ˗nu ˗gɔmɛn ˗nu ˗wo wo ˗wo ˗bho ˗a ˗ta kö mɛn ˈˈpɛpɛ ˈwo ˗dho ü ˈtɔ pö, ˗yö ˗an ˈkun.»* 15 ˈˈKɛɛ ˈyö Dëmɛn ˗ya pö ˗a ˗dhɛ: «˗Bhö ˈdho, ˗a ˗gɛn ˗mü ꞊dhɛ gɔndënën ˈö bhë, yö ˈnën ˈö ˗tɔ mɛn* ˈa n ˗kɔ ˗yɛ ˗a ˗bha kö ˗yö ˈwɔn ˈö ˗gban n ˗bha ˗a blɛɛˈˈ* ˈˈsɛ ˈˈwɛɛ ˈgümɛn ˗nu, ˗gblüdë ˗nu waa Izraɛdhö ˗mɛn ˗nu ˗an ˗dhɛ. 16 ˈWɔn ˈˈgbɩɩ˗ ˗nu ˈö ˗dho bɔ ˗an ˈgü n ˈtɔ ˗wɔn ˈgü, a ˗dho ˗an ˗zɔn ˗a ˗dhɛ ˈkpakpadhö.»

17 ˈDhɛ ˈö ˗kë ˈˈdhʋ̈, ˈyö Ananiasö ˗yö dho. ˈDhɛ ˈö ˗da ˈkɔɔ, ˈyö ö ˗kɔ ˗ya ˗a ˗ta ˈö˗ pö: «Sɔdhö, n ꞊dhegblü, Dëmɛn Yesu ˈö ö ˗de ˗zɔn ü ˗dhɛ ʒiaan ˗ta kö ü nu ˗ni ˈgü ˗dhɛ ˈö yö ˗a ˈgü bhë, yö ˈnën n bɔ, ˗yö kë ˈˈdhʋ̈ kö ü ˈˈɲan ˗yö ˈˈpʋ, kö ˗zuu ˈˈslʋ̈ʋ̈slʋ̈ ˗yö pa ü ˈgü.» 18 ˗Wo ˗to ˈˈshia˗ mü ˈö pë ˈbhaa ˗nu ˈwo ˗kë ꞊dhɛ ˈyuö˗ ꞊kiaa ˗nu ˈdhö ˈwo go ˗a ˈˈɲan ˗nu ˗bha ˈwo ˗puö, ˈö˗ ˈˈɲan ˗yö ˗pʋ ˈö ˗dhɛ yö. ˈDhɛ ˈö ˗kë ˈˈdhʋ̈, ˈyö ꞊luu ˈö ˈwo˗ bɔ ˈˈyi ꞊bhaa, 19 ˈyö pë ˗bhö, ˈö ꞊faan ꞊slɔɔ.

˗Yö ˗to Yesu ˗bha gwëëˈˈ ˗nu ˈˈpiʋ̈ Damasö mü ˈö ˗dhɛkpaɔyi ˈnën ˈbhaa ˗kë, 20 ˈö to mü ˈö ˗ya ˗zlanwopösü ˗bha ˗yakwëë ˗kë ˗a ˈgü ˗kɔ ˗nu ˈgü, ˈö ˈwɔn ˈö ˗gban Yesu ˗bha ˗a ꞊blɛɛ mɛn ˗nu ˗dhɛ, ˈö˗ pö ꞊dhɛ ˗Zlan Gbö ˗mü ˗a ˈka. 21 Mɛn ˈˈpɛpɛ ˈö ˈwo˗ ˗wo man, ˗a ˈwɔn ˗yö ˗an ˗kun ˈö ˈwo˗ pö: «Gɔndënën ˈö kun pë ˈˈdhiʋ̈˗ ꞊gbɔɔnsü kë ˗ni ˈgü mɛn ˈˈpɛpɛ ˈö ˈwo ˈtɔ ˈö bhë ˗a pö ˗an ˈka Zedhizadhɛmö bhë, ˈyaa ˈnën ˈö yö ˗ee? Nu ˈö˗ wo yö, yö ˈti nu kö ˗yö ˗an ˈkun* kö ˗yö ˈdho ˗an ˈka ˗yö ˗an nu ˈˈsaabhomɛn ˗nu ˗gɔmɛn ˗nu ˗dhɛ ˗ee?» 22 Sɔdhö ꞊faan ˗yö ˗kun ˗da ˗ni ˈgü ˈˈdhiʋ̈ ˗kplawo, ˈö˗ ˈˈdhi ˗yö kun ˈˈkan ˗ni ˈgü ˗zlanwopösü ˗bha, ˈö˗ ˈgü ˗pʋ ˈkpakpadhö ꞊dhɛ Yesu ˈnën ˈö ˗tɔ Klito. ˗Yö ˗kun yö ˗ni ˈgü Zuifö ˗nu ˈwo kun Damasö ˗an ˈˈdhi ˗ta, ˈö pë ˈwo ˗dho ˗a kë ˈwaa kun ˗a dɔ ˗ni ˈgü.

23 ˈDhɛ ˈö ˗dhɛkpaɔyi ˈnën ˈbhaa ˗yö ˗ʒiö, ˈyö Zuifö ˗nu ˗wo ˗yakwëë ˗kë, ˈö ˗an ˗wo ˗yö to do kö ˈwo˗ zë. 24 ˈˈKɛɛ pë ˈwo kun ˗a ˈˈpiʋ̈ ˈwo˗ kë ˗a ˈka bhë Sɔdhö ˗ya ˗man. Zuifö ˗nu ˗wo ˗kun ˈpö˗ ˈö bhë ˗a ˈˈkwee ˈˈdhi ˗nu ˗maankë ˗ni ˈgü ˈpö ˗së ˈka ˈɲënŋ˗ ˈgü waa gbeŋ ˗nu ˈka, ˗yö kë ˈˈdhʋ̈ kö ˈwa˗ ˈkun ˈwo˗ zë. 25 ˗A ˗wɔn ˈgü, gbeŋyi do ˈka ˗a ˗bha gwëëˈˈ ˗nu ˗wa ˗ya ꞊töö do ˈgü ˈö ˈwo˗ bɔ ˈpö˗ ˈö bhë ˈˈkplʋʋ ˈˈdhi do ˈbhaa ˈö kun ˗a ˗bha ˗a ˈka ˈwo˗ ꞊yɔɔ ˈˈkpɛnŋdhö.

26 ˈDhɛ ˈö ˗lo Zedhizadhɛmö, ˈyö Yesu ˗bha gwëëˈˈ ˗nu ˈwo mü ˗an ˈˈpiʋ̈ ˗ʒian ꞊mɛɛn. ˈˈKɛɛ ˗an ꞊gban ˈˈpɛpɛ ˗kun ˈˈsuʋ̈ ˗ni ˈgü ˗a ˗gɔ, ˈyö sü ꞊dhɛ ˗a ˗bha ˗kë Yesu ˗bha gwëëˈˈ ˈka ˗sü ˈö bhë, ˈwaa kun ˗a ˈsü ˗ni ˈgü ˈwɔn ꞊dede ˈka. 27 ˈDhɛ ˈö ˗kë ˈˈdhʋ̈, ˈyö Baanabasö ˗ya ˗takun ˈö dho ˗a ˈka bɔmɛn ˗nu ˈˈpiʋ̈. ˗Kɔ ˈö Sɔdhö ˗yö ˗kpan ˗a ˈka Dëmɛn ˗bha ʒiaan ˗ta kö ˗yö ˈdho ˗ni ˈgü Damasö, ˗kɔ ˈö Dëmɛn ˗yö ˈwɔn ꞊blɛɛ ˗a ˈka ˗a ˗dhɛ waa ˗kɔ ˈö Yesu ˗wɔn ꞊blɛɛ ˗a ˈka ˗zogbandhe ˈka Damasö ˗pö ˈgü bhë, ˗ya ꞊gban ˈˈpɛpɛ ˗blɛɛ ˗an ˗dhɛ. 28 ˈDhɛ ˈö ˗kë ˈˈdhʋ̈, ˈyö Sɔdhö ˗yö to ˗an ˈˈpiʋ̈ mü. ˗Yö ˗kun bɔ ˗ni ˈgü Zedhizadhɛmö ˗dhɛ ꞊gban ˈgü* ö ˈflëëgü, ˈö kun ˈwɔn blɛɛˈˈ ˗ni ˈgü ˗zogbandhe ˈka Dëmɛn ˈtɔ ˈgü. 29 ˗Yö ˗kun ˈwɔn blɛɛˈˈ ˗ni ˈgü Zuifö ˗nu ˈö ˈwo Glɛkö ˗wo pö ˗an ˗dhɛ, ˈö waa˗ ˗nu ˈwo kun zɔɔdhe ˗nu ˗man ˗ni ˈgü. ˈˈKɛɛ ˗yö ˗kun ˗an ˈˈpiʋ̈ ꞊dhɛ ˈwo˗ zë. 30 ˈDhɛ ˈö˗ ꞊dhegblü ˗nu ˗wa yö ˈˈdhʋ̈, ˈyö ˈwo dho ˗a ˈka Sezadhe, ˈö ˈwo˗ ˗takun ˈö dho Taasö.

31 ˈDhɛ ˈö ˗kë ˈˈdhʋ̈, ˈyö ˗yadeflëëgüsü ˗yö ˗kë ˗zlanwokɔdhi ˗nu ˈwo Zude ˗sɛ ˗todhʋ̈sü, Galile ˗dhɛ ˗nu waa Samadhi ˗dhɛ ˗nu ˈgü ˗an ˈgü, ˈö ˗an ˗gɛn ˗yö ˗gban. ˈDhɛ ˈö ˗kë ꞊dhɛ ˗wo ˗kun ˈwɔn ˗nu ˗kë ˗ni ˈgü ˗suʋ̈ Zoova ˗gɔ ˗sü ˈka, ˈö ˗zuu ˈˈslʋ̈ʋ̈slʋ̈ ˗yö kun ˗an ˗zo ˗gban ˗ni ˈgü bhë, Yesu ˗bha gwëëˈˈ ˗nu ˗wo ˗kun kë ˗ni ˈgü ꞊va ˗kplawo.

32 ˈˈTʋ̈ŋ ˈö bhë ˗a ˈgü, Piɛɛ ˗yö ˗kun bɔ ˗ni ˈgü ˈˈsɛ ˈö bhë ˗a ˗dhɛ ꞊gban ˈgü, ˈyö dho ˈpö ˗Zlan ˗bha mɛn ˗nu ˈwo Lida ˗an ˈˈpiʋ̈. 33 ˗Dhɛ ˈö bhë ˗a ˈgü, gɔndënën do ˈbhaa ˈwo˗ ˗dhɛ Ene ˗yö ˗kë mü. ˗A ˈˈtʋ̈ŋ ˈö bhë ˗a ˈgü kö ˗ya ˗kwɛ ˈˈsaaga kë ˈlii˗ ˗ta, ˗a ˗gɛn ˗mü ꞊dhɛ ˗a ˗dhɛ ꞊gban ˗yö ˗kun ga ˗sü ˈka ˗a ˗bha. 34 ˈYö Piɛɛ ˗ya pö a ˗dhɛ: «Ene, Yesu Klito ˗ya ü ˗dhɛ bo. ˗Bhö luuˈˈ ˈü ü ˗wɔ ˗a ˗ta ˗pë ˈsü.» Ene ˗yö ˗to ˈˈshia˗ mü ˈö ꞊luu. 35 ˈDhɛ ˈö mɛn ˗nu ˈwo Lida ˗pö waa Sadhɔn ˗dhɛ ˗nu ˈgü ˈwo˗ yö ˈˈdhʋ̈, ˈyö ˈwo wo wë ꞊slëë Dëmɛn ˈˈpiʋ̈.

36 Yesu ˗bha gwëëˈˈ dhebɔ do ˈbhaa ˗yö ˗kun Ʒope ˈö ˈwo˗ ˗dhɛ Tabita. ˗A ˈtɔ ˈö bhë ꞊waa˗ ꞊dhiëëta ˈyö ˗kë «Dɔɔkasö»* ˈka. ˗Yö ˗kun ˈwɔn ˗së ꞊va ꞊dede kë ˗ni ˈgü, ˈö kun gbɔɔdhe ˗nu kë ˗ni ˈgü ˈˈfleemɛn ˗nu ˗dhɛ. 37 ˈˈKɛɛ ˗a ˈˈtʋ̈ŋ ˈö bhë ˗a ˈgü, ˈˈyua ˗yö ˗puö ˗a ˗ta, ˈö ga. ˈDhɛ ˈwo˗ ꞊glöö ˗zu, ˈyö ˈwo dho ˈwo˗ wɔ ˈkɔdhi do ˈbhaa ˈö ˈkɔ ˗ta ˈˈdhuŋ ˗a ˈgü. 38 ˈDhɛ ˈö ˗kë ꞊dhɛ Lida ˗pö ˈyaa kun Ʒope ˗dhɛ ˈka ꞊gblɛɛn, ˈö Yesu ˗bha gwëëˈˈ ˗nu ˗wa man ꞊dhɛ Piɛɛ ˗yö ˈˈkwipö ˈö bhë ˗a ˈgü, ˈyö ˈwo gɔɔn˗ ˗nu ꞊plɛ bɔ mü kö ˗wo bhɛɛˈˈ ˗a ˗dhɛ ˗wa pö: «˗Bhö dɔ ˈˈgbɩɩ˗ ˈü nu yi ˈˈpiʋ̈ ˈzozodhö.» 39 ˈDhɛ ˈö ˗kë ˈˈdhʋ̈, ˈyö Piɛɛ ˗yö ꞊luu ˈö ˗ʒiö ˗an ꞊kee˗. ˈDhɛ ˈö ˗lo mü, ˈyö ˈwo dho ˗a ˈka ˈkɔdhi ˈö ˈkɔ ˗ta ˈˈdhuŋ bhë ˗a ˈgü. ˈYö ꞊gɛandhe ˗nu ˈˈpɛpɛ ˗wo ꞊ɲɔɔn ˗a ˗bha ˈgbʋ ˈka, kö ˗wo ˈˈbheenën ˗nu waa sɔ ꞊va ˈˈwɛɛ ˈbhaa ˗nu ˈö Dɔɔkasö ˗yö ˗an ˗yö ˗kë kö ˗yö ꞊kun ˈö ˈˈɲaan bhë, ˗an ˗zɔn ˗ni ˈgü ˗a ˗dhɛ. 40 ˈDhɛ ˈö ˗kë ˈˈdhʋ̈, ˈyö Piɛɛ ˗ya pö mɛn ꞊gban ˈˈpɛpɛ ˗dhɛ ˗wo yö ˈˈkpɛnŋ, ˈyö yö ö kpɔn ˈgü ˈö ˗ya bhɛɛˈˈ ˗sü ˗bha. ˈDhɛ ˈö ö bo, ˈyö ö wë ꞊slëë mɛn ꞊glöö ˈö bhë ˗a ˈˈpiʋ̈ ˈö˗ pö: «Tabita, ˗bhö luuˈˈ!» ˈYö Dɔɔkasö ˗yö ö ˈˈɲan ˗pʋ ˈö ˗kpan Piɛɛ ˗bha, ˈö ꞊luu ˈö ˗ya ö ˗gɛan. 41 ˈDhɛ ˈö ˗kë ˈˈdhʋ̈, ˗yö Piɛɛ ˗yö ö ˗kɔ ˗da ˗a ꞊kwɛɛ˗ ˈö˗ dɔ ö ˗gɛan. ˈYö ˗Zlan ˗bha mɛn ˈˈslʋ̈ʋ̈slʋ̈ ˗nu waa ꞊gɛandhe ˗nu ˗dhɛ, ˈyö˗ ˗zɔn ˗an ˗dhɛ kö ˗yö ˈˈbhɩɩ˗. 42 ˈWɔn ˈö bhë, Ʒope ˗mɛn ˗nu ꞊gban ˈˈpɛpɛ ˗wa ˗man, ˈö mɛn ꞊vadhɛ ˗wo wo ˗zo yö Dëmɛn ˗dhɛ. 43 Piɛɛ ˗yö ˗to Ʒope mü ˈö ˗dhɛkpaɔyi ˈnën ˈbhaa ˗kë gɔndënën do ˈwo˗ ˗dhɛ Simɔn, ˈö ˗kë wü kwi ˗yökëmɛn ˈka ˗a ˗gɔ ˈkɔɔ.