Yesu ˗bha bɔmɛn ˗nu këwɔn ˗nu
24 ˈDhɛ ˈö ˗dhɛkpaɔyi ˈˈsoodhu ˗yö ˗ʒiö, ˈyö ˈˈsaabhomɛn ˈkpii˗ Ananiasö ˗yö mɛn zii ˈbhaa ˗nu waa zadhüsümɛn* do ˈö ˈwo˗ ˗dhɛ Tɛɛtudhusö ˗an kpa ö ˗bha ˈö ˈwo nu ˈwo Pɔdhö ˗ta ˗zɔn ˈˈsɛ ꞊kɔɔnmɛn ˗dhɛ. 2 ˈDhɛ ˈwo˗ ˗dhɛ, ˈyö Tɛɛtudhusö ˗yö ˗ya Pɔdhö ˗ta ˗zɔn ˗sü ˗bha Felisö ˗dhɛ ˈö˗ pö:
«Bhi ˈnën ˈö ü ˈsaa˗ ˈgü ˈö ˗yadeflëëgüsü ˈdhö yi ˗gɔ ꞊dedewo, ˈö ü ˗bha ˈwɔndɔdhe ꞊yaa˗ kë ˈwɔn ꞊vadhɛ ˗ya ˈgo ˈˈgblʋʋ ˈˈsɛ ˈö yö ˗a ˈgü. 3 ˗A ˗wɔn ˈgü, mɛn ꞊bhlëësü Felisö, yi˗ ˈˈpiʋ̈ ˈyi ü ˈˈnuɛ bho ꞊dedewo yi ꞊gban ˈˈpɛpɛ ˈka, ˗dhɛ ꞊gban ˈˈpɛpɛ ˈgü. 4 ˈYaa n ˈˈpiʋ̈ ˈa ü ˗bha ˈˈtʋ̈ŋ ꞊va ˈsü, ˈˈkɛɛ a ˗bhɛɛ ü ˗dhɛ kö ˈü ü zuʋ̈ˈˈ kë ˗saa ˈü ü ˈˈtʋ ˈto yi ˗bha ˈˈtʋ̈ŋ ˈnën ˈdɛdɛ ˈˈpiʋ̈. 5 ˈYi˗ ˈˈpiʋ̈ kö ˗a ˈwɔn ˗yö kë ü ˈˈɲan ꞊dhɛ gɔndënën ˈö yö, ˗yö ꞊dhɛ ˗sü ˈkwëë˗ ˗yua ˈdhö.* ˗Yö Zuifö ˗nu ˈˈpɛpɛ ˈwo ˗dhɛ ꞊gban ˈgü ˈˈsɛ ˗ta ˗an ˗blü ˗ni ˈgü ˗gban ˈˈsɛ ꞊kɔɔnmɛn ˗gɔ ˗sü ˗bha. Nazadhɛtö ˗mɛn ˗nu ˗bha ˗zlanwo ˗dɛɛ ˈö bhë ˗a ˗gɔmɛn do ˗mü ˗a ˈka. 6 ˗Ya ˈˈslö ˗mɛɛn ˈpö kö ˈö ˗dhii ˗ya ˗Zlan ˗dhɔkë ˗a ˈgü ˗kɔ ˗bha. Yö ˈnën ˈö˗ ˗wɔn ˈgü ˈyi˗ kun. 7 —— 8 ˈBha˗ dhɛɛˈˈ ˈkpɔ bhi ꞊dede ü ˗dho ˗a yö ꞊dhɛ pë ˈˈpɛpɛ ˈö ˈyi˗ ꞊blɛɛ ˗a ˗bha bhë gagade ˗mü.»
9 Zuifö ˗nu ˗wo wo ˗wo ˗zuö pë ˈö˗ pö bhë ˗a ˗ta, ˈö ˈwo˗ pö ˗yö ˗kë ˈˈdhʋ̈ ꞊dedewo. 10 ˈDhɛ ˈö ˈˈsɛ ꞊kɔɔnmɛn ˗yö ˈwɔn blɛɛˈˈ ˗sü nu Pɔdhö ˗dhɛ ö ˗kɔ ˈgü, ˈyö Pɔdhö ˗ya pö:
«A˗ ˈwɔn ˗dɔ ꞊dhɛ ü ˈˈsɛ ˈö yö ˗a ˈgümɛn ˗nu ˗bha zakanmɛn ˈka ˗a ˗kwɛ ˗ya kë ꞊va. ˗A ˗wɔn ˈgü, ˗dɔ ü ˗kuu ˈˈdhiʋ̈ ˗sü kö ˈwɔn ˈwo˗ ˗ya n ˗bha bhë, n ˗man ˈö˗ ˈgü ˈa˗ pö ˗yö n ˗zo ˗kun. 11 ˈWɔn ˈa ˗dho ˗a blɛɛˈˈ yö ˗ya kë ꞊dhɛ ꞊sua ˗mü, bhi ꞊dede ü ꞊mɔɔn˗ ˗bha ˈü mɛn ˗nu dhɛɛˈˈ kpɔ. ˈDhɛ ˈa dho ˗Zlan ˗dhɔkë Zedhizadhɛmö, ˗a ˗dhɛkpaɔyi yö ˈti ʒiö ˗kɔŋ do ö ga ꞊plɛ (12) ˗ta ꞊köŋ. 12 Wo ˈti ˗kpan n ˗bha kö a zɔɔdhe ˗man ˗ni ˈgü mɛn ˈbhaa ˈka ˗Zlan ˗dhɔkë ˗a ˈgü ˗kɔ ˈgü. Wo ˈti ˗kpan n ˗bha ˈpö kö a mɛn ˗nu ˗dhɛ ˗ni ˈgü wo ˈkwëëdhö ˗yakwëë ˗kë ˗a ˈgü ˗kɔ ˗nu ˈgü ɛɛnˈˈ ˈplöö mü. 13 ˈWɔn ˗nu ˈwo ˗an ˗ya ˗ni ˈgü n ˗bha ꞊dɛɛ yö, pë ˈbhaa ˈö ˗dho ˗a ˗zɔn ꞊dhɛ gagade ˗mü, ˈyaa ˗an ˗gɔ. 14 ˈˈKɛɛ pë ˈa˗ dɔ, ˈa˗ ˈˈpiʋ̈ ˈa˗ pö ü ˗dhɛ ˈyö ˗tɔ ʒiaan ˈö ˈwo˗ ˗dhɛ ˗ni ˈgü ꞊dɛɛ ˗zlanwo ˗dɛɛ bhë, yö ˈnën ˈa to ˗a ˈˈpiʋ̈ ˈö ˈa yö kë ˗ni ˈgü n ˈˈbhɛman ˗nu ˗bha ˗Zlan ˗dhɛ, ˈyö sü ꞊dhɛ a n ˗zo ˗yö pë ˈˈpɛpɛ ˈö ˈTɔŋ˗ ˗ya pö waa pë ˈö ˗bɛnzë ˗sü ˈka ˗Zlan ˗wodhiʋ̈lomɛn ˗nu ˗bha ˈsëëdhɛ ˈgü bhë ˗a ˗dhɛ. 15 A n ˗zo ˗yö ˗Zlan ˗dhɛ, ˈö mɛn ˗nu ˈwo yö ˈwo wo ˗zo yö ˈˈdhʋ̈ ˈpö, ꞊dhɛ mɛn kpɛnŋdhö ˗nu waa mɛn ˗nu ˈö ˈwaa kpɛnŋdhö ˗wo ˗dho ˈgo ga ˈgü. 16 ˈYö ˈnën ˈö˗ ˗wɔn ˈgü ˈa n ˈgü dɔ ˈˈgbɩɩ˗ ˗kplawo kö n zuʋ̈ˈˈ ˈyaa ˗dho za dɔ n ˗bha ˗Zlan waa mɛnbhɩɩdhe ˗nu ˗an ˈˈɲan ˈˈdhiʋ̈. 17 ˈDhɛ ˈa ˗kwɛ ꞊va ˗kë ˈˈta ˈgü, ˈyö ˈa n ꞊yɛɛ ˗kë ˈa nu kö ˈa gbɔɔdhe kë n ˗man ˈˈsɛgümɛn ˗nu ˗gɔ, kö ˈa ˈˈsaa˗ ˗nu bho. 18 Yö ˈa kun ˗a kë ˗ni ˈgü ˈyö bhë. ˈDhɛ ˈwo ˗kpan n ˗bha ˗Zlan ˗dhɔkë ˗a ˈgü ˗kɔ ˈgü, kö pë ˈö ꞊waa˗ kë ˈö ˈwo ˗kë ˈˈslʋ̈ʋ̈slʋ̈ bhë, ˈman n bo ˗a kë ˗sü ˈka. Wo ˈti ˗kpan n ˗bha kö ˈman mɛn ˗nu ˗dhɛ wo ˈkwëëdhö ɛɛnˈˈ kö a ˗bhluubhluudhe ˗da ˗ni ˈgü. Zuifö ˈbhaa ˗nu ˈwo go Azi ˗sɛ ˈgü ˗wo ˗kë mü. 19 ˗An dua ˗mü ˗be kö ˗wo kë ü ˗kuu ˈˈdhiʋ̈ yö, kö pë yaa ˈa˗ ˗kë ˈwo˗ yö n ˗bha ˗wa pö. 20 Ɛɛnˈˈ ˈzü ˗a mɛn ˗nu ˈwo yö wo ꞊dede ˗wo ˈwɔn yaa ˈa˗ ˗kë ˈö ˈwo˗ yö n ˗bha kö a zakanmɛn ˗nu ˗kuu ˈˈdhiʋ̈ bhë ˗a pö. 21 ˈYaa ˈˈdhʋ̈ pë dosɛnŋ ˈö ˈa˗ pö n ˗wo ˗ta kö a dɔ ˗sü ˈka ˗an ꞊zinŋgü mü ˈyö ˗tɔ: ‹˗Zo ˗yö mɛn ˗nu ˈö ˗wa ga ˗an ˗bha ˗go ga ˈgü ˗sü ˗dhɛ ˗sü ˈnën ˈwo˗ ˗za dɔ ˗ni ˈgü n ˗bha ka ˗kuu ˈˈdhiʋ̈ bhë.›»
22 ˈˈKɛɛ ˈdhɛ ˈö ˗kë ˈˈdhʋ̈, ˈyö Felisö ˈö ˈwɔn ˈö ˗gban Ʒiaan ˈö bhë ˗a ˗bha ˗a dɔ ˗së ˈka bhë, ˗yö za ˈö bhë ˗a dɔ ˗yi ˈˈwɛɛ kpɔ ˈö˗ pö ˗an ˗dhɛ: «ˈˈSɔdha ˗gɔmɛn ˈkpii˗ Liziasö ˗ya nu kö ka ˗bha ˈwɔn ˈö bhë n ˗man ˈa˗ yö ˗a ˈgü ˈa˗ pö ka ˗dhɛ.» 23 ˈDhɛ ˈö ö bo ˗a ˗pö ˈˈdhʋ̈ ˗sü ˈka, ˈyö˗ pö ˈˈsɔdha ˗gɔmɛn ˗dhɛ ˗yö ˈdho Pɔdhö ˈka kö ˗wa ˗maan kë, ˈˈkɛɛ ˗wo ˈwɔn ˈbhaa ˗nu kë ˗sü ˗potaadhe nu ˗a ˗dhɛ, kö ˗wo ˈˈwɩ ˗a ˗bha kö ˈa ˈˈtɛɛbɔ ˗nu ˗wo nu ˗wo wo ˗zo kë ˗a ˈˈpiʋ̈.
24 ˈDhɛ ˈö ˗dhɛkpaɔyi ˈnën ˈbhaa ˗yö ˗ʒiö, ˈyö Felisö waa˗ ˗bha dhebɔ Drusidhö ˈö Zuifö ˈka ˈwo nu, ˈyö mɛn bɔ kö ˗wo nu Pɔdhö ˈka kö ˈwɔn ˈö ˗gban ˗zo ˗yö Yesu Klito* ˗dhɛ ˗sü ˗bha ˗wa ˈgü ˈˈpʋ ö ˗dhɛ kö ˈö˗ man. 25 ˈˈKɛɛ ˈdhɛ ˈö Pɔdhö ˗yö ˈwɔn ˈö ˗gban ˗kë kpɛnŋdhö ˗sü, ˗mɔn ö ˗de ꞊sɔŋ ˗bha ˗sü waa ˗Zlan ˗bha za ˈö nu ˗ni ˈgü bhë ˗an ˗bha ˗a ꞊blɛɛ, ˈyö ˈˈsuʋ̈ ˗yö ˗da Felisö ˈgü ˈö˗ pö: «˗Bhö ˈdho ꞊köŋ, ˈman ˈˈtʋ̈ŋ ˈnën ˈbhaa ꞊slɔɔ ˈzü kö ˈa ü ˗dhɛ.» 26 ˗A ˗bha ˈgü ˗be Pɔdhö ˗dho ˈmën ö ˈˈpiʋ̈ ˈwëëga ˈka. ˗A ˈwɔn ˈgü, ˗yö ˗kun ˗a ˗dhɛ ˗ni ˈgü ꞊shiöŋ ꞊shiöŋ kö waa˗ ˗nu ˈwo ˈˈdoo dɔ. 27 ˈDhɛ ˈö ˗kwɛ ꞊plɛ ˗yö ˗ʒiö, ˈyö Pɔɔsiusö Fɛtusö ˗yö ˗kë ˈˈsɛ ꞊kɔɔnmɛn ˈka Felisö ˈˈgblʋʋ ˈgü. ˈˈKɛɛ ˈdhɛ ˈö ˗kë ꞊dhɛ ˗yö ˗kun Felisö ˈˈpiʋ̈ ꞊dhɛ ö ˈˈdhiaa ˗yö ˈto Zuifö ˗nu ˈgü, ˗yö Pɔdhö ˗to ˗kaso ˈgü.