Nɔɔn˗ ˗së ˈsëëdhɛ ˈö Zan ˗ya ˗bɛnzë

19 ˈDhɛ ˈö ˗kë ˈˈdhʋ̈, ˈyö Pidhatö ˗yö ö ˗wo bho ˈˈsɔdha ˗nu ˗ta, ˈyö ˈwo Yesu kun ˈwo˗ ˗man ˗klaaga ˈka. 2 ˈYö ˈˈsɔdha ˗nu ˗wo ˗gblüdëdhɛ ˈfaan˗ do bɔ ˈˈglɛɛn ˈka ˈwo˗ ˗ya ˗a ˗gɔa ˈö ˈwo gblɔŋ do ˈö˗ ˈˈɲan ˈdhö ˈgɔɔ˗ ˈˈyi ˗sü ˗a ˗da ˗bha. 3 ˈYö ˈwo ꞊ɲɔɔn ˗a ˗bha ˈwo˗ pö: «Zuifö ˗nu ˗bha ˗Gblüdë, ˈbha ꞊bo!» ˈÖ kun ˈˈdhʋ̈ kö ˗wa ˗gɔ ˗man ˗ni ˈgü ˈpö. 4 ˈYö Pidhatö ˗yö yö ˈˈkpɛnŋ ˈzü ˈö˗ pö mɛn ꞊va ˈwo bhë ˗an ˗dhɛ: «˗Ka ka ˈˈtʋ ˈto, a nu ˗ni ˈgü mɛn ˈö bhë ˗a ˈka ka ꞊dhiaa ˈˈkpɛnŋdhö. A˗ ˗kë ˈˈdhʋ̈ kö ˈka˗ ˈwɔn dɔ ꞊dhɛ ˈwɔn yaa ˈö ˈa ˗dho ˗a yö ˗a ˗bha ˈyaa ˈdhö.» 5 ˈDhɛ ˈö˗ pö ˈˈdhʋ̈, ˈyö Yesu ˗yö yö ˈˈkpɛnŋ kö ˈˈglɛɛn ˈfaan˗ ˗ya ˗gɔa, ˈkö gblɔŋ ˈö˗ ˈˈɲan ˈdhö ˈgɔɔ˗ ˈˈyi ˗sü bhë ˗ya ˗bha. ˈYö Pidhatö ˗ya pö ˗an ˗dhɛ: «˗Ka ˗dhɛ ˗ga, mɛn ˈö bhë yö ꞊nɛn.» 6 ˈDhɛ ˈö ˈˈsaabhomɛn ˗nu ˗gɔmɛn ˗nu waa ˗Zlan ˗dhɔkë ˗a ˈgü ˗kɔ ˗maankëmɛn ˗nu ˗wo ˗kpan ˗a ˗bha, ˈyö ˈwo ˗gbla ˈwo˗ pö: «˗Bhö ˗a dɔ ˈˈdhü ˗bha! ˗Bhö ˗a dɔ ˈˈdhü ˗bha!»* ˈYö Pidhatö ˗ya pö ˗an ˗dhɛ: «Ka ꞊dede ˗kaa ˈkun ˈka ˈdho ˗a ˈka kö ˈka˗ zë,* ˈyö sü ꞊dhɛ ˈwɔn yaa ˈbhaa ˈa ˗dho ˗a yö ˗a ˗bha ˈyaa ˗dhö.» 7 ˈYö Zuifö ˗nu ˗wa pö ˗a ˗dhɛ: «Yi ˗bha ˈtɔŋ˗ do ˈbhaa ˗yö ˗dhö. ˗A ˈtɔŋ˗ ˈö ˈˈdhʋ̈ ˗ya ˗zɔn ꞊dhɛ ˗a dua ˗mü kö ˗yö ga, ˗a ˗gɛn ˗mü ꞊dhɛ ˗ya ö ˗de kë ˗Zlan gbö ˈka.»

8 ˈPë ˈwo kun ˗a pö ˗ni ˈgü bhë ˈdhɛ ˈö Pidhatö ˗ya man, ˈyö ˈˈsuʋ̈ ˗yö ˗da ˗a ˈgü ˈzü ꞊dedewo, 9 ˈyö ö ꞊yɛɛ ˗kë ˈö ˗da ˈˈsɛkɔɔnmɛn ˗bha ˈkɔ ˈö bhë ˗a ˈgü, ˈyö˗ pö Yesu ˗dhɛ: «˗Dhɛ ˗mɛɛn ˈü go ˗a ˗bha?» ˈˈKɛɛ Yesu yö ˈti˗ ˗yɔ bɔ ˗a ˗gɔ. 10 ˈDhɛ ˈö ˗kë ˈˈdhʋ̈, ˈyö Pidhatö ˗ya pö ˗a ˗dhɛ: «ˈBhaa˗ ˈˈpiʋ̈ kö ˈü ˈˈwɩ n ˗gɔ ˗ee? ˈBhaa˗ ˈwɔn dɔ ꞊dhɛ ˗a ˈˈse ˗yö n ˗dhɛ kö ˈa n ꞊kwaa ü ˗zü ɛɛnˈˈ kö ˈa˗ pö ˗wo ü zë* ˗ee?» 11 ˈYö Yesu ˗ya pö ˗a ˗dhɛ: «˗Ya kë ꞊dhɛ ˗Zlan ˈö dhaŋ˗ ˈgü yö ˈti ˈˈwɩ ˗a ˗bha ˗be, ˗a ˈˈse ˈyii ˗dho kë ü ˗dhɛ kö ˈü pë ˈˈoo ˗pë kë n ˈka. Yö ˈnën ˈö˗ ˗wɔn ˈgü ˈö mɛn ˈö n ˗da ü ꞊kwɛɛ˗ bhë ˗a ˗bha ˈwɔn yaa ˈdhö ꞊gbɔɔnsü ˈö ˗ʒiö ˗a ˈka mü.»

12 ˗A ˗wɔn ˈgü Pidhatö ˗kun ˗a ˈˈslö mɛɛnˈˈ ˗ni ˈgü ˗kplawo kö ˈö ö ꞊kwaa˗ ˗zü. ˈˈKɛɛ Zuifö ˗nu ˗wo ˗kun ˈˈgbla ˗ni ˈgü ˈwo˗ pö: «Kö ˈü ü ꞊kwaa gɔndënën ˈö bhë ˗a ˗zü, kö Sezaa ˈˈtɔŋdë ˈyaa ˗mü ü ˈka. ˗A ˗gɛn ˗mü ꞊dhɛ, mɛn ˈˈoo ˗mɛn ˈö ö ˗de ˗kë ˗gblüdë ˈka, kö ˗ya ˗gban Sezaa ˗gɔ.»* 13 ˈDhɛ ˈö Pidhatö ˗yö ˗wo ˗nu ˈwo bhë ˗an man, ˈyö nu Yesu ˈka ˈˈkpɛnŋdhö, ˈyö ˈɲaannu za ˗dɔ ˗a ˈgü ˗gbloo do ˈgü ˗dhɛ ˈwo ˈˈshiadhɛ ˗yö ˗kë ˗gwö ˈka ˈö ˈwo˗ ˗dhɛ Eblö ˗wo ˈgü Gabata bhë ˗a ˈgü. 14 ˗Yö ˗kë ˈˈdhʋ̈ Pakö ˈwlaan˗ ˗wayi ˈka, kö ˈɲaan˗ ˗ya ˗ya mɛn ˗gɔ ꞊zinŋgü.* ˈYö Pidhatö ˗ya pö Zuifö ˗nu ˗dhɛ: «˗Ka ˗dhɛ ˗ga, ka ˗bha ˗gblüdë ˈnën ˈö yö!» 15 ˈˈKɛɛ ˈyö ˈwo ˗gbla ˈwo˗ pö: «˗A zë! ˗A zë! ˗Bhö ˗a dɔ ˈˈdhü ˗bha!» ˈYö Pidhatö ˗ya pö ˗an ˗dhɛ: «ˈA ka ˗bha ˗gblüdë zë ˗ee?» ˈYö ˈˈsaabhomɛn ˗nu ˗gɔmɛn ˗nu ˗wa pö: «Yi ˗bha ˗gblüdë ˈˈwɛɛ ˈbhaa ˈyaa ˈdhö kö yö ˈti kë Sezaa ˈka.» 16 ˈDhɛ ˈö ˗kë ˈˈdhʋ̈, ˈyö ö ꞊kwaa˗ Yesu ˗zü ˗an ˗gɔ kö ˗wa zë ˈˈdhü ˗bha.

ˈYö ˈwo Yesu sü ˈwo dho ˗a ˈka. 17 Yesu yö ꞊dede ˗yö ö ˗bha ˗ga ˗a ˗ta ˗dhü ˗sü ˈö ˗ya ˈdho ˗sü ˗bha ˗a ˈka ˗dhɛ ˈwo˗ ˗dhɛ mɛn ˗gɔ ˈˈklaŋ ˗lo ˗dhɛ bhë ˗a ˈgü. ˗Dhɛ ˈö bhë ˗wa ˗dhɛ Eblö ˗wo ˈgü Gɔlügota. 18 ˈDhɛ ˈwo ˗lo mü, ˈyö ˈwo Yesu waa gɔndënën ꞊plɛ ˗an dɔ ˈˈdhü ˗bha. ˗Wa mɛn do ˗dɔ ˗a ˗kɔ ˗së ˈgü, ˈö ˈwo˗ mɛn do dɔ ˗a ꞊kwaa˗ ˈgü, ˈyö yö ˗zë ˈö ˗kë ˗an ꞊zinŋgü. 19 Pidhatö ˗yö ˗wo do ˈbhaa ˗bɛnzë ˈpö ˈö˗ ꞊nënŋ Yesu ˗bha ˗ga ˗a ˗ta ˗dhü ˈö bhë ˗a ˗bha. Pë ˈö kun ˗bɛnzë ˗sü ˈka ˈyö ˗tɔ: «Yesu ˈö go Nazadhɛtö, Zuifö ˗nu ˗bha ˗Gblüdë.» 20 ˗Wo ˈö bhë Zuifö ˗nu ꞊vadhɛ ˗wa ˗wo ˗pö, ˗a ˗gɛn ˗mü ꞊dhɛ ˗dhɛ ˈwo Yesu dɔ ˈˈdhü ˗bha ˗a ˗bha bhë ˈyaa kun ˈpödhɛ ˈka ꞊gblɛɛn. ˗Ya ˈgo mü ˈzü, ˗a ˗wo ˈö ˈˈdhʋ̈ ˗yö ˗kun ˗bɛnzë ˗sü ˈka Eblö ˗wo, Latɛn ˗wo waa Glɛkö ˗wo ˗an ˈgü. 21 ˈˈKɛɛ ˈyö Zuifö ˗nu ˗bha ˈˈsaabhomɛn ˗nu ˗gɔmɛn ˗nu ˗wa pö Pidhatö ˗dhɛ: «‹Zuifö ˗nu ˗bha ˗Gblüdë› ˈü˗ ˗ya bhë ˗a bho mü, kö ˈü˗ pö ꞊ʒiaan ˗ya ˗pö: ‹Zuifö ˗nu ˗bha ˗Gblüdë ˗mü n ˈka.›» 22 ˈYö Pidhatö ˗ya pö ˗an ˗dhɛ: «Pë ˈö ˈman˗ ˗bɛnzë, kö ˈman˗ ˗bɛnzë.»

23 ˈDhɛ ˈö ˈˈsɔdha ˗nu ˗wo wo bo Yesu dɔ ˗sü ˈka ˈˈdhü ˗bha, ˈyö ˈwo˗ ˗bha sɔ ˗nu sü ˈwo ˗an ˗gblü ˗yiishiö, ˈyö ˈˈsɔdha ˈdhɛ ˈö ˗dhö ˈö˗ do sü. ˈDhɛ ˈwo go mü, ˈyö ˈwo˗ ˗bha sɔ ˈö˗ ˗da sɔ ꞊löö bhë ˗a sü. Sɔ ˈwo˗ bɔ ˈö ˈwo go ˗a ˈka ˈˈdhuŋ ˈwo ꞊yɔɔ ˗a ˈka yö ˗mü, ˗a ˗wɔdhɛ ˈˈwɛɛ ˈbhaa ˈyaa kun ˗a ˗bha. 24 ˈYö ˈwo˗ pö wo ˈko ˗nu ˗dhɛ: «ˈKwaa ˗dho ˗a blëëˈˈ, ˗kwa ˗zë ˈˈkpʋ̈ü kë ꞊ʒiaan kö mɛn ˈö ˗dho ˈto ˗a ˗gɔ ˈkwa˗ dɔ.» ˗Yö ˗kë ˈˈdhʋ̈ kö pë ˈö ˗Zlan ˗Wo ˗ya to ˈˈdhiʋ̈ ˈö˗ pö bhë ˗yö yökodhiʋ̈. ˗Ya ˗pö: «˗Wo n ˗man sɔ ˗nu ˗gblü wo ˈko ˗nu ˗ta, ˈö ˈwo ˗zë ˈˈkpʋ̈ü ˗kë n ˗man sɔ ˗nu ˗wɔn ˈgü.» Pë ꞊dede ˈö ˈˈsɔdha ˗nu ˗wa ˗kë ˈyö bhë.

25 Yesu dhe waa ö ꞊dhegblü dhebɔ ˗wo ˗kun dɔ ˗sü ˈka ˗a ˗bha ˗ga ˗a ˗ta ˗dhü ˈˈsuee mü. Madhi ˈö ˗kë Kleopasö ˗bha dhebɔ ˈka waa Madhi ˈö go Madala* ˗wo ˗kun mü ˈpö. 26 ˈDhɛ ˈö Yesu ˗yö ˗kpan ö dhe waa˗ ˗bha gwëëˈˈ ˈdhɛ ˈö˗ ˗dhɔ ˗ya ˗kë bhë ˗an ˗bha kö ˗wo dɔ ˗sü ˈka ˗a ˈˈsuee mü, ˈyö˗ pö ö dhe ˗dhɛ: «Dhebɔnën, ü gbö ˈnën ˈö dɔ bhë.» 27 ˈYö go mü ˈö˗ pö ö ˗bha gwëëˈˈ ˈö bhë ˗a ˗dhɛ: «Ü dhe ˈnën ˈö dɔ bhë.» ˈÖ sü ˈˈtʋ̈ŋ ˈö bhë ˗a ˗bha, Yesu ˗bha gwëëˈˈ ˈö bhë ˗yö ö ˗kɔ ˗kpɔ ˗a dhe ˗gɔ ˈö˗ ˗ya ö ˗gɔ ˈˈkwɛnŋdhö.

28 ˈDhɛ ˗ya ö bo kë ˗sü ˈka ˈˈdhʋ̈, ˈö Yesu ꞊yaa˗ ˈwɔn dɔ ꞊dhɛ pë ꞊gban ˈˈpɛpɛ ˈˈdhiʋ̈ ˗ya ˗mɔn ˈˈkwöö, ˈyö˗ pö: «ˈˈYi mü ˗dhɔ ˗ya n ˈkun.» ˗Yö ˗kë ˈˈdhʋ̈ kö pë ˈö ˗Zlan ˗Wo ˗ya pö ˗yö yökodhiʋ̈. 29 ˈˈSɛgbɔ do ˈbhaa ˗yö ˗kun mü ˈö kun pa ˗sü ˈka we giisü ˈka. ˈDhɛ ˈö ˗kë ˈˈdhʋ̈, ˈyö ˈwo ˗fuu ˗ya ˈˈdhü ˈwo˗ ˗dhɛ izɔpö* bhë ˗a ˈˈdhiʋ̈ ˈö ˈwo˗ ˗sɔ we ˈö bhë ˗a ꞊bhaa ˈö ˈwo˗ ˗zɔn Yesu ˈˈdhi ˈka. 30 ˈDhɛ ˈö Yesu ˗yö ö ˗bɛn ˗yɛ we giisü ˈö bhë ˗a ˗bha, ˈyö˗ pö: «˗Ya yökodhiʋ̈!» ˈYö ö ˗gɔ ˈˈgblëënnu, ˈö to mü ˈö ga.*

31 ˈDhɛ ˈö ˗kë ꞊dhɛ ˈwɔn ˗nu bhë ˗wo ˗kë ˗dhɛkpaɔyi ˈö ˈwo wo ˗de ꞊baa ˗a ˈka ꞊Glooyi ˗bha bhë ˗a ˈka, ˈyö Zuifö ˗nu ˗wo ꞊bhɛɛ Pidhatö ˗dhɛ kö ˗ya pö mɛn ˗nu ˈwo ˗an dɔ ˈˈdhü ˗bha bhë ˗wo ˗an ˗gɛn ˗nu yɛɛˈˈ, kö ˗wo ˗an ꞊glöö bho ˈˈdhü ˗bha. ˗Wa ˗kë ˈˈdhʋ̈ kö ˗an ꞊glöö ˈyaa ˗dho ˈto ˈˈdhü ˗bha ˈö ꞊Glooyi ˗yö ˗wo ˗a ˗bha, (ˈyö sü ꞊dhɛ ꞊Glooyi ˈdhɛ ˈö bhë, ˗yö ˗kun ꞊Glooyi ˈkpii˗ do ˈbhaa ˈka). 32 ˈDhɛ ˈö ˗kë ˈˈdhʋ̈, ˈyö ˈˈsɔdha ˗nu ˗wo nu ˈö ˈwo mɛn ˗blɛɛsü ˗gɛn ˗nu ꞊yɛɛ, ˈö ˗a mɛn ˈˈwɛɛ do ˈö kun ˈˈdhü ˗bha Yesu ˈˈsuee bhë ˈwo˗ ˗gɛn ˗nu ꞊yɛɛ ˈpö. 33 ˈˈKɛɛ ˈdhɛ ˈwo yö Yesu ˗bha, ˈyö ˈwo˗ yö ꞊dhɛ ˗ya ga ˈsaadhö, ˗a ˗wɔn ˈgü wo ˈti˗ ˗gɛn ˗nu yɛɛˈˈ. 34 ˈYö ˈˈsɔdha ˗nu bhë ˗a mɛn do ˗yö Yesu zua ˈdünën ˈka ˗a ˈˈsɛn ˈˈpiʋ̈, ˈyö to mü ˈö ꞊ɲɔɔn waa ˈˈyi ˗wo ˗ya ˈgo ˗sü ˗bha ˗a ˈgü. 35 Mɛn ˈö˗ ˈˈɲan ˗yö ˗da ˈwɔn ˈö bhë ˗a ˈgü, yö ˈnën ˈö˗ ˗gɛn bho yö, ˗yö kë ˈˈdhʋ̈ kö ˗a ˈwɔn ˈö ˈˈdhʋ̈ ˈka ka ˗zo yö ˗a ˗dhɛ. ˗A ˗bha ꞊gbɛkiödhɛ ˈö˗ ˗kë bhë ˈyaa ꞊sua ˈka, yö ꞊dede ˗ya ˈwɔn ˗dɔ ꞊dhɛ pë ˈö˗ pö bhë gagade ˗mü. 36 ˈWɔn ˗nu ˈwo bhë, ˗wo ˗kë ˈˈdhʋ̈ kö pë ˈö ˗Zlan ˗Wo ˗ya pö ˗yö yökodhiʋ̈. ˗Ya ˗pö: «˗A ga dosɛnŋ ˗ʒiaan ˈyii ˗dho yɛɛˈˈ.» 37 ˗Ya ˈgo mü ˈzü, ˗Zlan ˗Wo ˈˈpian ˈˈwɛɛ ˈbhaa ˗ya ˗pö ꞊dhɛ: «Mɛn ˈö ˈwo˗ zua bhë ˗wo ˗dho wo ˗gɔ ˈˈdhiʋ̈ luuˈˈ ˈö ˈwo˗ ˗ga.»

38 ˈDhɛ ˈö ˈwɔn ˗nu ˈwo bhë ˈwo wo bo kë ˗sü ˈka, ˈyö Zozɛfö ˈö go Adhimate ˈö dho ˈö yö Pidhatö ˗bha kö ˗yö Yesu ꞊glöö nu ö ˗dhɛ, ˈyö Pidhatö ˗yö ˗we ˗a ˗bha. ˈDhɛ ˈö ˗kë ˈˈdhʋ̈, ˈyö dho ˈö Yesu ꞊glöö sü. ˗A Zozɛfö ˈö ˈˈdhʋ̈ bhë, ˗yö ˗kun Yesu ˗bha gwëëˈˈ ˈka ˗bindhe ˈgü, ˈyö sü ꞊dhɛ ˗yö ˗kun ˈˈsuʋ̈ ˗ni ˈgü Zuifö ˗nu ˗gɔ. 39 Gɔndënën ˈwo˗ ˗dhɛ Nikodɛmö ˈö˗ ˗bha ˈdho ˗blɛɛsü ˈö˗ wo Yesu ˈˈpiʋ̈ ˈö˗ wo gbeŋ bhë, yö ˗de ˈpö ˗yö ˗nu pë ꞊fii ˗së ˈwo˗ ˈmiidhö waa aloɛsö ˗kë bhë ˗an ˗kankwëësü ˈˈkɩdhʋŋ ˈö ˗mɔn ˗kɔŋ ˗yaaga ˈö ga ˗yaaga ˗bha ˗a ˈka. 40 ˈDhɛ ˈö ˗kë ˈˈdhʋ̈, ˈyö ˈwo Yesu ꞊glöö sü ˈö ˈwo yɩɩga sɔ ˗nu ꞊plʋʋ ˗a ˈka, ˈwo pë ꞊fii ˗së ˗sü ˗nu ˗kë ˗a ˗bha ꞊dhɛ ˗kɔ ˈwo mɛn ꞊glöö ꞊baa ˗a ˈka Zuifö ˗nu ˗bha wɔkɔ ˈgü ˗a ˈdhö. 41 ˈDhɛ ˈwo Yesu dɔ ˗a ˗bha ˈˈdhü ˗bha bhë, ˈˈdhüdhɛɛdhɛ do ˈbhaa ˗yö ˗kun ˗a ˈˈsuee ˈö mɛn ˗wɛɛ bho ˗dhɛ ˗dɛɛ ˈö wo ˈti mɛn ˈˈwɛɛ ˈbhaa wɔ mü do ˈö kun ˗a ˈgü mü. 42 ˈDhɛ ˈö ˗kë ꞊dhɛ ˈwɔn ˗nu ˈwo bhë ˗wo ˗kë Zuifö ˗nu ˗bha ꞊Glooyi ˗wayi ˈka, ˈö mɛn ˗wɛɛ bho ˗dhɛ ˈö bhë ˈö kun ˗a ˗dhɛ ˈˈsuee, ˈyö ˈwo dho Yesu ꞊glöö ˈka ˈwo˗ ˗wɔ mü.