Yesu ˗bha bɔmɛn ˗nu këwɔn ˗nu

21 ˈDhɛ ˈyi yi ˈgü dɔ ˈˈgbɩɩ˗ ˈö yaa˗ ˗nu ˈyi ˗kan yi ˈkwëë˗, ˈyö ˈyi ˗da ˈˈyitagɔ ˈgü ˈyi dho vɛɛdhö ˈö ˈyi ˗lo Kɔsö. ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö ˈyi dho Lɔdö, ˈyö ˈyi go mü ˈyi dho Patadha. 2 ˈDhɛ ˈyi ˗kpan ˈˈyitagɔ do ˈö kun ˈdho ˗ni ˈgü Fenisi ˗a ˗bha, ˈyö ˈyi ˗da ˗a ˈgü ˈö ˈyi ˗ʒiö. 3 ˈDhɛ ˈyi dho ˈyi ˗lo ˈˈsɛ ˈö ˈˈyi ꞊zinŋgü ˈö ˈwo˗ ˗dhɛ Shiplë bhë ˗a ˈˈsuee ˈö ˈyi ˗kpan ˗a ˗bha, ˈyö ˈyi˗ to yi ꞊kwaa˗ ˈgü ꞊ʒiaan ˈö ˈyi dho Sidhi ˈˈsɛ ˈgü ˗ʒian ˈka. Yi ˗dho ˈyi ˗lo ˈTii˗ ˗pö ˈö ˈˈyitagɔ dho ꞊kwɛɛ˗ yɔɔˈˈ ˗a ˗bha bhë ˗a ˈgü, ˈyö ˈyi ꞊yɔɔ mü. 4 ˈDhɛ ˈyi Yesu ˗bha gwëëˈˈ ˗nu ˈö ˈwo mü ˗an ꞊mɛɛn ˈö ˈyi ˗kpan ˗an ˗bha, yi ˗to ˗an ˈˈpiʋ̈ mü ˈö ˈyi ˗dhɛkpaɔyi ˈˈsɔɔplɛ ˗kë. ˈˈKɛɛ ˗wo ˗kun ˗a pö ˗ni ˈgü Pɔdhö ˗dhɛ ˗kplawo ꞊dhɛ ˈyaa ˗dho ö ˗gɛn kpö yö Zedhizadhɛmö ˈwɔn ˈö ˗zuu ˈˈslʋ̈ʋ̈slʋ̈ ˗yö ˈˈdhɛ bho ˗a ˗ta ˗an ˗dhɛ ˗a ˗wɔn ˈgü. 5 ˈDhɛ yi ʒiö ˗dhɛkpaɔyi ˗yö ˗wo, ˈyö ˈyi ˗da ʒiaan˗ ˈzü ˈyi dho. ˗An ꞊gban ˈˈpɛpɛ, ˈö dho ˈö yö ˗a ˈka dhebɔ ˗nu waa ˈnën ˈsɛɛn˗ ˗nu ˗an ˗bha, ˗wo yi ˗dɔ ʒiaan˗ ˈö ˈyi go ˗a ˈka ˈplöö. ˈDhɛ ˈyi ˗lo ꞊weeyi ˈˈdhiʋ̈, ˈyö mɛn ꞊gban ˈyi yö yi kpɔn ˈgü ˈö ˈyi ꞊bhɛɛ. 6 ˈDhɛ ˈyi yi bo, ˈyö ˈyi yi ˗wo ˗da yi ˈko ˗dhɛ. ˈDhɛ ˈyi ˗da ˈˈyitagɔ ˈgü, ˈyö ˈwo wo ꞊yɛɛ ˗kë ˈplöö.

7 Yi ˗go ˈTii˗ ˈö ˈyi bɔ ˈˈyi ˗ta ˈö ˈyi dho ˈyi ˗lo Tolemaisö. Kwa ꞊dhegblü ˗nu ˈwo mü, yi ˗an ꞊tuaabho ˈö ˈyi ˗dhɛkpaɔyi do ˗kë ˗an ˈˈpiʋ̈ mü. 8 ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö ˈyi ˗ʒiö ˈö ˈyi dho ˈyi ˗lo Sezadhe. ˈDhɛ ˈyi ˗lo mü, ˈyö ˈyi dho Filipö ˈö ˗kë nɔɔn˗ ˗së pö ˗mɛn ˈka, ˈö ˗kë gɔɔn˗ ˗nu ˈˈsɔɔplɛ ˈö bɔmɛn ˗nu ˗wo wo ˗kɔ ˗yɛ ˗an ˗bha Zedhizadhɛmö ˗a mɛn do ˈka bhë ˗a ˗gɔ ˈkɔɔ, ˈyö ˈyi to ˗a ˈˈpiʋ̈ mü. 9 ˗A ˈdhu ˗nu ˗wo ˗kun ˗yiishiö, ˈö ˈwaa kun gwaan˗ ˗bha.* ˗Wo ˗kun ˗Zlan ˗wodhiʋ̈lodhe ˗nu ˈka. 10 ˈDhɛ ˈyi ˗dhɛkpaɔyi ꞊va ˗kë mü, ˈyö ˗Zlan ˗wodhiʋ̈lomɛn do ˈö ˈwo˗ ˗dhɛ Agabusö, ˗yö ˗go Zude ˈö nu. 11 ˈDhɛ ˈö nu ˗wo yi ˗dhɛ, ˈyö Pɔdhö ˗bha wü kwi ˈˈpɛn ˈö˗ ˗klu sɔ ˗ta ö vɛɛdhö bhë ˗a sü, ˈyö ö ˗de ˗gɛn ˗nu waa ö ˗kɔ ˗nu ˗an ˗klu ˈö˗ pö: «Pë ˈö ˗zuu ˈˈslʋ̈ʋ̈slʋ̈ ˗ya pö ˈyö ꞊nɛn: ‹Mɛn ˈö˗ ˗bha wü kwi ˈˈpɛn ˈdhö yö, Zuifö ˗nu ˗dho ˗a ˗klu ꞊dhɛ ˗kɔ ˈö yö ˗a ˈdhö Zedhizadhɛmö, ˈö ˈwo˗ ˗da ˈˈsɛ ˈˈwɛɛ ˈgümɛn ˗nu ꞊kwɛɛ˗.›» 12 ˈDhɛ ˈyi˗ man ˈˈdhʋ̈, ˈyö yaa mɛn ˗nu ˈwo ˗kë mü ˈyi ˗ya bhɛɛˈˈ ˗sü ˗bha Pɔdhö ˗dhɛ kö ˈyaa ˗dho ˈdho Zedhizadhɛmö. 13 ˈYö˗ pö yi ˗dhɛ: «˗Mën ˈö ˗kë ˈö ˈka ˈˈgbʋ bɔ, ˈö ˈka˗ ˈˈslö ꞊mɛɛn kö ˈka n ˈgü ga?* ˗Yö kë ka ˈˈɲaan ꞊dhɛ n zuʋ̈ˈˈ ˗yö ˈˈwɩ ˗sü ˈka ˗a ˗bha kö ˗wo n ˗klu, kö ˗wo n zë ˈpö Zedhizadhɛmö Dëmɛn Yesu ˈtɔ ˗wɔn ˈgü.» 14 ˈDhɛ ˈyi˗ yö ꞊dhɛ pë ˈö˗ zuʋ̈ˈˈ ˈˈpiʋ̈ bhë yi ˗kɔ ˈyii ˗dho ꞊mɔɔn˗ ˗bha kö ˈyi˗ bho mü, ˈyö ˈyi yi ꞊kwaa ˗a ˗zü* ˈö ˈyi˗ pö: «˗A ˈdhɛ ˈö Zoova dhɔɔbhaawɔn ˈka ˗yö kë.»

15 ˈDhɛ ˈö ˗dhɛkpaɔyi ˈyi dho ˗a kë mü ˈö ɲën, ˈyö ˈyi ꞊kwɛɛ˗ ˗dhu ˈö ˈyi ˗da ʒiaan˗, ˈyi ˗ya ˈdho ˗sü ˗bha Zedhizadhɛmö. 16 Yesu ˗bha gwëëˈˈ ˈbhaa ˗nu ˈö ˈwo go Sezadhe ˗wo ˗ʒiö yi ꞊kee˗ ˈö ˈwo dho yi ˈka Nasɔn ˈö go Shiplë bhë ˗a ˗gɔ ˈkɔɔ kö ˈyi wɔ mü. ˗A Nasɔn ˈö ˈˈdhʋ̈ ˈyö ˗kë mɛn ˗blɛɛsü ˗nu ˈwo ˗we Yesu ˗wɔn ˗bha ˗a mɛn do ˈka. 17 ˈDhɛ ˈyi ˗lo Zedhizadhɛmö, kwa ꞊dhegblü ˗nu ˗wo wo ˗kɔ ˗ya yi ˗gɔ zuʋ̈gblüdhi ˈka. 18 ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö Pɔdhö ˗yö yi sü ˈö ˈyi dho Zakö ˈˈpiʋ̈. Mɛn zii ˗nu ˈˈpɛpɛ ˗wo ˗kun wo ˈkwëëdhö mü. 19 ˈDhɛ ˈö ˗an ꞊tuaabho, ˈyö ˗ya ˈwɔn ˈˈpɛpɛ ˈö ˗Zlan ˗yö bɔ ˗a ˗bha ˗zlanwopösü ˗ta ˈö˗ ˗kë ˈˈsɛ ˈˈwɛɛ ˈgümɛn ˗nu ꞊zinŋgü bhë ˗a ꞊gban ˗gɛn ˗bho ˗an ˗dhɛ ˗sü ˗bha.

20 ˈDhɛ ˈwo˗ man ˈˈdhʋ̈, ˈyö ˈwo ˗ya ˗Zlan ˈtɔ bhɔ ˗sü ˗bha, ˈˈkɛɛ ˈyö ˈwo˗ pö ˗a ˗dhɛ: «Yi ꞊dhegblü, ü˗ ˈwɔn ˗dɔ ꞊dhɛ Zuifö ˗nu ˈˈgblü ꞊va ꞊dede ˗wa ˈˈwɩ ˗Zlan ˗wo ˗bha ˈˈkɛɛ ˈö ˈwo ꞊kun ˗klu ˗sü ˈka ˈpö ˈTɔŋ˗ ˗bha. 21 ˗Wa ˗man ˗wa ˗pö ˈka ꞊dhɛ ü ˗bha ꞊klaŋwo ˗nu ˈgü, ü Zuifö ˗nu ˈwo ˗pɛn ˗sü ˈka ˈˈsɛ ˈˈwɛɛ ˗nu ˈgü bhë ˗an ꞊faan ˗mën kö ˗wo ˈˈkan Moizö ˗bha ˈTɔŋ˗ ˗bha, ˈü˗ pö ˗an ˗dhɛ ꞊dhɛ ˈwaa ˗dho wo ˗bha ˈnën ˗nu kë ˈˈbɔn ˈka ɛɛnˈˈ ˈwaa ˗dho ˈto ˗an ˗bha wɔkɔ ˗nu ˈwo˗ ˈgü ˈö˗ yi ˗ya ꞊gwëë bhë ˗an ˈˈpiʋ̈. 22 ˈDhɛ ˈö ˈˈdhʋ̈, ˈkwa˗ kë ꞊dhɛ? ˈKö pë ˈˈoo ˗pë ˗yö ˗kë, ˗wo ˗dho ˗a ˈwɔn dɔ ꞊dhɛ ˈbha nu ˈyö. 23 ˗A ˗wɔn ˈgü, pë ˈyi ˗dho ˗a pö ü ˗dhɛ yö ˗bhö ˗a kë. Gɔɔn˗ ˗nu ˗yiishiö ˗wo yi ˈˈpiʋ̈ yö ˈö ˗wa wo ˗wo ˗bhö ˗Zlan ˗dhɛ. 24 ˗Bhö ˗an kpa ü ˗bha ˈka ˈdho kö pë ˈö ꞊waa˗ kë ˈwo ˗kë ˈˈslʋ̈ʋ̈slʋ̈ ˈka˗ kë. Pë ˈˈpɛpɛ ˈö ˗gban ˈwɔn ˈö bhë ˗a ˗bha, ˗bhö mɛn ꞊gban ka ˗bha ꞊saa bho, kö ˗wo wo ˗gɔ ˈˈkpla bho. ˗Ya kë ˈˈdhʋ̈, mɛn ꞊gban ˈˈpɛpɛ ˗dho ˗a ˈwɔn dɔ ꞊dhɛ pë ˈwo˗ man ˗ni ˈgü ü ˗bha bhë ˗a ˈˈwɛɛ ˈbhaa ˈyaa gagade ˈka. ˗Wo ˗dho ˗a yö ꞊ʒiaan ꞊dhɛ ü ˈˈtakɔ ˗yö ˗së, ˈö ˈü ˈTɔŋ˗ ꞊bhlëë ˗ya ˈpö. 25 ˈˈSɛ ˈˈwɛɛ ˈgümɛn ˗nu ˈö ˈwo ˗we ˗Zlan ˗wo ˗bha bhë, wo ˗zë pë ˈö yi ˗wo ˗yö to ˗a ˗bha do yi˗ ˗bɛnzë ˈö ˈyi bɔ ˗an ˗dhɛ. Yi˗ pö ˗an ˗dhɛ ˗wo ˈˈkan pë ˗nu ˈwo ˈˈsaa˗ bho ˗an ˈka gbapë ˗nu ˗dhɛ, ꞊ɲɔɔn, wü ˈö wo ˈti˗ bhuɛɛˈˈ bho ˈö ga waa ˈˈɲangüyaa kë ˗sü ˗an ˗bha.»

26 ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö Pɔdhö ˗yö dho gɔɔn˗ ˗nu ˈwo bhë ˗an ˈka, ˈyö waa˗ ˗nu ˈwo pë ˈˈpɛpɛ ˈö ˈtɔŋ˗ ˗ya pö ˗wa kë kö wo kë ˈˈslʋ̈ʋ̈slʋ̈ bhë, ˗an ˗kë. ˈDhɛ ˈwo wo bo, ˈyö dho ˗Zlan ˗dhɔkë ˗a ˈgü ˗kɔ ˈgü kö ˈwɔn ˗nu ˈwo ˗gban ˗an ˗bha ˗kë ˈˈslʋ̈ʋ̈slʋ̈ ˗sü ˗bha bhë, ˗dhɛkpaɔyi ˈö ˗dho ɲën ˗a ˈka kö ˈˈsaabhomɛn ˗yö mɛn ˈö ˈdhö ˗a ˗bha ˈˈsaa˗ bho bhë ˈö˗ pö.

27 ˈˈKɛɛ ˈdhɛ ˈwo ꞊ɲɔɔn ˗ni ˈgü ˗dhɛkpaɔyi ˈˈsɔɔplɛ ˈwo bhë ˗an ˈˈdhiʋ̈todhɛ ˗bha, ˈyö Zuifö ˗nu ˈwo go Azi ˗sɛ ˈgü ˈwo ˗kpan Pɔdhö ˗bha ˗Zlan ˗dhɔkë ˗a ˈgü ˗kɔ ˈgü, ˈyö ˈwo mɛn ꞊va ˈwo kun mü ˗an zuʋ̈ˈˈ ꞊luu ˈö ˈwo Pɔdhö kun, 28 kö ˗wo ˈˈgbla ˗ni ˈgü ˗wa pö ˗ni ˈgü: «Izraɛdhö ˗mɛn ˗nu, ˗ka nu yi ˗dhɛ! Gɔndënën ˈö mɛn ꞊gban ꞊klaŋ kë ˗ni ˗dhɛ ˈˈpɛpɛ ˈgü kö ˗wo kwa ˗bha ˈˈsɛgümɛn ˗nu, kwa ˗bha ˈTɔŋ˗ waa ˗dhɛ ˈö yö ˗a ꞊bhlëë ˗shiö bhë ˈyö ꞊nɛn. ˗Ya nu ˗ʒiaanwo Glɛkö ˗nu ˈka ˗Zlan ˗dhɔkë ˗a ˈgü ˗kɔ ˈgü, ˗ya ˗dhii ˗ya ˗dhɛ ˈˈslʋ̈ʋ̈slʋ̈ ˈö yö ˗a ˗bha.» 29 ˈPë ˗kë ˈwo˗ pö ˈˈdhʋ̈ ˈyö ˗tɔ ˗wo ˗kpan Pɔdhö ˗bha ˈplöö kö Trofimö ˈö ˗kë Efɛzö mi ˈka bhë ˗ya ꞊kee˗, ˈyö ˈwo˗ ˗ga ꞊dhɛ ˗yö ˗dho ˗a ˈka ˗Zlan ˗dhɔkë ˗a ˈgü ˗kɔ ˈgü. 30 ˈYö ˗bhluubhluudhe ˗yö ˗da ˈplöö, ˈyö ˈpömɛn ˗nu ˈˈpɛpɛ ˗wo ˗ya ˈgo ˗sü ˗bha ˗bia ˈka ˗dhɛ ꞊gban ˈgü ˈö ˈwo nu ˈwo Pɔdhö kun, ˈyö ˈwo˗ ˗gaangaan ˈwo˗ bho ˗Zlan ˗dhɔkë ˗a ˈgü ˗kɔ ˈgü, ˈö ˈwo to mü ˈwo˗ ˈˈkwee ˗nu ta. 31 ˈDhɛ ˈwo kun ˗a ˈˈslö mɛɛnˈˈ ˗ni ˈgü kö ˈwo˗ zë, ˈyö mɛn ˗nu ˗wo ˈˈsɔdha ˗gɔmɛn ˈkpii˗ ꞊kpɔɔ ˈö ˈwo˗ pö ˗bhluubhluudhe ˗ya ˗da Zedhizadhɛmö ˗dhɛ ꞊gban ˈgü. 32 ˈDhɛ ˈö ˗kë ˈˈdhʋ̈, ˈyö to ˈˈshia˗ mü ˈö ˈˈsɔdha ˗nu waa ˈˈsɔdha ˗gɔmɛn ˗nu ˈwo˗ ˗kɔ ꞊löö ˗an sü ˈö ˈwo ꞊yɔɔ ˗an ˈˈpiʋ̈ mü ˗bia ˈka. ˈDhɛ ˈwo ˗kpan ˈˈsɔdha ˗gɔmɛn ˈkpii˗ waa ˈˈsɔdha ˗nu ˗an ˗bha, ˈyö ˈwo wo ꞊kwaa Pɔdhö ˗man ˗sü ˗zü.

33 ˈDhɛ ˈö ˈˈsɔdha ˗gɔmɛn ˈkpii˗ ˗yö ꞊ɲɔɔn ˗an ˈˈsuee, ˈyö˗ pö ˗wo Pɔdhö ˈkun ˗wa ˗klu ꞊yɔɔga ꞊plɛ ˈka. ˈYö mɛn ˗nu dhɛɛˈˈ kpɔ kö mɛn ˈö Pɔdhö ˈdhö˗ ˈka waa pë ˈö˗ ˗kë ˗wa pö. 34 ˈˈKɛɛ mɛn ꞊va ˈwo kun mü bhë ˗a mɛn ˈbhaa ˗nu ˗wo ˈˈgbla ˗ni ˈgü ˈwɔn ˈbhaa blɛɛˈˈ ˗sü ˈka, kö ˗a mɛn ˈbhaa ˗nu ˗de ˈpö ˗wa ˈˈwɛɛ ˈbhaa pö ˗ni ˈgü. ˈDhɛ ˈö ˗kë ꞊dhɛ ˈpë ˗kë ˈö ˗bhluubhluudhe ˈö bhë ˈö ˗da ˗a ˗gɛn kpɛnŋdhö ˈwo ˗dho ˗a pö ˗a ˗dhɛ ˈyaa kun ˈdhö, ˈyö˗ pö ˗wo ˈdho Pɔdhö ˈka ˈˈsɔdha ˈkaan˗ ˈgü. 35 ˈˈKɛɛ ˈdhɛ ˈwo yö ˗da ˈˈkpan ˗bha ˗dhɛ ˈgü, ˈyö ˈˈsɔdha ˗nu ˗wo wo ˗kɔ ˗da Pɔdhö ˈgü ˈwo˗ sü, mɛn ꞊va ˈwo kun mü bhë ˗an ˗bha ˗kë ˈˈvaanvan ˗sü ˗wɔn ˈgü. 36 ˗A ˗gɛn ˗mü ꞊dhɛ ˗wo ˗kun ˗an ꞊kee˗ ꞊va ꞊dedewo, ˈö ˈwo kun ˈˈgbla ˗ni ˈgü ˈwo˗ pö: «˗Kaa zë!»

37 ˈDhɛ ˈwo ˗dho ˗da Pɔdhö ˈka ˈˈsɔdha ˈkaan˗ ˈgü, ˈyö˗ pö ˈˈsɔdha ˗gɔmɛn ˈkpii˗ ˗dhɛ: «A ꞊mɔɔn˗ ˗bha ˈa ˈwɔn ˈbhaa blɛɛˈˈ ü ˗dhɛ ˗ee?» ˈYö˗ ˗yɔ bɔ ˈö˗ pö: «Ü Glɛkö ˗wo ˗pö ˗ee? 38 Ezitö mi ˈö ˗gban ˈˈsɛkɔɔnmɛn ˗nu ˗gɔ, ˈö gɔɔn˗ ˗nu ˈˈgblü ˗yiishiö (4.000) ˈö ˗kpee ˈgü ˗dhaa ˈdhö ˗an ˗gɔ ˗an sü ˈö waa˗ ˗nu ˈwo dho ˈˈyɛta ˈö˗ yi yö ˈti ꞊gwëë ꞊köŋ bhë, ˈyaa ˗mü ü ˈka ˗ee?» 39 ˈYö Pɔdhö ˗ya pö ˗a ˗dhɛ: «Zuifö ˗mü n ˈka, a ˗go Taasö, Silisi ˗sɛ ˈgü. ˈˈKwipö ˈö mɛn ꞊gban ˗wa dɔ bhë ˗a ˈgünën ˗mü n ˈka. ˗Bhö dɔ ˈˈgbɩɩ˗ ˈü ˈˈwɩ ˗a ˗bha kö ˈa ˈwɔn ˈbhaa blɛɛˈˈ ˈˈsɛgümɛn ˗nu ˈwo yö ˗an ˗dhɛ.» 40 ˈDhɛ ˈö ˗we ˗a ˗bha ˗a ˗gɔ, ˈyö Pɔdhö ˗yö dɔ ˈˈkpan ˗ta mü ˈö ˈwɔn ꞊blɛɛ ˗an ˗dhɛ ö ˗kɔ ˈgü kö ˗dhɛ ˗ta ˗yö ga ˗an ˗ta. ˈDhɛ ˈö ˗dhɛ ˗ta ˗yö dɔ dinŋdhö, ˈyö ˗ya ˈwɔn ˗blɛɛ ˗an ˗dhɛ ˗sü ˗bha Eblö ˗wo ˈgü ˈö˗ pö: