Yesu ˗bha bɔmɛn ˗nu këwɔn ˗nu

22 «N ꞊dhegblü ˗nu, n dë ˗nu, ˗ka ka ˈˈtʋ ˈto ˗së ˈka kö ˈwɔn ˈö ˗gban n ˗bha ˈa ˗dho ˗a blɛɛˈˈ bhë ˈka˗ man.» 2 ˈDhɛ ˈwo˗ yö ꞊dhɛ Pɔdhö ˗yö ˈwɔn blɛɛˈˈ ˗ni ˈgü wo ˗dhɛ Eblö ˗wo ˈgü, ˈyö ˗dhɛ ˗ta ˗yö ga ˈzü ꞊dedewo ˗an ꞊gban ˈˈpɛpɛ ˗ta, ˈyö˗ pö ˗an ˗dhɛ: 3 «Zuifö ˗mü n ˈka, a ˗bhɔ Silisi ˗pö ˈö ˈwo˗ ˗dhɛ Taasö bhë ˗a ˈgü, ˈˈkɛɛ ˈˈkwipö ˈö yö ˈyö ˈa ꞊klaŋ ˗kë ˗a ˈgü. N ˗man ꞊klaŋgɔmɛn ˈö n ꞊klaŋ ˗kë kwa ˈˈbhɛman ˗nu ˗bha ˈTɔŋ˗ ˈkun ˗kɔ ˈka ꞊dedewo, ˈö ˈa ˗Zlan ˗wɔn kun ˈˈgbɩɩ˗ ꞊dhɛ ˗kɔ ˈö ka ˈˈpɛpɛ ˈka ˗a ˈka ꞊dɛɛ yö ˗a ˈdhö, yö ˈnën ˈö ˗tɔ Gamaliɛdhö. 4 Mɛn ˗nu ˈwo Ʒiaan ˈö yö ˗a ˗ta ˗mɛn ˗nu ˈka a ˗an ˈˈklʋʋ ˗bhɔ, ˈa ˗an zë. A gɔɔn˗ ˗nu waa dhebɔ ˈbhaa ˗nu ˗klu, ˈö ˈa ˗an ˗da ˗kaso ˈgü. 5 ˈˈSaabhomɛn ˈkpii˗ waa mɛn zii ˗nu ˗todhʋ̈sü ˗wa ˈwɔn ˗dɔ ˈˈdhʋ̈. Wo ꞊dede ˗wo ˈsëëdhɛ ˗nu ˗kë ˈwo˗ dɔ n ˗gɔ kö ˗a ˈdho ˗a ˈka ˈa˗ nu kwa ꞊dhegblü ˗nu ˈwo Damasö ˗an ˗dhɛ. A ˗kun ˈdho ˗ni ˈgü mü kö mɛn ˗nu ˈwo ˈmü ˈa ˗an ˈkun ˈa ˗an ˗lö kö ˈa nu ˗an ˈka Zedhizadhɛmö kö ˗wo ˈwɔn bho ˗an ˈgü.

6 «ˈˈKɛɛ ˈdhɛ ˈa ꞊ɲɔɔn ˗ni ˈgü Damasö ˗dhɛ ˈˈsuee ˈɲaan˗ ˗bha ˗ya mɛn ˗gɔ ꞊zinŋgü ˈˈlɛlɛ ꞊tɛɛ˗ ˗bha, ˈyö to mü ˈö ˈˈshiʋ̈ ˈbhü ˈkpii˗ do ˗yö go dhaŋ˗ ˈgü ˈö ꞊klënŋ n ˗zü. 7 ˈYö ˈa ˗puö ˈˈshia˗, ˈa ˗wo do ˈbhaa man kö ˗ya pö ˗ni ˈgü n ˗dhɛ: ‹Sɔdhö, Sɔdhö, ˈmën ˗kë ˈü n ˈˈklʋʋ bhɔ?› 8 ˈYö ˈa˗ dhɛɛˈˈ kpɔ ˈa˗ pö: ‹N Dëmɛn, de ˗mü ü ˈka?› ˈYö˗ pö n ˗dhɛ: ‹Maan Yesu ˗mɛn ˈa go Nazadhɛtö ˈü n ˈˈklʋʋ bhɔ ˗ni ˈgü bhë man ˗mü.› 9 Mɛn ˗nu ˈö ˈwo kun n ˈˈpiʋ̈ ˗wo ˗kpan ˈˈshiʋ̈ ˈbhü ˈö ˈˈdhʋ̈ ˗a ˗bha, ˈˈkɛɛ mɛn ˈö kun ˈwɔn blɛɛˈˈ ˗ni ˈgü n ˗dhɛ bhë wo ˈti˗ ˗wo man. 10 ˈDhɛ ˈö ˗kë ˈˈdhʋ̈, ˈyö ˈa˗ pö ˗a ˗dhɛ: ‹N Dëmɛn, ˈmën n dua ˈdhö ˗mü kö ˈa˗ kë?› ˈYö Dëmɛn ˗ya pö n ˗dhɛ: ‹˗Bhö luuˈˈ ˈü ˈdho Damasö. ˈBha ˗lo mü, pë ˈˈpɛpɛ ˈö ü dua ˈdhö ˗mü kö ˈü˗ kë ˗wo ˗dho ˗a pö ü ˗dhɛ.› 11 ˈˈKɛɛ ˈdhɛ ˈö ˗kë ꞊dhɛ ˈmaan kun ˗dhɛ yö ˗ni ˈgü ˈzü ˈˈshiʋ̈ ˈbhü ˈö yö n ˈˈɲan ˈgü bhë ˗a ˗wɔn ˈgü, mɛn ˗nu ˈwo kun n ꞊kee˗ bhë ˗wo wo ˗kɔ ˗da n ꞊kwɛɛ˗ ˈö ˈwo ʒiaan bho n ˈka, ˈwo dho n ˈka Damasö.

12 «ˈDhɛ ˈö ˗kë ˈˈdhʋ̈, ˈyö gɔndënën do ˈö kun mü ˈwo˗ ˗dhɛ Ananiasö ˈö ˗kë ˗suʋ̈ ˗Zlan ˗gɔ ˗mɛn ˈö ˈTɔŋ˗ ꞊bhlëë ˗ya ˗a ˈka, ˈö Zuifö ˗nu ˈˈpɛpɛ ˈwo kun mü ˈwo kun ˗a ˗wɔn ˗së blɛɛˈˈ ˗ni ˈgü bhë 13 ˗yö nu n ˈˈpiʋ̈. ˈDhɛ ˈö nu ˈö dɔ n ˈˈsuee, ˈyö˗ pö n ˗dhɛ: ‹Sɔdhö, n ꞊dhegblü, ü ˈˈɲan ˗yö ˈˈpʋ!› A ˗to mü ˈa n ˈˈɲan ˈˈdhiʋ̈ ꞊luu ˈa ˗kpan ˗a ˗bha. 14 ˈYö˗ pö n ˗dhɛ: ‹Kwa ˈˈbhɛman ˗nu ˗bha ˗Zlan ˗ya ö ˗kɔ ˈˈyɛ ü ˗bha kö ˈwɔn ˈö˗ dhɔɔbhaawɔn ˈka ˈü˗ draanˈˈ ˈü˗ dɔ, kö ü ˈˈɲan ˗yö ˗kpan mɛn ˈö kpɛnŋdhö ˗a ˗bha, kö ˗wo ˈö go ˗a ˈˈdhi ˈü˗ man. 15 ˗A ˗gɛn ˗mü ꞊dhɛ ü dua ˗mü kö ˈü kë ˗a ˗bha ꞊gbɛkiö ˈka, kö ˈwɔn ˗nu ˈü ˗an yö ɛɛnˈˈ ˈü ˗an man bhë ˈü˗ blɛɛˈˈ mɛn ꞊gban ˈˈpɛpɛ ˗dhɛ. 16 ˈDhɛ ˈö ˈˈdhʋ̈, ˈmën ˈü ü ˈˈɲan to ˗a ˗gɔ? ˗Bhö luuˈˈ ˈü bɔ ˈˈyi ꞊bhaa, ˈü ü ˗zo yö Yesu ˈtɔ ˗dhɛ kö ü ˗bha ˈwɔn yaa ˗nu ˗wo ˈgo ü ˗bha.›

17 «ˈDhɛ ˈö ö bo kë ˗sü ˈka ˈˈdhʋ̈, ˈa n ꞊yɛɛ ˗kë Zedhizadhɛmö, a ˗kun bhɛɛˈˈ ˗ni ˈgü ˗Zlan ˗dhɔkë ˗a ˈgü ˗kɔ ˈgü, ˈyö n ˈˈɲan ˈgü ˗yö ˗da 18 ˈa ˗kpan Dëmɛn ˗bha ˈö˗ pö n ˗dhɛ: ‹˗Bhö luuˈˈ ˈzozodhö ˈü ˈgo Zedhizadhɛmö, ˗a ˗gɛn ˗mü ꞊dhɛ ˈwɔn ˈö ˗gban n ˗bha ˈü ˗dho ˗a blɛɛˈˈ bhë wo ˈti ˗dho ˈˈwɩ ˗a ˗bha.› 19 ˈYö ˈa˗ pö ˗a ˗dhɛ: ‹N Dëmɛn, wo ꞊dede ˗wa ˈwɔn ˗dɔ ꞊dhɛ a ˗kun bɔ ˗ni ˈgü ˗yakwëë ˗kë ˗a ˈgü ˗kɔ ˗nu ˈgü, ˈö mɛn ˗nu ˈwo wo ˗zo yö ü ˗dhɛ ˈa ˗an kun, ˈa ˗an ˗da ˗kaso ˈgü, ˈa ˗an ˗man. 20 ˗Ya ˈgo ˗a ˈgü ˈzü, ˈˈtʋ̈ŋ ˈö ˈwo ü ˗bha ꞊gbɛkiö Etiɛnö ꞊ɲɔɔn ꞊wɛnŋ ˗a ˈka bhë, a ˗kë ˗a ˗dhɛ ˈgü, ˈö ˗kë n ˗dhɛ ˗së. Mɛn ˗nu ˈwo kun ˗a zë ˗ni ˈgü bhë, man ˈnën ˈa n ˗zo ˗kë ˗an ˗bha sɔ ˗nu ˈˈpiʋ̈ ˗ʒiaanwo.› 21 ˈˈKɛɛ ˈdhɛ ˈa˗ pö ˈˈdhʋ̈, ˈyö˗ pö n ˗dhɛ: ‹˗Bhö ˈdho, ˗a ˗gɛn ˗mü ꞊dhɛ a ˗dho ü bɔ ˈˈsɛ ˗nu ˈö ˈwo mü ꞊gblɛɛn ˗an ˈgü.›»

22 ˗Wo ˗kun wo ˈˈtʋ ˈto ˗ni ˈgü ˗a ˗bha ˗be. ˈˈKɛɛ ˈdhɛ ˈö ˗wo ˈö bhë ˗a pö, ˈyö ˈwo ˗gbla ˈwo˗ pö: «Mɛn ˈö bhë ˗kaa zë, ˗a ˗dhɛ ˈyaa˗ ˗bha kö ˗yö ˗tosɛta kë!» 23 ˗Wo ˗kun ˈˈgbla ˗ni ˈgü, ˈö ˈwo wo ˗bha sɔ ˗nu ˈwo˗ ˗da sɔ ˗ta ˗an ˗zuö, kö ˗wo ꞊boo ˗bi ˗nu ˗pɛn ˗ni ˈgü ˈˈdhuŋ. 24 ˗A ˗wɔn ˈgü, ˈˈsɔdha ˗gɔmɛn ˈkpii˗ ˗ya ˗pö ˗wo ˗da Pɔdhö ˈka ˈkaan˗ ˈgü, ˈö˗ pö ˗wa ˗man kö ˗yö ˈˈwɩ, kö pë ꞊dede ˈö˗ ˗kë ˈö mɛn ꞊va ˈwo bhë ˈwo ˈˈgbla ˗ni ˈgü ˈö ˈwo˗ pö ˗wa zë bhë, ˗ya pö. 25 ˈˈKɛɛ ˈdhɛ ˈwo Pɔdhö ˗wɔ ˈˈshia˗ kö ˈwo˗ ˗man, ˈyö˗ pö ˈˈsɔdha ˗gɔmɛn ˈö kun mü bhë ˗a ˗dhɛ: «˗A ˗dhɛ ˗ya ˗bha kö Wlɔmö mi ˈö za yö ˈti˗ ˈkun ˈka˗ ˗man ˗ee?» 26 ˈDhɛ ˈö ˈˈsɔdha ˗gɔmɛn ˈö bhë ˈö˗ man ˈˈdhʋ̈, ˈyö dho ˈö ˗ʒiö ˗a ˈgü ö ˗gɔmɛn ˈkpii˗ ˗dhɛ ˈö˗ pö: «Mɛn ˈö bhë Wlɔmö mi ˗mü. Ü ˗dho ˗a kë ꞊dhɛ?» 27 ˈDhɛ ˈö ˗kë ˈˈdhʋ̈, ˈyö ˈˈsɔdha ˗gɔmɛn ˈkpii˗ ˗yö ꞊ɲɔɔn Pɔdhö ˗bha ˈö˗ pö ˗a ˗dhɛ: «Wlɔmö mi ˗mü ü ˈka ˗ee?» ˈYö Pɔdhö ˗ya pö ˗a ˗dhɛ: «꞊Ii.» 28 ˈYö ˈˈsɔdha ˗gɔmɛn ˈkpii˗ bhë ˈö˗ pö ˈzü: «ˈWëëga ꞊va ꞊dede ˈnën ˈa˗ nu ˈyö ˈa ˗kë Wlɔmö mi ˈka.» ˈYö Pɔdhö ˗ya pö ˗a ˗dhɛ: «Man ˗zë n ˗man ˈö bhë a ˗bhɔ ˗a ˈka.»

29 ˈDhɛ ˈö˗ pö ˈˈdhʋ̈, ˈyö mɛn ˗nu ˈö kun ˗an ˈˈpiʋ̈ ꞊dhɛ ˈwo˗ ˗man kö ˈwo dhɛɛˈˈ ˈkpɔ ˗a ˗gɔ bhë ˈwo bhɔ ˗a ˗dhɛ ꞊taa. ˈDhɛ ˈö ˈˈsɔdha ˗gɔmɛn ˈkpii˗ ˗ya ˈwɔn dɔ ꞊dhɛ Wlɔmö mi ˗mü Pɔdhö ˈka, ˈyö ˈˈsuʋ̈ ˗yö ˗da ˗a ˈgü ꞊yɔɔ˗ ˗nu ˈwo˗ yö ˗a ˗bha bhë ˗a ˗wɔn ˈgü.

30 ˈˈKɛɛ ˈdhɛ ˈö˗ ˗ta ˗dhɛ ˗yö ꞊kpɔɔ, ˈyö˗ ˗pʋ. ˈYö ˈˈsaabhomɛn ˗nu ˗gɔmɛn ˗nu waa zakanmɛn ˗nu ˗an ˗dhɛ wo ˈkwëëdhö, ˈyö sü ꞊dhɛ ˗yö ˗kun ˗a ˈˈpiʋ̈ kö pë ꞊dede ˈö˗ ˗wɔn ˈgü ˈö Zuifö ˗nu ˗wo za ˗ya ˗a ˗bha ˈö˗ dɔ. ˈYö dho Pɔdhö ˈka ˈö˗ dɔ ˗an ꞊zinŋgü.