Yesu ˗bha bɔmɛn ˗nu këwɔn ˗nu

23 ˈDhɛ ˈö Pɔdhö ˗yö zakanmɛn ˗nu ˈwo bhë ˗an ˗ga ˗pinŋdhö, ˈyö˗ pö: «N ꞊dhegblü ˗nu, a ˈwɔn ˗nu ˗kë zuʋ̈ˈˈ ˈˈpuu ˗bha ˗Zlan ˈˈɲan ˈˈdhiʋ̈, ˈö nu ˈö yö ˗a ˈka ꞊dɛɛ ˗bha.» 2 ˈDhɛ ˈö˗ pö ˈˈdhʋ̈, ˈyö ˈˈsaabhomɛn ˈkpii˗ Ananiasö ˗ya pö mɛn ˗nu ˈwo kun dɔ ˗sü ˈka Pɔdhö ˈˈsuee bhë ˗an ˗dhɛ ˗wa ˈˈdhi ˗man. 3 ˈYö Pɔdhö ˗ya pö ˗a ˗dhɛ: «˗Zlan ˗dho ü ˗bha ˈˈyɔɔ bho, ˈˈkpënŋ˗ ˗kë mɛn ˗gɔ ˗mɛn.* ˈDhɛ ˈü ˗ya ˗a ˗bha bhë, ü ˗ya mü ˈˈdhʋ̈ kö ˈü ˗gban ˈTɔŋ˗ ˗ta ˈü za dɔ n ˗bha. ˈˈKɛɛ ˈyö bhi do ˈü bhë ˈzü ˈü ˈTɔŋ˗ ˗lö ˈgü ˈü˗ pö ˗ni ˈgü ˗wo n ˗man bhë.» 4 ˈYö mɛn ˗nu ˈwo kun dɔ ˗sü ˈka mü bhë ˈwo˗ pö: «ˈSi ˈnën ˈü˗ bho ˗ni ˈgü ˗Zlan ˗bha ˈˈsaabhomɛn ˈkpii˗ ˗gɔ bhë ˗ɔɔ!» 5 ˈYö Pɔdhö ˗ya pö: «N ꞊dhegblü ˗nu, ˈmaan˗ ˈwɔn dɔ ˗be ꞊dhɛ ˈˈsaabhomɛn ˈkpii˗ ˗mü ˗a ˈka. ˈYö sü ꞊dhɛ pë ˈö ˗bɛnzë ˗sü ˈka ˗ya ˗pö: ‹Ü dua ˈyaa ˗mü kö ˈü ˈˈwɩ mɛn ˈö ü ˗bha ˈˈsɛ ꞊kɔɔnmɛn ˈka ˗a ˗dhɛ.›»

6 ˈDhɛ ˈö ˗kë ꞊dhɛ Pɔdhö ˗ya ˈwɔn ˗dɔ ꞊dhɛ zakanmɛn ˗nu ˈwo kun mü bhë ˗a mɛn ˗kɔ ˈˈpian do ˗yö ˗kun Sadusiɛn ˗nu ˈka, ˈö˗ ˗kɔ ˈˈpian do ˗de ˈpö ˗yö ˗kë Fadhiziɛn ˗nu ˈka bhë, ˈyö ˗gbla ˈö˗ pö: «N ꞊dhegblü ˗nu, Fadhiziɛn ˗mü n ˈka, ˈö ˈa Fadhiziɛn ˗nu ˗bha ˈnën ˈka. ˗Zo ˗yö mɛn ˗nu ˈö ˗wa ga ˗an ˗bha ˗go ga ˈgü ˗sü ˗dhɛ ˗sü ˈnën ˈwo˗ ˗za dɔ ˗ni ˈgü n ˗bha bhë.» 7 Pë ˈö˗ pö bhë ˗a ˗wɔn ˈgü, ˗zuöödhe ˗yö ˗da Fadhiziɛn ˗nu waa Sadusiɛn ˗nu ˗an ꞊zinŋgü, ˈö ˗kankwëëdhe ˗yö ˗da ˗an kpö ˈgü. 8 ˗A ˗gɛn ˗mü ꞊dhɛ Sadusiɛn ˗nu ˗wa ˗pö ˗go ga ˈgü ˗sü, ˈˈkiö, ɛɛnˈˈ ˗zuu ˗nu ˈwaa ˈdhö, ˈˈkɛɛ kö Fadhiziɛn ˗nu ˗zë ˗wo wo ˗zo ˗yö* ꞊dhɛ pë ˗nu ˈwo bhë ˗wo ˗dhö. 9 ˈDhɛ ˈö ˗kë ˈˈdhʋ̈, ˈyö mɛn ꞊gban ˗wo ˗ya ˈˈgbla ˗sü ˗bha, ˈyö ˈtɔŋ˗ ˗gɔmɛn ˈbhaa ˗nu ˈö ˈwo bɔ Fadhiziɛn ˗nu ˈka ˈwo ꞊luu, ˈyö ˗an ˗bha ˈö ˗an ˗gɔ ˈwo ˗ya ˗a blɛɛˈˈ ˗sü ˗bha wo ꞊faan ꞊gban ˈka ˈwo˗ pö: «ˈWɔn yaa ˈbhaa ˈkö gɔndënën ˈö yö ˈö ˗dho ˗a kë ˈyaa ˈdhö. ˗Ya kë ꞊dhɛ ˗zuu ɛɛnˈˈ ˗Zlan ˗bha ˈˈkiö ˈbhaa ˈnën ˈö ˈwɔn ꞊blɛɛ ˗a ˗dhɛ ꞊wɛ, ...» 10 ˈDhɛ ˈö ˗zuöödhe ˈö ˗da ˗an ꞊zinŋgü bhë ˈö ˗kë ˈˈgbɩɩ˗, ˈyö ˈˈsɔdha ˗gɔmɛn ˗ya ˗ga ꞊dhɛ ˗wo ˈdho˗ Pɔdhö zë, ˈyö ˈˈsuʋ̈ ˗yö ˗da ˗a ˈgü. ˈDhɛ ˈö ˗kë ˈˈdhʋ̈, ˈyö˗ pö ˈˈsɔdha ˗nu ˗dhɛ ˗wo yɔɔˈˈ ˗wo ˈdho ˗wa bho ˗an ꞊zinŋgü mü kö ˗wo ˈdho ˗a ˈka ˈˈsɔdha ˈkaan˗ ˈgü.

11 ˗A gbeŋ ˈö dɔ ˗a ˈˈpiʋ̈, ˈyö Dëmɛn ˗yö nu ˈö dɔ ˗a ˈˈsuee ˈö˗ pö ˗a ˗dhɛ: «˗Bhö ü ꞊faan ˈsü! ˗A ˗gɛn ˗mü ꞊dhɛ ˗kɔ do ˈö ˈwɔn ˈö ˗gban n ˗bha ˈü˗ ꞊blɛɛ* ˗a ˈka Zedhizadhɛmö bhë, ü dua ˗mü ˈpö kö ˈü˗ blɛɛˈˈ ˈˈdhʋ̈ Wlɔmö.»

12 ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö Zuifö ˗nu ˗wo Pɔdhö ˗yakwëë ˗kë, ˈyö ˈwo wo ˗wo ˗bhö ˈwo˗ pö ˈwa Pɔdhö zë ˈyö ˈwo ˗dho ˗bhöpë ɛɛnˈˈ müpë ˗nu ˗da wo ˈˈdhii. 13 Mɛn ˗nu ˈö ˈwo wo ˗wo ˗bhö ˈˈdhʋ̈, ˗wo ˗ʒiö mɛn ˗kɔŋ ˗yiishiö (40) ˗ta. 14 ˗Wo ˗dho ˈˈsaabhomɛn ˗nu ˗gɔmɛn ˗nu waa mɛn zii ˗nu ˗an ˈˈpiʋ̈ ˈö ˈwo˗ pö ˗an ˗dhɛ: «ˈYa yi ˗wo ˗bhö ꞊dhɛ ˈya Pɔdhö zë ˈyö ˈyi ꞊kun pë ˈˈoo ˗pë ˗da yi ˈˈdhii. 15 ˈDhɛ ˈö ˈˈdhʋ̈, kaa zakanmɛn ˗nu ˗kaa pö ˈˈsɔdha ˗gɔmɛn ˈkpii˗ ˗dhɛ ˗yö nu Pɔdhö ˈka, kö ˈka˗ kë ꞊dhɛ ˈpë ˈka˗ ˈˈpiʋ̈ ˈka ˗dhɛ ˗ga ˗a ˗bha ˈwɔn ˈö bhë ˗a ˈgü ˈzü ˗së ˈka ˗a ˈdhö. ˗Wo nu ˗ni ˈgü ˗a ˈka, yi ˗dho ˈgba ˈsü ˗a ˗gɔ kö ˈyi˗ zë ʒiaan˗.»

16 ˈˈKɛɛ ˈdhɛ ˈö Pɔdhö ˗bha ˈbɛɛ ˗yö ꞊döŋ ˈwo˗ ˈˈpiʋ̈ ˈwo˗ ˗dhiö ˗a ˗gɔ bhë ˗a ˗tɔɔ man, ˈyö dho ˈˈsɔdha ˈkaan˗ ˈgü ˈö˗ ꞊blɛɛ Pɔdhö ˗dhɛ. 17 ˈDhɛ ˈö ˗kë ˈˈdhʋ̈, ˈyö Pɔdhö ˗yö ˈˈsɔdha ˗gɔmɛn ˗nu bhë ˗a mɛn do ˗dhɛ ˈö˗ pö ˗a ˗dhɛ: «˗Bhö yö ˈnëngɔnnën ˈö yö ˗a ˗dhɛ ˈˈdhiʋ̈ ˈü ˈdho ˗a ˈka ka ˗gɔmɛn ˈkpii˗ ˈˈpiʋ̈, ˗a ˗gɛn ˗mü ꞊dhɛ ˈwɔn ˈbhaa ˗ya ˗gɔ kö ˗ya blɛɛˈˈ ˗a ˗dhɛ.» 18 ˈDhɛ ˈö ˗kë ˈˈdhʋ̈, ˈyö ˈnëngɔnnën ˈö bhë ˗a sü ˈö dho ˗a ˈka ˈˈsɔdha ˗gɔmɛn ˈkpii˗ ˈˈpiʋ̈, ˈyö˗ pö ˗a ˗dhɛ: «Pɔdhö ˈö ˗kaso ˈgü bhë ˗yö n ˗dhɛ ˈö˗ pö ꞊dhɛ ˈa nu ˈnëngɔnnën ˈö yö ˗a ˈka ü ˈˈpiʋ̈, ˈyö sü ꞊dhɛ ˈwɔn ˈbhaa ˗ya ˗gɔ kö ˗ya blɛɛˈˈ ü ˗dhɛ.» 19 ˈYö ˈˈsɔdha ˗gɔmɛn ˈkpii˗ ˗yö ˗ya ˈnën ˈö bhë ˗a ˗kɔ ˗bha ˈö dho ˗a ˈka ꞊plɛdhe ˈgü, ˈyö˗ dhɛɛˈˈ kpɔ ˈö˗ pö: «˗Mën ˗wɔn ˈö ü ˗gɔ kö ˈü˗ blɛɛˈˈ n ˗dhɛ?» 20 ˈYö˗ ˈnëngɔnnën ˗ya pö ˗a ˗dhɛ: «Zuifö ˗nu ˗wo ˗ya ˗mɔn kö ˈwo˗ pö ü ˗dhɛ ˈü nu Pɔdhö ˈka dhiʋ̈ˈˈ zakanmɛn ˗nu ˗kuu ˈˈdhiʋ̈ ꞊dhɛ ˈpë ˈwo˗ ˈˈpiʋ̈ ˈwo ˗dhɛ ˗ga ˗a ˗bha ˈwɔn ˈö bhë ˗a ˈgü ˈzü ˗së ˈka ˗a ˈdhö. 21 ˈˈKɛɛ ˈbhaa ˗dho ˈˈwɩ ˗a ˗bha ˗an ˗gɔ, ˗a ˗gɛn ˗mü ꞊dhɛ gɔɔn˗ ˗nu ˈwo ˗ʒiö ˗kɔŋ ˗yiishiö (40) ˗ta ˗wa ˈgba ˈsü ˗a ˗gɔ, ˈö ˗wa wo ˗wo ˗bhö ꞊dhɛ ˈwa˗ zë ˈyö ˈwo ꞊kun ˗bhöpë ɛɛnˈˈ müpë ˗da wo ˈˈdhii. ˗Wa ˗mɔn ˗a ˈgü ˈsaadhö, ü ˗bha ˗we ˗a ˗bha ˗sü ˈnën ˈö˗ ˗wɔn ˗ya ˈto.» 22 ˈYö ˈˈsɔdha ˗gɔmɛn ˗yö ö ˗kwaa ˈnëngɔnnën ˈö bhë ˗a ˗zü kö ˗yö ˈdho. ˈˈKɛɛ ˈˈsanni ˗yö ˈdho ˗ya ˗pö ˗a ˗dhɛ: «ˈBhaa ˗dho ˗a pö mɛn ˈˈwɛɛ ˈbhaa ˗dhɛ ꞊dhɛ ˈbha ˈwɔn ˈö bhë ˗a blɛɛˈˈ n ˗dhɛ.»

23 ˈDhɛ ˈö ˗kë ˈˈdhʋ̈, ˈyö ˈˈsɔdha ˗gɔmɛn ˈkpii˗ ˗yö ö ˗bha ˈˈsɔdha ˗gɔmɛn ꞊plɛ ˗dhɛ ˈö˗ pö ˗an ˗dhɛ: «˗Ka ˈˈsɔdha këŋ ꞊plɛ (200) ˗dhɛ wo ˈkwëëdhö kö ˈka ˈˈsɔdha ˗kɔŋ ˈˈsɔɔplɛ (70) ˈwo ˗dho kë ꞊soo ꞊taa waa˗ mɛn këŋ ꞊plɛ (200) ˈö ˈdünënga dho kë ˗an ˗gɔ ˗an kpa ˗an ˗bha kö kaa˗ ˗nu ˈka ˈdho Sezadhe gbeŋ, ˈˈlɛlɛ ˈˈseishiö* ꞊tɛɛ˗ ˗bha. 24 ˗Ka ꞊soo ˗nu ˈsü ˈpö Pɔdhö ˗bha ˈka kö ˈwɔn ˈbhaa ˈyaa ˗dho ˗a ˈˈdhiʋ̈ ꞊slɔɔ, ˈka ˈdho ˈka ˗lo ˗a ˈka ˈˈsɛ ꞊kɔɔnmɛn Felisö ˈˈpiʋ̈.» 25 ˗Yö ˈsëëdhɛ do ˈbhaa ˗kë ˈö˗ dɔ ˗an ˗gɔ. Pë ˈö˗ pö ˗a ˈgü ˈyö ꞊nɛn:

26 «ˈˈSɛdë ꞊bhlëësü Felisö, ˈsëëdhɛ ˈö yö maan Klodö Liziasö ˗mɛn man ˈnën ˈa˗ bɔ ü ˗dhɛ. ˈMan ˈˈwɩ ü ˈka ˈgbɛ! 27 Gɔndënën ˈö yö Zuifö ˗nu ˗wa ˗kun kö ˈwo˗ zë ˗be, ˈˈkɛɛ ˈyö yaa n ˗man ˈˈsɔdha ˗nu ˈyi dho mü ˈzozodhö ˈö ˈyi˗ dha, ˈyö ˗tɔ a˗ ˗man ꞊dhɛ Wlɔmö mi ˗mü ˗a ˈka. 28 ˈDhɛ ˈö ˗kë ˈˈdhʋ̈, ˈyö ˈa dho ˗a ˈka zakanmɛn ˗nu ˗kuu ˈˈdhiʋ̈ kö pë ˈyaa ˈö˗ ˗kë ˈa˗ dɔ. 29 ˈYö ˈa˗ yö ꞊dhɛ ˈwɔn ˗nu ˈwo ˗gban ˗an ˗bha ˈTɔŋ˗ ˗bha ˈyö ˈwo˗ za ˗ya ˗bha. Pë ˈö ˗dho kë ˗a zë ˗gɛn ɛɛnˈˈ ˗a ˗da ˗kaso ˈgü ˗gɛn kpɛnŋdhö ˈka n ˈti˗ yö. 30 ˈDhɛ ˈa˗ man ꞊dhɛ ˗wa ˈgba ˈsü ˗a ˗gɔ kö ˈwo˗ zë, ˈyö ˈa˗ bɔ ü ˗dhɛ ˈmü ˈzozodhö. A˗ ˗pö mɛn ˗nu ˈwo za ˗ya ˗a ˗bha bhë ˗an ˗dhɛ ˗wo nu ü ˗kuu ˈˈdhiʋ̈ ˈmü kö ˗wa ˗wɔn ˗da ü ˗dhɛ.»

31 ˈˈSɔdha ˗nu ˗wo ˈwɔn ˈö ˗an ˗gɔmɛn ˗ya pö ˗an ˗dhɛ bhë ˗a ˗kë, ˈö ˈwo Pɔdhö sü gbeŋ ˈwo dho ˗a ˈka Antipatrisö. 32 ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö ˈˈsɔdha ˗nu ˈwo kun ꞊soo ꞊taa bhë ˈwo dho Pɔdhö ˈka, ˈyö ˗a mɛn ˗nu ˈwo to ˈwo wo ꞊yɛɛ ˗kë ˈwo nu ˈˈsɔdha ˈkaan˗ ˈgü. 33 ˈˈSɔdha ˗nu ˈwo kun ꞊soo ꞊taa bhë ˗wo ˗dho ˈwo ˗lo Sezadhe, ˈyö ˈsëëdhɛ ˈwo˗ dɔ ˗an ˗gɔ bhë ˈwo˗ nu ˈˈsɛ ꞊kɔɔnmɛn ˗dhɛ, ˈö ˈwo Pɔdhö ˈˈklɔɔn bho ˗a ˗bha. 34 ˈDhɛ ˈö ˈsëëdhɛ ˈö bhë ˗a ˗wo pö, ˈyö dhɛɛˈˈ kpɔ kö ˗dhɛ ˈö Pɔdhö ˗yö go ˗a ˗bha ˈö˗ dɔ. ˈYö Pɔdhö ˗ya pö ˗a ˗dhɛ ö ˗go Silisi ˗sɛ ˈgü. 35 ˈYö˗ pö Pɔdhö ˗dhɛ: «Mɛn ˗nu ˈwo za ˗ya ü ˗bha bhë ˗wa nu, kö ü ˗bha ˈwɔn ˈö bhë ˈa ˗dhɛ ˗ga ˗a ˈgü ˗së ˈka.» ˈDhɛ ˈö ö bo, ˈyö˗ pö ˗wo ˈdho Pɔdhö ˈka Edhɔdö ˗gɔ ˈkɔɔ kö ˗wa ˗maan kë.