Yesu ˗bha bɔmɛn ˗nu këwɔn ˗nu
25 ˈDhɛ ˈö Fɛtusö ˗yö ˗lo Zude ˗sɛ ˈgü ˈö ˗ya ˈˈsɛ ꞊kɔɔn ˗sü ˗bha, ˈö ˗dhɛkpaɔyi ˗yaaga ˗yö ˗ʒiö, ˈyö go Sezadhe ˈö dho Zedhizadhɛmö. 2 ˈYö ˈˈsaabhomɛn ˗nu ˗gɔmɛn ˗nu waa Zuifö ˗nu ˗bha mɛn ꞊bhlëësü ˗nu ˗wo dho ˈwo Pɔdhö ˗wɔn ˗da ˗a ˗dhɛ. ˗Wo ˗bhɛɛ Fɛtusö ˗dhɛ ꞊dedewo, 3 ˈö ˈwo˗ pö ˗a ˗dhɛ ˗yö dɔ ˈˈgbɩɩ˗ kö ˗yö Pɔdhö bɔ wo ˗dhɛ Zedhizadhɛmö. Pë ˈwo kun ˗a ˈˈpiʋ̈ ˈyö ˗tɔ ˈwo ˈgba ˈsü Pɔdhö ˗gɔ kö ˈwo˗ zë ʒiaan ˗ta. 4 ˈˈKɛɛ ˈyö Fɛtusö ˗ya pö ˗an ˗dhɛ Pɔdhö ˗dho ˈto ˗kaso ˈgü Sezadhe mü, yö ꞊dede ˗a ˈˈtʋ̈ŋ ˗ya ˈto ˈˈtɩtɩ kö ˈö ˈdho mü. 5 ˈYö˗ pö ˗an ˗dhɛ ˈzü: «˗Ya kë ꞊dhɛ ˈwɔn yaa ˈbhaa ˈnën gɔndënën ˈö bhë ˈö˗ ˗kë ꞊dedewo, ka ˗bha mɛn ˗nu ˈö ˗wogbindhɛ ˈdhö ˗an ˗gɔ ˗wo ʒiö n ꞊kee˗ kö yaa˗ ˗nu ˈyi ˈdho kö ˗wa ˗wɔn ˗da.»
6 ˈDhɛ ˈö ˗dhɛkpaɔyi ˈö ˗mɔn ˈˈsaaga ɛɛnˈˈ ˗kɔŋ do ˗bha ˗a ˗kë ˗an ˈˈpiʋ̈ mü, ˈyö ö ꞊yɛɛ ˗kë ˈö dho Sezadhe. ˈDhɛ ˈö˗ ˗ta ˗dhɛ ˗yö ꞊kpɔɔ, ˈyö dho ˈö ˗ya zakandhɛ ˈgü, ˈyö˗ pö ˗wo nu Pɔdhö ˈka. 7 ˈDhɛ ˈö nu ˈö ˗da ˈkɔɔ, ˈyö Zuifö ˗nu ˈwo go Zedhizadhɛmö bhë, ˈwo ꞊klëën ˗a ˗zü, ˈö ˈwɔn yaa ꞊gbɔɔnsü ˗nu ˈö yö ˈti ˗an kë, ˈö wo ꞊dede wo ˈti ꞊mɔɔn˗ ˗bha ˈpö kö ˗wa ˗zɔn ꞊dhɛ gagade ˗mü bhë ˈwo˗ ˗ya ˗a ˗bha.
8 ˈDhɛ ˈö ˗kë ˈˈdhʋ̈, ˈyö Pɔdhö ˗yö ˗ya ö ˗de ˗ta ˗za dɔ ˗sü ˗bha ˈö˗ pö: «ˈWɔn yaa ˈˈwɛɛ ˈö ˈa ˗dho ˗a kë kö ˗yö kë Zuifö ˗nu ˗bha ˈTɔŋ˗ ɛɛnˈˈ ˗Zlan ˗dhɔkë ˗a ˈgü ˗kɔ ɛɛnˈˈ ˈzü Sezaa ꞊bhlëë ˗shiö ˗wɔn ˈka ˈyaa ˈdhö.» 9 ˈˈKɛɛ ˈdhɛ ˈö ˗kë ꞊dhɛ, ˗yö ˗kun Fɛtusö ˈˈpiʋ̈ ꞊dhɛ ö ˈˈdhiaa ˗yö kë Zuifö ˗nu ˈgü, ˈyö˗ pö Pɔdhö ˗dhɛ: «Ü˗ ˈˈpiʋ̈ kö ˈü ˈdho Zedhizadhɛmö kö ˈwɔn ˗nu ˈwo ˗an ˗ya ü bha bhë ˈka˗ ˗za dɔ n ˈˈɲan ˈˈdhiʋ̈ ˈmü ˗ee?» 10 ˈYö Pɔdhö ˗ya pö ˗a ˗dhɛ: «˗Dhɛ ˈa dɔ ˗a ˗bha yö Sezaa ˗bha zakandhɛ ˗mü, yö ˈnën ˈö˗ ˗dhɛ ˈdhö˗ ˗bha kö ˗wo za dɔ n ˗bha mü. N ˈti ˈwɔn yaa kë Zuifö ˗nu ˈka, ꞊dhɛ ˗kɔ ˈö bhi ꞊dede ˈü˗ yö ˗ni ˈgü ˗a ˈka bhë ˗a ˈdhö. 11 ˗Ya kë ꞊dhɛ ˈwɔnyaakëmɛn ˗mü n ˈka ꞊dedewo, ˈö ˈman ˈwɔn ˈbhaa ˈö˗ ˗wɔn ˈgü ˗an dua ˈdhö ˗mü kö ˗wo n zë ˗a kë, a ˈˈwɩ ˗sü ˈka ˗a ˗bha kö ˈa ga. ˈˈKɛɛ ˗ya kë ꞊dhɛ ˈwɔn ˗nu ˈö ˈwo˗ ˗ya ˗ni ˈgü n ˗bha bhë, ˗a ˗ya n ˗bha ˗gɛn ˈyaa ˈdhö, mɛn ˈbha dua ˈyaa ˗mü kö ˗yö n ˗da ˗an ꞊kwɛɛ˗ kö ˈö kë ˗an ˗dhɛ ˗së. A˗ ˈˈpiʋ̈ kö za ˈö yö ˗yö ˈdho Sezaa ˗kuu ˈˈdhiʋ̈!» 12 ˈDhɛ ˈö Fɛtusö waa ˗dhioo ˗dɔ ˗a ˗ta ˗mɛn ˗nu ˈwo wo ˗gɔ dun, ˈyö˗ pö Pɔdhö ˗dhɛ: «ˈDhɛ ˈö ˗kë ꞊dhɛ ˈü˗ ˈˈpiʋ̈ ˈü ˈdho Sezaa ˗kuu ˈˈdhiʋ̈ bhë, ü ˗dho ˈdho ˗a ˗kuu ˈˈdhiʋ̈.»
13 ˈDhɛ ˈö ˗dhɛkpaɔyi ˈnën ˈbhaa ˗yö ˗ʒiö, ˈyö ˗gblüdë Aglipa waa Bedhenisö ˈwo nu ˗wo Fɛtusö ˗dhɛ Sezadhe kö ˈwo˗ ˈˈyʋʋ ˈsü. 14 ˈDhɛ ˈö ˗kë ꞊dhɛ ˗wo ˗kun ˗dhɛkpaɔyi ˈnën ˈbhaa kë ˗ni ˈgü mü, ˈyö Fɛtusö ˗yö Pɔdhö ˗bha ˈwɔn ˈö bhë ˗a ꞊blɛɛ ˗gblüdë ˗dhɛ ˈö˗ pö:
«Gɔndënën do ˈbhaa ˈö Felisö ˗ya to ˗kaso ˈgü ˗yö ˈyö. 15 ˈDhɛ ˈa dho Zedhizadhɛmö, ˈˈsaabhomɛn ˗nu ˗gɔmɛn ˗nu waa Zuifö ˗nu ˗bha mɛn zii ˗nu ˗wa ˗wɔn ˗da n ˗dhɛ ˈö ˈwo˗ pö n ˗dhɛ ˈa˗ zë za ˈka. 16 ˈˈKɛɛ ˈyö ˈa˗ pö ˗an ˗dhɛ ꞊dhɛ Wlɔmö ˗mɛn ˗nu ˗bha wɔkɔ ˈgü, mɛn ˈwo za ˗ya ˗a ˗bha ˈwaa˗ ˗da mɛn ˗nu ꞊kwɛɛ˗ kö ˈwo kë ˗an ˗dhɛ ˗së, kö ˗a mɛn ˈö ˈˈdhʋ̈ yö ˈti dɔ ˈpö mɛn ˗nu ˈwo za ˗ya ˗a ˗bha bhë ˗an wë ˈˈdhiʋ̈ kö ˗yö ʒiö ö ˗bha ˈgü. 17 ˈDhɛ ˈwo nu ˈö˗ ˗ta ˗dhɛ ˗yö ꞊kpɔɔ, a ˗to mü ˈa dho ˈa ˗ya zakandhɛ ˈgü, ˈyö ˈa˗ pö ˗wo nu gɔndënën ˈö bhë ˗a ˈka. 18 ˈˈKɛɛ ˈdhɛ ˈö za ˗ya ˗a ˗bha ˗mɛn ˗nu ˗wo nu, ˈwɔn yaa ˗nu ˈa n ˗zo gɔn ˗a ˈka ˗be bhë wo ˈti˗ ˈˈwɛɛ ˈbhaa ˗ya ˗a ˗bha. 19 Pë dosɛnŋ ˈö˗ zɔɔdhe kun ˗an ꞊zinŋgü ˗yö ˗gban ˗an ˗bha ˗zlan gbasü* waa gɔndënën do ˈwo˗ ˗dhɛ Yesu ˈö ˗ya ga, ˈˈkɛɛ ˈö Pɔdhö ˈdhö˗ pö ˗ni ˈgü ˗kplawo ꞊dhɛ ˗yö ˈˈbhɩɩ˗ bhë ˗a ˗bha. 20 ˈDhɛ ˈö ˗kë ꞊dhɛ ˗a zɔɔdhe ˈö bhë ˗kɔ ˈa ˗dho ˗a ˈˈɲan bhɔ ˗a ˈka n ˈti˗ dɔ, a gɔndënën ˈö bhë ˗a dhɛɛˈˈ ˗kpɔ kö ˗ya kë ꞊dhɛ ˗yö ˗dho ˈˈwɩ ˗a ˗bha kö ˗yö ˈdho Zedhizadhɛmö kö za ˈö bhë ˗yö dɔ mü ˗ya pö. 21 ˈˈKɛɛ ˈdhɛ ˈö Pɔdhö ˗ya pö ˈwɔn ˈö bhë ˗yö ˈdho Sezaa* ˗kuu ˈˈdhiʋ̈, ˈö˗ pö ˈö ˈto ˗kaso ˈgü kö ˗yö ˈdho ˗yö yö ˗a ˈka pë ˈö ˗dho ˗a pö ˗a ˗bha, ˈyö ˈa˗ pö ˗yö ˈto ˗kaso ˈgü kö ˗wa ˗maan kë kö ˗yö dho ˗yö yö ˗a ˈka ˈˈtʋ̈ŋ ˈa ˗dho ˗a bɔ ˗a ˈka Sezaa ˗dhɛ ˗a ˗bha.»
22 ˈDhɛ ˈö kë ˈˈdhʋ̈, ˈyö Aglipa ˗ya pö Fɛtusö ˗dhɛ: «Man ꞊dede a˗ ˈˈpiʋ̈ ˈpö kö gɔndënën ˈö bhë ˈa˗ ˗wo man.» ˈYö Fɛtusö ˗ya pö: «Ü ˗dho ˗a ˗wo man dhiʋ̈ˈˈ.» 23 ˗A ˗dhɛkpaɔyi ˈö dɔ ˗a ˈˈpiʋ̈, ˈyö Aglipa waa Bedhenisö ˈwo nu ˈwo ˗da za ˗kan ˗a ˈgü ˗kɔ ˈgü ˗desüva ꞊dede ˈka, kö ˈˈsɔdha ˗gɔmɛn ˈˈgblʋ̈gblʋ̈ ˗nu waa mɛn ꞊bhlëësü ˗nu ˈwo ˈˈkwipö ˈö bhë ˗a ˈgü ˗wo ˗an ꞊kee˗. ˈYö Fɛtusö ˗yö mɛn bɔ ˈö ˈwo nu Pɔdhö ˈka. 24 ˈYö˗ pö: «˗Gblüdë Aglipa waa mɛn ˈˈpɛpɛ ˈö ˈka yi ˈˈpiʋ̈ yö, gɔndënën ˈö Zuifö ˗nu ꞊gban ˗wa ˗ta ˗zɔn n ˗dhɛ Zedhizadhɛmö waa ˗dhɛ ˈö yö ˗a ˈgü ˈˈgbla ˗sü ˈka, ˈö ˈwo˗ pö ˗a ˗dhɛ ˈyaa˗ ˗bha kö ˗yö ˗tosɛta kë ˈzü pinŋdhö bhë, ˈyö dɔ bhë. 25 ˈˈKɛɛ man ˗zë, ˈwɔn ˈö ˗dho ˗a kë kö ˗yö kë ˗a zë ˗gɛn ˈka n ˈti˗ yö. ˗A ˗wɔn ˈgü ˈdhɛ ˈö˗ pö ꞊dhɛ ö˗ ˈˈpiʋ̈ kö ˈwɔn ˈö bhë ˗yö ˈdho Sezaa* ˗kuu ˈˈdhiʋ̈, ˗a ˗we ˗a ˗bha kö ˈa˗ bɔ mü. 26 ˈˈKɛɛ pë ˈbhaa ˈkö ˗dho kë n ˗gɔ kö ˈa˗ ˗bɛnzë ˗a ˗bha ˈa˗ bɔ n Dëmɛn ˗dhɛ ˈyaa ˈdhö. Yö ˈnën ˈö˗ ˗wɔn ˈgü ˈa nu ˗a ˈka mɛn ꞊gban ˈka ˗kuu ˈˈdhiʋ̈, ˈˈkɛɛ ˈa nu ˗a ˈka ˗Gblüdë Aglipa ü ˗kuu ˈˈdhiʋ̈. A˗ ˗kë ˈˈdhʋ̈ kö dhɛɛˈˈ ˗ya ˈkpɔ ˗a ˗gɔ, pë ˈa ˗dho ˗a ˗bɛnzë ˗a ˗bha ˈa˗ dɔ. 27 ˗A ˗gɛn ˗mü ꞊dhɛ n ˗bha ˈgü, ˈwaa ˗kasogümɛn bɔ mɛn ˗dhɛ ˈˈdhʋ̈ ˈˈwɛɛwɛ kö pë ˈö˗ ˗mɛn ˗ya ˗kë wo ˈti˗ blɛɛˈˈ.»