ˈSëëdhɛ ˈö Pɔdhö ˗ya bɔ Wlɔmö ˗mɛn ˗nu ˗dhɛ

16 A˗ ˗dhɛ ka ˗gɔ kö ˈka ka ˗kɔ ˗ya kwa ꞊dhegblüdhe Febe ˈö yö ˗kë ˗zlanwokɔdhi ˈö Sankle ˗a ˈgü ˗mɛn ˈka bhë ˗a ˗gɔ. 2 ˗Ka dɔ ˈˈgbɩɩ˗ ˈka ka ˗kɔ ˗ya ˗a ˗gɔ ꞊dhɛ ˗kɔ ˈwo wo ˗kɔ ˗ya ˗a ˈka Dëmɛn ˗bha mɛn ˈˈslʋ̈ʋ̈slʋ̈ ˗nu ˗gɔ ˗a ˈdhö, kö ˗takundhe ˈˈpɛpɛ ˈö˗ ˗bhawɔn ˗yö yö ˗a ˗bha ˈka˗ nu ˗a ˗dhɛ. ˗A ˗gɛn ˗mü ꞊dhɛ yö ˗de ˈpö, ˗yö ˗nu mɛn ꞊va ꞊dede ˗dhɛ. Mɛn ˗nu ˈwo ˈˈdhʋ̈ a˗ mɛn do ˈka.

3 ˗Ka Plisüka waa Akidhasö ˈö ˈwo ˗kë n yökëyoo ˗nu ˈka Yesu Klito* ˗bha yö ˈgü bhë ˗an ꞊tuaabho n ˗bha ˈka. 4 ˗Wo wo ˗de ˗dɔ ga ˗yɛ ˈˈdhiʋ̈ n ˗wɔn ˈgü.* Yaa ˗zlanwokɔdhi ˈˈpɛpɛ ˈgümɛn ˗nu ˈö ˈwaa Zuifö ˈka, yi ˗an ˈˈnuɛ ˗bho. 5 ˗Zlanwokɔdhi ˈö ˗yakwëë ˗kë ˗an ˗bha ˈkɔɔ bhë, ˗kaa ˈgümɛn ˗nu ꞊tuaabho n ˗dhɛ. ˗Ka n ˗man mɛn dhɔɔbhaasü Epenɛtö ˈö ˗kë Klito ˗bha gwëëˈˈ ˗blɛɛsü ˗nu ˈwo Azi ˗sɛ ˈgü ˗a mɛn do ˈka bhë, ˗a ꞊tuaabho n ˗dhɛ. 6 Madhi ˈö yö ˗kë ꞊dedewo ka ˗bha ˈka bhë ˈman˗ ꞊tuaabho. 7 ˈMan ˈˈwɩ ˈpö Andronikusö waa Zuniasö ˈö ˈwo ˗kë n ˗de ˗bha mɛn ˗nu ˈka, ˈö yaa˗ ˗nu ˈyi ˗kaso ˗kë yi ˈkwëë˗ bhë ˗an ˈka. ˈMɛn ˈwo bhë ˗wo ˗kë Klito ˗bha gwëëˈˈ ˗nu ˈka n ˈˈdhiʋ̈ ꞊gblɛɛn, ˈö bɔmɛn ˗nu ˗wo ˗an dɔ ˗së ˈka.

8 ˗Ka Anpliatusö ˈö˗ ˗wɔn ˈdhö n ˗gɔ ˈˈgbɩɩ˗ ˗Zlan ˗bha ʒiaan ˗ta bhë ˗a ꞊tuaabho n ˗dhɛ. 9 ˈMan ˈˈwɩ Uubɛn ˈö ˗kë kwa yökëyoo ˈka Klito ˗bha ʒiaan ˗ta bhë waa n ˈˈtɔŋdë ꞊bhlëësü Takisö ˗an ˈka. 10 ˗Ka Apedhɛsö ˈö˗ ˈˈdhiaa ˈdhö Klito ˈgü bhë ˗a ꞊tuaabho n ˗dhɛ. ˈMan ˈˈwɩ ˈpö Adhitobudhö waa ö ˗bha ˈkɔɔmɛn ˗nu ˗an ˈka. 11 ˈMan Elodiɔn ˈö ˗kë n ˗man mɛn ˈka bhë ˗a ꞊tuaabho. ˈMan ˈˈwɩ Naasisö waa ö ˗bha ˈkɔdhigümɛn ˗nu ˈwo Dëmɛn ˗bha ʒiaan ˗ta bhë ˗an ˈka. 12 ˈMan Trifɛnö waa Trifozö ˈö ˈwo ˗kë dhebɔ ˗nu ˈwo yö kë ˗ni ˈgü ꞊dedewo Dëmɛn ˗dhɛ ˗an ˈka bhë ˗an ꞊tuaabho. ˈMan ˈˈwɩ Pɛɛsisö ˈö ˗kë kwa dhɔɔbhaamɛn ˈka bhë ˗a ˈka ˈpö, ˈyö sü ꞊dhɛ ˗ya yö kë ꞊dedewo Dëmɛn ˗dhɛ. 13 ˈMan ˈˈwɩ Dhufusö ˈö Dëmɛn ˗yö ö ˗kɔ ˗yɛ ˗a ˗bha waa ö dhe ˈa˗ sü ꞊dhɛ n dhe ˈdhö ˈpö bhë ˗an ˈka. 14 ˈMan Asɛnklitö, Flegɔn, Ɛɛmɛsö, Patrobasö, Ɛɛmasö waa kwa ꞊dhegblü ˗nu ˈwo ˗an ˈˈpiʋ̈ ˈmü ˗an ꞊tuaabho. 15 ˈMan ˈˈwɩ ˈpö Filolɔgö waa Ʒudhi, Nedhe waa ö ꞊dhegblüdhe, Olɛnpasö waa mɛn ˈˈslʋ̈ʋ̈slʋ̈ ˗nu ˈˈpɛpɛ ˈwo ˗an ˈˈpiʋ̈ ˈmü ˗an ˈka. 16 ˗Ka ka ˈko ˗nu ꞊tuaabho ˈˈwowosü* ˈka. ˗Zo ˗yö Klito ˗dhɛ ˗mɛn ˗nu ˈö ˈwo ˗zlanwokɔdhi ˈˈpɛpɛ ˈgü, ˗wa ka ꞊tuaabho.

17 ˈˈKɛɛ n ꞊dhegblü ˗nu, a ka ꞊faanmën kö mɛn ˗nu ˈö ˈwo ˗kankwëëdhe ˗damɛn ˗nu ˈka, ˈö ˈwo mɛn ˗gɛn ˈˈdhiʋ̈ ˗zuö ˗wɔn ˗nu ˗kë, ˈö ˗an këwɔn ˗nu ˈwo ˈˈdhʋ̈ ˈwaa ˗bɛ pë ˈwo ka ꞊klaŋ ˗kë ˗a ˈka ˗a ˗bha bhë, ˈka ˗an ˈsuaan˗ bho, kö ˈka ˈˈkan ˗an ˗bha. 18 ˗A ˗gɛn ˗mü ꞊dhɛ mɛn ꞊suu ˗nu ˈwo ˈˈdhʋ̈, ˈwaa kwa Dëmɛn Klito ˗bha ꞊dhuëŋ ˗nu ˈka, wo ˗de dhɔɔbhaawɔn kë ˗sü* ˈnën ˈwo˗ ˗bha ꞊dhuëŋ ˈka. ˗Wo ˗bɔ ˗wo ˈˈnɛɛnnɛn ˗nu waa ˈˈkpënŋ˗ ˗kë mɛn ˗gɔ ˗wo ˗nu ˗ta ˈö ˈwo mɛn ˗nu ˈö ˗an ˗zo ˈyaa wo ˗de ˈˈpiʋ̈ ˗an zuʋ̈ˈˈ sü. 19 Ka ˗bha ˈwɔn ˗man ˗Zlan ˗ta ˗sü ˈö bhë, mɛn ꞊gban ˈˈpɛpɛ ˈˈɲan ꞊yaa˗ yö. ˗Ya ˗kë ˈö n zuʋ̈ˈˈ ꞊nii ˗yö ˗da ꞊dedewo ka ˗wɔn ˈgü. ˗Yö n ˈˈpiʋ̈ ꞊dhɛ ˈka kë ꞊kpɔɔsü, kö ˈka ˈwɔn ˗nu ˈwo ˗së ˗an kë, kö ˈka ꞊duëë ˈwɔn yaa ˗gɔ, kö pö ˈyaa ˗dho kë ka ˗bha. 20 ˗A ˈˈtʋ̈ŋ ˗ya ˈto ꞊klöö˗ kö ˗Zlan ˈö zuʋ̈waannusü nu ka ˗dhɛ bhë, ˗yö Sɔtraan ˗böö wuuˈˈ ka ˗gɛn ꞊löö. Kö kwa Dëmɛn Yesu ˗yö ö ˗bha ˗gasitɛ kë ka ˗dhɛ bhë, ˈaa ˗yö kë!

21 Timote ˈö ˗kë n yökëyoo ˈka, ˗ya ka ꞊tuaabho. Lusiusö, Zazɔn waa Sosipatɛɛ ˈö ˈwo ˗kë n ˗man mɛn ˗nu ˈka bhë, ˗wa ˈˈwɩ ka ˈka ˈpö.

22 Maan Tɛɛtiusö ˗mɛn ˈa ˈsëëdhɛ ˈö yö ˗a ˗bɛnzë, ˈa ˗kë ˗zo ˗yö Dëmɛn ˗dhɛ ˗mɛn ˈka ꞊dhɛ ka ˈdhö bhë, ˈman ka ꞊tuaabho.

23 Gayusö ˈö ˗kë n ˗dhɛŋbhɔadë ˈka, ˈö ˗zlanwokɔdhi ˈgümɛn ˗nu ˈˈpɛpɛ ˗wo ˗bhɔkwëë ˗kë ˗a ˗gɔ ˈkɔɔ ˈpö bhë, ˗ya ka ꞊tuaabho. Edhasö ˈö ˗kë ˈˈkwipö ˈö yö ˗a ˈwëëkɔdhiʋ̈mɛn ˈka waa ö ꞊dhegblü Kaatusö ˗wa ˈˈwɩ ka ˈka ˈpö. 24 ——

25 ˗Zlan ꞊mɔɔn˗ bha ˈö bɔ nɔɔn˗ ˗së ˈa˗ pö ˗ni ˈgü waa ˈwɔn ˈö ˗gban Yesu Klito ˗bha ˗an ˗ta ˈö ka ˈgü ˗kë ˈˈgbɩɩ˗. ˗A nɔɔn˗ ˗së ˈö ˈˈdhʋ̈, ˗yö ˗bɛ ˗Zlan ˗bha ˈwɔn ˈö˗ to ˗bin ˗sü ˈka ˈö˗ yi ˗ya ꞊gwëë, ˈö ˈˈdhɛ bho ˗ni ˈgü ˗a ˗ta bhë ˗a ˗bha. 26 ˈˈKɛɛ ˈˈtʋ̈ŋ ˈö yö ˗a ˈgü, ˈwɔn ˈö kun ˗bin ˗sü ˈka ˈˈdhʋ̈ bhë ˈkwa˗ dɔ, ˈö ˈkwa bɔ ˈpö ˈwɔn ˈö ˗Zlan ˗Wo ˈsëëdhɛ ˗ya to ˈˈdhiʋ̈ ˈö˗ ꞊blɛɛ ˗a ˗ta, ˈkwa˗ ˗zɔn ˈˈsɛ ꞊gban ˈˈpɛpɛ ˈgümɛn ˗nu ˗dhɛ. Kwa ˗bha ˗Zlan ˈö ˗dhö ˗toëpö ˈka bhë yö ˈnën ˈö˗ pö ˗yö kë ꞊dhɛ ˗kɔ ˈö bhë ˗a ˈdhö. ˗Yö ˗kë ˈˈdhʋ̈ kö ˈwɔn ˗man ˗a ˗ta ˗sü ˈö ˗zoyödhe ˈka, ˗yö kë ˗an ˗gɔ. 27 Kö ˗Zlan ˈö yöö dosɛnŋ ˈnën ˈö ˈwɔndɔdhe ˈdhö˗ ˗gɔ, ˗a ˈtɔ ˗yö bɔ Yesu Klito ˗ta ˗yö bhɔ ˗toëpö ˈka bhë, ˈaa ˗yö kë!