Nɔɔn˗ ˗së ˈsëëdhɛ ˈö Makö ˗ya ˗bɛnzë

15 ˈDhɛ ˈö ˗dhɛ ˗yö ꞊kpɔɔ, ˈyö ˈˈsaabhomɛn ˗nu ˗gɔmɛn ˗nu, mɛn zii ˗nu waa ˈtɔŋ˗ ˗gɔmɛn ˗nu ˈö ˈwo ˗kë zakanmɛn ˗nu ˈka bhë ˈwo ˗soo ˈwo dho wo ˈkwëëdhö, ˈö ˈwo ˗yakwëë ˗kë. ˈDhɛ ˈwo wo bo Yesu ˗lö ˗sü ˈka, ˈyö ˈwo dho ˗a ˈka ˈö ˈwo˗ nu Pidhatö ˗dhɛ. 2 ˈYö Pidhatö ˗ya dhɛɛˈˈ kpɔ ˈö˗ pö: «Bhi ˈnën ˈü ˗tɔ Zuifö ˗nu ˗bha ˗Gblüdë ˗ee?» ˈYö Yesu ˗ya ˗yɔ bɔ ˗a ˗gɔ ˈö˗ pö: «Yö ˈnën ˈö bhi ꞊dede ˈü˗ pö bhë.» 3 ˈWɔn ꞊va ꞊dede ˈnën ˈˈsaabhomɛn ˗nu ˗gɔmɛn ˗nu ˗wo kun ˗a ˗ya ˗ni ˈgü ˗a ˗bha. 4 ˈYö Pidhatö ˗ya dhɛɛˈˈ kpɔ ˈzü ˈö˗ pö: «Pë ˈbhaa ˈyaa ü ˗gɔ kö ˈü˗ pö ˗ee? ˈWɔn ˈˈpɛpɛ ˈö ˈwo˗ blɛɛˈˈ ˗ni ˈgü ü ˗bha bhë, ˈbhaa˗ man ˗ee?» 5 ˈˈKɛɛ Yesu yö ˈti˗ ˗daa ˈˈwɛɛ ˈbhaa kë ˗a ˗gɔ. ˈYö˗ ˈwɔn ˗yö Pidhatö kun ꞊dedewo.

6 Pakö ˈwlaan˗ yi ˗ya ˗lo ˗kplawo, ˗kasogümɛn ˈö ˈˈsɛgümɛn ˗nu ˗wo ꞊bhɛɛ Pidhatö ˗dhɛ kö ˗ya bho ˗kaso ˈgü, ˗ya ˗bho mü. 7 ˗A ˈˈtʋ̈ŋ ˈö bhë ˗a ˈgü, gɔndënën do ˈwo˗ ˗dhɛ Badhabasö waa mɛn ˗nu ˈö ˈwo ˗gban ˈˈsɛkɔɔnmɛn ˗nu ˗gɔ ˈö ˈwo mɛn zë, ˗wo ˗kun ˗kaso ˈgü. 8 ˈDhɛ ˈö ˗kë ˈˈdhʋ̈, ˈyö mɛn ꞊va ꞊dede ˗wo nu ˈwo ˗ya bhɛɛˈˈ ˗sü ˗bha Pidhatö ˗dhɛ kö pë ˈö˗ ˗kë wo ˗dhɛ ˗kplawo bhë ˗ya kë. 9 ˈYö Pidhatö ˗ya pö ˗an ˗dhɛ: «Ka˗ ˈˈpiʋ̈ kö ˈa n ꞊kwaa Zuifö ˗nu ˗bha ˗Gblüdë ˗zü ka ˗dhɛ ˗ee?» 10 ˗A ˗gɛn ˗mü ꞊dhɛ Pidhatö ˗ya ˈwɔn ˗dɔ ꞊dhɛ ꞊druɛɛ ˈnën ˈˈsaabhomɛn ˗nu ˗gɔmɛn ˗nu ˗blü ˈyö ˈwo Yesu kun ˈwo nu ˗a ˈka ö ˈˈpiʋ̈ bhë. 11 ˈˈKɛɛ ˈˈsaabhomɛn ˗nu ˗gɔmɛn ˗nu ˗wo mɛn ˗nu ˈwo kun mü bhë ˗an ˗blü kö ˗wa pö ˗yö Badhabasö bho ˗kaso ˈgü. 12 ˈYö Pidhatö ˗ya pö ˗an ˗dhɛ: «ˈDhɛ ˈö ˈˈdhʋ̈, mɛn ˈö ˈka˗ ˗dhɛ Zuifö ˗nu ˗bha ˗Gblüdë bhë ˈa˗ kë ꞊dhɛ?» 13 ˈYö ˈwo ˗gbla ˈzü ˈwo˗ pö: «˗Bhö ˗a dɔ ˈˈdhü ˗bha!» 14 ˈˈKɛɛ ˈyö Pidhatö ˗ya pö ˗an ˗dhɛ: «ˈMën ˗kë? ˗Mën ˗wɔn yaa ˈö˗ ˗kë ka ˈka?» ˈYö ˗an ꞊gban ˈˈpɛpɛ ˗wo ˗gbla ˈˈgbɩɩ˗ ˈka ˈzü ˈö ˈwo˗ pö: «˗Bhö ˗a dɔ ˈˈdhü ˗bha!» 15 ˈDhɛ ˈö ˗kë ꞊dhɛ Pidhatö ˈyaa kun ˗a ˈˈpiʋ̈ kö ˈö mɛn ˗nu ˈwo bhë ˗an ˗shiödhɛwɔn kë, ˈyö ö ꞊kwaa Badhabasö ˗zü, ˈö˗ pö ˗wo Yesu ˗man ˗klaaga ˈka. ˈDhɛ ˈwo wo bo ˈyö˗ pö ˗an ˗dhɛ ˗wa dɔ ˈˈdhü ˗bha.

16 ˈDhɛ ˈö ˗kë ˈˈdhʋ̈, ˈyö ˈˈsɔdha ˗nu ˗wo dho ˗a ˈka ˈˈdheedhɛ ˈö ˈˈsɛkɔɔnmɛn ˗gɔ ˈˈkwɛndhö bhë ˗a ˈgü, ˈyö ˈwo ˈˈsɔdha ˗nu ˈˈpɛpɛ ˗dhɛ ˈö ˈwo dho wo ˈkwëëdhö mü. 17 ˈYö ˈwo sɔ ˗zɔɔndhö do ˈö man ˗gbangbandhö ˗a ˗da ˗a ˗bha, ˈyö ˈwo ˈˈglɛɛn ˈfaan˗ ˗yökë ˈwo˗ ˗ya ˗a ˗gɔa. 18 ˈYö ˈwo ˗ya ˗a pö ˗sü ˗bha ˗a ˗dhɛ: «Zuifö ˗nu ˗bha ˗Gblüdë, ˈbha ꞊bo!» 19 ˈYö ˈwo ˗kadhüga sü ˈwo˗ ˗man ˗a ˈka ˗a ˗gɔ ˗bha, ˈö ˈwo wo ˈˈdhidhi ˗nu bho ˗a ˗bha, ˈyö ˈwo yö wo kpɔn ˈgü, ˈwo ˈˈgblëënnu ˗a ˈˈdhiʋ̈.* 20 ˈDhɛ ˈwo wo bo ꞊wɛɛ˗ ˗dɔ ˗a ˗bha ˗sü ˈka, ˈyö ˈwo sɔ ˗kɔn ˗zɔɔndhö ˈö bhë ˗a bho ˗a ˗bha ˈö ˈwo˗ ˗bha sɔ ˗nu ˗da ˗a ˗bha. ˈDhɛ ˈwo wo bo, ˈyö ˈwo dho ˗a ˈka ˈˈkpɛnŋ kö ˈwo ˈdho ˈwo˗ dɔ ˈˈdhü ˗bha. 21 ˈDhɛ ˈwo ˗kpan gɔndënën do ˈö ˈwo˗ ˗dhɛ Simɔn ˈö go Silɛnö, ˈö ˗kë Alɛzandrö waa Dhufusö ˗an dë ˈka bhë ˗a ˗bha kö ˗yö ˈgo ˗ni ˈgü ˈbhlaa, ˈyö ˈwo˗ kun kö ˗yö Yesu ˗bha ˗ga ˗a ˗ta ˗dhü bun.

22 ˈYö ˈwo dho Yesu ˈka ˗dhɛ ˈwo˗ ˗dhɛ Gɔlügota bhë ˗a ˗bha. ꞊Waa˗ pö ˈˈdhʋ̈ ˗a ˗gɛn ˈnën ˈö ˗tɔ «mɛn ˗gɔ ˈˈklaŋ ˗lo ˗dhɛ.» 23 ˈDhɛ ˈwo ˗lo mü, ˈyö ˈtaakpɛɛ ꞊suu ˈwo˗ ˗kë ˈmiidhö ˈka bhë ˈwo˗ ˗da ˗drɔɔn ˈˈyi ˈˈpiʋ̈ ˈwo˗ nu ˗a ˗dhɛ, ˈˈkɛɛ yö ˈti ˈˈwɩ ˗a ˗bha kö ˈö˗ mü. 24 ˈDhɛ ˈö ˗kë ˈˈdhʋ̈ ˈyö ˈwo˗ dɔ ˈˈdhü ˗bha, ˈö ˈwo˗ ˗bha sɔ ˗nu ˗gblü wo ˈko ˗nu ˗ta ˗zë ˈˈkpʋ̈ü kë ˗sü ˈka, kö ˗a ˈdhɛ ˈö ˈdhö mɛn ˈö ˗dho ˈto ˗a ˗gɔ ˈwo˗ dɔ. 25 ˈDhɛ ˈö ˈkwa dɔ ˈˈlɛlɛ ˈˈseishiö* ꞊tɛɛ˗ ˗bha dhiapiʋ̈, ˈyö ˈwo˗ dɔ ˈˈdhü ˗bha. 26 Pë ˈö˗ zë ˗gɛn ˈka ˈö ˈwo˗ ˗ya ˗a ˗gɔ ˗ta ˈˈdhuŋ ˈyö ˗tɔ: «Zuifö ˗nu ˗bha ˗Gblüdë.» 27 ˗Wo pëyaakëmɛn ˗nu ꞊plɛ ˗dɔ ˈˈdhü ˗bha ˈpö ˗a ˈˈsuee. ˗A mɛn do ˗kun ˗a ˗kɔ ˗së ˈgü, ˈö˗ mɛn do kun ˗a ꞊kwaa˗ ˈgü. 28 —— 29 Mɛn ˗nu ˈwo kun ʒiö ˗ni gü ˗dhɛ ˈö bhë ˗a ˈgü ˗wa ˗kpan Yesu ˗bha, ˗wo ˈsi ˗bho ˗a ˗gɔ ˈö ˈwo wo ˗gɔ ˈgü zë ˗a ˗dhɛ ˈö ˈwo˗ pö: «˗Aaˈˈ! Bhi ˈö ˈü˗ pö ü ˗dho ˗Zlan ˗dhɔkë ˗a ˈgü ˗kɔ ˈwü kö ˈü˗ dɔ ˗dhɛkpaɔyi ˗yaaga ˈˈkpaan ˈka bhë, 30 ˗bhö ü ˗de dha kö ˈü ˈgo ˈˈdhü ˗bha ˈü yɔɔˈˈ ˗kɛɛ!» 31 ˈˈSaabhomɛn ˗nu ˗gɔmɛn ˗nu waa ˈtɔŋ˗ ˗gɔmɛn ˗nu ˗wo ˗kun ꞊wɛɛ˗ dɔ ˗ni ˈgü ˗a ˗bha wo ˈko ꞊zinŋgü ˈpö, ˈö ˈwo˗ pö: «˗Ya mɛn ˈˈwɛɛ ˗nu dha, ˈˈkɛɛ ˈyaa ꞊mɔɔn˗ ˗bha kö ˗yö ö ˗de dha ˗wa! 32 ˗Ya kë ꞊dhɛ Klito, Izraɛdhömɛn ˗nu ˗bha ˗Gblüdë ˗mü ˗a ˈka, ˗yö ˈgo ˈˈdhü ˗bha ˗yö yɔɔˈˈ kö ˈkwa˗ yö. ꞊Yaa˗ kë ˈˈdhʋ̈ kwa ˗dho ˈdhaŋ˗ bho ˗a ˈˈdhiʋ̈.» Mɛn ˗nu ˗de ˗ʒiaan ˈwo ˗an dɔ ˈˈdhü ˗bha Yesu ˈˈsuee bhë, ˗wo ˗kun ˈˈwɩ ˗ni ˈgü ˈpö ˗a ˗dhɛ.

33 ˈÖ sü ˈɲaan˗ ˗bha ˗ya mɛn ˗gɔ ꞊zinŋgü ˈˈtʋ̈ŋ ˗bha* ˈö dho ˈö yö ˗a ˈka ˈˈlɛlɛ ˗kɔŋ do ˈö ga ˈˈsoodhu* ꞊tɛɛ˗ ˗bha ˈˈdooka, ˗dhɛ ˗yö ˗tröö ˈsënsëndhö ˈˈsɛ ˗ta. 34 ˈDhɛ ˈö ˈkwa dɔ ˈˈdooka ˈˈlɛlɛ ˗kɔŋ do ˈö ga ˈˈsoodhu ꞊tɛɛ˗ ˗bha, ˈyö Yesu ˗yö ˗gbla ˈˈgbɩɩ˗ ˈö˗ pö: «Eli, Eli, lama sabatani?» ˗A ˗gɛn ˈnën ˈö ˗tɔ: «N ˗man ˗Zlan, n ˗man ˗Zlan, ˈmën ˗kë ˈü ˗kan n ˗bha?» 35 ˈDhɛ mɛn ˗nu ˈö ˈwo kun dɔ ˗sü ˈka mü bhë ˈwo˗ man ˈˈdhʋ̈, ˈyö˗ mɛn ˈbhaa ˗nu ˗wo ˗ya ˗a pö ˗sü ˗bha: «˗Ka ˗dhɛ ˗ga! ˗Yö Edhi ˗dhɛ ˗ni ˈgü ˗wa.» 36 ˈDhɛ ˈö ˗kë ˈˈdhʋ̈ ˈyö˗ mɛn do ˗yö ˗bia ˗lö ˈö dho ˈö ˗fuu sü ˈö˗ ˗da we giisü ˈˈyi ꞊bhaa, ˈyö˗ ˗ya ˗kadhü ˈˈdhiʋ̈ ˈö˗ nu ˗a ˗dhɛ kö ˗ya mü, ˈyö˗ pö: «˗Ka dɔ kö ꞊ya kë ꞊dhɛ Edhi ˗dho nu ˈö˗ bho ˈˈdhü ˗bha ˈö˗ ꞊yɔɔ kö ˈkwa˗ yö.» 37 ˈYö Yesu ˗yö ˗gbla ˈˈgbɩɩ˗ ˈzü , ˈö to mü ˈö ga. 38 ˈDhɛ ˈö ˗kë ˈˈdhʋ̈, ˈyö ˗ʒiö ˈˈkpan ˈˈdhiʋ̈ ˗sɔ ˈö ˗Zlan ˗dhɔkëdhɛ ˈgü ˈö ˗pɛ ö ˈgü ꞊plɛ, ˈö go ˗a ˈka ˈˈdhuŋ ˈö dho ˈö yö ˗a ˈka ˈˈshia˗. 39 ˈDhɛ ˈö ˈˈsɔdha ˗gɔmɛn ˈö kun dɔ ˗sü ˈka Yesu ˈwëëdhö bhë ˈö ˈwɔn ˗nu ˈwo ˗kë ˗a ga ˈˈtʋ̈ŋ ˈgü bhë ˗a yö, ˈyö˗ pö: «˗A zɔɔ ˗dhɛ ˈyaa ˗dhö, mɛn ˈö yö ˗Zlan Gbö ˗mü.»

40 Dhebɔ ˈbhaa ˗nu ˗kun dɔ ˗sü ˈka mü ꞊gblɛɛn ˈö ˈwo ˗dhɛ ˗ga. ˗A mɛn ˈbhaa ˗nu ˈnën ˈwo ˗tɔ Madhi ˈö go Madala waa Madhi ˈö ˗kë Zakö ˈˈtɩɩsü waa Zoze ˗an dhe ˈka waa Salome. 41 ˈDhɛ ˈö Yesu kun Galile ˗sɛ ˈgü, ˗wo ˗kun ʒiö ˗ni ˈgü ˗a ꞊kee˗ ˈö ˈwo˗ ˗takun. Dhebɔ ˈbhaa ˗nu ˈö ˈwo to ˗a ˈˈpiʋ̈ ˈö waa˗ ˗nu ˈwo nu Zedhizadhɛmö ˗wo ˗kun mü ˈpö.

42 ˈWɔn ˗nu ˈwo bhë ˗wo ˗kë ꞊Glooyi ˗wayi, ˈö ˈwo wo ˗de ꞊baa ˗a ˈka ꞊Glooyi ˗bha bhë ˗a ˈka, kö ˈˈdoo ˗ya ˗da ˈsaadhö. 43 ˗A ˗wɔn ˈgü, Zozɛfö ˈö go Adhimate bhë ˗yö ö ꞊faan ˗sü ˈö dho Pidhatö ˈˈpiʋ̈ ˈö˗ pö ˗a ˗dhɛ ˗yö Yesu ꞊glöö nu ö ˗dhɛ. Zozɛfö ˈö ˈˈdhʋ̈ ˗yö ˗kun zakanmɛn do ˈö ˈwo˗ ꞊bhlëë ˗ya ˗a ˈka. Yö ˗de ˈpö ˗yö ˗kun ö ˈˈɲan ˈto ˗ni ˈgü ˗Zlan ˗bha ˗Gblüdëdhɛ ˗gɔ. 44 ˈˈKɛɛ Pidhatö ˗kun ˗a ˈˈpiʋ̈ kö ꞊ya kë ꞊dhɛ Yesu ˗ya ga ˈsaadhö ˈö˗ ˈwɔn dɔ. ˈYö ˈˈsɔdha ˗gɔmɛn ˗dhɛ ˈö˗ dhɛɛˈˈ kpɔ. 45 ˈDhɛ ˈö˗ ˈˈsɔdha ˗gɔmɛn ˗ya pö ˗a ˗dhɛ ˗ya ga ˈˈdhʋ̈ ꞊dedewo, ˈyö ˗wɩ ˗a ˗bha kö Zozɛfö ˗yö Yesu ꞊glöö ˈsü. 46 ˈDhɛ ˈö Zozɛfö ˗yö yɩɩga sɔ ꞊bhlëësü do dhɔ, ˈyö Yesu ꞊glöö bho ˈˈdhü ˗bha ˈö sɔ ˈö bhë ˗a ꞊plʋʋ ˗a ˈka, ˈyö dho ˈö˗ ˗wɔ mɛn ˗wɛɛbhodhɛ ˈö ˈwo˗ pɔn ˗gwö ˈgü ˗a ˈgü. ˈYö ˗gwö kpö do ꞊glünŋ ˈö˗ yö ˗a ˈˈdhiʋ̈. 47 ˈˈKɛɛ Madhi ˈö go Madala waa Madhi ˈö ˗kë Zoze dhe ˈka bhë, ˗wo ˗to ˗dhɛ ˈö bhë ˗a ˈgü Yesu blɔɔndhɛ ˗ga ˗sü ˗bha.