ˈSëëdhɛ ˈö Pɔdhö ˗ya bɔ Wlɔmö ˗mɛn ˗nu ˗dhɛ

1 Maan Pɔdhö ˗mɛn, ˈa ˗kë Yesu Klito ˗bha ꞊dhuëŋ ˈka bhë, man ˈnën ˈa ˈsëëdhɛ ˈö yö ˗a bɔ ka ˗dhɛ. Yesu ˗yö n ˗dhɛ kö ˈa kë ö ˗bha bɔmɛn ˈka, ˈö n ˗ya ˗de ˗ta kö ˈa ˗Zlan ˗bha nɔɔn˗ ˗së pö. 2 Nɔɔn˗ ˗së ˈö ˈˈdhʋ̈, ˗Zlan ˗yö ˗bɔ ö ˗wodhiʋ̈lomɛn ˗nu ˗ta ꞊kwɛŋzü ˈö˗ ˈˈplünŋ bho, ˈö ˗bɛnzë ˗sü ˈka ˗a ˈˈDhiwo ˈsëëdhɛ ˈˈslʋ̈ʋ̈slʋ̈ ˈgü. 3 ˗Yö ˗gban ˗a Gbö ˈö bhɔ ˈˈkpɔnŋ ꞊taa yö, ˈö ˗kë Davi ꞊suugünën ˈka bhë ˗a ˗bha. 4 ˗Zuu ˈˈslʋ̈ʋ̈slʋ̈ ꞊faan ˗bha ˗kë ˈˈgbɩɩ˗ ˗sü ˈsaa˗ ˈgü ˗yö ˗go ga ˈgü, ˈö˗ ˗zɔn ꞊dhɛ ˗Zlan Gbö ˗mü ˗a ˈka. ˗A Gbö ˈö ˈˈdhʋ̈ yö ˈnën ˈö ˗tɔ kwa Dëmɛn Yesu Klito. 5 ˗Zlan ˗yö ˗bɔ ˗a ˗ta ˈö ˗gasitɛ ˗kë n ˗dhɛ,* ˈö Yesu ˗yö ö ˗kɔ ˗yɛ n ˗bha kö ˈa kë ö ˗bha bɔmɛn ˈka, ˗yö kë ˈˈdhʋ̈ kö ˗zoyödhe ˗yö kë ˈˈsɛ ꞊gban ˈˈpɛpɛ ˈgümɛn ˗nu ˗gɔ, kö ˗wo ˈwɔn man ˗a ˗ta, ˗wo ꞊bhlëë ˗ya ˗a ˈtɔ ˗bha. 6 Mɛn ˗nu ˈwo ˗an ˗dhɛ ˈˈdhʋ̈ kö ˗wo kë Yesu Klito ˗bha ˈka bhë, ka ˗an ˈˈpiʋ̈ ˈpö. 7 Mɛn ˈˈpɛpɛ ˈö ˈka ˗Zlan dhɔɔbhaamɛn ˗nu ˈka Wlɔmö, ˈö ka ˗dhɛ kö ˈka kë ˈˈslʋ̈ʋ̈slʋ̈ bhë, ka ˈnën ˈa ˈsëëdhɛ ˈö yö ˗a bɔ ka ˗dhɛ.

Kö kwa Dë ˗Zlan waa kwa Dëmɛn Yesu Klito ˗wo ˗gasitɛ kë ka ˗dhɛ kö ˗wo ka gba zuʋ̈waannusü ˈka bhë, ˈaa ˗yö kë!

8 Pë ˗blɛɛsü ˈa ˗dho ˗a pö ka ˗dhɛ ˈyö ˗tɔ: A ˗bɔ Yesu Klito ˗ta ˈa n ˗man ˗Zlan ˈˈnuɛ bho mɛn ꞊gban ˈˈpɛpɛ ka ˗wɔn ˈgü, ˗a ˗gɛn ˗mü ꞊dhɛ ˗wo ka ˗bha ˗zoyödhe ˗wɔn ˗blɛɛ ˗dhɛ ꞊gban ˈˈpɛpɛ ˈgü ˈˈkpɔnŋ ꞊taa. 9 ˗Zlan ˈa˗ ˗bha yö kë ˗ni ˈgü n zuʋ̈ˈˈ ꞊gban* ˈka nɔɔn˗ ˗së ˈö ˗gban ˗a Gbö ˗bha ˗a pö ˗sü ˈka bhë, yö ꞊dede ˗ya ˈwɔn ˗dɔ ꞊dhɛ a ˗bhɛɛ ka ˗bha ˈka ˗kplawo. 10 A ˗bhɛɛ ˈˈdhʋ̈ kö ˗Zlan ˗ya ˈˈwɩ ˗a ˗bha, ˈa pë ꞊gban ˈˈpɛpɛ kë ˈa nu ˈa ˗wo ka ˗dhɛ. 11 ˗A ˗gɛn ˗mü ꞊dhɛ, ˗yö n ˈˈpiʋ̈ ꞊dedewo ˈa n ˈˈɲan ˗kpan ka ˗bha, kö gbɔɔdhe ˈö go ˗Zlan ˈˈpiʋ̈ ˈa˗ kë ka ˗dhɛ, kö ka ˗bha ˗zoyödhe ˗gɛn ˗yö ˗gban, 12 ɛɛnˈˈ ˗yö kë ˈˈdhʋ̈ kö ˈkwa kwa ˈko ˗nu ꞊faan dɔ kwa ˗bha ˗zoyödhe ˈka. Kö n ˗bha ˗yö ka ꞊faan dɔ, kö ka ˗bha ˗yö n ꞊faan ˈmën ˈpö.

13 N ꞊dhegblü ˗nu, a˗ ˈˈpiʋ̈ kö ˈka˗ ˈwɔn dɔ ꞊dhɛ a˗ ˈˈslö ˗mɛɛn ˗gɛnɲaan ˈka ꞊va kö ˈa nu ka ˈˈpiʋ̈ ˈmü, ˈˈkɛɛ ˗a ˈˈse ˈnën ˈyii kë n ˗dhɛ ˈö yö ˗a ˈka ꞊dɛɛ ˗bha. ˈPë ˗kë ˈa˗ ˈˈpiʋ̈ ˈa nu ˈmü yö ˈnën ˈö ˗tɔ kö n ˗man ˗zlanwopösü ˈö ˈmü ˗a ꞊trɔɔn ˗yö kë ˈpö ꞊dhɛ ˗kɔ ˈö˗ ˈka ˈˈsɛ ˈˈwɛɛ ˗nu ˈgü ˗a ˈdhö. 14 ˗Yö ˗kë Glɛkö ˗nu ɛɛnˈˈ ˗dhɛŋ ˗nu* ˈka, ˗yö ˗kë ˈwɔndɔmɛn ˗nu waa mɛn ˗nu ˈö ˈwaa ˈwɔn dɔ* ˗an ˈka, ˗an ꞊gban ˗bha ˈˈpɔ ˗yö n ˗bha. 15 Yö ˈnën ˈö˗ ˗wɔn ˈgü ˈö nɔɔn˗ ˗së pö ˗sü ˈö mɛn ˗nu ˈö ˈka Wlɔmö ˗sɛ ˈgü ka ˗dhɛ ˈpö bhë, ˗a ˗lele ˈdhö n ˗ta. 16 Nɔɔn˗ ˗së pö ˗sü ˈlëë˗ ˈyaa n kë. ˗A ˗gɛn ˗mü ꞊dhɛ yö ˈnën ˈö ˗Zlan ˗yö bɔ ˗a ˗ta ˈö ö ˗bha ˈˈpiigbɩɩdhɛ ˗zɔn, ˈö mɛn ˈˈpɛpɛ ˈö ˗zoyödhe ˈdhö ˗an ˗gɔ ˗an dha. ˗A zü ˗yö ˗dɔ Zuifö ˗nu ˗ta, ˈö dho ˈö yö ˗a ˈka ˈpö Glɛkö ˗nu ˗bha. 17 ˗A ˗gɛn ˗mü ꞊dhɛ, ˗zo ˗yö nɔɔn˗ ˗së ˈö bhë ˗a ˗dhɛ ˗sü ˈnën ˗Zlan ˗bha kpɛnŋdhödhɛ* ˗zɔn ˗ni ˈgü mɛn ˗nu ˗dhɛ, ˈö mɛn ˗nu ˈwo ˈˈdhʋ̈ ˗an ˗bha ˗zoyödhe ˗gɛn ˈdhö ˗gban ˗ni ˈgü, ꞊dhɛ ˗kɔ ˈö ˗Zlan ˗Wo ˗ya pö ˗a ˈka ˗a ˈdhö. ˗Ya ˗pö: «Mɛn ˈö kpɛnŋdhö ˗yö ˗dho ˗tosɛta kë ˗a ˗bha ˗zoyödhe ˗wɔn ˈgü.»

18 ˗Zlan ˗yö ˗ya dhaŋ˗ ˈgü ˈö˗ ˗zɔn ˗ni ˈgü ꞊dhɛ ˈwɔn ˗yö ˗shiö ˗sü ˈka ö ˗dhɛ mɛn ˈˈpɛpɛ ˈö ˈwaa˗ ꞊bhlëë ˗ya waa mɛn ˗nu ˈö ˈwaa kpɛnŋdhö, ˈö ˈwo ˈˈslö yaa ˗nu kë ˗ni ˈgü kö ˈwo mɛn ˗nu ˗kɔ ˈˈkan gagade dɔ ˗sü ˗bha bhë ˗an ˗bha. 19 ˗A ˗gɛn ˗mü ꞊dhɛ ˈwɔn ˈˈpɛpɛ ˈwo ꞊mɔɔn˗ ˗bha ˗wa dɔ ˈö ˗gban ˗Zlan ˗bha, ˗a ˈˈwɛɛ ˈbhaa ˈyaa ˗bin ˗sü ˈka ˗an ˗gɔ, ˈyö sü ꞊dhɛ ˗Zlan ˗ya ˗zɔn ˗an ˗dhɛ ˈˈpuu ˈka. 20 ˗Yö ˈˈdhʋ̈ ꞊dhɛ mɛn ˈbhaa ˈyaa ˗kpan ˗Zlan ˗bha, ˈˈkɛɛ ˈö sü ˈˈtʋ̈ŋ ˈö ˈˈkpɔnŋtaadhɛ ˗da ˗a ˈka ˗a ˗bha ˈö nu ˈö yö ˗a ˈka ꞊dɛɛ ˗bha, ˗a ˗bha ˈˈklʋʋsë ˗nu ˈwo ˗kë ꞊dhɛ ˗a ˗bha ˈˈpiigbɩɩdhɛ ˈö˗ ˈˈdhiʋ̈todhɛ ˈyaa ˈdhö waa˗ ˗bha ˗kë ˗Zlan ˈka ˗sü ˈdhö bhë, mɛnbhɩɩdhe ˗nu ˗wa ˗yö ˈkpakpadhö ˗a ˗dapë ˗nu ˗bha. Yö ˈnën ˈö˗ ˗wɔn ˈgü ˈö ˗an ˗bhawɔn ˈto ˗gɛn ˈyaa ˈdhö. 21 ˗A pö ˈa˗ wo ˈˈdhʋ̈ bhë, ˗a ˈklɔɔ˗ ˗mü ꞊dhɛ, ˈkö ˗kë ꞊dhɛ ˗wo ˗Zlan ˗dɔ, wo ˈti˗ ˈsü ꞊dhɛ ˗Zlan ˈdhö kö ˗wa ꞊bhlëë ˗ya, ɛɛnˈˈ wo ˈti˗ ˈˈnuɛ bho. ˗An ˗bha ˈwɔn ˗yö ˈko ˈˈdhiʋ̈ ˗kɔ ˗ya kë ꞊ʒiaan ꞊dhɛ ˈˈblɔɔnmɛn ˗nu ˗bha ˈdhö, ˈö ˗an zuʋ̈ˈˈ ˈö ˈyaa ˈwɔn yö ˈko ˈˈdhiʋ̈ bhë ˗ya ˗puö ˗dhɛtiidhɛ ˈgü. 22 ˈKö ˗kë ꞊dhɛ ˗wa ˗pö wo ˗de ˗dhɛ ꞊dhɛ wo ˈwɔndɔmɛn ˗nu ˈka, ˗wa kë ˈˈblɔɔnsü. 23 ˗Wa ˗Zlan ˈö ˈyaa ga bhë ˗a ˗bha ˈtɔbhɔdhe ˈsü ꞊waa˗ nu pë ˗nu ˈwo ˗kë ꞊dhɛ mɛnbhɩɩdhe ˈö ga ˗mɛn ˈka, ˗mannën ˗nu, ꞊kwlaatawü ˗nu waa ˗ta ˈgwü ˗ta ˗wü ˗nu ˈˈbin ˗nu ˈdhö bhë ˗an ˗dhɛ.

24 Yö ˈnën ˈö˗ ˗wɔn ˈgü ˈö ˗Zlan ˗yö ö ˗kɔ bho ˗an ˈgü ˗dhiiwɔn ˗nu ˈö ˗an zuʋ̈ˈˈ ˗yö bhɔ ˗an kë ˗sü ˗bha bhë ˗an ˗gɔ, kë ˈˈdhʋ̈ kö ˗wo ˈlëë˗ dɔ wo ˗de ˗bha. 25 ˗Wa gagade ˈö ˗gban ˗Zlan ˗bha ˗a ˗ta ˗bɔ ꞊sua ˗bha. ˗Wa wo ˗ta yö ˗Zlan ˈö pë ꞊gban ˗da ˗a ˗bha, ˗wa ˗dapë ˗nu gba ˗ni ˈgü, ˈö ˈwo yö kë ˗ni ˈgü ˗an ˗dhɛ, ˈˈkɛɛ kö ˗Zlan ˈö pë ꞊gban ˗Damɛn ˈka bhë, yö dosɛnŋ ˈnën ˈö˗ dua ˈdhö ˗mü kö ˗a ˈtɔ ˗yö bhɔ ˗toëpö ˈka. Kö ˗yö kë ˈˈdhʋ̈ bhë, ˈaa ˗yö kë! 26 Yö ˈnën ˈö˗ ˈwɔn ˈgü ˈö ˗Zlan ˗yö ö ˗kɔ bho ˗an ˈgü, kö ˈwɔn ˈö ˗gban mɛn ꞊plɛ ˗bha sɛɛˈˈ ˗bha ˗kë do ˗sü ˗bha, ˗a yaa ˈlëësü ˈö ˗an zuʋ̈ˈˈ ˈdhö bhɔ ˗ni ˈgü ˗a ˗bha bhë ˗wa kë. ˗A ˗gɛn ˗mü ꞊dhɛ, dhebɔ ˗nu ˈwo ˗an ˈˈpiʋ̈ ˗wa wo ꞊kwaa gɔɔn˗ waa dhe ˗an ˗bha sɛɛˈˈ ˗bha ˗kë do ˗sü ˈö ˗Zlan ˗ya ˗da bhë ˗a ˗zü, ˗wo ˗a ˈdhɛ ˈö ˗Zlan yö ˈti ˗an ˗da kö ˗wa kë bhë ˗a kë ˗ni ˈgü. 27 ˗Kɔ do ˈö bhë ˗a ˈka ˈpö, gɔɔn˗ ˗nu ˗wa wo ꞊kwaa waa dhebɔ ˗nu wo ˗bha sɛɛˈˈ ˗bha ˗kë do ˗sü ˈö ˗Zlan ˗ya ˗da bhë ˗a ˗zü. Wo ˈko ˗nu ˗kun ˈˈnɔɔnbɔ ˈka ˗sü ˈnën ˗an zuʋ̈ˈˈ ˈdhö bhɔ ˗ni ˈgü ˗a ˗bha ꞊dedewo, ˈö gɔɔn˗ ˗nu waa gɔɔn˗ ˗nu ˈwo ˈwɔn yaa ˗ɲënŋsü kë ˗ni ˈgü, ˈö ʒiaan ˈwo˗ to ˈˈdhʋ̈ bhë ˗a ˈˈklʋʋbhɔdhe ˈdhö nu ˗ni ˈgü wo ꞊dede ˗an ˗ta.

28 ˈDhɛ ˈö ˗kë ꞊dhɛ ˗an ˈˈtʋ ˈyaa kun ˗Zlan dɔ ˗sü ꞊dede ˗bha bhë, ˗Zlan ˗yö ö ˗kɔ ˗bho ˗an ˈgü kö ˗an ˗de ˗bha ˗zotadhe yaa ˈö ˗an ˗gɔ bhë ˗yö ˈˈdhiʋ̈sü ˗an ˈka, ˈyö ˈwɔn ˈö ˈyaa kë ˗pë ˈka ˈwo˗ kë ˗ni ˈgü. 29 ˈWɔn ꞊gban ˈˈpɛpɛ ˈgü, ˈwaa pë ˈö kpɛnŋdhö ˗a kë. ˗An zuʋ̈ˈˈ ˗yö ˈya˗, ˈö pë ˈyaa ˗an ˗zokun,* ˈö ˈwo ˈwɔn yaa ˗kë mɛn ˗nu ˈka. ˗Wo pa ˗sü ˈka ˈpö zuʋ̈ˈˈ ˗bhɔ pë ˗bha ˗sü, mɛn zë ˗sü, ˈˈdhinaan kë ˗sü, ꞊sua kë ˗sü waa ˈˈkpënŋ˗ ˗kë mɛn ˗gɔ ˗sü ˗nu ˈka. ˗Wo ꞊tɔɔ ˗kë, 30 ˈö ˈwo mɛn ˗nu ˗wɔn yaa ꞊blɛɛ. ˗Zlan ˗san ˗yö ˗an ˗kë, ˗an ˈˈdhiwo ˗yö ˈya˗, ˈö ˈwo wo ˗de ˗wɔn ꞊blɛɛ ˗desüva ˈka. ˈWɔn yaa kë ˗sü ˈnën ˈwo˗ ˗yökodhiʋ̈ ˗kë, ˈö ˈwaa ˈwɔn man wo ˈkpɔmɛn ˗nu ˗ta. 31 ˈWɔn ˈgüman ˗tʋ ˈyaa ˗an ˗gɔ, pë ˗nu ˈwo˗ ˈˈplünŋ bho ˈwaa ˗an kë, mɛnbhɩɩdhe ˗dhɔ ɛɛnˈˈ mɛn ˗wëë ˈyaa ˗an kë. 32 ˗Wa ˈwɔn ˗dɔ ˈkpakpadhö ꞊dhɛ ˗Zlan ˗ya ˗pö mɛn ˗nu ˈwo ˈwɔn ꞊suu ˗nu ˈwo ˈˈdhʋ̈ ˗an ˗kë, ˗an dua ˗mü kö ˗wo ga. ˈˈKɛɛ wo ˗zë ˗wo ˈwɔn ˗nu ˈwo bhë ˗an ˗kë ˗kplawo, ˈö mɛn ˈˈwɛɛ ˗nu ꞊waa˗ ˗an kë ˈpö ˈö ˗kë ˗an ˗dhɛ ˗së.