ˈSëëdhɛ ˗blɛɛsü ˈö Pɔdhö ˗ya bɔ Kolɛntö ˗mɛn ˗nu ˗dhɛ

5 ˗Wo ˈˈɲangüyaa ˈbhaa kë ˗ni ˈgü ka ˗gɔ ˈmü ˈö˗ ˗tɔɔ ˈdhö ˈˈshia˗. ˗A ˈˈɲangüyaa ꞊suu ˈö ˈˈdhʋ̈, mɛn ˗nu ˗de ˈwo ˈˈsɛ ˈˈwɛɛ ˈgümɛn ˗nu ˈka ˈwaa˗ kë ˗ʒiaanwo. ˈYö sü ꞊dhɛ gɔndë do ˗yö ka ˈˈpiʋ̈ ˈmü ˈö waa ö dë ˗bha dhebɔ ˈwo wo ˈko ꞊kee˗.* 2 ˈWɔn ꞊suu ˈö bhë, ˈyö˗ ˈˈyi ˗yö ˗kan ka ˈˈdhi ˗ee? Ka dua ˈyaa ˗mü ꞊ʒiaan kö ˈka ˗wëë ˗ya wo, kö mɛn ˈö ˈwɔn ꞊suu ˈö bhë ˗a ˗kë bhë ˈka˗ bho ka ˈˈpiʋ̈ ˗ee? 3 ˈKö ˗kë ꞊dhɛ man ꞊dede ˈmaan ˈmü, n zuʋ̈ˈˈ ˗yö ka ˈˈpiʋ̈ ˈmü, ˈyö mɛn ˈö ˈwɔn ꞊suu ˈö bhë ˗a kë ˗ni ˈgü bhë, ˈman za dɔ ˗a ˗bha ˈsaadhö ꞊dhɛ pë ˈö man ꞊dede ˈa ˈmü ˗a ˈdhö. 4 ˗Dhɛ ˈkö ˈka˗ ˈwɔn dɔ ꞊dhɛ n zuʋ̈ˈˈ ˗yö ka ˈˈpiʋ̈ ˈmü, ˈö kwa Dëmɛn Yesu ˗bha ˈˈpiigbɩɩdhɛ ˈdhö ka ˈˈpiʋ̈ ˈmü ˈpö bhë, ˈka ˈdho ka ˈkwëëdhö Dëmɛn Yesu ˈtɔ ˈgü, 5 ka dua ˗mü kö ˈka mɛn ˈö bhë ˗a ˈˈdhiʋ̈ dɔ Sɔtraan ˗gɔ, kö bun dhɔɔbhaawɔn kë ˗sü ˈö bhë ˗a ˈgü ˗yö shiʋ̈ˈˈ. ˗Yö kë ˈˈdhʋ̈ kö ˈwɔn yö ˗kɔ ˈö ˗zlanwokɔdhi ˈgü ˗yö ˈto ö ˗wɛɛ ˈgü* Dëmɛn nu ˗yi ˈka.

6 ˗A ˗dhɛ ˈyaa˗ ˗bha kö ˈka ka ˗de ˈsü ꞊va. ˈKaa˗ ˈwɔn dɔ ꞊dhɛ ˈˈsɛkɛ ˈdɛdɛ ˗ya kë ˈbluu˗ ˗böö ˈˈpiʋ̈, ˗ya ˗kë ˈö ˗da ˗ee? 7 ˗Ka ˈˈsɛkɛ zii bho ka ˈˈpiʋ̈ kö ˈka kë ˈbluu˗ ˗böö ˗dɛɛ ˈka, ˈyö sü ꞊dhɛ ˈˈsɛkɛ ˈyaa ka ˈˈpiʋ̈. ˗A ˗gɛn ˗mü ꞊dhɛ Klito ˈö kwa ˗bha pakö ˈˈbhlaanën ˈka bhë, ˗wa ˈˈsaa˗ bho ˗a ˈka ˈsaadhö. 8 ˈDhɛ ˈö ˈˈdhʋ̈, ˗kwa ˈwlaan˗ kë. ˈˈKɛɛ ˈkwaa ˗dho ˗a kë ˈˈsɛkɛ zii ɛɛnˈˈ ˈwɔn yaa waa ˗dhiiwɔn ˗nu ˈˈsɛkɛ ˈka. ˗Kwaa kë ꞊ʒiaan ˈbluu˗ ˈö ˈˈsɛkɛ ˈyaa˗ ˈˈpiʋ̈, ˈbluu˗ ˈö ˗kë zuʋ̈ˈˈ ˈˈpuu waa gagade ˈbluu˗ ˈka bhë ˗an ˈka.

9 ˈSëëdhɛ ˈa˗ bɔ ka ˗dhɛ bhë, a˗ ˗pö ˗a ˈgü ꞊dhɛ ˈkaa ˗dho ꞊nënŋ mɛn ˗nu ˈwo ˈˈɲangüyaakëmɛn ˗nu ˈka ˗an ˗bha. 10 ˈˈKɛɛ ˗a pö ˈa˗ wo ˈˈdhʋ̈ bhë, n ˈti˗ pö ꞊dhɛ mɛn ˗nu ˈwo ˈˈɲangüyaakëmɛn ˗nu ˈka ˈˈkpɔnŋ ꞊taa yö ɛɛnˈˈ mɛn ˗nu ˈö pë ˈyaa ˗an ˗zokun ɛɛnˈˈ mɛn ˗nu ˈwo ꞊kwaanmɛn ˗nu ˈka, ɛɛnˈˈ ˈzü ˈö ˈwo ꞊geebɔ gbamɛn ˗nu ˈka bhë, ˈka ˈˈkan ˗an ˗bha ˈpapadhö. ˗Yö ˈˈdhʋ̈ ˗be, kö ka ˗dho ˈgo ˈˈkpɔnŋ ꞊taa. 11 ˈˈKɛɛ ˈˈtʋ̈ŋ ˈö yö ˗a ˈgü, a˗ ˗pö ka ˗dhɛ ꞊dhɛ mɛn ˈwo˗ ˗dhɛ kwa ꞊dhegblü, ˈˈkɛɛ ˈö ˈˈɲangüyaakëmɛn ˈka, ɛɛnˈˈ ˈö pë ˈyaa˗ ˗zokun, ɛɛnˈˈ ˈö ꞊geebɔ gbamɛn ˈka, ɛɛnˈˈ ˈö ˈsi bho, ˈö we ˈˈdudu mü ˗mɛn ɛɛnˈˈ ꞊kwaanmɛn ˈka, ˈkaa ˗dho ꞊nënŋ ˗a ˗bha. ˈKaa ˗dho pë ˗bhö mɛn ꞊suu ˈö ˈˈdhʋ̈ ˗a ˈˈpiʋ̈ ˗ʒiaanwo. 12 ˈMën ˗kë ˈa ˗dho za dɔ mɛn ˗nu ˈö ˈwaa ˗zlanwokɔdhi ˈgümɛn ˗nu ˈka ˗an ˗bha? Mɛn ˗nu ˈwo ˗zlanwokɔdhi ˈgü ˈwaa ˈnën ˈka ˗dho za dɔ ˗an ˗bha, 13 kö ˗Zlan ˗zë ˗yö za dɔ mɛn ˗nu ˈwo ˈˈkpɛnŋ ˗an ˗bha ˗ee? «˗Ka ˈwɔnyaakëmɛn bho ka ˈˈpiʋ̈.»