ˈSëëdhɛ ˗blɛɛsü ˈö Pɔdhö ˗ya bɔ Kolɛntö ˗mɛn ˗nu ˗dhɛ
13 ˈKö ˗kë ꞊dhɛ a ˈwɔn ˗blɛɛ mɛnbhɩɩdhe ˗nu ˗wo ˈgü, ˈa˗ ꞊blɛɛ ˈpö ˗Zlan ˗bha ˈˈkiö ˗nu ˗wo ˈgü, ˗dhɔ ˈyaa n ˈgü, kö a ꞊dhɛ gɔnŋgɔnŋ ˈwo˗ ˗man ɛɛnˈˈ ˈˈföŋ ˈˈpɛn ˈwo ˗man ˈkwëë˗ ˗an vin ˈdhö. 2 ˈKö ˗kë ˈpö ꞊dhɛ ˗Zlan ˗yö ˗kɔmɔnwɔnbhasü ˗nu n ˗dhɛ kö ˈa˗ ˗wo ˈˈdhiʋ̈ ˗lo,* ˈö ˈwɔn ˈˈpɛpɛ ˈö ˗bin ˗sü ˈka ˈa˗ ˈgüman, ˈa pë ꞊gban dɔ, ˈö ˗zoyödhe ˈwo ꞊mɔɔn˗ ˗bha ˗wo ˗tɔn bho ˗a ˈka ˈˈgblʋʋ ˈö n ˗gɔ, ˗dhɔ ˈyaa n ˈgü, kö ˈmaan pë ˈbhaa ˈka.* 3 ˈKö ˗kë ˈzü ꞊dhɛ a n ꞊slɔɔpë ˈˈpɛpɛ ˗nu kö ˈa mɛn ˈˈwɛɛ ˗nu ˈˈdhi gba, ˈa n ˗de nu ˈzü mɛn ˈˈwɛɛ ˗nu ˗wɔn ˈgü kö ˈa kë n ˗de ˈgü ˈˈgɔɔgɔ, ˗dhɔ ˈyaa n ˈgü, kö a˗ ˗kë ˈˈwɛɛwɛ.
4 Mɛn ˈö ˗dhɔ ˈdhö˗ ˈgü ˗a zuʋ̈ˈˈ ˗yö ˗saa, ˈö˗ zuʋ̈ˈˈ ˈdhö ˗së. Mɛn ˈö ˗dhɔ ˈdhö˗ ˈgü, ˈyaa ꞊druɛɛ˗ kë mɛn ˗bha. ˗A ˗mɛn ˈyaa ö ˗de ˈtɔ ˈkun mɛn ˈˈwɛɛ ˗nu ˗ta ɛɛnˈˈ ˈyaa ö ˗de ˈsü ꞊va. 5 ˈYaa ˈlëë˗ ˗wɔn ˗nu kë,* ˈyaa ˗ya yö dosɛnŋ ö ˗de ˗bha ˈwɔn ˗së ꞊zɔnŋ ˗ta, ˈwɔn ˈyaa ˗shiö ˗a ˗dhɛ ˈˈvaandhö, ɛɛnˈˈ ˈyaa ˈwɔn ˈkun ö zuʋ̈ˈˈ ˈˈpiʋ̈ mɛn ˗bha. 6 Mɛn ˗nu ˗wa ˈwɔn ˈö ˈyaa kpɛnŋdhö ˗a kë, ˗a zuʋ̈ˈˈ ꞊nii ˈyaa ˗da. Pë ˈö˗ zuʋ̈ˈˈ ꞊nii ˗da ꞊ʒiaan ˈyö ˗tɔ gagade. 7 ˗Yö ˈwɔn ꞊gban ˗kun ö ˗bha, ˈö ˈdhaŋ˗ bho ˈwɔn ꞊gban ˈˈdhiʋ̈, ˈö ö ˗zo yö ˈwɔn ꞊gban ˗dhɛ, ˈö ˈwɔn ˈˈgbɩɩ˗ ꞊gban bun.
8 ˗Dhɔ ˈˈyi ˈyaa bhuʋ̈ˈˈ. ˈˈKɛɛ ˗yö ˗kë ˗kɔmɔnwɔnbhasü ˈö ˗Zlan ˗ya nu mɛn ˗dhɛ kö ˗yö ö ˗wo ˈˈdhiʋ̈ ˗lo ˗a ˈka oo, ˗yö ˗kë ˈwɔn ˗blɛɛ ˗wo ˈˈwɛɛ ˈgü ˗sü ˈka* oo, ɛɛnˈˈ ˗yö ˗kë ˈwɔndɔdhe ˈka, ˗a ꞊gban ˗dho ˈgo ˈˈshia˗. 9 ˗A ˗gɛn ˗mü ꞊dhɛ ˈkwaa pë ꞊gban dɔ ɛɛnˈˈ kwa ˗bha ˗Zlan ˗wo ˈˈdhiʋ̈ ˗lo ˗sü ˈˈdhiʋ̈ ˈyaa ˗mɔn ˗sü ˈka. 10 ˈˈKɛɛ pë ˈö˗ ˈˈdhiʋ̈ ˈdhö ˗mɔn ˗sü ˈka ˗ya nu, pë ˈdhɛ ˈö˗ ˈˈdhiʋ̈ ˈyaa ˗mɔn ˗sü ˈka ˗yö ˗dho ˈgo ˈˈshia˗. 11 ˈDhɛ ˈa kun ˈnën ˈˈtɩtɩ ˈka, a ˗kun ˈwɔn blɛɛˈˈ ˗ni ˈgü ꞊dhɛ ˈnën ˈsɛɛn˗ ˗nu ˈdhö, ˈa n ˗zota ꞊dhɛ ˈnën ˈsɛɛn˗ ˗nu ˈdhö, ˈa ˈwɔn ˗yö ˈko ˈˈdhiʋ̈ ꞊dhɛ ˈnën ˈsɛɛn˗ ˗nu ˈdhö. ˈˈKɛɛ ꞊dɛɛ ˈman kë ˈkpii˗, ˈman n ꞊kwaa ˈnën ˗nu ˗bha ˈwɔn kë ˗kɔ ˗nu ˗zü. 12 ˈˈTʋ̈ŋ ˈö yö ˗a ˈgü, ˈkwaa ˗dhɛ yö ˗së ˈka. ˗Yö kë ˗sü ˈka ꞊dhɛ pë ˈö ˈkwa ˗dhɛ ˗ga ˗ni ˈgü ˗dhuaŋdhe ˈˈluulu ˈgü ˗a ˈdhö. ˈˈKɛɛ ˗a ˈˈtʋ̈ŋ ˗dho ˗wo ˈö ˈkwa ˗kpan pë ˗nu ˗bha ˈkpakpadhö. ˈˈTʋ̈ŋ ˈö yö ˗a ˈgü ˈmaan ˈwɔn ꞊gban dɔ, ˈˈkɛɛ ˗a ˈˈtʋ̈ŋ ˗dho ˗wo ˈö ˈa ˈwɔn ꞊gban dɔ ˗së ˈka ꞊dhɛ ˗kɔ ˈö ˗Zlan ˗yö n dɔ ˗a ˈka ˗së ˈka bhë ˗a ˈdhö. 13 ˈWɔn ˗nu ˈwo bhë ˗an ꞊gban ˈgü, pë ˗yaaga ˈwo ˗dho ˈto ˈyö ˈwo ꞊nɛn: ˗zo ˗yö ˗Zlan ˗dhɛ ˗sü, ˗zo ˗yö ˗dhɛkpaɔyi dhiʋ̈ˈˈ ˗së ˗dhɛ ˗sü waa ˗dhɔ. ˈˈKɛɛ pë ˗yaaga ˈwo bhë, ˗a ˈdhɛ ˈö˗ ˗wɔn ˈdhö ˈˈgbɩɩ˗ ꞊dedewo ˈyö ˗tɔ ˗dhɔ.