-Wo ˗nu ˗wo ˗bɛnzë ˗sü ˈka ˈkɔ ˈˈbhaŋ ˗bha

ˈDhɛ ˈˈtʋ̈ŋ ˗yö ˗ʒiö ˈyö Bɛlöshaza ˗yö ˗kë ˗gblüdë ˈka Babidhɔnö. Gbeŋ do ˈka, ˗yö mɛn ꞊bhlëësü ˗nu ˈwo ꞊mɔɔn mɛn ˈˈgblü ˗bha, ˈö ˈwo ˈˈsɛ bhë˗ ˈgü ˗an ˗dhɛ ˈwlaan˗ do ˗ta. ˗Ya ˗pö ö ˗bha yökëmɛn ˗nu ˗dhɛ ˗wo nu ˈˈsënŋ ˗kɔɔ ˗nu ˈö Nabukodonozɔ ˗yö ˗an sü ˗Zlan ˗dhɔkëgükɔ ˈgü ˗an ˈka. Bɛlöshaza waa ö ˗bha ˗dhɛŋ ˗nu ˗wo ˈˈyi ˗mü ˗kɔɔ ˗nu bhë ˗an ˈgü ˈö ˈwo wo ˗bha ꞊geebɔ ˗nu ˈtɔ bhɔ. ˈWo dho ˈˈkan wo ˗ta, kö mɛn ˗kɔdhɛ do ˗ya ˗wo, ˗yö ˗wo ˈbha ˗bɛnzë ˗ni ˈgü ˈkɔ ˈwo kun ˗a ˈgü bhë, ˗a ˈˈbhaŋ ˗bha.

ˈˈSuʋ̈ ꞊dede ˗yö ˗da Bɛlöshaza ˈgü. ˈYö ö ˗bha ˗dhidhakëmɛn ˗nu ˗dhɛ ˈö˗ pö: ‹Mɛn ˈö ˗dho ꞊mɔɔn ˗wo ˈö bhë ˗a ˈgü ˈˈpʋ ˗sü ˗bha, a ˗dho ˗a kë mɛn ˈkpii˗ ˗yaaga ˗naan ˈka Babidhɔnö.› ˗Wa ˈgü ˈˈpʋ ˗sü ˈgüdan, ˈˈkɛɛ ˈwii ꞊mɔɔn˗ ˗bha. ˗Gblüdhe ˗yö ˗nu ˈö˗ pö: ‹Mɛn ˈbha ˗yö ˗dhö ˈwo˗ ˗dhɛ Daniɛdhö. ˗Yö ˗kun ˈwɔn ˗nu ˈgü ˈˈpʋ ˗ni ˈgü ꞊shiöŋ Nabukodonozɔ ˗dhɛ. ˗Yö ꞊mɔɔn˗ ˗bha ˈö ˗wo ˗nu bhë, ˗an ˈklɔɔ˗ pö ü ˗dhɛ.›

Daniɛdhö ˗yö ˗nu ˗gblüdë ˗kuu ˈˈdhiʋ̈. ˈYö ˗Gblüdë ˗ya pö ˗a ˗dhɛ: ‹ˈBha ꞊mɔɔn ˗wo ˗nu ˈwo bhë ˗an ˗wopösü ˗bha, ˈbha ˗an ˈgü ˈˈpʋ, a ˗dho ü ˗gba ˈˈsënŋ ˗yöbhɔbhapë do ˈka, ˈyö ˈa ü ˗kë mɛn ˈˈgbɩɩ˗ ˗yaaga ˗naan ˈka Babidhɔnö.› ˈYö Daniɛdhö ˗ya pö: ‹ˈMaan ü ˗bha gbɔɔdhe ˗nu ˈˈpiʋ̈, ˈˈkɛɛ a ˗dho ˗wo ˗nu ˈwo bhë ˗an ˗gɛn pö ü ˗dhɛ. Ü dë Nabukodonozɔ ˗yö ö ˗de ˗sü ꞊va, ˈö Zoova ˗yö ˈlëë˗ dɔ ˗a ˗bha. ˈWɔn ˈˈpɛpɛ ˈö˗ ˈˈdhiʋ̈ ꞊slɔɔ, ü˗ ˗dɔ. Ü Zoova ꞊bhlëë ˗shiö we ˗mü ˈˈsënŋ ˗kɔɔ ˗nu ˈü ˗an sü ˗a ˗dhɔkëgükɔ ˈgü bhë, ˗an ˈgü ˗sü ˈka. ˗A ˗wɔn ˈgü ˈyö ˗Zlan ˗yö ˗wo ˗nu ˈwo yö ˗an ˗bɛn ˗zë: Mene, Mene, Tekɛlö, waa Paasinö. ˗Wo ˗nu ˈwo bhë ˗an ˗gɛn ˈnën ˈtɔ˗ Medö waa Pɛɛsö ˗mɛn ˗nu ˗wo ˗dho Babidhɔnö ˗pö ˈkun, ˈö ˈwo ü bho ˗gblüdëdhɛ ˈgü.›

Babidhɔnö ˗pö sü ˗dhɛ ˗kun ˈˈgbɩɩ˗. ˈˈKwipö ˈö bhë ˗a ˈˈkplʋʋ ˗nu ˗kun ˈˈgbɛɛ ˈö ˈˈyiga ˈdhö kun ꞊klëën ˗sü ˈka˗ ˗zü. ˈˈKɛɛ gbeŋ ˈö bhë ˗a ˈka, Mɛdö waa Pɛɛsö ˗mɛn ˗nu ˗wo ˗nu ˗gblü ˈka ˗a ˗gɔ. Pɛɛsö mi ˈö ˈwo˗ ˗dhɛ Sidhisö, ˗ya ˗kë ˈö ˈˈyi bhë ˗yö ꞊bhʋ̈ʋ̈ ˈö˗ ˗bha ˈˈsɔdha ˗nu ˗wo ˗ʒiö ˗a ꞊bhaa ˈwo ˈdho ˗a ˈˈkwɛɛ ˈˈdhiʋ̈. ˈDhɛ ˈwo ˗lo mü kö˗ ˈˈkwɛɛ ˗nu ˗wo ˈˈpʋ ˗sü ˈka. ˈˈSɔdha ˗nu ˗wo ˗sɔ mü ˈwo ˈˈkwipö ˈö bhë ˗a sü, ˈö ˈwo˗ ˗bha ˗gblüdë zë. ˈDhɛ ˗kë ˈˈdhʋ̈, ˈyö Sidhisö ˗yö ˗kë Babidhɔnö ꞊kɔɔnmɛn ˈka.

˗Kwɛ ˈö bhë ˗a ˈka, Sidhisö ˗ya ˗pö: ‹Zoova ˗ya ˗pö n ˗dhɛ ˈa˗ ˗dhɔkëgükɔ ˈö Zedhizadhɛmö bhë ˗a dɔ ˈzü. Mɛn ˗nu ˈwo˗ ˈˈpiʋ̈ kö ˗wo n ˗takun, ˗wo ꞊mɔɔn˗ ˗bha ˈwo dho mü wo ˈflëë˗ ˈgü.› Zuifö ˗nu ꞊va ˗wo wo yee ˗kë Zedhizadhɛmö kö ˗kwɛ 70 ˗ya ʒiö ˗a ˈgüshiʋ̈ ˗sü ˗ta, ꞊dhɛ ˗kɔ ˈö Zoova ˗ya pö ˗a ˈka bhë ˗a ˈdhö. Sidhisö ˗yö ˈˈsënŋ waa ˈwëë˗ ˗kɔɔ ˗nu waa ˈˈtɛɛ ꞊kwɛɛ˗ ˗nu ˈö Nabukodonozɔ ˗yö ˗an sü ˗Zlan ˗dhɔkëgükɔ ˈgü bhë, ˗an ˈˈdhiʋ̈ yee ˗kë. ˗Kɔ ˈö Zoova ˗yö bɔ ˗a ˈka Sidhisö ˗ta ˈö ö ˗bha ˈˈsɛgümɛn ˗nu ˗takun, ü˗ ˗yö ˗ee?