Edhizabɛtö ˗yö ˈnën do ˗kpɔ

ˈDhɛ Zedhizadhɛmö ˈˈkplʋʋ ˗nu ˗wo dɔ, ˗a ˗kwɛ ˗ya kë 400. ˈˈSaabhomɛn do ˈbha ˈwo˗ ˗dhɛ Zakadhi waa˗ ˗bha dhebɔ Edhizabɛtö ˗wo ˗kun Zedhizadhɛmö ˗dhɛ ˈˈsɔɔ. ˗Wo wo ˈko ˗sü ˈö˗ yi ˗yö ꞊gwëë, ˈˈkɛɛ ˈnën ˈyaa kun ˗an ˗gɔ. Yi do ˈka kö Zakadhi ˗yö ansansö ˈˈgʋ̈ ˗ni ˈgü ˗Zlan ˗dhɔkëgükɔ ˈgü, ˈyö ˗Zlan ˗bha ˈˈkiö Gabliɛ ˗yö ö ˗de ˗zɔn ˗a ˗dhɛ. ˈˈSuʋ̈ ˗ziisü ˗yö ˗da Zakadhi ˈgü, ˈˈkɛɛ Gabliɛ ˗ya ˗pö ˗a ˗dhɛ: ‹ˈˈSuʋ̈ ˈyaa dho ü kë. Nɔɔn˗ ˗së ˈö go Zoova ˈˈpiʋ̈ ꞊nën ˈa nu ˗a dɔ ü ˗gɔ. Ü ˗bha dhebɔ Edhizabɛtö ˗dho ˈnëngɔɔn˗ do ˈkpɔ. ˈTɔ ˈka dho ˗a ˗ya ˗a ˗bha ˈyö ˈtɔ˗ Zan. Zoova ˗ya ö ˗kɔ ˈˈyɛ ˗a ˗bha kö ˗yö yö ˈbha ˈö ö ˗de ˗ta, ˗a kë›. ˈYö Zakadhi ˗ya dhɛɛˈˈ ˈkpɔ ˈö˗ pö: ‹˗Mën ˈö˗ ˗zɔn ꞊dhɛ ˈwɔn ˈü˗ pö bhë gagade ˗mü? Yaa n ˗man dhebɔ ˈya kë zii ˈsaadhö ˈnën ˈkpɔ ˗sü ˗bha.› ˈYö Gabliɛ ˗ya pö: ‹˗Zlan ꞊nën ˈö n bɔ kö ˈa nɔɔn˗ ˈö yö, ˗a dɔ ü ˗gɔ. ˈˈKɛɛ ˈdhɛ ˗kë ꞊dhɛ ˈbhii˗ ˈsü gagade ˈka bhë, ü dho ˗kë ˈˈbhʋbhʋ ˈka ˈö dho ˈö yö˗ ˈka ˈnën bhë˗ bhɔ ˗yi ˗bha.

Zakadhi ˗yö ˗gwëë ꞊dedewo ˗Zlan ˗dhɔkëgükɔ ˈgü yi ˈö bhë ˗a ˈka. ˈDhɛ ˈö yö ˈˈkpɛnŋ, mɛn ˗nu ˈwo kun ˈˈɲan ˈto ˗ni ˈgü ˗a ˗gɔ, ˗wo ˗kun ˗a ˈˈpiʋ̈ kö ˈwɔn ˈö ˗kë ˈmü ˈwo˗ dɔ. ˈˈKɛɛ Zakadhi ˈyii ꞊mɔɔn ˈwɔn blɛɛˈˈ ˗sü ˗bha. ˗Yö ˈwɔn ˗blɛɛ ˗an ˗dhɛ ö ˗kɔ ˈgü. ˈDhɛ ˗kë ˈˈdhʋ̈, ˈˈsɛgümɛn ˗nu ˈwo to mü ˈwo˗ ˈwɔn dɔ ꞊dhɛ ˗Zlan ˗ya nɔɔn˗ ˈbha dɔ ˗a ˗gɔ.

ˈDhɛ ˈˈtʋ̈ŋ ˗yö ˗ʒiö, Edhizabɛtö ˗yö ˈgwü ˗sü ˈö ˈnëngɔɔn˗ do kpɔ ꞊dhɛ ˗kɔ ˈö ˗Zlan ˗bha ˈˈkiö ˗ya pö˗ ˈka bhë ˗a ˈdhö. ˈDhɛ ˗kë ˈˈdhʋ̈ ˗a ˈˈtɛɛbɔ ˗nu waa˗ ˗bha ˈkɔdhigümɛn ˗nu ˗wo ˗nu ˈwo ˈnën ˈö bhë ˗a ˗ga. ˗An zuʋ̈ˈˈ ˈˈgblü ˗yö dhi Edhizabɛtö ˗bha ˈka. ˈYö Edhizabɛtö ˗ya pö: ‹˗Wo ˗dho ˗a ˗dhɛ Zan›. ˈYö ˈwo˗ pö: ‹ˈWaa mɛn ˈbha ˗dhɛ Zan ka ˗bha ˈkɔdhi ˈgü. ˗Kaa dë ˈtɔ Zakadhi ˗ya ˗a ˗bha.› ˈˈKɛɛ ˈyö Zakadhi ˗yö ˗wo ˈö yö ˗a ˗bɛnzë: ‹˗Wa ˗dhɛ Zan.› -Yö ˗to mü ˈö ˗ya ˈwɔn blɛɛˈˈ ˗sü ˗bha ˗dɛɛwo. ˈNën ˈö bhë ˗wa ˗wɔn ˗blɛɛ Zude ˗dhɛ ꞊gban ˈgü, ˈwo˗ pö: ‹ˈNën ˈö yö, ˗yö ˗dho kë de ˈö˗ ˈka?›

ˈDhɛˈ ö ˗kë ˈˈdhʋ̈, ˈyö ˗zuu ˈˈslʋ̈ʋ̈slʋ̈ ˗yö nu Zakadhi ˗ta ˈö ˗ya ˈwɔn blɛɛˈˈ ˗sü ˗bha ˈö˗ pö: ‹Zoova ˈtɔ ˗yö bhɔ. ˗Ya ˈˈplüünŋ ˗bho Ablaamö ˗dhɛ ˈö˗ pö ꞊dhɛ ö dho Mesi bɔ kö ˗yö kwa dha. Zan ˗dho kë ˗Zlan ˗wodhiʋ̈lomɛn ˈka, ˈö Mesi ˗bha ʒiaan ꞊baa.›

ˈWɔn ˗së ˈbha ˗yö ˗kë Madhi ˈö ˗kë Edhizabɛtö ˗bha ˈkɔdhigümɛn do ˈka bhë, ˗a ˗dhɛ. ˈWɔn ˈö ˗kë ˗a ˗dhɛ, kwa ˗dho ˗a yö ˈwɔn ˗gɔ ˈdhɛ ˈö dɔ ˗a ˗dhɛ ˈö yö ˗a ˈˈpiʋ̈, ˗a ˈgü.